No Kasanodakay a Pagserbian Dagiti Kristiano a Papastor

ITI adu a lugar posible a paliiwen no kasano nga asikasuen dagiti papastor ti maysa nga arban. Idalan, salakniban, ken ipaayanda dagiti karnero. Makapainteres daytoy kadagiti Kristiano a panglakayen, tangay mairaman iti trabahoda ti panangipastor. Kinapudnona, rebbengenda nga ‘ipastoran ti kongregasion ti Dios’ ken ‘asikasuen ti isuamin nga arban.’​—Aramid 20:28.

No kamengkay iti kongregasion Kristiano, kasanodakay a pagserbian dagiti naespirituan a papastor? Ken kasanokayo nga agtignay iti panagreggetda maipaay kadakayo? Apay a kasapulan ti kongregasion ti tulongda?

Salaknib Maibusor iti Ania?

Idi un-unana, agpeggad dagiti arban gapu kadagiti leon ken dadduma pay a narungsot nga animal ken anupenda dagiti indibidual a karnero. Masapul a mangsalaknib dagiti papastor. (1 Samuel 17:34, 35) Bueno, “agsursursor [ni Satanas a Diablo] a kasla maysa a leon a ngumerngernger, nga agsapsapul ti alun-onenna.” (1 Pedro 5:8) Sidadangkes a makigubgubat saan laeng a maibusor iti naindagaan nga organisasion ni Jehova iti pakabuklan no di pay met maibusor iti tunggal indibidual nga adipen ti Dios. Aniat’ panggep ni Satanas? Kayatna nga upayen dagiti tattao ni Jehova ken lapdanna pay ket ida manipud ‘panagtungpal kadagiti bilin ti Dios’ ken panangibanag iti “trabaho a panangsaksi ken Jesus.”​—Apocalipsis 12:17.

Inakusar ni Jehova dagiti agtuturay a papastor ti nagkauna nga Israel iti kinaliway gapu ta dagiti karnerona nagbalin a “taraon dagiti amin a narurungsot nga animal iti away.” (Ezequiel 34:8) Nupay kasta, adda napasnek a tarigagay dagiti Kristiano a panglakayen a mangsalaknib kadagidiay adda iti kongregasion tapno awan ti mapukaw a bunga ti kinaliway wenno gapu iti impluensia ni Satanas, ti lubong, wenno dagiti apostata a “lobo.” (Aramid 20:29, 30) Kasano a matulongan dagiti papastor ti amin a kameng ti arban nga agtalinaed a naalibtak ken managbantay? Ti maysa a pamay-an isut’ panangipaay iti nasayaat pannakaisaganana a Nainkasuratan a palawag iti plataporma ti Kingdom Hall. Ti maysa pay isut’ positibo, makaparegta a pannakisarita sakbay ken kalpasan dagiti gimong. Kaskasdi a maysa pay nga epektibo a pamay-an isut’ personal nga isasarungkar kadagiti “karnero” iti pagtaengan. (Idiligyo ti Salmo 95:7.) Ngem ania aya ti panangipastor nga isasarungkar? Kasano a rumbeng a maaramid ti kasta nga isasarungkar? Ken asino ti masarungkaran?

Ania ti Panangipastor nga Isasarungkar?

Ti panangipastor nga isasarungkar saan laeng a maysa a sosial nga isasarungkar buyogen ti panagsasarita maipapan kadagiti awan serserbina. Napaliiw ti maysa a panglakayen: “Kaaduan kadagiti agibumbunannag ti naan-anay a maragsakan iti panangbasa iti kasuratan wenno panangsalaysay iti maysa a partikular a karakter iti Biblia. Siempre, saan a bukbukodan ti panglakayen ti agsao. Kadawyan a maragsakan ti masarungkaran nga agibumbunannag iti Pagarian a mangyebkas kadagiti kapanunotanna iti Biblia, ket mangpapigsa iti pammatina ti panangaramid iti daytoy. Mabalin a mangitugot ti panglakayen iti magasin a Pagwanawanan wenno Agriingkayo! tapno salaysayenna ti maysa a makapabileg nga artikulo. Nalabit a daytoy a naespirituan a panangsalaysay ti mangiduma iti panangipastor nga isasarungkar manipud iti sosial nga isasarungkar.”

