Panagserbi kas Managtalek a Katulongan ni Jehova

“Imparangna kenka, O tao, daydiay naimbag. Ket ania aya ti iparebbeng ni Jehova kenka no di laeng ti agaramid a sililinteg ken iti kinamanangngaasi ken pannagna a sipapakumbaba iti Diosmo?”​—MIKIAS 6:8.

1. Iti ania a Nainkasuratan a pakaibatayan nga amin nga ad-adipen ni Jehova itatta mabalin a maawagan dagiti “katulonganna”?

INSURAT ni Kristiano nga apostol Juan: “Kitaenyo no ania a kita ti ayat ti insagut kadatayo ti Ama, tapno managantay annak ti Dios; ket annaknatay ngarud.” (1 Juan 3:1) Ket kinuna ni apostol Pablo maipapan iti bagina ken ni kaduana nga Apolos: “A katulongnakam ti Dios.” (1 Corinto 3:9) Agpadpada a dagitoy a sasao ti inyebkas dagiti ken maipapan kadagiti napulotan a paspasurot ni Jesu-Kristo. Ngem iti prinsipiona agaplikarda iti isuamin a pudno nga ad-adipen ti Dios. Gapuna mabalin a maikuna dagitoy ti sabali a pannao: ‘Kitaenyo no ania a kita ti ayat ti impaay ti Ama kadatayo nga agbalintay a katulongan ni Jehova.’

2. Apay a posible ti panagbalin dagiti ad-adipen ni Jehova kas katulonganna?

² Kasano a posible a maipaay iti nakapuy, imperpekto a tattao nga agbalin a katulongan ti naindaklan a Namarsua, nga awan patingga ti pannakabalin ken kinasiribna, naan-anay iti kinahustisia, ken ti personipikasion ti ayat? Daytoy ket posible agsipud ta dagiti immuna a nagannak kadatayo naaramidda a kaladladawan ken kaasping ti Namarsua ken ti katulonganna, ti Verbo, wenno Logos. (Genesis 1:26, 27; Juan 1:1) Gapuna naikkan dagiti immuna a nagannak kadatayo ti maysa a rukod ti kinasirib, kinahustisia, pannakabalin, ken ayat. Dayta ti gapuna no apay a maikuna ni Jehova kadagiti naindagaan nga ad-adipenna babaen ti mammadtona: “Imparangna kenka, O tao, daydiay naimbag. Ket ania aya ti iparebbeng ni Jehova kenka no di laeng ti agaramid a sililinteg ken iti kinamanangngaasi ken pannagna a sipapakumbaba iti Diosmo?”​—Mikias 6:8.

3. Aniat’ isingasing ti Mikias 6:8, ket aniat’ kasapulan iti maysa a tao sakbay nga isut’ agbalin a katulongan ni Jehova?

³ No mabasatayo dagiti sasao nga, “Ania aya ti iparebbeng ni Jehova kenka no di laeng . . . ?” isingsingasingna a daydiay sumarsaruno naimbag ti pananggupgopna ti responsabilidad ti ‘tao’ iti Dios ken iti padana a tattao. No ania ti saklawen daytoy a pudpudno ti agbalinto a nalawag bayat nga agtultuloy ti panagsasaritatayo. Siempre, saan nga uray siasino lattan ti mabalin a makipagna ken ni Jehova. Daytoy a pribilehio ti naireserba nga agpaay kadagidiay ‘makisinnabet kenkuana babaen iti panagtulag,’ kayariganna. (Amos 3:3) Kasano a kasta? Babaen ti panangaramid iti awan inkedkedna a dedikasion ken ni Jehova ken insimbolo daytoy iti bautismo iti danum, kas imparangarang ti napalabas nga artikulo. Gapuna, aniat’ kaipapanan ti Mikias 6:8 kadagitoy a tattao?

