Agtalinaedkayo a Silalagip Unay iti Aldaw ni Jehova
“Kadagiti maudi nga al-aldaw umaydanto dagiti managuy-uyaw.”—2 PEDRO 3:3.
1. Ania a kinaganat ti narikna ti maysa a Kristiano iti moderno a panawen?
INSURAT ti maysa nga amin-tiempo a ministro iti nasurok nga 66 a tawen: “Kanayonak a makarikna iti kinaganat. Kanayonko a pampanunoten nga umay ti Armagedon inton kanikaduana. (Apocalipsis 16:14, 16) Kas ken amak, ken ni apongko a lakay, agbibiagak a mayannurot iti indagadag ni apostol [Pedro], ‘agtalinaedkayo a silalagip unay iti kaadda ti aldaw ni Jehova.’ Kanayon a matmatmatak ti naikari a baro a lubong kas ‘agpayso nupay saan a makita.’”—2 Pedro 3:11, 12; Hebreo 11:1; Isaias 11:6-9; Apocalipsis 21:3, 4.
2. Ania ti kayat a sawen ti panagtalinaed a silalagip unay iti aldaw ni Jehova?
2 Ti sasao ni Pedro nga ‘agtalinaedkayo a silalagip unay’ iti aldaw ni Jehova kaipapananna a ditay iwaksi dayta iti panunottayo. Ditay koma liplipatan a nakaas-asidegen ti aldaw a panangdadael ni Jehova iti daytoy a sistema ti bambanag a mangiwaya iti pannakaipasdek ti baro a lubong nga inkarina. Rebbengna a napaypayso dayta kadatayo a kasla adda laeng iti sanguanantayo a nalawag a makita. Kasta ti kinaagpaysona kadagiti propeta ti Dios idi ugma, ket sangkasaoda idi nga asidegen dayta.—Isaias 13:6; Joel 1:15; 2:1; Abdias 15; Sofonias 1:7, 14.
3. Ania ti nabatad a nangtignay ken Pedro a mangbalakad maipanggep iti aldaw ni Jehova?
3 Apay nga indagadag kadatayo ni Pedro a panunotentayo a ti aldaw ni Jehova mabalin a dumteng, no ar-arigen, “inton kanikaduana”? Agsipud ta agparang nga adda dagidiay manguy-uyawen iti ideya maipapan iti naikari a kaadda ni Kristo a pakadusaan dagiti agar-aramid iti dakes. (2 Pedro 3:3, 4) Isu nga iti kapitulo 3 ti maikadua a suratna, nga usigentay ita, sungbatan ni Pedro ti ibagbaga dagitoy a managuyaw.
Nabara a Pammalagip
4. Ania ti kayat ni Pedro a laglagipentayo?
4 Maanninaw ti panangipateg ni Pedro kadagiti kakabsatna iti maulit-ulit a panangawagna kadakuada iti daytoy a kapitulo kas “dungdunguen.” Babaen ti sibabara a panangikalikagumna a saanda a liplipatan ti nasursuroda, inrugi ni Pedro: “Dungdunguen, . . . parayrayek dagiti nasin-aw a pannakabalinyo nga agpanunot babaen iti pammalagip, tapno malagipyo koma dagiti sasao a napalabasen nga insawang dagiti nasantuan a mammadto ken ti bilin ti Apo ken Manangisalakan babaen kadagiti apostolyo.”—2 Pedro 3:1, 2, 8, 14, 17; Judas 17.
5. Ania ti kinuna ti sumagmamano a propeta maipapan iti aldaw ni Jehova?
5 Ania a “sasao a napalabasen nga insawang dagiti nasantuan a mammadto” ti indagadag ni Pedro a laglagipen dagiti agbasa? Dagidiay maipapan iti kaadda ni Kristo iti turay ti Pagarian ken ti pannakaukom dagiti nadangkes. Nadakamaten ni Pedro dagitoy a sasao. (2 Pedro 1:16-19; 2:3-10) Tinukoy ni Judas ni Enoc, ti umuna a nailanad a propeta a namakdaar maipapan iti nakaam-amak a panangukom ti Dios kadagiti managdakdakes. (Judas 14, 15) Simmaruno ken Enoc dagiti dadduma a propeta, ket di kayat ni Pedro a lipatentayo ti insuratda.—Isaias 66:15, 16; Sofonias 1:15-18; Zacarias 14:6-9.
