Kanayon Kadi nga Umiso ti Panagtulnog?

“NANGNGEGNAK kadi?” inriaw ti ina ken bassit a ni Johnnie bayat ti iruruarna iti ruangan. Saan, saanna a suksukimaten ti panagdengngeg ni Johnnie. Isut’ manigsigurado a ti anakna ti agtungpalto kenkuana ket agawid iti umiso nga oras.

Pudno unay, ti panagdengngeg ken ti panagtulnog nasinged ti pannakainaigda iti maysa ken maysa. Saan a pakasdaawan, ngarud, nga iti orihinal a pasasao ti Biblia, dagiti sasao a mangipamatmat iti panagtulnog ket nainaigda iti panagdengngeg. Ngem siasino ti pangipaayantayo iti panagimdengtayo? Agtulnogtayo kadi iti tunggal maysa a mangkalikagum iti dayta? Ken kanayon kadi nga umiso ti panagtulnog?

No Kaano nga Umiso ti Panagtulnog

Ti panagtulnog iti Namarsuatayo, ni Jehova a Dios, ket kanayon nga umiso. Kas Namarsua kadatayo ken ti Gubuayan iti biag, isu ti umuna unay a pagtulnogan dagiti parsuana. (Salmo 95:6, 7) Kas ti Kangatuan a Soberano, ni Jehova iyallatiwna met ti autoridadna kadagiti dadduma a makasabet kadagiti pagalagadanna, ket daytoy ti mangipaay iti panagtulnogtayo kadakuada a maitutop. Ti kangrunaan kadagita a persona isu ni Jesu-Kristo. Nanipud 1914 isut’ nagbalin a tinudingan ti Dios nga Ari iti nailangitan a Pagarian “nga amin dagiti il-ili, nasnasion, ken pagsasao agserbida koma kenkuana.” (Daniel 7:13, 14) Kasta met, kas Pangulo iti kongregasion Kristiano, impaay ni Jesus ti autoridadna kadagiti dadduma nga adda iti dayta, isu a mamagbalin iti panagtulnogtayo kadagita a papastor nga adda iti babaenna a maitutop.​—Hebreo 13:17.

Ni Jehova nangisaad met kadagiti pagalagadan maipapan iti panagtulnog iti uneg ti pamilia. Dagiti annak nabalakadanda nga ‘agtulnog kadagiti dadakkelda gapu iti Apo,’ ken naibaga kadagiti babbai nga “agtulnogda kadagiti assawada a kas iti Apo.” (Efeso 5:21–6:3) Dagiti Kristiano napalagipanda a “paiturayanda koma kadagiti gobierno ken dagiti agtuturay.” (Tito 3:1) Kadagitoy amin, nupay kasta naan-anay kadi ti panagtulnogtayo? Kanayon kadi nga umiso?

No ti Panagtulnog Saan nga Umiso

Siempre, ti panagimdeng kadagidiay a saan a nangitalkan ni Jehova iti autoridad mabalin nga agbanag iti didigra. Ti umuna a tao, ni Adan, “nagimdeng” iti timek ni Eva ket nakikadua kenkuana iti pannangan iti kayo iti pannakaammo iti naimbag ken dakes. (Genesis 3:17) Ania ti nagbanaganna? “Ta gapu ti isusukir ti maysa a tao dagiti adu naibilangda a managbasol.” (Roma 5:19) Anian a nagpeggad a nagbanagan ti panagimdeng iti di umiso a persona.

Kanayon kadi nga umiso, nupay kasta, ti umimdeng kadagidiay a nakaitalkan ti posision iti autoridad? Saan no ikagumaanda nga usaren ti autoridadda iti saan a nadiosan a pamay-an. Kas pangarigan, maitunos iti prinsipio iti panagtulnog kadagiti “appo iti nainlasagan a pamay-an,” masapul nga agtulnogtayo kadagiti amotayo. Ngem ania ngay no dagita ti mangibilin kadatayo a mangaramid iti maysa a banag a maisuppiat kadagiti linlinteg ti mannakabalin-amin a Dios? Ti sumaganad nga imbaga ni Pablo ipamatmatna ti umiso a kurso: “A dikay agserbi iti mata a kas kadagiti umagawa a mangay-ayo kadagiti tattao, no di ket kas ad-adipen ni Kristo, agaramidkayo a napusuan iti pagayatan ti Dios.” (Efeso 6:5, 6) Iti sabali pay nga okasion, ni Pedro ken dagiti dadduma nga apostol kinunada: “Agtulnogkami a nangnangruna iti Dios ngem kadagiti tao.”​—Aramid 5:29.