‘Agaramid a Sililinteg’

4. Kangrunaan, aniat’ kaipapanan ti “agaramid a sililinteg”?

⁴ Umuna, adda ti pagalagadan nga “agaramid a sililinteg.” Kas katulongan ni Jehova a Dios, masapul a maaddaantayo ti nadalus a konsiensia. Ti “agaramid a sililinteg” kayatna a sawen nangnangruna ti panagaramid ti nalinteg, nga isut’ kalkalikaguman ti Dios kadatayo. Kaipapanan daytoy a masapul a tungpalentayo dagiti obligasiontayo, a ti kangrunaanna isu ti panangipaaytayo ken ni Jehova ti naipamaysa a debosion. (Nahum 1:2) Saanna nga ipalubos nga isut’ maaddaan ti karibal. Ditay mabalin ti agpaadipen iti dua nga appo.​—1 Corinto 10:22; Mateo 6:24.

5. Kasanot’ panangipakita ni Jesu-Kristo nga inayatna ti kinalinteg ken ginurana ti kinadakes?

⁵ Mainayon pay, tapno “agaramid a sililinteg,” masapul nga ‘ayatentayo ti kinalinteg ken guraentayo ti kinadakes,’ kas inaramid ni Jesu-Kristo. Gapu iti ayatna iti kinalinteg, isu a mismo ket “awan basolna, di natulawan, adayo kadagiti managbasol.” (Salmo 45:7; Hebreo 7:26) Ket gapu ta ginura ni Jesus ti kinadakes, buyogen iti nalinteg a panagpungtot a kinastigona dagiti managinsisingpet ken naagum a narelihiusuan a papangulo idi kaaldawanna.​—Mateo 23:13-36; Juan 8:44.

6. Apay a kasapulan ti ad-adda pay ngem ti pannakaadda kadatayo ti basta iyaanamong ti isip a rebbeng a liklikantayo ti ania a maiparit gapu ta daytat’ dakes?

⁶ Kas makita manipud ulidan ni Jesus, saan nga umdas ti basta ayaten ti kinalinteg. Masapul met a guraentayo​—wen, karurod, masimron, maariek, maaddaan iti napigsa a pananggura​—iti dakes. Gapu ta ti pagannayasantayo ket dakes manipud ti kinaubing ken ti puspusotayo ti manangallilaw, traidor, kasapulantayo ti ad-adda ngem ti basta pammalubos ti isip a ti banag a dakes ket maiparit. (Genesis 8:21; Jeremias 17:9) Malaksid a sipipigsa a busorentayo dagiti pagannayasan nga agbasol ken pannulisog, datayonto ti matnag kadagiti panangallukoyda. Masapul a maaddaantayo iti napigsa a pananggura iti dakes nga impakita ni Finees idi ginayangna dagiti pagassawaan a nagkakaysa iti narugit a panagdaydayaw ken ni Baal iti Peor.​—Numeros 25:5-8.

7. Ania ti adda kadatayo a pammaneknek a di usaren ni Jehova kas katulonganna ti asinoman a managdakdakes?

⁷ Ni Jehova saanna a kayat ket saannanto nga usaren kas katulonganna ti asinoman nga indibidual a managdakdakes. Daytoy ti nalawag idiay Salmo 50:16-18, a sadiay mabasatayo: “Ngem kadagiti nadangkes ti Dios kunana: ‘Ania ti rebbengmo nga aramiden a pangiparangarangmo kadagiti pagal-alagadak, ken iti panangawatmo iti pannakitulagmo ita ngiwatmo? Idinto a karurodmo ti pannursurok, ken ipalladawmo ita likudan dagiti sasaok. Idi nakitam ti maysa a mannanakaw, nakitimpuyogka kenkuana; ken nakiramanka kadagiti nakiabig iti dida asawa.’”

