Dakdakkel ni Jehova Ngem iti Pusotayo

“NI Jehova maay-ayo kadagiti agbuteng kenkuana,” insurat ti salmista. Wen, maragsakan ti Namarsua a makakita iti tunggal adipenna ditoy daga a mangikagkagumaan a mangannurot kadagiti nalinteg a pagalagadanna. Kadagiti panawen ti dukot, bendisionan, pabilgen, ken liwliwaen ti Dios dagiti nasungdo kenkuana. Ammona nga imperpekto dagiti agdaydayaw kenkuana, isu a daydiay kabaelanda laeng ti namnamaenna kadakuada.​—Salmo 147:11.

Nalabit nalakatay la a patien nga ay-ayaten unay ni Jehova dagiti adipenna. Nupay kasta, adda dagiti mangipagarup a saan pulos ida a maipateg ni Jehova gapu ta dagiti bukodda a pagkurangan ti pakaseknanda unay. Mabalin a kunaenda, “Managbasolak unay tapno ayaten ni Jehova.” Siempre, addada tiempo nga umapay kadatayo amin ti negatibo a rikrikna. Ngem dagiti dadduma, agparang a kankanayon a makidangdangadangda iti rikna ti kinaawan serserbi.

Panagleddaang

Idi panawen ti Biblia, adda dagiti matalek a tattao a nagsagaba iti nakaro a leddaang. Marurod ni Job iti biagna ket impapanna nga isut’ binaybay-anen ti Dios. Adda panawen idi a nakaro ti panagdukot ni Anna, ti nagbalin nga ina ni Samuel, ta lupes ket nagsangit iti nasaem gapu iti daytoy. ‘Naparukob a napalalo’ ni David, ken nariribukan ni Epafrodito gapu ta naladingitan dagiti kakabsatna idi madamagda ti panagsakitna.​—Salmo 38:6; 1 Samuel 1:7, 10; Job 29:2, 4, 5; Filipos 2:25, 26.

Dagiti met ngay Kristiano ita? Nalabit a makedngan ti sagrado a serbisio ti dadduma kasano man ti panangikagumaanda gapu iti sakit, panaglakay wenno panagbaket, wenno dadduma pay a personal a kasasaad. Mabalin a daytoy ti panggapuanda a mangipagarup a dida maar-aramidan ti namnamaen kadakuada ni Jehova ken dagiti kapammatianda. Wenno nalabit kanayon a pabasolen ti dadduma ti bagida gapu iti napalabas a biddutda, ket agduaduada a napakawan idan ni Jehova. Nalabit a ti dadduma a naggapu iti narikut a pamilia patienda a dida maikari iti pammateg. Kasano a posible daytoy?

Dadduma ti dimmakkel iti pamilia nga ad-adda a maiparparangarang ti espiritu ti panagimbubukod, panangpabain, ken buteng, imbes nga ayat. Nalabit didanto pulos maawat nga adda ama a mangipateg unay kadakuada, a mangsapul kadagiti gundaway tapno mangkomendar ken mangparegta, a mangpalabas kadagiti babassit a pagkurangan ket sidadaan a mangpakawan no serioso ti nagbasolan, ken ti kinadungngona patalgedenna ti rikna ti intero a pamilia. Yantangay dida pulos naaddaan iti naayat nga ama ditoy daga, narigatda a maawatan no ania ti kaipapanan ti maaddaan iti naayat a nailangitan nga Ama.

Kas pagarigan, insurat ni Fritz: “Nakaro ti impluensia ti kinagubsang ni tatangko iti kinaubingko agingga iti kinaagtutubok.a Pulos a dinak kinomendaran, ket saanak a pulos nasinged kenkuana. Kinapudnona, kaaduanna a maamakak kenkuana.” Kas resultana, makarikna pay laeng ni Fritz iti kinaawan kompiansa iti bagina nupay agtawenen iti nasurok a 50. Kuna met ni Margarette: “Saan a nadekket ken saan a nadungngo dagiti dadakkelko. Idi rinugiak ti nagadal iti Biblia, narigatanak a mangiladawan iti maysa a naayat nga ama.”