6. Ania a sasao ni Kristo ken dagiti apostol ti manglawlawag kadatayo maipapan iti aldaw ni Jehova?
6 Mainayon pay, kinuna ni Pedro kadagiti agbasa a laglagipenda “ti bilin ti Apo ken Manangisalakan.” Karaman iti bilin ni Jesus daytoy a pammalagip: “Asikasuenyo ti bagbagiyo tapno dagiti pusoyo dida pulos madagsenan . . . ket giddato a dayta nga aldaw kellaat nga umay kadakayo a kas maysa a silo.” “Agtultuloykayo a kumitkita, agtultuloykayo a siririing, ta dikay ammo no kaano ti naituding a tiempo.” (Lucas 21:34-36; Marcos 13:33) Indagadag met ni Pedro nga ipangagtayo ti sasao dagiti apostol. Kas pagarigan, insurat ni apostol Pablo: “Ti aldaw ni Jehova umay nga apagpag-isu a kas maysa a mannanakaw iti rabii. No kasta, ngarud, ditay koma maturog a kas iti ar-aramiden dagiti dadduma, no di ket agtalinaedtayo koma a siririing ket sipupuottayo.”—1 Tesalonica 5:2, 6.
Ti Tarigagay Dagiti Managuyaw
7, 8. (a) Ania a kita ti tattao dagidiay manguy-uyaw iti pammakdaar a mensahe ti Dios? (b) Ania ti ibagbaga dagiti managuyaw?
7 Kas nadakamaten, ti makagapu a namagbaga ni Pedro ket adda dagiti manguy-uyaw iti kakasta a pakdaar, kas ti panangrabrabak dagiti Israelita idi un-unana kadagiti mammadto ni Jehova. (2 Cronicas 36:16) Inlawlawag ni Pedro: “Umuna nga ammuenyo daytoy, a kadagiti maudi nga al-aldaw umaydanto dagiti managuy-uyaw agraman ti panguy-uyawda, nga agtultuloyda maitunos iti bukodda a tartarigagay.” (2 Pedro 3:3) Kinuna ni Judas a tarigagayan dagitoy a managuyaw dagiti “di nadiosan a bambanag.” Inawaganna ida iti “inaanimal a tattao, nga awanan kina-naespirituan.”—Judas 17-19.
8 Dagiti ulbod a mannursuro a kinuna ni Pedro a “sumursurot iti lasag buyogen ti tarigagay a tulawan dayta” ket mabalin a karaman kadagitoy a managuyaw nga awanan espiritualidad. (2 Pedro 2:1, 10, 14) Pagang-angawanda dagiti matalek a Kristiano, a kunkunada: “Sadino ti yan daytoy naikari a kaaddana? Ay ket, nanipud iti aldaw a dagiti ammami naturogda ken patay, amin a bambanag nagtultuloyda a kasta met laeng nanipud idi panangrugi ti sangaparsuaan.”—2 Pedro 3:4.
9. (a) Apay nga ikagkagumaan dagiti managuyaw nga ep-epen ti kinaganat a maanninaw iti Sao ti Dios? (b) Kasano a ti panagtalinaed a silalagip unay iti aldaw ni Jehova maysa a salaknib kadatayo?
9 Apay nga aguyawda? Apay nga iparipiripda a dinto mapasamak uray kaano ti kaadda ni Kristo, a di pulos nakibiang ti Dios kadagiti aramid ti tao ken dinto pulos makibiang? Bueno, babaen ti panangep-epda iti kinaganat a maanninaw iti Sao ti Dios, kayat dagitoy nga inaanimal a managuyaw nga ilibay dagiti sabsabali iti naespirituan a kinaaleng-aleng tapno nalakada ida a sulbogen. Anian a nabileg a pammaregta kadatayo ita nga agtalinaed a siririing iti naespirituan! Sapay koma ta sipapanunottayo nga asidegen ti aldaw ni Jehova ken kanayon a laglagipentayo nga isu ket siiimatang kadatayo! Iti kasta matignaytayo nga agserbi a sireregta ken Jehova ken mataginayontayo ti kinadalustayo iti moral.—Salmo 11:4; Isaias 29:15; Ezequiel 8:12; 12:27; Sofonias 1:12.