8. Ania a pasamak ti mangipaganetget ti pannakababalaw a pataudentayo no matnagtayo iti kinadakes?

⁸ Mabalin nga okupadotayo iti serbisio ni Jehova, a mangikaskasaba ti naimbag a damag ti Pagarian ti Dios. Ngem no ditayo naannad iti panagteppel, mabalin nga agsalungasingtayo gapu kadagiti nainlasagan a pagkapuyan ket makaiyegtayo iti pakababalawan iti nagan ni Jehova. Gapuna, sumagmamano a tawen ti napalabasen maysa a panglakayen ti nakaaramid iti pannakikamalala iti maysa a naespirituan a kabsat a babai nga addaan iti di manamati nga asawa. Iti rabii a naiyanunsio ti pannakailaksid daydiay dati a panglakayen, ti napapungtotan nga asawa a lalaki simrek idiay Kingdom Hall nga addaan ti shotgun ket pinaltoganna dagiti dua a nakabasol a tattao. Awan kadakuada ti natay, ngem iti sumaganad nga aldaw daytoy ti nagparangen iti pammarang a panid ti kadadakkelan a pagiwarnakan iti Estados Unidos! Pudno unay, ti kinadakes mangiyeg iti pakababalawan.​—Proverbio 6:32.

9. Sigun iti Proverbio 4:23, aniat’ masapul nga igagatayo, ken apay?

⁹ Ngarud, maiyanatup laeng, a mabalakadantayo: “Igagam ta pusom iti amin a regtam, ta aggapu kenkuana dagiti gubuayan ti biag.” (Proverbio 4:23) Wen, masapul a disiplinaentay ti bagbagitayo no ania ti pagpampanunotan dagiti piguratibo a puspusotayo. Lumanlanlan, ti telebision, dagiti magasin, ken dagiti dadduma pay a kita dagiti pagipablaakan ti mangitamtampok kadagiti narugit a bambanag, agraman pornograpia. Gapuna, masapul a nakapilpilitayo koma iti intay buybuyaen, dengdenggen, ken basbasaen. Ti personal a panangkontrol ti pampanunot ti nakapatpateg unay! Kas pangarigan, mabalin a nakalaklaka ti maaddaan ragsak manipud panagpampanunottayo kadagiti seksual a panagar-arapaap, bambanag a ditay man laeng panunoten a padasen iti aktual a panagbiag. (Mateo 5:28) Ngem masansan ti kasta a panagpampanunot ti mangibunga kadagiti dakes nga aramid. Imbes nga agpampanunot kadagita a bambanag, ipakitatay koma ti bunga ti nasantuan nga espiritu a panagteppel ket panunoten dagiti bambanag a nailista idiay Filipos 4:8.​—Galacia 5:22, 23.

“Ayaten ti Kinamanangngaasi”

10, 11. (a) Ania ti paggiddiatan a mabalin nga aramiden iti kinamatalek ken kinasungdo? (b) Kasanot’ panangipamatmat ti Anak ti Dios ti kinamatalek ken kinasungdo?

¹⁰ Ti maikadua a pagalagadan idiay Mikias 6:8 ket “ayatentayo ti kinamanangngaasi.” Ti “ayaten ti kinasungdo” ti pannakaibasa ti The New English Bible ditoy. Ti footnote idiay New World Translation Reference Bible ipakpakitana a ti Hebreo a sao a cheʹsedh, a naipaulog a “kinamanangngaasi,” ti mabalin met nga ipaulog a “naayat a kinamanangngaasi” wenno “nasungdo a panagayat.” Sigun kadagiti lexicograpo, “ti kinasungdo ipasimudaagna ti natibker a panangtungday iti aniaman a sulisog iti itatallikud wenno panangtraidor.” “Ti kinasungdo nayonanna ti kinamatalek ti idea a panagtarigagay a tumakder a kaasibay ken pannakidangadang a maipaay iti maysa a tao wenno banag, uray pay kontra kadagiti napalalo a kinarigat.” Makapainteres a, makitatayo met kadagiti Kasuratan ti bassit a pakaigiddiatan ti pannakausar dagitoy a sasao. Kas pangarigan, ti termino a “kinasungdo” ti pulos di naus-usar kadagiti bambanag nga awan biagna. Ngem maulit-ulit ti sao a “kinamatalek.” Gapuna, ti bulan maaw-awagan “iti matalek a saksi idiay langit.” (Salmo 89:37) Kalpasanna, makunkuna met, dagiti sasao ti Dios kas matalek, kayatna a sawen, mapagpannurayan.a (Apocalipsis 21:5; 22:6) Nupay kasta, ti kinasungdo, ket naipagalad laeng ken ni Jehova a Dios ken kadagiti naanamongan nga ad-adipenna. Gapuna, maipapan ken Jehova, mabasatayo: “Iti nasungdo agparangkanto a sisusungdo.”​—2 Samuel 22:26.