Ti isu met laeng a prinsipio agaplikar iti uneg ti pamilia. Gaput’ dina panangapresiar kadagiti sapulen ti Dios, maysa nga asawa a lalaki ti di manganamong iti tarigagay ti asawana a tumabuno a kanayon kadagiti Nakristianuan a gimgimong. Kas pangarigan ngay ta isut’ manglapped kenkuana, a mangranggas pay, kas maar-aramid no dadduma, tapno pasardengenna a tumabuno kadagiti Nakristianuan a panaggigimong. Ania koma ti aramidenna? No isut’ tumulok ket agulimeken, mabalin a pagpeggadenna ti espiritualidadna, agraman ti espiritualidad ti pamiliana, ket mapukawna ti namnamana iti biag nga agnanayon. Saan kadi a nasaysayaat ti panagtulnog ken ni Jehova, a bigbigentayo nga awan ti tao, uray pay ti asawana, a naikkan iti autoridad a mangringbaw iti bilin a ‘saan a baybay-an ti panaggigimongtayo’?​—Hebreo 10:25.

Ti asawa ni Miyoko ti nagkedked a dagiti masapulanna ti “saysayangenna” iti itatabunona kadagiti gimgimong a dina anamongan. Kamaudiananna, insardengnan ti panangiyawatna kenkuana iti kuarta a maipaay iti panangtaginayon iti balay, ket ni Miyoko ti masapul a magmagna iti maysa nga oras a mapan iti Kingdom Hall.

Isu kadit’ simmardeng? Saan. Isut’ immadani ken ni Jehova babaen iti kararag ket inusigna ti kasasaadna. Gaput’ pannakabigbigna iti rason iti ibubusor ni lakayna, inkeddeng ni Miyoko ti mangala iti trabaho a panangitulod kadagiti diario. Immanamong ni lakayna, no la ketdi ta itedna ti kagudua ti sueldona kenkuana.

Manen, isut’ nagkararag a no pagayatan ni Jehova, isut’ maikkan iti asideg laeng a rota. Gagangay, alaenna ti makatawen wenno ad-adu pay sakbay a ti maysa magun-odanna ti tarigagayna. Ngem, nakaskasdaaw, iti uneg ti innem a lawlawas ni Miyoko natukonan ti maysa a rota nga asideg laeng iti balayna. Gaput’ naparegta iti kapanunotan a dengdenggen ni Jehova dagiti karkararagna, isut’ nagtrabaho manipud alas 4:30 agingga iti alas 6:00 iti tunggal agsapa. Gaput’ pannakakitana iti daytoy, ti kababalin ni lakayna nain-inot a nagbalbaliw, ket nakitinnulongen. Kas met ken ni Miyoko, a kanayon nga agserserbi kas auxiliary payunir, pinanunotna ken inusigna iti kasasaadna, inkararagna ken kalpasanna nagtignay a sipopositibo, dakayo met masarakanyonto a daytoy agbanagto iti bendision ni Jehova.

Siempre, mabalin nga addada dagiti naisangsangayan a rason a ti di manamati nga asawa mabalin a kalikagumanna ti asawana nga aglangan kadagiti Nakristianuan a gimong. Mabalin nga aramidenna dayta nga awan ti panggep a mangpakapuy iti panagdayawna ken panagserbina ken Jehova a Dios. Ti pannakaawat kadagiti nairaman a prinsipio tulongannanto ti maysa a Kristiano a babai a mangikeddeng a siuumiso ti maitunos iti partikular a kasasaadna.