Sipapakinakem ken Makarimon
10. Kasano a pinaneknekan ni Pedro a nagbiddut dagiti managuyaw?
10 Di ikankano ti kakasta a managuyaw ti napateg a kinapudno. Igagarada a di ikankano dayta ket padasenda a durogan dagiti sabsabali a manglipat iti dayta. Apay? Tapno nalaklakada a sulbogen dagiti tattao. “Ta, maitunos iti kayatda,” insurat ni Pedro, “daytoy a kinapudno makaliklik iti panangammoda.” Ania a kinapudno? “Nga adda idi langlangit nanipud idi ugma ken maysa a daga nga agtaktakder a sititibker manipud iti danum ken iti tengnga ti danum babaen ti sao ti Dios; ket babaen kadagidiay a pamay-an nadadael ti lubong iti daydi a tiempo idi nalayus iti danum.” (2 Pedro 3:5, 6) Wen, inikkat ni Jehova ti kinadakes ditoy daga babaen ti Layus idi kaaldawan ni Noe, maysa a kinapudno nga impaganetget met ni Jesus. (Mateo 24:37-39; Lucas 17:26, 27; 2 Pedro 2:5) Isu a maisupadi iti ibagbaga dagiti managuyaw, saan a nagtultuloy amin a bambanag a “kasta met laeng nanipud idi panangrugi ti sangaparsuaan.”
11. Ania dagiti nasapa a sinegseggaan dagiti nagkauna a Kristiano a nanguyawan kadakuada dagiti dadduma?
11 Mabalin a rinabrabak dagiti managuyaw dagiti matalek a Kristiano agsipud ta addada banag a ninamnama dagitoy a di pay idi natungpal. Sakbay la unay ti ipapatay ni Jesus, dagiti adalanna “ipagpagarupda nga agparangto a giddato ti pagarian ti Dios.” Sa kalpasan ti panagungarna, dinamagda no maipasdek nga insigida ti Pagarian. Kasta met, agarup sangapulo a tawen sakbay a pinutar ni Pedro ti maikadua a suratna, adda dagiti “madanagan” iti “naisao a mensahe” wenno “surat,” a kunkunada a naggapu ken apostol Pablo wenno kadagiti kakaduana, “a kasla ti aldaw ni Jehova ket dimtengen.” (Lucas 19:11; 2 Tesalonica 2:2; Aramid 1:6) Nupay kasta, saan nga ubbaw ti kakasta a namnama dagiti adalan ni Jesus, no di ket nasapa laeng. Di bumurong nga umay ti aldaw ni Jehova!
Mapangnamnamaan ti Sao ti Dios
12. Kasano a napaneknekan a mapangnamnamaan dagiti padto iti Sao ti Dios maipapan iti “aldaw ni Jehova”?
12 Kas nadakamaten, masansan a namakdaar dagiti propeta sakbay ti panawen Kristiano nga asidegen ti aldaw a panagibales ni Jehova. Dimteng ti bassit a mangiladawan nga “aldaw ni Jehova” idi 607 K.K.P. idi dinusa ni Jehova ti nasukir nga ilina. (Sofonias 1:14-18) Di nagbayag, sinagaba dagiti sabsabali a nasion, a pakairamanan ti Babilonia ken Egipto, ti kasta nga “aldaw ni Jehova.” (Isaias 13:6-9; Jeremias 46:1-10; Abdias 15) Naipadto met ti panungpalan ti Judio a sistema ti bambanag idi umuna a siglo, ket napasamak dayta idi dinadael ti buyot ti Roma ti Judea idi 70 K.P. (Lucas 19:41-44; 1 Pedro 4:7) Ngem tuktukoyen ni Pedro ti masanguanan nga “aldaw ni Jehova,” a dakdakkel nga amang ngem ti sangalubongan a Layus!