¹¹ Ti Anak ti Dios ti matalek ken nasungdo ken Jehova idiay langit. Ditoy daga, isut’ naglasat kadagiti pannakasuot kas ti tao a Jesu-Kristo ken pinaneknekanna ti kinatulnogna nga isut’ agpadpada a matalek ken nasungdo kas tao. Ipamatmat daytoy ti Hebreo 5:7-9, a pakabasaantayo: “Isu a kadagidi aldaw ti panaglasagna idinto a nangidaton kadagiti karkararag ken dawdawat a nabuyogan iti nasged nga araraw ken lulua, iti daydiay makabalin idi a mangispal kenkuana iti ipapatay, ket idinto a naipangag gapu iti nadiosan nga amakna. Uray pay no isu ti Anak idi, naadalna ti panagtulnog gapu kadagiti bambanag a linak-amna; ket idinto a naaramid nga awan pagkuranganna nagbalin nga isu ti nakin-aramid iti agnanayon a pannakaisalakan kadagiti isuamin nga agtulnog kenkuana.”

Dagiti Suot iti Kinasungdo

12. No maminsan, aniat’ makasuot iti kinasungdotayo, ken kasano ti panagtignay dagiti dadduma kadagita a suot?

¹² Ti kinasungdo ken ni Jehova a Dios sapulenna nga agbalintayo met a nasungdo kadagiti ad-adipenna ditoy daga, dagiti padatayo a Kristiano. Pinagbalin a nalawag daytoy ni apostol Juan idi nga impalagipna kadatayo: “Ta ti saan nga agayat iti kabsatna, isu a nakitana, saanna a mabalin nga ayaten ti Dios isu a dina nakita.” (1 Juan 4:20) Dagiti kinaimperpekto dagiti dadduma ti mabalin a mangsuot iti kinasungdotayo iti daytoy a banag. Kas pangarigan, idi a napasaktanda, dadduma ti nangipamatmat ti kinakapuy ti kinasungdoda iti organisasion ni Jehova babaen ti iyiikayda manipud kadagiti Nakristianuan a panaggigimong. Ti sabali pay a suot ti kinasungdotayo kadagiti kakabsattayo ti tumaud no dagidiay us-usaren ni Jehova a mangidaulo ket agbiddutda iti pangngeddengda. Sagpaminsan, dagita a panagbiddut ti inus-usar dagiti dadduma kas pambar ti panagsakit ti nakemda ket insinada ti bagbagida manipud ti makitkita nga organisasion ni Jehova. Ngem nainkalintegan kadi ti kursoda? Nikaanoman!

13. Apay a ti isisina manipud organisasion ni Jehova saan a nainkalintegan, ket ania dagiti mapagpilian a maidatag kadagita a tattao a di nasungdo?