Nagkomento ti maysa pay nga addaan kapadasan a panglakayen: “Sakbay ti isasarungkar, mangbusbos ti panglakayen iti sumagmamano a panawen a mangpampanunot maipapan iti agibumbunannag a sarungkaranna. Ania ngatat’ mangpabileg iti agibumbunannag? Ti napasnek a komendasion maysa a napateg a paset dagiti panangipastor nga isasarungkar, ta pabilgenna ti maysa a tao nga agibtur.” Wen, ti panangipastor nga isasarungkar saan a basta nainggayyeman nga isasarungkar a maaramidan ti asinoman iti kongregasion.

Apay a Sarungkarannakay ti Pastor?

No sumarungkar ti panglakayen iti maysa a pagtaengan, nakasagana a mangparegta kadagiti kapammatian ken tumulong kadakuada a tumibker iti pammati. (Roma 1:11) Gapuna no tarigagayan ti maysa wenno dua a panglakayen ti sumarungkar kadakayo, kasanot’ panagtignayyo? Kinuna ti maysa nga agdaldaliasat a manangaywan: “No maaramid laeng ti panangipastor nga isasarungkar no adda parikut, ti umuna a reaksion iti panggep nga isasarungkar mabalin nga, ‘Aniat’ naaramidak a biddut?’” Tuladen dagiti naayat a naespirituan a papastor ni Jehova, a nangaywan iti salmista ken kanayon a ‘nangpabaro iti kararuana,’ nangruna kadagiti panawen ti rigat ken naisangsangayan a panagkasapulan.​—Salmo 23:1-4.

Ti panggep ti panangipastor isut’ ‘panangpabileg, saan a tapno mangrakrak.’ (2 Corinto 13:10) Pudno a mangparegta ti sasao nga addaan panangapresiar iti panagibtur, regta, ken ti matalek a panagaramid ti maysa a nasarungkaran. Napaliiw ti maysa a panglakayen: “Iti panangipastor nga isasarungkar, saan a nasayaat nga ipasimudaag a simmarungkar ti maysa gapu ta panggepna a takuaten ken pagsaritaan dagiti parikut. Siempre, nalabit a kayat ti agibumbunannag a mismo a pagsaritaanda ti maipapan iti sumagmamano a partikular a parikut. Ket no ti maysa a karnero agkapuy wenno isinsinana ti bagina manipud iti dadduma iti arban, masapul nga agtignay dagiti panglakayen tapno tumulong.”

Awan duadua a mangaramid dagiti Kristiano a papastor iti naisangsangayan a panangaywan iti asinoman a kas kadagidiay nailadawan kadagitoy a sasao: “Siak [ni Jehova] sapulekto daydiay napukaw, ket iyawidkonto daydiay napapanaw, ket bedbedakto daydiay nabungtol, ket papigsaekto daydiay masakit.” (Ezequiel 34:16) Wen, mabalin a kasapulan ti panangbirok kadagiti karnero, maisubli, mabedbedan, wenno mapapigsa. Naliwayan dagiti papastor iti Israel dagitoy a rebbengen. Ti panangaramid iti kasta a trabaho kalikagumanna nga asitgan ti pastor ti maysa a karnero ket ipaay dagiti kasapulanna. Kangrunaanna, rumbeng a daytoy ti pakabigbigan iti tunggal panagipastor nga isasarungkar ita.

Masapul Dagiti Nasalun-at a Karnero ti Panangaywan

Rumbeng kadi nga ipapantayo a saan a masapul a maseknan dagiti agdama-aldaw a naespirituan a papastor kadagiti nasalun-at a karnero? Bueno, no maipasubo ti maysa a literal a karnero, nalaklaka a matulongan no adda talekna iti pastor. Kuna ti maysa a libro a “dagiti karnero nainkasigudan a naatapda kadagiti tattao, ket saan a kanayon a nalaka ti mangpaamo kadakuada.” Malaksid iti sabsabali pay a banag, isingasing ti isu met laeng a libro daytoy kangrunaan a pagalagadan tapno magun-od ti talek dagiti karnero: “Regular a makisaritakayo kadagiti animal. Mairuamda iti boses, a mangpatalged kadakuada. Masansan a sarungkaranyo dagiti karnero iti pagpastoran.”​—Alles für das Schaf. Handbuch für die artgerechte Haltung (Amin a Banag Agpaay Kadagiti Karnero. Libro maipapan iti No Kasano a Siuumiso a Maaywananda).