13. Ania a historikal a pasamak ti mangipakita a sigurado nga umay ti panungpalan daytoy a sistema ti bambanag?
13 Dineskribir ni Pedro dayta a sumungsungad a panangdadael, a kunkunana: “Ngem babaen ti isu met laeng a sao.” Kaibagbagana laeng a “babaen ti sao ti Dios,” ti daga sakbay ti Layus ket sitatakder “iti danum ken iti tengnga ti danum.” Daytoy a kasasaad, a nadeskribir iti salaysay ti Biblia iti panamarsua, ti namagbalin a posible iti Layus idi bimmayakabak ti danum iti panangibilin, wenno sao, ti Dios. Intuloy ni Pedro: “Babaen ti isu met laeng a sao [ti Dios] naidulin ti langlangit ken ti daga nga adda ita maipaay iti apuy ket maisagsaganada iti aldaw ti panangukom ken ti pannakadadael dagiti di nadiosan a tattao.” (2 Pedro 3:5-7; Genesis 1:6-8) Ipanamnama dayta kadatayo ti sao ni Jehova! Gibusannanto “ti langlangit ken ti daga”—daytoy a sistema ti bambanag—iti naindaklan nga aldaw ti sumsumged a pungtotna! (Sofonias 3:8) Ngem kaano?
Panangsegga iti Iyaay ti Panungpalan
14. Apay a makapagtalektayo nga agbibiagtayon iti “maudi nga al-aldaw”?
14 Kayat idi dagiti adalan ni Jesus a maammuan no kaano nga umay ti panungpalan, gapuna sinaludsodda kenkuana: “Anianto ti pagilasinan ti kaaddam ken ti panungpalan ti sistema ti bambanag?” Nabatad a salsaludsodenda no kaano nga agpatingga ti Judio a sistema, ngem naipamaysa ti sungbat ni Jesus kangrunaanna no kaano a madadael ti agdama a ‘langlangit ken daga.’ Impadto ni Jesus dagiti bambanag a kas iti dadakkel a gubat, kinakirang ti taraon, ginggined, sakit, ken krimen. (Mateo 24:3-14; Lucas 21:5-36) Manipud idi tawen 1914, makitatayo a mapaspasamaken ti imbaga ni Jesus a pagilasinan ti “panungpalan ti sistema ti bambanag” kasta met dagiti banag a dinakamat ni apostol Pablo a mangtanda iti “maudi nga al-aldaw.” (2 Timoteo 3:1-5) Pudno la unay, aglaplapusanan ti ebidensia nga agbibiagtayon iti panawen ti panungpalan daytoy a sistema ti bambanag!
15. Ania ti pagduyosan idi dagiti Kristiano iti laksid ti panamagannad ni Jesus?
15 Magagaran dagiti Saksi ni Jehova a mangammo no kaano nga umay ti aldaw ni Jehova. Iti gagarda, adda dagiti tiempo a pinadasda a pattapattaen no kaano nga umay dayta. Ngem iti panangaramidda iti kasta, nalipatanda, kas kadagiti nagkauna nga adalan ni Jesus, pakdaar ti Apoda a ‘ditay ammo no kaano ti naituding a tiempo.’ (Marcos 13:32, 33) Dagiti managuyaw rinabrabakda dagiti matalek a Kristiano gapu ta saan a napasamak dagiti ninamnamada. (2 Pedro 3:3, 4) Nupay kasta, pinasingkedan ni Pedro nga umayto ti aldaw ni Jehova, iti tiempo nga inkeddengna.
Nasken a Tuladentayo ti Panangmatmat ni Jehova
16. Ania a pammalagip ti nainsiriban nga ipangagtayo?
16 Nasken a tuladentayo ti panangmatmat ni Jehova iti tiempo, kas ipalagip kadatayo ita ni Pedro: “Nupay kasta, di koma makaliklik iti panangammoyo daytoy maysa a kinapudno, dungdunguen, a ti maysa nga aldaw ken Jehova kasla sangaribo a tawen ket ti sangaribo a tawen kasla maysa nga aldaw.” No idildilig, anian a nakaab-ababa ti 70 wenno 80 a tawen a kaatiddog ti biagtayo! (2 Pedro 3:8; Salmo 90:4, 10) Ngarud, no kasla agtaktak ti pannakatungpal dagiti kari ti Dios, nasken nga ipangagtayo ti pammalagip ti propeta ti Dios: “Nupay agtaktak [ti naituding a panawen], isu urayem; ta pudno nga umayto, a dinto agbayag.”—Habacuc 2:3.