¹³ Apay a saan a nainkalintegan ti panangpanaw dagita a tattao iti organisasion ti Dios? Agsipud ta ipasiguro ti Saona kadatayo: “Dakkel a talna ti maadda kadagiti agayat iti linteg [ni Jehova], ket awan kadakuada ti pakaitibkolanda.” (Salmo 119:165) Mainayon pay, naibilin kadatayo a “adda koma kadakayo met laeng ti nasged nga ayat iti maysa ken maysa, ta ti ayat abbonganna dagiti adu unay a basbasol.” (1 Pedro 4:8; Proverbio 10:12) Mainayon pay, kas pangarigan insina ti maysa a tao ti bagina manipud ili ni Jehova. Sadino ngay ti papananna? Saan aya a naipasango kadagiti isu met laeng a salisal a naipasango kadagiti apostol ni Jesus idi sinaludsodanna ida no kayatda met ti pumanaw kenkuana? Siuumiso ti isusungbat ni apostol Pedro: “Apo, asinonto ti papananmi? Sika addaanka kadagiti sao ti biag nga agnanayon.” (Juan 6:68) Awan sabali a papananen no di laeng iti “Babilonia a Dakkel,” ti sangalubongan nga imperio ti ulbod a relihion, wenno kadagiti pananggemgem ti napolitikaan nga “atap nga animal” ni Satanas. (Apocalipsis 13:1; 18:1-5) Kaaduanna, dagidiay di nasungdo a nangpanaw iti makitkita nga organisasion ni Jehova ti agpapada ti ar-aramidda kadagidiay adda iti mangibabain iti Dios a “Babilonia a Dakkel.”

“Pannagna a Sipapakumbaba iti Diosmo”

14, 15. (a) Aniat’ kaipapanan ti sao nga Iloko a “napakumbaba”? (b) Iti ania a kaipapanan ti “napakumbaba” ti pakaseknantay ditoy, ken agpaay kadagiti ania a rason? (c) Apay a dagiti Kristiano rebbeng nga ‘isaadda ti natimbeng a panangmatmat kadagiti abilidad wenno pategda’?

¹⁴ Ti sao nga Iloko a “sipapakumbaba” ti addaan sumagmamano a kaipapananna. Mabalin a tukoyen dayta daydiay awan panagpampammarangna, “limitado iti kadakkel, kaadu, wenno kalawa.” Wenno daytat’ maaddaan met ti kaipapanan ti kinadalus ti panagbiag, “nga al-alagadenna ti kinatakneng iti panagkawkawes ken kababalin.” (1 Timoteo 2:9) Sa adda pay met daydiay kaipapanan ti “kinapakumbaba” nga isut’ nangnangruna a pakaseknantayo, awan sabali, ti pannakaammo a kanayon ti maysa kadagiti limitasionna wenno “panangikabil iti natimbeng a panangrukod ti maysa kadagiti abilidad wenno pategna.” Ditay pulos agbalin a kas maysa a katulongan ni Jehova no nangato unay ti panangipapantay iti bagbagitayo a mangal-ala ti atension kadagiti bagbagitayo imbes nga ipaay ti nangnangruna nga atension ken ni Jehova a Dios.

¹⁵ ‘Ti panangisaad ti natimbeng a panangmatmat kadagiti abilidad wenno kinapategtayo’ ti nalawag a kaipapananna nga isut’ rebbeng nga inaigtayo iti Hebreo a sao a naipaulog a “kinapakumbaba” idiay Mikias 6:8. Nalawag daytoy manipud pannakausar ti sao iti sabali pay a nakaaramatanna iti Hebreo a Kasuratan. Idiay Proverbio 11:2 daytat’ naigiddiat saan nga iti seksual a kinarugit no di ket iti kinatangsit, nga isut’ resulta ti nalabes a panangpampanunot iti bagi ti maysa. Sadiay intay mabasa: “Immay kadi ti kinatangsit? Umay metten ni bain; ngem kadagiti napakumbaba adda ni sirib.” Ti panagbalin a napakumbaba isut’ kagidgiddan ti kaadda ti panagbuteng ken ni Jehova, nga isu met ti nainaig idi iti kinasirib. (Salmo 111:10) Ti tao a napakumbaba ket addaan panagbuteng ken ni Jehova agsipud ta pagaammona ti nagdakkelan a pagdumaan nga adda iti nagbaetanna ken ti Dios, iti nagbaetan ti kinalinteg ken pannakabalin ni Jehova ken ti mismo a kinaimperpekto ken pagkapuyanna. Gapuna, ti tao a napakumbaba turposenna ti pannakaisalakanna a buyogen ti buteng ken pigerger.​—Filipos 2:12.