No kasta napateg ti personal a pannakilangen no tarigagayan a patauden ti addaan panagtalek a relasion iti pastor ken kadagiti karnero. Pudno met daytoy iti kongregasion Kristiano. Kinuna ti maysa a panglakayen: “No pagaammo iti kongregasion kas maysa a panglakayen a regular a sumarsarungkar kadagiti karnero pagbalinenna a nalaklaka ti isasarungkar iti daydiay addaan kadagiti parikut.” Gapuna, dagiti naespirituan a papastor saan laeng a rumbeng nga agpakan ken mangaywan kadagiti karnero idiay Kingdom Hall. Bayat nga ipalubos ti kasasaad, rumbeng a maam-ammo ti papanglakayen dagiti karnero babaen ti panagipastor nga isasarungkar kadagiti pagtaenganda. Malagip ti maysa a Kristiano nga idi kabbaro pay a nadutokan a panglakayen, nagtelepono ti mamangulo a manangaywan ket indawatna kenkuana a sumarungkar ken liwliwaenna ti maysa a kabsat a nabiit pay a natay ti anakna a babai iti maysa a nakaam-ames nga aksidente iti lugan. Aminen ti panglakayen: “Anian a ladingitko, tangay pulos a diak pay nasarungkaran ti kabsat ken diak pay ket ammo no sadinot’ pagnaedanna! Nabang-aranak idi intukon ti maysa a nataengan a panglakayen a kumadua kaniak.” Wen, agtitinnulong dagiti panglakayen kadagiti panangipastor nga isasarungkar.

Iti panagsagana ken panagaramid iti sumagmamano a panangipastor nga isasarungkar, mabalin a kumuyog iti panglakayen ti maysa a ministerial nga adipen a mangikagkagumaan a mangragpat iti “nasayaat nga aramid” ti maysa a manangaywan. (1 Timoteo 3:1, 13) Anian a panangipateg unay ti ministerial nga adipen a makita no kasano a pagserbian ti maysa a panglakayen dagiti karnero kadagiti panangipastor nga isasarungkar! Dagiti panglakayen ken ministerial nga adipen no kasta agbalinda a nadekdekket iti amin iti kongregasion, a mangpatibker kadagiti singgalut ti Nakristianuan nga ayat ken panagkaykaysa.​—Colosas 3:14.

Panagplano iti Panawen Maipaay iti Panangipastor nga Isasarungkar

Idi imparebbeng ti maysa a bagi ti papanglakayen ti panangipastor nga isasarungkar kadagiti mangidadaulo iti Panagadal iti Libro ti Kongregasion, nasarungkaran amin nga agibumbunannag iti sumagmamano a grupo iti las-ud ti innem a bulan, idinto ta awan ti nasarungkaran iti sabali a grupo. Daytoy ti nangtignay iti maysa a panglakayen nga agkuna: “Agparang a dadduma a panglakayen ti mangyun-una ken adut’ maaramidanda iti panangipastor a trabaho, ngem dadduma ti makasapul iti pammaregta dagiti padada a panglakayen tapno maaramid ti kasta.” Gapuna mangyurnos ti sumagmamano a bagi ti panglakayen tapno masarungkaran dagiti papastor ti amin nga agibumbunannag iti las-ud ti naikeddeng a periodo ti panawen.

Siempre, mabalin a sumarungkar ti maysa a panglakayen wenno ti asinoman a sabali nga agibumbunannag iti maysa a kameng ti kongregasion uray awan dagiti naisangsangayan nga urnos a maaramid. Sakbay a mangaramid iti panangipastor nga isasarungkar, agtelepono ti maysa a panglakayen ket kunaenna, “Kada bulan a sumarungkarak iti maysa a pamilia. Mabalin kadi a sumarungkarak kadakayo iti maysa nga oras wenno nalablabes iti sumaganad a bulan? Kaano ngata a mabalinkayo?”

