Ti Dios ti “Daan a Tulag”—Dios Aya ti Ayat?
“TI Dios ti Daan a Tulag, awan sabali ni Yahweh iti Judaismo, ket maysa a dios a manangilunod, naunget a dios, dios a mannangimon, ket diak marikna ti kinasinged kenkuana.” Kasta ti kuna ni Youji Inoue, maysa a dati a Katoliko a Hapones, iti maysa nga artikulo a napauluan “Japanese and Christianity” iti maysa kadagiti nalatak a periodiko ti Japan, ti Asahi Shimbun. Ngem, intuloyna, idi agangay daytoy a Dios “timmanor ken nagbalin nga isu ti Dios ti Baro a Tulag, kayatna a sawen, ti Dios nga insuro ni Jesus.”
Tapno makasiguro, ni klero nga Inoue ket saan nga isut’ maymaysa a mangsalsalimetmet iti kasta a panangmatmat. Ngem umanamongkayo aya kenkuana? Patienyo aya a ti Dios ti “Daan a Tulag,” wenno ti Hebreo a Kasuratan, ket maysa a nagubsang ken manangibales a Dios no maidilig iti Dios ti “Baro a Tulag,” wenno ti Kristiano a Griego a Kasuratan?
Kas kadagiti tattao, dagiti personalidad ti mabalin nga agbalbaliw. Kas pangarigan, igunamgunam ti Biblia kadagiti agayat ti Dios nga “ikawesda ti baro a personalidad a napartuat a maiyannurot iti pagayatan ti Dios iti pudno a kinalinteg ken kinasungdo.” (Efeso 4:24) Babaen ti panagadal iti Biblia ken ti panangiyaplikar iti maad-adalda, adu dagiti dati a managimon, naunget, ken dadduma pay, ti nakapagaramid ti dadakkel a panagbalbaliw, ket itan mangipampamatmatda iti inaldaw a panagbiagda ti bunga ti espiritu ti Dios—“ayat, rag-o, talna, mabayag a panagitured, kinaasi, kinaimbag, pammati, kinaemma, panagteppel.”—Galacia 5:22, 23.
Ngem maikuna met aya ti kasta iti Namarsua, ni Jehova a Dios? Isu aya ti ‘nakapatanor ken agbaliw’ manipud “maysa a naunget a dios” a nagbalin a Nakristianuan a Dios ti ayat, kas panangawag dagiti dadduma kenkuana?
Ni Jehova—Kanayon a Dios ti Ayat
“Ti Dios ayat,” insurat ni apostol Juan. (1 Juan 4:8) Inyebkasna sadiay ti agnanayon a kinapudno: Ti Namarsua, ni Jehova, isu idi, isu ita, ken kankanayonto a maysa a Dios ti di agbalbaliw a panagayat. Ket manipud pangrugian aginggana iti panungpalan, supsuportaran ti rekord ti Biblia dayta a sao.
Idi pinarsua ni Jehova ti daga, siaayat nga inaramidna dayta a nagsayaat a pagtaengan ti sangatauan. (Isaias 45:18) Kamaudiananna, idi pinarsuana ti immuna a lalaki ken babai, da Adan ken Eva, inaramidna ida a “kaladladawanna,” kayatna a sawen, inikkanna ida kadagiti nadiosan a kualidad a kas ti ayat, kinahustisia, kinasirib, ken pannakabalin. Inkabilna met iti sanguananda ti namnama a maaddaan kadagiti annak, pagbalinen ti intero a daga a maysa a paraiso, ken agtaengda nga agnanayon iti dayta. (Genesis 1:27, 28) Saan kadi nga amin daytoy ti pammaneknek ti maysa a Dios ti ayat?
Idi ti immuna a natauan a pagassawaan ti natnag iti pannakasulisog babaen ken Satanas a nangusar iti uleg, napukawda ti agnanayon a bendision saan laeng nga agpaay iti bagida no di ket kasta met kadagiti di pay naiyanak a kaputotanda. Iti daytoy nainget unay a punto, inyebkas ni Jehova ti imuna a padto a nailanad idiay Biblia, awan sabali, a maysa a naikari a ‘bin-i ti babai’ ti mangdunor iti ulo ti uleg. (Genesis 3:15) Saan kadi a daytoy a kari ti namnama ken pannakaispal ti maysa pay a naisalsalumina nga ebkas ti ayat ti Dios?
Agarup 2,000 a tawtawen kamaudiananna, inkari ni Jehova ken Abraham a matalek nga adipenna: “Ket iti putotmo mabendisionanto ti isuamin a nasnasion ti daga,” iti kasta impanayagna a ‘ti bin-i ti babai’ ti aggapunto iti linea ti pamilia ni Abraham. (Genesis 22:18) Daytoy a kari ti nangpatibker iti namnama ti pannakaispal ken impakitana a ti panagayat ni Jehova iti sangatauan ti di kimmupas iti panaglabas ti panawen. Isut’ addaan iti panggep a bendito a masanguanan maipaay iti sangatauan iti panangaramidna iti daytoy a kari. Pudno unay nga isut’ Dios ti ayat!
Ti Ayat ti Dios iti Israel
Mainayon pay, inispal ni Jehova a Dios dagiti Israelitas manipud pannakaadipen idiay Egipto idi 1513 K.K.P. ket nangaramid ti maysa a Linteg ti tulag kadakuada babaen ken Moises. Iti maikadua kadagiti Sangapulo a Bilin, kuna ni Jehova: “Ta siak, ni Yahweh a Diosmo, mannangimonak a Dios [maysa a Dios a mangikalikagum iti naipamaysa a debosion, New World Translation] a mangipasarungkar ti kinadakes dagiti amma kadagiti annak, kadagiti appoko, ken kadagiti appoko ti tumeng, kadagidiay gumura kaniak; ken mangipaay iti naayat nga asi kadagiti rinibribo nga agayat kaniak ken mangsalimetmet kadagiti bilbilinko.”—Exodo 20:5, 6, The Jerusalem Bible.