16. Aniat’ sumagmamano a kasuratan a mangipakpakita no apay a rebbeng dagiti Kristiano ti agpakumbaba?

¹⁶ Nakaad-adu dagiti rason no apay a dagiti katulongan ni Jehova rebbeng a napakumbabada! Agpapan pay ti adda kadatayo a kinasirib, iti pisikal a pigsa a naipaay kadatayo, wenno uray kasano kaadu ti material a kinabaknangtayo, awan gapu ti intay pagtangsitan. (Jeremias 9:23) Apay nga awan? Gapu iti prinsipio a naiyebkas idiay 1 Corinto 4:7: “Ta siasino ti mangaramid kenka a maidumaka? Wenno ania ti adda kenka a dika inawat? Ngem no inawatmo, apay-apay a pagtangsitmo, a kasla ket tay dika inawaten?” Awanantay met ti aniaman a rason a pagtangsitan gapu kadagiti bungbunga ti ministeriotayo, ta ditay aya nabasa idiay 1 Corinto 3:6, 7? Sadiay kuna ni Pablo: “Nagmulaak, ni Apolos nagsibug, ngem inted ti Dios ti idadakkel; iti kasta, uray ti agmula, uray ti agsibug, awan aniaman no di laeng ti Dios a mangted ti idadakkel.” Dagiti sasao ni Jesus idiay Lucas 17:10 ti rebbeng a makatulong met iti panagtalinaedtayo koma a napakumbaba, ta kinunana: “Inton naaramidyo ti isuamin a naibilin kadakayo, kunaenyo, ‘Ad-adipenkami nga awan kapapaayan. Ta inaramidmi laeng ti rebbengmi nga aramiden.’”

17. Apay a ti kinapakumbaba pudno nga isu ti dalan ti kinasirib?

¹⁷ Ti panagbalin a napakumbaba ket pudno nga isu ti dalan ti kinasirib. Ti kinapakumbaba ti mamagbalin kadatayo a kontento sadinoman ti pakaipaayan kadatayo ti pribilehio nga agserbi. No napakumbaba wenno nanumotayo, ditayto sigagaramugam a padpadasen a sumilnag no di ket kontentotayo a pagbalinen ti bagbagitayo kas “ti kanumuan.” (Lucas 9:48) Ken, maaddaantay met ti kababalin ti salmista, a nagkuna: “Ta ti maysa nga aldaw kadagiti paraanganmo nasaysayaat ngem sangaribo iti sabali a disso. Kaykayatko laengen ti agbantay iti ruangan ti balay ti Diosko ngem ti panagnaed kadagiti kalapaw ti kinadangkes.” (Salmo 84:10) Mainayon pay, no napakumbabatayo, maaddaantayto ti ayat nga isut’ mangtignay kadatayo a mangidaulo iti panangipakita ti pammadayaw kadagiti sabsabali.​—Roma 12:10.

Ti Kinapakumbaba Makaay-ayo kadagiti Agtutubo

18. (a) Apay a ti kinapakumbaba nangnangruna a maiyanatup kadagiti agtutubo? (b) Ti pannakasapul ti kinapakumbaba ket paneknekan ti ania a rekord a nakairamanan dagiti moderno-aldaw nga agtutubo?

