Ti Pakabigbigan ti Pudno a Panagdayaw

KUNA ti kaaduan a relihion a naggapu iti Dios ti isursuroda. No kasta, masapul nga ipangagtayo dagiti sasao ni Juan nga apostol ni Jesus. Insuratna: “Dungdungnguen, saanyo a patien ti tunggal naipaltiing nga ebkas, no di ket subokenyo dagiti naipaltiing nga ebkas tapno makitayo no nagtaudda iti Dios, agsipud ta adu nga ulbod a mammadto ti nakastrek ditoy lubong.” (1 Juan 4:1) Kasanotayo a maammuan no ti maysa a banag ket nagtaud iti Dios?

Amin a nagtaud iti Dios iparangarangna ti personalidadna, nangnangruna ti ayat a kangrunaan a galadna. Kas pagarigan, ti maysa nga ebkas ti panagayat ti Dios ket ti sentido ti panagangottayo, ti makagapu a matagiragsaktayo ti banglo dagiti mula, sabsabong, wenno ti kalutluto a tinapay. Ti abilidadtayo a makakita iti ilelennek ti init, ti maysa a kulibangbang, wenno ti isem ti maysa nga ubing iparangarangna ti panagayat ti Dios kadatayo. Kasta met laeng no maipapan iti abilidadtayo a makangngeg iti napintas a musika, ti uni dagiti billit, wenno ti timek ti ay-ayatentayo. Uray pay ti pannakabukeltayo, nupay imperpektotayo, ipamatmatna ti panagayat ti Dios. Isu a masansan a mapasarantayo ti kinapudno dagiti sasao ni Jesus: “Ad-adu ti kinaragsak iti panangted ngem iti panangawat.” (Aramid 20:35) Maragsakantayo a mangipakita iti ayat agsipud ta naaramidtayo “iti ladawan ti Dios.” (Genesis 1:27) Nupay adu ti sabali pay a galad ni Jehova, ti ayat ti kangrunaan a paset ti personalidadna.

Dagiti surat a naggapu iti Dios rumbeng nga iparangarangda ti ayatna. Dagiti relihion iti lubong addaanda kadagiti adu a nagkauna a sursurat. Iparparangarang kadi dagita a sursurat ti ayat ti Dios?

Iti kinapudnona, kaaduan kadagiti nagkauna a sursurat dagiti relihion manmanoda a tukoyen ti ayat ti Dios kadatayo wenno no kasano nga ayatentayo ti Dios. Isu nga awan ti sungbat a magun-odan ti adu nga agsalsaludsod iti, “Apay nga agtultuloy ti panagsagaba ken kinadakes idinto ta ti nakaparsuaan paneknekanna ti ayat ti Dios?” Iti sabali a bangir, ti Biblia ti kakaisuna a nagkauna a narelihiosuan a surat a naan-anay a mangilawlawag iti ayat ti Dios. Isurona met no kasano nga ipakita ti ayat.

Ti Libro Maipapan iti Ayat

Ti Sao ti Dios, ti Biblia, ipalgakna a ni Jehova “ti Dios ti ayat.” (2 Corinto 13:11) Isalaysay ti Biblia no kasano a ti ayat ti nangtignay ken Jehova tapno paraburanna dagiti immuna a tattao iti maysa a kita ti biag nga awanan sakit ken ipapatay. Ngem nangrugi ti panagsagaba ti sangatauan gapu iti iyaalsa iti autoridad ti Dios. (Deuteronomio 32:4, 5; Roma 5:12) Nagtignay ni Jehova tapno maisubli ti napukaw. Kuna ti Biblia: “Ti Dios inayatna ti lubong iti kasta unay isu nga intedna ti bugbugtong nga Anakna, tapno tunggal maysa a mangwatwat iti pammati kenkuana saan koma a madadael no di ket maaddaan iti agnanayon a biag.” (Juan 3:16) Ti Nasantuan a Kasuratan ad-adda pay nga impalgakna ti ayat ti Dios babaen ti panangisalaysayna no kasano a nangipasdek ti Dios iti naan-anay a gobierno nga iturayan ni Jesus tapno maisubli ti kappia iti natulnog a sangatauan.​—Daniel 7:13, 14; 2 Pedro 3:13.