Dagiti Bendision iti Panangipastor nga Isasarungkar

Bayat nga umad-adu dagiti parikut iti daytoy dakes a sistema, agbalin a makagunggona pay dagiti makaparegta nga isasarungkar dagiti mannakaawat a papastor. No maparegta ken matulongan amin nga adda iti arban babaen kadagiti panangipastor nga isasarungkar, marikna ti tunggal karnero ti talged ken kinatalináay.

Maipanggep iti kongregasion a sadiay regular a sarsarungkaran dagiti papastor ti amin nga agibumbunannag ti Pagarian, naipadamag: “Nagbalin dagiti agibumbunannag a positibo unay maipapan kadagiti panangipastor nga isasarungkar. Kadawyanen iti maysa nga agibumbunannag nga umasideg iti maysa kadagiti panglakayen tapno saludsodenna no kaano manen a sumarungkar, tangay tinagiragsak ti agibumbunannag ti makapabileg a pannakisarita idi napalabas nga isasarungkar. Maysa a banag a timmulong ti panangipastor nga isasarungkar tapno maparang-ay ti espiritu ti kongregasion.” Ipasimudaag ti dadduma pay a report a no siaayat nga agserbi dagiti papastor iti kasta a pamay-an, dumakkel ti kongregasion iti ayat, panagkaykaysa, ken kinabara. Anian a bendision!

Sumarungkar dagiti Kristiano a papastor tapno pasayaatenda ti naespirituan a salun-at dagiti karnero. Kayat dagiti panglakayen a paregtaen ken papigsaen dagiti kapammatianda. No rumbeng a maipalgak ti maysa a nadagsen a parikut nga agkasapulan iti pammalakad kabayatan ti isasarungkar, mabalin a kasayaatan no mangyurnos iti sabali a panawen para iti pannakisarita, nangnangruna no kadua ti panglakayen ti maysa a ministerial nga adipen. Aniaman ti mapasamak, mayanatup ti kararag iti ngudo ti panangipastor nga isasarungkar.

Kayat kadi ti maysa a naespirituan a pastor ti sumarungkar iti pagtaenganyo iti asideg a masanguanan? No kasta, siraragsakkayo a mangnamnama iti pammaregta nga agur-uray kadakayo. Sumarungkar tapno pagserbian ken papigsaennakayo iti pangngeddengyo nga agtalinaed iti dana nga agturong iti biag nga agnanayon.​—Mateo 7:13, 14.

[Kahon iti panid 26]

Dagiti Singasing Agpaay Kadagiti Panangipastor nga Isasarungkar

◻ Makitulag a nasaksakbay: Kadawyan a nasayaat ti makitulag a nasaksakbay. No panggep ti panglakayen a tamingen ti nadagsen a parikut, mayanatup a nasaksakbay a pakaammuan ti agibumbunannag maipapan iti daytoy.

◻ Panagsagana: Utobenyo ti personalidad ken kasasaad ti tao. Mangipaay iti naimpusuan a komendasion. Aramidenyo a kalat ti mangipaay iti makaparegta, makapabileg-pammati a “naespirituan a sagut.”​—Roma 1:11, 12.

◻ No asino ti ikuyog: Maysa pay a panglakayen wenno maysa a kualipikado a ministerial nga adipen.

◻ Kabayatan ti isasarungkar: Rumbeng a natanang, naayat, positibo, ken mannakibagay ti panglakayen. Agsaludsod maipapan iti pamilia, ti kasasaadna, ken dadduma pay. Dumngeg a naimbag. No maipalgak dagiti nadagsen a parikut, mabalin a kasayaatan no mangyurnos iti maysa a naisangsangayan panangipastor nga isasarungkar.

◻ Kapaut ti isasarungkar: Agtalinaed iti nagtulagan a panawen, ken pumanawkayo bayat a tagtagiragsaken pay ti binisita ti isasarungkaryo.

◻ Panangserra iti isasarungkar: Mayanatup ken pudpudno a maipateg ti maysa a kararag.​—Filipos 4:6, 7.

[Ladawan iti panid 24]

Mangipaay dagiti Kristiano a papastor iti naespirituan a salaknib

[Dagiti ladawan iti panid 26]

Mangipaay ti panangipastor nga isasarungkar kadagiti nasasayaat a gundaway agpaay iti naespirituan a pammaregta