Agbalinkay Koma a Naragsak a Managbasa iti Libro nga Apocalipsis

“Naragsak daydiay mangbasa a sipipigsa ken dagidiay dumngeg kadagiti sasao daytoy a padto, ken dagidiay mangtungpal kadagiti bambanag a naisurat iti dayta.”​—APOCALIPSIS 1:3.

1. Ania ti sasaaden ni apostol Juan idi insuratna ti Apocalipsis, ket iti ania a panggep a naisurat dagitoy a sirmata?

SIAK ni Juan . . . addaak idi iti isla a maawagan Patmos gapu iti panagsao maipapan iti Dios ken panangsaksi ken Jesus.” (Apocalipsis 1:9) Kasta ti kasasaad idi insurat ni apostol Juan ti libro nga Apocalipsis. Naikuna nga isu ket naidestiero idiay Patmos kabayatan ti panagturay ti Romano nga Emperador a ni Domitian (81-96 K.P.), a nangipaannurot iti panagdayaw iti emperador ken nangidadanes kadagiti Kristiano. Bayat nga adda idiay Patmos, dimteng ken ni Juan ti agsasaruno a sirmata nga insuratna. Insalaysayna dagitoy, saan a tapno pagkullayawenna dagiti nagkauna a Kristiano, no di ket tapno pakirden, liwliwaen, ken paregtaenna ida gapu kadagiti suot a mapaspasaranda ken dagiti dumtengto pay.​—Aramid 28:22; Apocalipsis 1:4; 2:3, 9,10, 13.

2. Apay a paginteresan dagiti Kristiano ita ti sasaaden idi ni Juan ken dagiti padana a Kristiano?

² Napateg unay ti kaipapananna kadagiti Kristiano ita dagiti kasasaad idi naisurat daytoy a libro ti Biblia. Maidaddadanes idi ni Juan gapu ta isu ket maysa a saksi ni Jehova ken ti Anakna, ni Kristo Jesus. Mairurrurumenda kadagiti padana a Kristiano gapu ta, nupay ikagkagumaanda ti agbalin a naimbag nga umili, dida mabalin ti agdayaw iti emperador. (Lucas 4:8) Kasta met laeng ti sasaaden dagiti pudno a Kristiano ita iti dadduma a pagilian, a ti Estado ti mangikeddeng no ania ti “umiso no maipapan iti relihion.” Gapuna, anian a makaliwliwa dagiti sasao a masarakan iti pangrugian ti libro nga Apocalipsis: “Naragsak daydiay mangbasa a sipipigsa ken dagidiay dumngeg kadagiti sasao daytoy a padto, ken dagidiay mangtungpal kadagiti bambanag a naisurat iti dayta; ta ti naituding a tiempo asidegen.” (Apocalipsis 1:3) Wen, pudno a kinaragsak ken adu a bendision ti sagrapen dagiti napasnek ken natulnog a managbasa iti Apocalipsis.

3. Siasino ti Gubuayan ti Apocalipsis a nayallatiw ken Juan?

³ Siasino ti kangrunaan a Gubuayan ti Apocalipsis, ket ania a kalasugan ti nausar a nangyallatiw iti dayta? Kunaen kadatayo ti umuna a bersikulo: “Ti palgaak ni Jesu-Kristo, nga inted kenkuana ti Dios, tapno ipakitana kadagiti adipenna dagiti bambanag a masapul a maaramid iti mabiit. Ket imbaonna ti anghelna ket baeten kenkuana imparangna dayta babaen kadagiti pagilasinan iti adipenna a ni Juan.” (Apocalipsis 1:1) Iti simple a pannao, ti aktual a Gubuayan ti Apocalipsis isu ni Jehova a Dios, a nangted iti dayta ken Jesus, ket babaen ti maysa nga anghel, inyallatiw ni Jesus ken Juan. No intay usigen pay, maammuantayo nga inaramat met ni Jesus ti nasantuan nga espiritu a nangyallatiw kadagiti mensahe kadagiti kongregasion ken nangted kadagiti sirmata ken ni Juan.​—Apocalipsis 2:7,11, 17, 29; 3:6,13, 22; 4:2; 17:3; 21:10; idiligyo ti Aramid 2:33.

