Ti Sao ni Jehova Nabiag
Dagiti Tampok iti Surat ni Juan ken iti Surat ni Judas
DAGITI tallo a surat ni apostol Juan a nalabit naisurat idi 98 K.P. idiay Efeso ket karaman kadagiti maudi a libro a linaon ti naipaltiing a Kasuratan. Ti umuna a dua a surat paregtaenna dagiti Kristiano nga agtultuloy a magna iti lawag ken mangbusor iti apostasia. Iti maikatlo a surat, saan laeng nga imbaga ni Juan ti maipapan iti pannagna iti kinapudno no di ket imparegtana pay ti Nakristianuan a panagtutunos.
Iti surat nga inaramidna idiay Palestina idi agarup 65 K.P., ni Judas a kabsat ni Jesus iti ina pinakdaaranna dagiti padana a Kristiano maipapan kadagiti nadangkes a tattao a nakalibas a simrek iti kongregasion, ken namalakad no kasano a sarangten dagiti dakes nga impluensia. Makapagtalinaedtayo a natibker iti pammati iti laksid dagiti tubeng no ipangagtayo ti mensahe ti tallo a surat ni Juan ken ti surat ni Judas.—Heb. 4:12.
ITULTULOYYO TI MAGNA ITI LAWAG KEN AYAT KEN BABAEN ITI PAMMATI
Gapu ta nairanta nga agpaay iti intero a timpuyog dagidiay naikaykaysa iti Kristo, ti umuna a surat ni Juan ket mangipaay iti nasayaat a balakad a tumulong kadagiti Kristiano a mangbusor iti apostasia ken agtalinaed a natibker iti kinapudno ken iti kinalinteg. Ipaganetgetna ti kinapateg ti agtultuloy a pannagna iti lawag ken ayat ken babaen iti pammati.
Insurat ni Juan: “No magmagnatayo iti lawag a kas isu [ti Dios] adda iti lawag, adda pannakiramantayo iti maysa ken maysa.” Ken yantangay ti Dios ti Gubuayan ti ayat, kinuna ti apostol: “Itultuloytayo koma nga ayaten ti maysa ken maysa.” Gapu ta “ti ayat iti Dios” ti mangtignay kadatayo a ‘mangtungpal kadagiti bilinna,’ maparmektayo ti lubong babaen iti “pammatitayo” ken Jehova, iti Saona, ken iti Anakna.—1 Juan 1:7; 4:7; 5:3, 4.
Sungbat Kadagiti Nainkasuratan a Saludsod:
2:2; 4:10—Kasano a ni Jesus ket “pangikappia a sakripisio”? Ti pannakikappia kaipapananna ti “panangay-ayo.” Indaton ni Jesus ti biagna kas pangikappia a sakripisio iti anag nga iti panangaramidna iti dayta, naay-ayona, wenno natungpalna ti kalikaguman ti naan-anay a hustisia. Maibatay iti dayta a sakripisio, ti Dios maipaayna ti asi ken mapakawanna ti basbasol dagidiay mamati ken Jesus.—Juan 3:16; Roma 6:23.
2:7, 8—Ania a bilin ti dakdakamaten ni Juan kas “daan” ken kas “baro”? Dakdakamaten ni Juan ti bilin maipapan iti managsakripisio nga ayat kadagiti kakabsat. (Juan 13:34) Tinukoyna dayta kas “daan” agsipud ta impaay dayta ni Jesus nasurok nga 60 a tawen sakbay nga insurat ni Juan ti umuna a napaltiingan a suratna. Gapuna, naammuan daytan dagiti manamati “nanipud idi damo” a nagbalinda a Kristiano. “Baro” met dayta a bilin agsipud ta saanna laeng a saklawen ti ‘panagayat iti pada a tao a kas iti bagi’ no di ket kalikagumanna pay ti managsakripisio nga ayat.—Lev. 19:18; Juan 15:12, 13.
3:2—Ania ti “saan pay a naiparangarang” kadagiti napulotan a Kristiano, ken siasino ti makitadanto “kas iti kinaisuna”? Ti saan pay a naiparangarang kadakuada ket no anianto ti langada inton mapagungarda iti espiritu a bagi idiay langit. (Fil. 3:20, 21) Nupay kasta, ammoda a no “kaanoman nga isu [ti Dios] maiparangarang agbalin[danto] a kas kenkuana, agsipud ta isu makita[danto] kas iti kinaisuna,” kayatna a sawen, kas “ti Espiritu.”—2 Cor. 3:17, 18.