Aniaman ti rason, ipamatmat dagiti kasta a rikna a no dadduma, ti panagserbitayo iti Dios ket tigtignayen nangnangruna ti bain wenno buteng, saan a ti ayat. Kasla awan serserbina ti panagreggettayo. Gapu ta kayattay a maay-ayo ni Jehova ken dagiti kapammatiantayo, mabalin a mariknatayo a ditay magawayan amin a kayattay nga aramiden. Kas banagna, mabalin a ditay maragpat dagiti kalattayo, pabasolentay ti bagitayo, ket maupaytayo.

Ania ti mabalin nga aramiden? Nalabit masapul nga ipalagiptayo iti bagitayo ti kinamanangngaasi ni Jehova. Natarusan ni apostol Juan daytoy a naayat a galad ti Dios.

“Ti Dios Dakdakkel Ngem Kadagiti Pusotayo”

Iti ngudo ti umuna a siglo K.P., insurat ni Juan kadagiti kapammatianna: “Babaen itoy maammuantayto a nagtaudtayo iti kinapudno, ket pagtalgedentayto dagiti pusotayo iti sanguananna maipapan iti aniaman a pangkondenaran kadatayo dagiti pusotayo, agsipud ta ti Dios dakdakkel ngem kadagiti pusotayo ket ammona ti isuamin a bambanag.” Apay nga insurat ni Juan dagitoy a sasao?​—1 Juan 3:19, 20.

Nalawag nga ammo ni Juan a posible para iti adipen ni Jehova a sidiren ti bukodna a puso. Nalabit a napasaran met idi ni Juan dayta. Gapu ta kabarbaraan ni Juan idi agkabannuag pay, pasaray korehiren ni Jesu-Kristo ti nainget a panangtratona kadagiti sabsabali. Kinapudnona, inted ni Jesus kada Juan ken iti kabsatna a ni Santiago ‘dagiti birngas a Boanerges, a kayatna a sawen Annak ti Gurruod.’​—Marcos 3:17; Lucas 9:49-56.

Iti simmaruno nga 60 a tawen, timmanang ti pannakilangen ni Juan ket nagbalin a natimbeng, naayat, ken naasi a Kristiano. Idi inlanadna ti umuna a naipaltiing a suratna idi isu laengen ti sibibiag nga apostol, ammona a di singiren ni Jehova ti tunggal adipenna kada makaaramidda iti babassit a biddut. Imbes ketdi, isu ket maysa nga Ama a nadungngo, naasi, naparabur, mannakipagrikna, ken addaan nauneg a panagayat iti amin nga agayat ken agdayaw kenkuana iti kinapudno. Insurat ni Juan: “Ti Dios ket ayat.”​—1 Juan 4:8.

Pagragsakan ni Jehova ti Panagserbitayo Kenkuana

Ammo ti Dios dagiti nakaisigudan a pagkapuyan ken pagkurangantayo, ket silalagip kadagitoy. “Ammona ti pannakasukogtayo; isu malagipna a datayo tapoktayo,” insurat ni David. Ammo ni Jehova ti epekto ti nalikudantayo iti kinasiasinotayo ita. Kinapudnona, adayo nga am-ammonatayo ngem iti pannakaammotayo iti bagitayo a mismo.​—Salmo 103:14.

Ammona nga adu kadatayo ti mayat nga agbalin a naiduma, ngem ditay maparmek dagiti pagkurangantayo. Mayarig ti kasasaadtayo iti kasasaad ni apostol Pablo a nagkuna: “Ti naimbag a kayatko diak aramiden, no di ket ti dakes a diak kayat isu ti an-annurotek.” Addaantayo amin iti kasta a pannakidangadang. Iti dadduma a kaso, nalabit a mangiturong daytoy kadatayo iti manangsidir a puso.​—Roma 7:19.