Iti iyaaddang pay iti maysa nga addang, ania ngay no ti lalaki ibagana iti asawana a saanna nga ikuyog dagiti ubbing kadagiti Nakristianuan a gimgimong? Ammona, siempre, nga uray pay no ti asawana dina awaten ti kinaulo ni Kristo, isu pay laeng ti ulo ti pamilia. (1 Corinto 11:3) Ken kaskasdi, ti babai naimpusuan met ti panangpampanunotna iti naespirituan a pagimbagan dagiti annakna, agraman ti tarigagayna nga agtulnog ken ni Jehova. Pudno a dayta ket pannakasuot ti pammatina nga agbiag a maitunos iti rebbengenna kadagitoy amin a paset. Ti panagkararag ken Jehova a maipaay iti sirib ken pannakaawat ti sigurado a makatulong. (Santiago 1:5; Filipos 4:6, 7) Ti nataktika a pannakirinnason iti asawana ken ti nadayaw a pannakisarita, a buyogen ti natalna ken naemma nga espiritu, mabalin a makatulong met iti panangpili iti pangngeddeng.​—Colosas 4:6; 1 Pedro 3:1-5.

Maysa a Kristiano a babai idiay Yamato, Japan, ti napasanguan iti kasta a kasasaad idi ti asawana ti nanglapped kenkuana a mangikuyog kadagiti tallo nga annakna kadagiti gimgimong. Ania ti maaramidanna? Sigagaget a sinuruanna dagiti annakna iti pagtaengan, ket idi nataengandan a mangaramid iti bukodda a pangngeddeng, tunggal maysa ti nangala iti takder a maipaay ken ni Jehova ket rinugianda ti timmabuno kadagiti gimgimong. Gaput’ nakapungtot, ti lalaki pinapanawna ida amin iti balayna.

Nakasarak ti babai iti trabaho ket nagnaedda a temporario iti apartment ti maysa a kabsat a babai. Ngem dina binaybay-an dagiti bambanag agingga iti daytan. Isut’ nagsubli a nangdalus iti balay ni lakayna ken nangiluto iti taraonna. Kamaudiananna, kalpasan ti makabulan wenno ad-adu pay, ti lalaki ti nangpasubli kadakuada ket insardengnan ti panangbusorna kadakuada. Anian a gunggona iti matalek a kursona!

“Suotenyo dagiti Espiritu”

Dagiti ngay autoridad iti kongregasion Kristiano? Yantangay dagidiay adda kadagiti mararaem nga akem ti natudingan babaen ti panagtignay ti nasantuan nga espiritu ken ibatayda ti balakadda ken ti pammagbagada iti Sao ti Dios, masiguradotayo a ti panagtulnog kadagiti nadutokan nga autoridad iti kongregasion Kristiano ket maitutop. (Aramid 20:28; Hebreo 13:17) Ngem dayta dina kayatna a sawen a tungpalentayo ti kasta nga autoridad a ditayon us-usigen no ania ti maibaga. Apay?

Intukon ni apostol Juan daytoy a balakad: “Dikay patien dagiti amin nga espiritu, no di ket suotenyo dagiti espiritu no nagtaudda iti Dios.” (1 Juan 4:1) Daytoy dina kayat a sawen nga agsuspetsatayo iti isuamin nga ibaga dagiti dadduma kadatayo. Imbes ketdi, laglagipentayo dagiti sasao ni Pablo idiay Galacia 1:8: “Ngem uray dakam met laeng wenno maysa nga anghel a naggapu idiay langit ikaskasabana koma kadakayo ti maysa nga ebanghelio a maiduma iti daydiay inkaskasabami kadakayo, mailunod koma.”

Ti kadi impormasion nga adda iti imatangtayo naiduma manipud iti insuro “ti matalek ken naannad nga adipen”? Ti kadi tao a mangisaksaknap iti mensahe agsasao tapno mangidayaw iti nagan ni Jehova, wenno padpadasenna ti mangitan-ok iti bagina met laeng? Ti kadi impormasion maitunos iti intero a sursuro iti Biblia? Dagitoy a salsaludsod ti makatulongto kadatayo iti ‘panangsuot’ iti aniaman a banag a mabalin a kasla mapagduaduaan. Nabalakadantayo a ‘siguraduentayo dagiti amin a bambanag; salimetmetantayo a sititibker ti naimbag.’​—Mateo 24:45; 1 Tesalonica 5:21.