Gupgopen ti Biblia ti obligasion ti tao kadagitoy a sasao: “‘Masapul nga ayatem ni Jehova a Diosmo buyogen ti intero a pusom ken buyogen ti intero a kararuam ken buyogen ti intero a panunotmo.’ Daytoy ti kadakkelan ken umuna a bilin. Ti maikadua, nga umasping iti dayta, isu daytoy, ‘Masapul nga ayatem ti padam a tao a kas iti bagim.’ Kadagitoy dua a bilin nga agpannuray ti intero a Linteg.” (Mateo 22:37-40) Sigun iti Biblia, ti Dios ti nangipaltiing iti daytoy a libro. Gapu ta nabatad nga iparangarangna ti personalidad ni Jehova, masiguradotayo a naggapu dayta iti “Dios ti ayat.”​—2 Timoteo 3:16.

No surotentayo daytoy a pagannurotan, malasintayo no ania kadagiti nagkauna a sursurat ti agpaypayso a naggapu iti Dios. Ti ayat ti maysa pay a pakabigbigan dagiti pudno nga agdaydayaw gapu ta tultuladenda ti Dios no iti panangipakita iti ayat.

No Kasano a Mabigbigtayo Dagiti Pudno a Mangay-ayat iti Dios

Naidumduma dagidiay pudno nga agayat iti Dios, nangnangruna ta agbibiagtayo ita iti aw-awagan ti Biblia a ‘maudi nga al-aldaw.’ Dagiti tattao ad-adda a ‘managayatda iti bagbagida, managayatda iti kuarta, managayat iti ragragsak imbes a managayat iti Dios.’​—2 Timoteo 3:1-4.

Kasano a mailasinmo dagiti tattao a managayat iti Dios? Kuna ti Biblia: “Daytoy ti kaipapanan ti ayat iti Dios, a tungpalentayo dagiti bilinna.” (1 Juan 5:3) Ti panagayat iti Dios tignayenna dagiti tattao a mangraem iti moral a pagalagadan ti Biblia. Kas pagarigan, ti Sao ti Dios sagudayenna dagiti linteg maipapan iti pannakidenna ken panagasawa. Ti panagdenna maipalubos laeng kadagiti agasawa, ken permanente ti panagasawa. (Mateo 19:9; Hebreo 13:4) Idi timmabuno iti gimong dagiti Saksi ni Jehova ti maysa a babai a taga-Espania a nagadal iti teolohia, kinunana idi nakitana ti nasaet a panangadalda kadagiti moral a pagalagadan ti Biblia: “Nagawidak a napabileg, saan laeng a gapu kadagiti makaisuro a Nainkasuratan a palawag no di ket gapu iti panagkaykaysa nga impakita dagitoy a tattao, ti natan-ok a prinsipioda maipapan iti moral ken ti nasayaat a kababalinda.”

Malaksid iti panagayatda iti Dios, nalaka a mabigbig dagiti pudno a Kristiano babaen ti wagas a panangipakitada iti ayat kadagiti kaarrubada. Ti kapatgan a trabahoda isu ti panangisarita kadagiti tattao maipapan iti kakaisuna a namnama ti sangatauan, ti Pagarian ti Dios. (Mateo 24:14) Awanen ti maipaay a napapaut a gunggona kadagiti kaarruba no di ti panangtulong kadakuada a mangam-ammo iti Dios. (Juan 17:3) Ipakita met dagiti pudno a Kristiano ti ayatda iti dadduma a pamay-an. Mangipaayda iti maitutop a tulong kadagidiay agsagsagaba. Kas pagarigan, idi nadidigra ti Italia gapu iti ginggined, impadamag ti maysa a periodiko a dagiti Saksi ni Jehova “nagsayaat ti pamay-an a panangtulongda kadagidiay agsagsagaba, aniaman ti relihion dagitoy.”