Laglagipenyo a kanayon daytoy: Napatpateg ti panangmatmat ni Jehova kadatayo ngem iti panangmatmattayo iti bagitayo. Saan la a basta makontento no di ket maragsakan no makitana nga isut’ pagregreggetantayo nga ay-aywen. (Proverbio 27:11) Nupay kasla bassit para kadatayo ti nagapuanantayo, makaay-ayo kenkuana ti kinamasindadaan ken nasayaat a motibotayo. Saan la a ti nagapuanantayo ti kitaenna; matarusanna no ania ti kayattay nga aramiden; ammona dagiti kalikagum ken tarigagaytayo. Mabasa ni Jehova dagiti pusotayo.​—Jeremias 12:3; 17:10.

Kas pagarigan, adu kadagiti Saksi ni Jehova ti nainkasigudan a managbabain ken naulimek, a kaykayatda ti di agpadlaw. Kadagiti kasta a tattao, maysa a karit ti panangikasaba iti naimbag a damag iti binalaybalay. Ngem gapu iti tarigagay nga agserbi iti Dios ken matulongan dagiti kaarrubada, masursuro uray dagiti managbabain ti umasideg kadagiti kaarrubada tapno makisarita maipapan iti Biblia. Nalabit mariknada a bassit ti nagapuananda, ket mabalin a daytoy ti mangikkat iti rag-oda. Nalabit iparipirip ti pusoda nga awan maar-aramidanda iti ministerioda iti publiko. Ngem awan duadua a pagrag-oan ni Jehova ti panangikagumaanda nga agserbi. Kanayonanna, saanda a masierto no kaano ken no sadino a tumarubo, dumakkel, ken agbunga dagiti bukel ti kinapudno nga immulada.​—Eclesiastes 11:6; Marcos 12:41-44; 2 Corinto 8:12.

Dadduma a Saksi ti addaan iti agtultuloy a sakit. Lumakay wenno bumaketen ti dadduma. Narigat ken makapadanag kadakuada ti regular a pannakigimong iti Kingdom Hall. No mangngegda ti maysa a palawag a mangdakamat iti trabaho a panangasaba, nalabit malagipda ti dati nga ar-aramidenda ken ti kayatda pay nga aramiden, nupay lapdan idan ti an-annayen. Mabalin a makonsiensiada ta dida masurot ti balakad kasano man ti ayatda a mangaramid iti dayta. Ngem sigurado nga ilalaen ni Jehova ti kinasungdo ken panagibturda. Agtalinaedda la ketdi a nasungdo, dina pulos lipaten ti kinamatalekda.​—Salmo 18:25; 37:28.

‘Pagtalgedentayo ti Pusotayo’

Idi lakayen ni Juan, nalawan ti pannakaawatna iti kinamanangngaasi ti Dios. Laglagipenyo ta insuratna: “Ti Dios dakdakkel ngem kadagiti pusotayo ket ammona ti isuamin a bambanag.” Kanayonanna, imparegta ni Juan a ‘pagtalgedentayo ti pusotayo.’ Ania ti kayat a sawen ni Juan kadagita a sasao?

Sigun iti Vine’s Expository Dictionary of Old and New Testament Words, ti Griego a verbo a naipatarus kas ‘pagtalgeden’ kaipapananna ti “panangallukoy, panangguyugoy, pananggutugot.” Iti sabali a pannao, tapno mapagtalgedtayo ti pusotayo, masapul a guyugoyentayo ti pusotayo, nga allukoyentayo a mamati nga ay-ayatennatayo ni Jehova. Kasano?