Maysa a makapainteres a kaso a maitudo isu ti kaso ni Ukom Gideon. Tapno masigurado a ni Jehova ti adda kenkuana, nangisingasing ni Gideon iti pakasuotan: “Adtoy a mangikabilak iti maysa a dutdot idiay pagtaltagan,” kinunana ken Jehova. “No ti linnaaw addanto laeng iti dutdot ket matdanto a namaga ti amin a daga, maawatak nga isalakanmonto ti Israel a gapu iti imak.” Idi nga inaramid ni Jehova kas iti naikalikagum, tinarigagayan ni Gideon ti panangipanamnama: “Ipalubosmo koma a ti kinamaga adda laeng koma iti dutdot, ket ti linnaaw iti rabaw ti amin a daga.”​—Oc-ocom 6:37-39.

Nakalablabes kadi ti panagannad wenno panagsuspetsa ni Gideon? Nalawag a saan, ta inawat ni Jehova ti dua a dawatna ket inaramidna ti kinalikagumanna. Tarigagayan laeng ni Gideon a siguraduen ti kinaumiso ti sasaadenna. Gaput’ awanan iti naisurat a Sao ti Dios a kas kadatayo, dayta ti kaepektibuan a pamay-an para ken Gideon a “mangsigurado iti dayta.” Nupay kasta, idi inawatnan ti panangipanamnama, isut’ nainget a nagtulnog kadagiti bilbilin manipud ken ni Jehova uray pay no ti mangilaban kadagiti 300 a lallaki a maibusor iti puersa ti kabusor a 135,000 ti kasla panagbekkel manipud iti panangmatmat iti tao. (Oc-ocom 7:7; 8:10) Ipakitatayo met kadi ti isu met laeng a kababalin babaen ti panangsapul iti Sao ti Dios a maipaay iti no ania ti pudpudno a pagayatan ni Jehova ken kalpasanna ti panangsalimetmet iti dayta?

Ti Kasisiriban a Pili

Saan nga inanamaen ni Jehova ti panangipakitatayo iti bulsek a panamati. Dina tarigagayan ti panagtulnogtayo a magun-odan ti maysa a manangsanay iti animal nga addaan iti busal wenno baot. Dayta ti makagapu no apay nga imbagana ken David: “Saankayo kadi a kas iti kabayo wenno kas iti mulo nga awanan pannakaawat, a masapul dagiti aruaten a pakagat ken rienda a pangigawid kadakuada.” (Salmo 32:9) Imbes ketdi, inikkannatayo ni Jehova ti panagpanunot ken ti pannakaawat tapno, maibatay iti pannakaawat, pilientayo ti agtulnog kenkuana.

Iti Hapones, ti sao a kiku (umimdeng) ramanenna ti kaipapanan a saan laeng a ti panagimdeng ken ti panagtulnog no di ket ti panangipato no dayta a banag ket naimbag wenno dakes. No adda agsao kadatayo, naimbag no umimdeng iti daytoy a kaipapanan tapno no agtulnogtayo, agtulnogtayo saan a babaen laeng iti basta panamati no di ket babaen iti panangpili. Idi ti nailangitan nga Amatayo, ni Jehova a Dios, nagsao, babaen man iti Saona, ti Biblia, wenno babaen iti naindagaan nga organisasionna, nakapatpateg ti panagimdengtayo ken ti panagtulnogtayo, a pampaneknekantayo a natulnogtayo a managdayaw a saan a ditay ikankano ti naayat a pammalagipna: “Nangngegnak kadi?”

[Ladawan iti panid 29]

Iti siasino ti imdengak?

[Ladawan iti panid 31]

Sinapul ni Gideon ti pagayatan ni Jehova ket nagtungpal kenkuana