17. Nupay napapaut ti panagtalinaed ti maudi nga al-aldaw ngem ti impagarup ti adu, ania ti masiguradotayo?
17 Apay a napapaut ti panagtultuloy dagiti maudi nga al-aldaw ngem ti ninamnama ti adu? Adda naimbag a rason, kas simmaruno nga inlawlawag ni Pedro: “Saan a nabannayat ni Jehova maipapan iti karina, kas iti panangibilang dagiti dadduma a tattao a kinabannayat, no di ket an-anusannakayo agsipud ta saanna a tarigagayan a madadael ti asinoman no di ket tarigagayanna a makagteng dagiti isuamin iti panagbabawi.” (2 Pedro 3:9) Ammo ni Jehova ti kasayaatan para iti intero a sangatauan. Maseknan iti biag dagiti tattao, kas kinunana: “Awan ti ragsakko iti ipapatay ti nadangkes; no di ket ti nadangkes agbaw-ing koma iti dalanna ket agbiag.” (Ezequiel 33:11) Isu a makapagtalektayo a dumtengto ti panungpalan iti maitutop a tiempo tapno matungpal ti panggep ti masirib unay, naayat a Namarsua kadatayo!
Anianto ti Aglabas?
18, 19. (a) Apay a determinado ni Jehova a mangdadael iti daytoy a sistema ti bambanag? (b) Kasano a dineskribir ni Pedro ti panungpalan daytoy a sistema, ket anianto ti aktual a madadael?
18 Gapu ta pudno nga ay-ayaten ni Jehova dagidiay agserserbi kenkuana, ikisapnanto amin dagidiay mangrirriribuk kadakuada. (Salmo 37:9-11, 29) Iti panangdakamatna, kas iti inaramid ni Pablo kasakbayanna, nga umay daytoy a pannakadadael a kellaat, insurat ni Pedro: “Ti aldaw ni Jehova umayto a kasla mannanakaw, nga iti dayta ti langlangit aglabasdanto buyogen ti sumayetset a daranudor, ngem dagiti elemento gapu ta nakabarbarada unay marunawdanto, ket ti daga ken ti ar-aramid nga adda kenkuana matakuatanto.” (2 Pedro 3:10; 1 Tesalonica 5:2) Saan a nadadael idi Layus ti literal a langlangit ken daga, ket saandanto met a madadael iti aldaw ni Jehova. Ania ngarud ti ‘aglabas,’ wenno madadael?
19 Aggibusto dagiti gobierno ti tao a mangiturturay iti sangatauan kas “langlangit” agraman ti “daga,” wenno ti di nadiosan a kagimongan ti tao. Ti “sumayetset a daranudor” nalabit ipasimudaagna ti napardas a panaglabas ti langlangit. “Dagiti elemento” a mangbukel iti agdama a dakes a kagimongan ti tao “marunawdanto,” wenno madadael. Ket ti “daga,” agraman ti “ar-aramid nga adda kenkuana,” “matakuatanto.” Naan-anay nga ibutaktakto ni Jehova dagiti dakes nga aramid dagiti tattao inton gibusanna ti intero a sistema ti lubong a maikari unay a madadael.
Salimetmetanyo ti Namnamayo
20. Kasano a ti pannakaammotayo kadagiti mapasamak iti masanguanan apektaranna ti panagbiagtayo?
20 Tangay asidegen a dumteng dagitoy makapikapik a pasamak, kinuna ni Pedro a rebbengna a makumikomtayo ‘kadagiti nasantuan a panagbibiag ken ar-aramid ti nadiosan a debosion, nga ur-urayen ken agtalinaedtayo a silalagip unay iti kaadda ti aldaw ni Jehova.’ Di pagduaduaan daytoy! “Ti langlangit gapu ta maur-uramda marunawdanto ket ti el-elemento gapu ta nakabarbarada unay malunagdanto!” (2 Pedro 3:11, 12) Ti kinapudno a mabalin a mangrugi inton bigat dagitoy makapikapik a pasamak rebbengna nga apektaranna amin nga ar-aramidentayo wenno planotayo nga aramiden.