Ni Fritz, a nadakamat itay, ket agserserbi iti agarup 25 a tawenen kas panglakayen iti maysa kadagiti kongregasion dagiti Saksi ni Jehova. Natakuatanna a ti personal a panagadal ket makaipaay ti pammatalged iti pusona nga isut’ ay-ayaten ni Jehova. “Regular ken naannad nga ad-adalek ti Biblia ken dagiti publikasiontayo. Tumulong daytoy tapno malipatak ti napalabas ken mataginayonko ti nalawag a panangmatmat iti nakaskasdaaw a masakbayantayo. Addada gundaway a daegannak ti napalabasko, ket iti panagriknak dinak pulos maipateg ti Dios. Ngem nakitak a ti regular a panagadal pabilgenna ti pusok, parayrayenna ti pammatik, ken tumulong tapno agtultuloyak a naragsak ken natimbeng.”

Pudno, mabalin a di mabaliwan ti panagbasa iti Biblia ken panagmennamenna ti aktual a kasasaadtayo. Ngem mabaliwanna ti panangmatmattayo iti kasasaadtayo. Ti panangimula iti pusotayo kadagiti kapanunotan manipud iti Sao ti Dios tulongannatayo nga agpanunot a kas kenkuana. Kanayonanna, ti panagadal palawaenna ti pannakaawattayo maipapan iti kinamanangngaasi ti Dios. In-inutto a mabigbigtayo a dinatay pabasolen ni Jehova iti kasasaad a linak-amtayo idi ubbingtayo, ket dinatay panungsungbaten kadagiti an-annayentayo. Ammona a masansan a ditay gapuanan dagiti pakadagsenan nga ibakbaklay ti adu kadatayo, emosional man wenno pisikal, ket siaayat nga ikonsiderarna daytoy.

Ni Margarette met ngay a nadakamat itay? Idi naam-ammona ni Jehova, nakagunggona met unay kenkuana ti panagadal iti Biblia. Kas ken Fritz, masapul a balbaliwanna ti panangmatmatna iti maysa nga ama. Nakatulong ti kararag tapno mapagtutunos ni Margarette ti amin a naammuanna babaen ti panagadal. “Idi damo, imbilangko ni Jehova a nasinged a gayyem yantangay ad-adda a nariknak ti ayat manipud kadagiti gagayyemko ngem iti amak. In-inut a nasursurok nga iyesngaw ken Jehova dagiti rikrikna, panagduadua, pakadanagan, ken parikutko. Naynay nga agkararagak kenkuana. Maigiddato iti dayta, pagtutunosek amin a baro a banag a maad-adalko maipapan kenkuana kas iti maysa a mosaic. Di nagbayag, ad-adda a simmayaat ti panangmatmatko ken Jehova ta saanakon a marigatan a mangibilang kenkuana kas naayat nga Amak,” kuna ni Margarette.

Pannakaikkat ti Amin a Pakadanagan

Bayat nga adda pay la daytoy dakes ken daan a sistema, awan ti di agdanag. Iti dadduma a Kristiano, kaipapanan daytoy a mabalin nga agsublisubli dagiti rikna ti panagdanag wenno panagduadua iti bagi a pakaigapuan ti pannakariribuk. Ngem mainanamatayo nga ammo ni Jehova ti naimbag a motibotayo ken ti panagreggettayo nga agserbi kenkuana. Nikaanoman a lipatenna ti ayat nga impakitatayo agpaay iti naganna.​—Hebreo 6:10.

Iti umad-adanin a baro a daga iti sidong ti Mesianiko a Pagarian, manamnama ti amin a matalek a tattao a maikkatto dagiti pakarigatanda a gapuanan ti sistema ni Satanas. Anian a bang-arto dayta! Ket makitatayto pay ti ad-adu a pammaneknek ti kinamanangngaasi ni Jehova. Kabayatanna, agtalektay koma amin a ti “Dios dakdakkel ngem kadagiti pusotayo ket ammona ti isuamin a bambanag.”​—1 Juan 3:20.

[Footnote]

[Blurb iti panid 30]

Saan a nainget nga agturay ni Jehova no di ket maysa a nadungngo, naasi, ken mannakipagrikna nga Ama

[Ladawan iti panid 31]

Ti panagadal iti Sao ti Dios tulongannatayo nga agpanunot a kas kenkuana