Malaksid iti panagayatda iti Dios ken iti kaarruba, ayaten dagiti pudno a Kristiano ti maysa ken maysa. Kinuna ni Jesus: “Mangtedak kadakayo iti baro a bilin, nga ayatenyo ti maysa ken maysa; kas iti panagayatko kadakayo, kasta met nga ayatenyo ti maysa ken maysa. Babaen iti daytoy maammuanto ti isuamin a dakayo dagiti adalak, no addaankayo iti ayat iti maysa ken maysa.”​—Juan 13:34, 35.

Nakadkadlaw kadi ti nakaidumaan ti panagayat dagiti pudno a Kristiano iti maysa ken maysa? Kasta ti napaliiw ti maysa nga agtagibalay nga agnagan iti Ema. Isu ket agtartrabaho idiay La Paz, Bolivia, a sadiay masansan a naisina dagiti nabaknang kadagiti napanglaw gapu iti panagduduma ti puli. Kinunana: “Idi damo a timmabunoak iti gimong dagiti Saksi ni Jehova, nakitak ti maysa a natakneng ti panagkawkawesna a lalaki a nakatugaw ken makisarsarita iti maysa a katutubo a babai. Diak pay nakakita iti kasta idi. Iti dayta a kanito, napaneknekak a daytoy ti ili ti Dios.” Umasping iti dayta, kinuna ti maysa nga agtutubo a babai a taga-Brazil nga agnagan iti Miriam: “Diak ammo idi no kasano ti agbalin a naragsak, uray pay iti pamiliak. Damo a naimatangak kadagiti Saksi ni Jehova ti ayat a nabuyogan iti aramid.” Idiay Estados Unidos, insurat ti direktor ti maysa nga estasion ti telebision maipapan kadagiti Saksi ni Jehova: “No ad-adu a tattao ti mangaramid iti ar-aramiden ti relihionyo, saan koma a kastoy ti kasasaad daytoy a nasion ita. Kas maysa a periodista, ammok a ti pamuon ti organisasionyo ket ayat ken nabileg a pammati iti Namarsua.”

Birokenyo ti Pudno a Panagdayaw

Ti ayat ket maysa a pakabigbigan ti pudno a panagdayaw. Inyarig ni Jesus ti panangbirok iti pudno a panagdayaw iti panangbirok iti umiso a dalan ken pannagna iti dayta. Dayta laeng ti dalan nga agturong iti biag nga agnanayon. Kinuna ni Jesus: “Sumrekkayo iti akikid a ruangan; agsipud ta akaba ken nalawa ti dalan nga agturong iti pannakadadael, ket adu dagidiay sumrek iti dayta; idinto ta akikid ti ruangan ken nailet ti dalan nga agturong iti biag, ket bassit dagidiay makasarak iti dayta.” (Mateo 7:13, 14) Maymaysa laeng a grupo dagiti pudno a Kristiano ti sangsangkamaysa a makipagpagna iti Dios iti dalan ti pudno a panagdayaw. Ngarud, talaga a napateg no ania a relihion ti piliem. No mabirokam ken magnaka iti dayta a dalan, nasarakam ti kasayaatan a dalan iti biag agsipud ta dayta ti dalan ti ayat.​—Efeso 4:1-4.

Darepdepem ti matagiragsakmo a rag-o bayat a magmagnaka iti dalan ti pudno a panagdayaw! Arigna makipagpagnaka iti Dios. Maadalmo manipud iti Dios ti kinasirib ken ayat tapno maaddaanka iti nasayaat a relasion kadagiti sabsabali. Masursurom kenkuana ti panggep ti biag, ken maawatam dagiti kari ti Dios ket maaddaanka iti namnama iti masanguanan. Saanmonto a pulos a pagbabawyan ti panangbirokmo iti pudno a panagdayaw.

[Ladawan iti panid 5]

Kadagiti nagkauna a sursurat, ti Biblia laeng ti mangipalgak iti ayat ti Dios

[Dagiti Ladawan iti panid 7]

Mailasin dagiti pudno a Kristiano agsipud ta ipakpakitada ti ayat