ALFA KEN OMEGA
Dagitoy ti pangnagan iti umuna ken maudi a letra ti Griego nga alpabeto ken namitlo a naaramat kas titulo iti libro ti Apocalipsis. Nupay kasta, ti kanayonan a panagparang daytoy a sasao iti King James a patarus iti Apocalipsis 1:11 saan a pasingkedan ti sumagmamano kadagiti kadadaanan a Griego a manuskrito, a pakairamanan ti Alexandrine, Sinaitic, ken Codex Ephraemi rescriptus. Ngarud, naikkat dayta iti adu nga agdama-aldaw a patarus.
Nupay ti adu a komentarista iyaplikarda daytoy a titulo agpadpada iti Dios ken ni Kristo, ti naan-annad a panangsukimat iti usarna kednganna ti pakayaplikaran dayta kas agpaay laeng ken Jehova a Dios. Ipakita ti umuna a bersikulo ti Apocalipsis a ti palgaak immuna nga inted ti Dios dayta ken babaen ken Jesu-Kristo, ngarud daydiay agsasao (babaen ti maysa nga angheliko a pannakabagi) ket ti Dios a mismo no dadduma, ken ni Kristo Jesus iti dadduma a gundaway. (Apo 22:8) Gapuna kuna ti Apocalipsis 1:8 (RS): “‘Siak ti Alfa ken ti Omega,’ kuna ni Apo Dios [“Jehova a Dios,” NW], daydiay adda ita ken adda idi ken um-umay, ti Mannakabalin-amin.” Nupay ti immuna a bersikulo agsao maipapan ken Kristo Jesus, nalawag nga iti bersikulo 8 agaplikar ti titulo iti “Mannakabalin-amin” a Dios. Maipapan itoy, kunaen ti Barnes’ Notes on the New Testament (1974): “Saan a naan-anay a masigurado a ti mannurat espesipiko a tuktukoyenna ditoy ni Apo Jesus . . . Kasta met nga awan ti pudpudno a karkarna iti panangipagarup a ti mannurat tuktukoyenna ditoy ti Dios a kasta.”
Agparang manen ti titulo iti Apocalipsis 21:6, ket ti sumaruno a bersikulo iyam-ammona ti agsasao babaen ti panagkunana: “Ti asinoman nga agballigi tawidennanto dagitoy a banag, ket siakto ti Diosna ket isunto ti anakko.” Yantangay tinukoy ni Jesus dagidiay makipagtawid kenkuana iti Pagarianna kas “kakabsat,” saan nga “annak,” ti agsasao isu la ketdi ti nailangitan nga Ama ni Jesus, ni Jehova a Dios.—Mt 25:40; idiligyo ti Heb 2:10-12.
Ti maudi a pagparangan ti titulo ket Apocalipsis 22:13, a kunana: “Siak ti Alfa ken ti Omega, ti umuna ken ti maudi, ti pangrugian ken ti panungpalan.” Nabatad a sumagmamano a persona ti naiparang nga agsasao iti daytoy a kapitulo ti Apocalipsis; ipakita ti bersikulo 8 ken 9 a ti anghel nagsao ken Juan, ti bersikulo 16 nabatad nga agaplikar ken Jesus, ti umuna a paset ti bersikulo 17 naipatuldo a sasao ti “espiritu ken ti nobia,” ket daydiay agsasao iti maudi a paset ti bersikulo 20 nalawag a ni Juan a mismo. Ngarud “ti Alfa ken ti Omega” iti bersikulo 12-15 mabalin a siuumiso a lasinen nga isu met laeng daydiay agik-ikut iti dayta a titulo iti sabali pay a dua a nagparanganna: Ni Jehova a Dios. Ti sasao nga, “Adtoy! Umayak a sidadaras,” iti bersikulo 12, saanna a kalikaguman nga iyaplikar ken Jesus dagitoy immunan a nadakamat a bersikulo, yantangay agsao met a mismo ti Dios kas ‘umay’ wenno ‘rummuar’ a mangipakat iti panangukom. (Idiligyo ti Isa 26:21.) Sawen ti Malakias 3:1-6 maipapan iti agkuyog nga iyaay a mangukom ni Jehova ken ti “mensahero[na] ti tulag.”
Ti titulo a “ti Alfa ken ti Omega” addaan iti isu met laeng a kaipapanan a kas “ti umuna ken ti maudi” ken “ti pangrugian ken ti panungpalan” no maaramat dagitoy a termino mainaig ken Jehova. Iti kasakbayanna awan Mannakabalin-amin a Dios, ken awanto ti sumaruno kenkuana. Sibaballigi a pagpatinggaennanto ti isyu maipapan iti Kinadios, agnanayon a naalangon kas maymaysa laeng a Mannakabalin-amin a Dios.—Idiligyo ti Isa 44:6.