Kas ti Soberano ken asawa a makinkukua, addaan kalintegan ni Jehova a mangikalikagum ti naipamaysa a debosion manipud iti naitulag nga ilina, ti Israel. (Isaias 54:5; Jeremias 3:14) Idi a ti ilina dida nagmatalek ket masansan agturongda kadagiti ulbod a didiosen, saan kadi a nainkalintegan a ni Jehova, gaput’ ayatna kadakuada, disiplinaenna ida, iyebkasna ti dina pananganamong ken panangkondenarna iti nakillo a daldalanda?
Iti adu nga okasion, impakita ni Jehova ti pannakaseknanna unay iti ilina ket nagapelar kadakuada nga agsublida koma kenkuana. (Isaias 55:7) Nupay no dinusana ida gapu iti basbasolda, a ti kamaudiananna impalubosna ti pannakadadael ti nasionda ken ti pannakakayawda iti ganggannaet a daga, idi nadanon ti tiempona insublina ida iti mismo nga ilida met laeng. Ania ti ipakpakita amin daytoy maipapan ken ni Jehova? Isu aya ti maysa a naimut, mananggura, ken manangibales a Dios? Saan! Imbes ketdi, ipakpakitana nga isu ket “Dios a manangngaasi ken managparabur, nabannayat nga agpungtot ken aglaplapusanan iti naayat a kinaimbag ken kinapudno.”—Exodo 34:6; Nehemias 9:17; Joel 2:13; Nahum 1:2, 3.
Ti Ayat Maiyebkas Babaen iti Anakna
Kadagiti naglabas a siglo, nangipaay ni Jehova a Dios ti kanayonan pay a detalye maipapan iti ‘bin-i ti babai’ ken ti ‘bin-i ni Abraham,’ ket babaen kadagiti mammadtona impakaammona ti iyaay ti Mesias. Idi nadanonen ti naikeddeng a tiempo, ti Dios indemostrana ti ayatna iti di maartapan a pamay-an—babaen ti panangibaonna iti bugbugtong nga Anakna ditoy daga a mangipaay iti dayta a subbot.
Iti daytoy nakaskasdaaw a probisionna, insurat ni apostol Juan: “Ta kasta la unay ti panagayat ti Dios iti lubong ta intedna ti Anakna a bugbugtong, tapno amin a maaddaan ti pammati kenkuana saan a mapukaw no di ket adda biagna nga agnanayon.” (Juan 3:16) Agsipud ta ti ayat ti Dios baeten ti Anakna, ni Jesu-Kristo, ti nadaeg unay, sibibiddut nga impato dagiti dadduma nga isu ket saan a ti isu met laeng a Dios a daydiay masasao idiay Hebreo a Kasuratan a nangiyeg iti pannusa ken panangukom.
Ngem ti aya Dios nga insuro ni Jesus ti naiduma manipud iti Dios a nailadawan iti Hebreo a Kasuratan? Wenno gapu laeng aya ta pinili dagiti tattao a kitaen ti kayatda a kitaen? Saan aya a dayta nakalatlatak a kasuratan, ti Juan 3:16, ipakitana a silalawag a no ti maysa ket di ‘maaddaan ti pammati’ iti Anak, dayta ket “mapukaw”? Mainayon pay, intuloy ni Juan a kunaen: “Ngem ti saan nga agtulnog iti Anak saannanto a makita ti biag, no di ket ti pungtot ti Dios agtaeng kenkuana,” (Juan 3:36) No daytoy ket nikaanoman dina kissayan ti kinadakkel ti ayat ti Dios, ngarud apay ketdin a dagiti sasao ti panangiyebkasna iti di pannakaay-ayo kadagiti di matalek nga Israelitas ken kadagiti dadduma iti Hebreo a Kasuratan ti mamagbalin kenkuana a saan a Dios ti ayat?
Ti Naayat a Panggep ti Dios Agpaay Kadakayo
Babaen ken mammadtona a Malakias, kinuna ti Dios: “Ta siak ni Jehova; diak agbaliw.” (Malakias 3:6) Saan laeng nga isut’ nagtalinaed a di nagbaliw kas Dios ti ayat no di ket ti naayat a panggepna maipaay iti sangatauan ken ti daga ti nagtalinaed met a di nagbaliw. Kas ti panangisaad ni Jehova iti imatang da Adan ken ni Eva ti namnama ti biag nga agnanayon iti maysa a naindagaan a paraiso, kasta met daytoy a Dios ti ayat kayatnakayo nga agbalin a maysa kadagidiay agbiagto nga agnanayon a siraragsak iti dayta a Paraiso. (Lucas 23:43; 2 Pedro 3:13; Apocalipsis 21:4) Ngem ania ti kasapulan? Kuna ni Jesus: “Daytoy kaipapananna ti biag nga agnanayon, ti panangammoda kenka, a maymaysa a pudno a Dios, ken daydiay imbaonmo, ni Jesu-Kristo.” (Juan 17:3) Maragsakan dagiti Saksi ni Jehova a tumulong kadakayo a mangammo ti maipapan ken Jehova, ti Dios ti di agbalbaliw nga ayat.