21. Anianto ti mangsukat iti agdama a langlangit ken daga?
21 Ibaga kadatayo ita ni Pedro no anianto ti mangsukat iti daan a sistema, a kunkunana: “Ngem adda baro a langlangit ken maysa a baro a daga nga ur-urayentayo sigun iti karina, ket kadagitoy nga agtaeng ti kinalinteg.” (2 Pedro 3:13; Isaias 65:17) O, anian a bang-ar! Ni Kristo ken dagiti 144,000 a makipagturay kenkuana ti mangbukel iti “baro” a gobierno a “langlangit,” ket dagiti tattao a makalasat iti panungpalan daytoy a lubong ti mangbukel iti “baro a daga.”—1 Juan 2:17; Apocalipsis 5:9, 10; 14:1, 3.
Manteneren ti Kinaganat ken Kinadalus iti Moral
22. (a) Ania ti tumulong kadatayo a mangliklik iti aniaman a pakamulitan wenno pakatulawan iti naespirituan? (b) Ania a peggad ti impakdaar ni Pedro?
22 “Gapuna, dungdunguen,” intuloy ni Pedro, “yantangay ur-urayenyo dagitoy a bambanag, aramidenyo ti amin a kabaelanyo tapno masarakannakayo iti kamaudiananna a di namulitan ken awan pakapilawanna ken sitatalna. Kanayonanna pay, ibilangyo ti kinaanus ni Apotayo a kas pannakaisalakan.” Ti sigagagar a panangpadpadaan ken panangmatmat iti kasla pannakataktak ti aldaw ni Jehova kas ebkas ti kinaanusna tulongannatayo a mangliklik iti aniaman a pakamulitan wenno pakatulawan iti naespirituan. Ngem, adda peggad! Namakdaar ni Pedro a kadagiti surat “ni dungdunguentayo a kabsat a Pablo . . . adda sumagmamano a bambanag a narigat a maawatan, a tirtiritiren dagiti di nasursuruan ken dagiti managduadua, a kas met iti aramidenda kadagiti dadduma a Kasuratan, nga agturong iti bukodda a pannakadadael.”—2 Pedro 3:14-16.
23. Ania ti pangserra a pammalagip ni Pedro?
23 Dagiti ulbod a mannursuro nabatad a tiniritirda dagiti surat ni Pablo maipapan iti di kaikarian a kinamanangaasi ti Dios, nga inusarda dagitoy a pagpambar iti nalulok a kababalin. Nalabit a daytoy ti adda iti panunot ni Pedro idi insuratna ti pangserra a pammalagip: “Dakayo, ngarud, dungdunguen, nga addaan iti daytoy naipakpakauna a pannakaammo, agaluadkayo tapno dikay maiyadayo a maikanunong kadakuada babaen iti biddut dagiti managsalungasing-linteg a tattao ket matnagkayo manipud bukodyo a kinatibker.” Kalpasanna, ginibusanna ti suratna, nga indagadagna: “Itultuloyyo ti rumang-ay iti di kaikarian a kinamanangaasi ken pannakaammo iti Apo ken Manangisalakantayo a ni Jesu-Kristo.”—2 Pedro 3:17, 18.
24. Ania koma ti kababalin dagiti amin nga adipen ni Jehova?
24 Nalawag, kayat ni Pedro a pabilgen dagiti kakabsatna. Tarigagayanna a ti kababalin koma ti amin ket kas iti inyebkas ti matalek a 82 ti tawenna a Saksi a naadaw iti pangrugian: “Agbibiagak a mayannurot iti indagadag ti apostol, ‘agtalinaed a silalagip unay iti kaadda ti aldaw ni Jehova.’ Kanayon a matmatmatak ti naikari a baro a lubong kas ‘agpayso nupay saan a makita.’” Sapay koma ta kasta met ti panagbiagtayo amin.
Kasanoyo a Sungbatan?
◻ Ania ti kayat a sawen ti ‘panagtalinaed a silalagip unay’ iti aldaw ni Jehova?
◻ Ania ti sipapakinakem a di ikankano dagiti managuyaw, ken apay?
◻ Ania ti makagapu a rabrabaken dagiti managuyaw dagiti matalek a Kristiano?
◻ Ania a panangmatmat ti nasken a mantenerentayo?
[Ladawan iti panid 23]
Agtalinaedkayo a silalagip unay iti aldaw ni Jehova . . .
[Ladawan iti panid 24]
. . . ken iti umay a baro a lubong