¹⁸ Nangnangruna a maiyanatup kadagiti Kristiano nga agtutubo nga adornuan ti bagbagida iti pagan-anay ti kinapakumbaba. Anian a nagsayaat nga ulidan ti ipaay ni Eliu kadakuada! Nupay isut’ addaan kadagiti umiso a sungbat, isut’ situtulok a naguray a sidadayaw agingga a nakapagsaon dagiti natataengan. (Job 32:6, 7) Masansan, adda pagannayasan dagiti agtutubo a maaddaan ti panagtalek unay iti bagida, a bassit ti pannakaawatda kadagiti limitasionda. Agsipud ta addaanda iti pigsa ti pammagi ken nakagun-odda metten ti sumagmamano a pannakaammo, mabalin nga agannayasda a kasla kitaen nga ipababa dagiti natataengan. Ngem ti pannakaammo ket saan a kaasping iti kinasirib, nga isu ti panangiyaplikar iti pannakaammo. Gagangay isu ti nakalkaldaang a rekord nga ar-aramiden dagiti moderno nga agtutubo idiay Estados Unidos. Sadiay, 63 porsiento kadagiti maar-aresto kadagiti kangrunaan a krimen ramanenna dagiti tattao iti kinaagtutuboda agingga iti 24 años, a 30 porsiento kadagiti maar-aresto ti adda iti baba ti edad a 18. Naipadamag met a ti “nabartek wenno apektado iti droga a panagmammaneho ti kangrunaan a makagapu iti ipapatay dagiti Americano nga agedad ti 15-24.” Iti dayta a daga, “umad-adu nga umad-adu a panagasawa dagiti tin-edyer ti agtungpal iti deborsio,” idinto a maipadpadamag a “dagiti panagasawa ti ad-adda a napapaut koma no ti nobia ken ti nobio ket maaddaanda pay koma ti sumagmamano pay a tawen ti kinasirib iti likudanda no mapanda iti sanguanan ti altar.”

19. Ania a Nainkasuratan a balakad ti nasayaat unay nga ipapuso dagiti agtutubo?

¹⁹ Ngarud, anian a nainsiriban, ti balakad ti Sao ti Dios! Maiyanatup unay, sursuruanna dagiti agtutubo a dayawenda ti amada ken ti inada, nga agtulnogda kadakuada iti isuamin. (Efeso 6:1-3; Colosas 3:20) Nangnangruna nga ipapuso koma dagiti agtutubo ti masirib a balakad: “Agtalekka ken ni Jehova iti amin a pusom ket dika agtalged iti pannakaawatmo met laeng. Kadagiti amin a dalanmo isu ti bigbigem, ket isu iturongnanto dagiti desdesmo.”​—Proverbio 3:5, 6.

20. Ania dagiti gunggona a mainanama dagiti amin a dedikado ken bautisado a tattao no ipangagda ti Mikias 6:8?

²⁰ Ania dagiti gunggona a manamnamatay amin no, kalpasan ti panangipakitatay ti panagtalek ken Jehova babaen iti dedikasion ken bautismo iti danum, ket ‘alagadentayo ti kinahustisia, ipamatmat ti nasungdo a panagayat ken napakumbabatayo a makipagna iti Diostayo’? Ti kapatgan iti isuamin, maaddaantayo ti anamong ni Jehova gapu ta naragpattay dagiti pagannurotanna ket iti kasta paragsakentayo ti pusona babaen iti pannakiraman iti panangsantipikar ti naindaklan ken mangnibinibi a naganna. (Proverbio 27:11) Mainayon pay, makitatayto kadagiti mismo a panagbiagtayo ti kinapudno ti prinsipio a “ti nadiosan a debosion ti mangted gunggona iti isuamin, ta adda kari iti biag nga agdama ken iti mapasungad.”​—1 Timoteo 4:8.

[Dagiti Footnote]

Ania Dagiti Sungbatyo?

◻ Maitunos iti Mikias 6:8, aniat’ kasapulan tapno “agaramid a sililinteg”?

◻ Aniat’ pakainaigan ti kinasungdo ken Jehova iti pannakirelasiontayo kadagiti padatayo a Kristiano?

◻ Apay a rebbeng a ‘napakumbabatay koma a makipagna iti Diostayo’?

◻ Apay a ti kinapakumbaba nangnangruna a maiyanatup kadagiti Kristiano nga agtutubo?

[Ladawan iti panid 17]

Igaggagayo aya ti pusoyo babaen iti panagbalin a napili no ania ti buybuyaenyo, dengdenggenyo, ken basbasaenyo?

[Ladawan iti panid 18]

Ammo ni Pedro nga awanen ti mabalinda a papanan agsipud ta ni Jesus ti addaan “kadagiti sao ti biag nga agnanayon.” Determinadokay met aya nga agtalinaed a nasungdo iti organisasion ni Jehova?