5:5-8—Kasano a ti danum, dara, ken ti espiritu saksianda ti kinapudno a ni “Jesus isu ti Anak ti Dios”? Ti danum ket nangsaksi gapu ta idi nabautisaran ni Jesus iti danum, inyebkas a mismo ni Jehova ti pananganamongna kenkuana kas ti Anakna. (Mat. 3:17) Ti dara, wenno ti biag ni Jesus a naipaay kas “katupag a subbot nga agpaay iti isuamin,” imparangarangna met a ni Jesus ket Anak ti Dios. (1 Tim. 2:5, 6) Ken nangsaksi met ti nasantuan nga espiritu a ni Jesus ti Anak ti Dios idi bimmaba dayta kenkuana bayat ti pannakabautisarna, isu a nabaelan ni Jesus ti nagna “iti daga nga ar-aramidenna ti naimbag ket papaimbagenna amin dagidiay inrurumen ti Diablo.”—Juan 1:29-34; Ara. 10:38.
Dagiti Masursurotayo:
2:9-11; 3:15. No palubosan ti maysa a Kristiano ti aniaman wenno asinoman a mangdadael iti nainkabsatan a panagayatna, isu ket magmagna iti naespirituan a kinasipnget, a dina ammo ti papananna.
ITULTULOYYO TI ‘MAGNA ITI KINAPUDNO’
Kastoy ti panglukat a sasao ni Juan iti maikadua a suratna: “Ti lakay agpaay iti ina a napili ken iti annakna.” Maragragsakan ta nasarakanna “ti dadduma iti annak[na] a magmagnada iti kinapudno.”—2 Juan 1, 4.
Kalpasan nga imparegtana ti panangpatanor iti ayat, insurat ni Juan: “Daytoy ti kaipapanan ti ayat, nga agtultuloytayo a magna maitunos kadagiti bilinna.” Namakdaar met ni Juan maipapan iti “manangallilaw ken ti antikristo.”—2 Juan 5-7.
Sungbat Kadagiti Nainkasuratan a Saludsod:
1, 13—Siasino ti “ina a napili”? Mabalin a tuktukoyen ni Juan ti babai nga agnagan iti Kyria, nga isu ti Griego para iti sao nga “ina.” Wenno nalabit ar-aramatenna dayta kas simboliko a pangawag iti maysa a kongregasion tapno matikaw dagiti manangidadanes. No ti naud-udi a nadakamat ti tuktukoyen ni Juan, ti annakna ngarud ket dagiti kameng dayta a kongregasion. Ti met ‘annak ti kabsatna a babai’ ket dagidiay kameng ti sabali a kongregasion.
7—Ania nga ‘iyaay’ ni Jesus ti tuktukoyen ditoy ni Juan, ken kasano a dagiti manangallilaw ket “saan a mangipudpudno” iti dayta? Ti ‘iyaay’ a nadakamat ditoy saanna a tuktukoyen ti di makita nga iyaay ni Jesus iti masanguanan, no di ket ti panaglasag ni Jesus ken ti panagbalinna a napulotan kas ti Kristo. (1 Juan 4:2) Dagiti manangallilaw saanda a bigbigen dayta a panaglasag. Nalabit ilibakda a ni Jesus ket nagbiag ditoy daga wenno ilaksidda nga isu ket napulotan iti nasantuan nga espiritu.
Dagiti Masursurotayo:
2, 4. Ti pannakaammotayo “iti kinapudno”—ti amin a Nakristianuan a sursuro a masarakan iti Biblia—ken ti panangipangagtayo iti dayta ket nagpateg iti pannakaisalakantayo.—3 Juan 3, 4.
8-11. No ditay kayat a mapukaw ti “di kaikarian a kinamanangngaasi, asi ken talna manipud iti Dios nga Ama ken manipud ken Jesu-Kristo,” agraman ti naayat a timpuyogtayo kas agkakapammatian, nasken a ‘siputantayo’ ti naespirituan a kasasaadtayo ken ilaksidtayo dagidiay “saan nga agtalinaed iti sursuro ti Kristo.”—2 Juan 3.
AGBALINKAYO A “KATRABAHUAN ITI KINAPUDNO”
Ti maikatlo a surat ni Juan ket naiturong iti nasinged a gayyemna a ni Gayo. Insuratna: “Awanen ti adda kaniak a dakdakkel pay a pakaigapuan ti kinamanagyaman ngem kadagitoy a banag, a mangngegko koma a ti annakko agtultuloyda a magna iti kinapudno.”—3 Juan 4.
Ni Juan kinomendaranna ni Gayo gapu iti ‘ar-aramidenna a matalek a trabaho’ a panangsuporta kadagiti bumisbisita a kakabsat. Kinuna ti apostol: “Pagrebbengantayo nga awaten dagiti kasta a tattao buyogen ti kinamanagpadagus, tapno agbalintayo a katrabahuan iti kinapudno.”—3 Juan 5-8.
Sungbat Kadagiti Nainkasuratan a Saludsod:
11—Apay a ti dadduma ket agar-aramid iti dakes? Gapu ta saanda a natibker iti naespirituan, saanda a makita ti Dios babaen ti mata ti pannakaawatda. Yantangay dida makita babaen kadagiti literal a matada, agtigtignayda a kasla saan ida a kitkitaen ti Dios.—Ezeq. 9:9.
14—Siasino dagiti natukoy kas “gagayyem”? Ti termino ditoy a “gagayyem” ramanenna saan laeng a dagidiay addaan nasinged a pannakipagayam. Inusar ni Juan dayta a tumukoy kadagiti amin a kapammatian.
Dagiti Masursurotayo:
4. Maragsakan unay dagiti natataengan iti naespirituan no makitada nga ‘agtultuloy a magna iti kinapudno’ dagiti kabbaro a kameng ti kongregasion. Ken anian nga awan kaaspingna a rag-o ti marikna dagiti nagannak no napadakkelda dagiti annakda kas ad-adipen ni Jehova!
5-8. Karaman kadagidiay agtartrabaho a sipipinget maigapu iti panagayatda ken Jehova ken kadagiti kakabsatda ket dagiti agdaldaliasat a manangaywan, misionero, agserserbi kadagiti pagtaengan ti Bethel wenno sanga nga opisina, ken payunir. Mapagwadan ti pammatida ken maikarida iti naayat a suportatayo.
9-12. Nasken a tuladentayo ti ulidan ni matalek a Demetrio saan ket a ti salawasaw ken manangpardaya a ni Diotrefes.
“PAGTALINAEDENYO TI BAGBAGIYO ITI AYAT TI DIOS”
Sigun ken Judas, dagidiay nakastrek iti kongregasion ket “managtanabutobda, managreklamo maipapan iti kasasaadda iti biag, nga agtultuloyda sigun iti bukodda a tartarigagay . . . Agsao[da] . . . iti napalangguad a bambanag, bayat a pagrukbabanda dagiti personalidad.”—Jud. 4, 16.
Kasano a masaranget dagiti Kristiano dagiti dakes nga impluensia? Insurat ni Judas: “Dungdunguen, lagipenyo ti sasao a siguden nga insawang dagiti apostol ni Apotayo a Jesu-Kristo.” Sana innayon: “Pagtalinaedenyo ti bagbagiyo iti ayat ti Dios.”—Jud. 17-21.
Sungbat Kadagiti Nainkasuratan a Saludsod:
3, 4—Apay nga inggunamgunam ni Judas kadagiti Kristiano a ‘makidangadangda a sipipinget maipaay iti pammati’? Agsipud ta ‘adda di nadiosan a tattao a nakalibas a simrek iti kongregasion.’ Dagita a tattao “pagbalbalinenda ti di kaikarian a kinamanangngaasi ti Diostayo kas pambar maipaay iti nalulok a kababalin.”
20, 21—Kasanotayo a ‘pagtalinaeden ti bagbagitayo iti ayat ti Dios’? Maaramidtay dayta iti tallo a wagas: (1) pabilgentayo ti bagbagitayo iti ‘kasasantuan a pammati’ babaen ti napasnek a panagadal iti Sao ti Dios ken naregta a pannakiramantayo iti trabaho a panangasaba; (2) panagkararag “buyogen ti nasantuan nga espiritu,” wenno maitunos iti pannakabalinna; ken (3) alagadentayo ti pammati iti daton a pangsubbot ni Jesu-Kristo—ti mamagbalin a posible ti pannakagun-odtayo iti agnanayon a biag.—Juan 3:16, 36.
Dagiti Masursurotayo:
5-7. Maliklikan ngata dagiti nadangkes ti panangukom ti Dios? Sigun iti tallo a mamakdaar nga ehemplo nga insurat ni Judas, imposible dayta.
8-10. Rumbeng a tuladentayo ti ulidan ni Miguel nga arkanghel ken ipakitatayo ti panagraem kadagidiay impaayan ni Jehova iti autoridad.
12. No kasano a dagiti bato a nakalemmeng iti uneg ti danum ket mamagpeggad kadagiti barko wenno lumalangoy, dagiti apostata a sinsinan ti ayat nga ipakpakitada ket mamagpeggad met iti pammatitayo. Nalabit kasla naparabur dagiti ulbod a mannursuro ngem kasda la kadagiti ulep nga awanan iti danum gapu ta kawawda iti naespirituan. Dagiti kasta a tattao ket umasping kadagiti natay ken awanan bunga a kaykayo iti arinunos ti otonio. Madadaeldanto a kas kadagiti naparut a kayo. Nainsiriban a liklikantayo dagiti apostata.
22, 23. Dagiti pudno a Kristiano guraenda ti dakes. Kas panangikagumaanda a mangisalakan kadagidiay “sumagmamano nga addaan kadagiti panagduadua” manipud iti apuy ti agnanayon a pannakadadael, dagiti natataengan iti kongregasion, nangnangruna dagiti nadutokan a manangaywan ket mangipapaay kadakuada iti naespirituan a tulong.
[Dagiti Ladawan iti panid 28]
Ti danum, espiritu, ken dara paneknekanda a ni “Jesus isu ti Anak ti Dios”