4. Ania ti us-usaren ni Jehova agingga ita a mangidalan iti ilina ditoy daga?

⁴ Us-usaren pay laeng ni Jehova ti Anakna, nga isu ti “ulo ti kongregasion,” a mangisuro kadagiti adipenna ditoy daga. (Efeso 5:23; Isaias 54:13; Juan 6:45) Us-usaren met ni Jehova ti espirituna a mangisuro iti ilina. (Juan 15:26; 1 Corinto 2:10) Ket no kasano nga inusar ni Jesus ti “adipenna a ni Juan” a mangyallatiw iti makapasalun-at a naespirituan a taraon kadagiti kongregasion idi umuna a siglo, us-usarenna met ita ti “matalek ken masirib nga adipen,” a buklen dagiti napulotan a “kakabsatna” ditoy daga, tapno ipaayanna ti sangakabbalayanna ken dagiti kakaduada iti naespirituan a “taraon iti umiso a tiempo.” (Mateo 24:45-47; 25:40) Naragsak dagidiay mangbigbig iti Gubuayan dagiti aw-awatentayo a “naimbag a sagut” kas iti naespirituan a taraon ken ti kalasugan nga us-usarenna.​—Santiago 1:17.

Dagiti Kongregasion nga Iturturong ni Kristo

5. (a) Kadagiti ania a nayarig dagiti Kristiano a kongregasion ken dagiti manangaywanda? (b) Iti laksid ti natauan a kinaimperpekto, ania ti mangted kadatayo iti ragsak?

⁵ Kadagiti umuna a kapitulo ti Apocalipsis, mayarig dagiti kongregasion Kristiano kadagiti pagsilawan. Mayarig dagiti manangaywanda kadagiti anghel (mensahero) ken kadagiti bituen. (Apocalipsis 1:20)a Maipapan iti bagina, binilin ni Kristo ni Juan nga isuratna daytoy: “Dagitoy ti bambanag a kuna daydiay mangig-iggem kadagiti pito a bituen iti makannawan nga imana, isu a magmagna iti nagtetengngaan dagiti pito a nabalitokan a pagsaadan ti pagsilawan.” (Apocalipsis 2:1) Ipakita dagiti pito a mensahe a naipatulod kadagiti pito a kongregasion sadi Asia nga idi umuna a siglo K.P., adda dagiti paglaingan ken pagkapuyan dagiti kongregasion ken dagiti panglakayenda. Pudno met daytoy ita. No kasta, naragragsaktayo no ditay liplipatan a ti Ulotayo a ni Kristo ket adda iti tengnga dagiti kongregasion. Ammona no ania ti talaga a mapaspasamak. Iti simboliko a pamay-an, adda dagiti manangaywan “iti makannawan nga imana,” kayatna a sawen, addada iti babaenna ken iturturongna ida ket sungsungbatanda kenkuana ti pamay-anda a mangipastor kadagiti kongregasion.​—Aramid 20:28; Hebreo 13:17.

6. Ania ti mangipakita a saan laeng a dagiti manangaywan ti adda sungsungbatanna ken Kristo?

⁶ Nupay kasta, al-allilawentay ti bagbagitayo no ipagaruptayo a dagiti laeng manangaywan ti manungsungbat ken Kristo kadagiti aramidda. Iti maysa kadagiti mensahena, kinuna ni Kristo: “Amin dagiti kongregasion maammuandanto a siak daydiay mangsukimat kadagiti bekkel ken puspuso, ket itedkonto iti tumunggal maysa kadakayo sigun kadagiti aramidyo.” (Apocalipsis 2:23) Maysa daytoy a ballaag ken pammaregta​—ballaag ta ammo ni Kristo dagiti nalimed a motibotayo, ken pammaregta ta ipatalgedna kadatayo nga ammo ni Kristo ti panagreggettayo ket bendisionannatayto no aramidentayo ti amin a kabaelantayo.​—Marcos 14:6-9; Lucas 21:3,4.

7. Kasano a dagiti Kristiano sadi Filadelfia ‘sinalimetmetanda ti sao maipapan iti panagibtur ni Jesus’?

⁷ Awan pannubngar a linaon ti mensahe ni Kristo iti kongregasion sadi Filadelfia a siudad ti Lidia, ngem naglaon dayta iti kari a rumbeng a paginteresantayo unay. “Agsipud ta tinaginayonmo ti sao maipapan ti panagibturko, taginayonenkanto met iti oras ti pannakasubok, nga umayto iti isuamin a mapagnaedan a daga, tapno suboken dagidiay agnanaed iti daga.” (Apocalipsis 3:10) Ti Griego para iti “tinaginayonmo ti sao maipapan ti panagibturko” mabalin a kaipapananna met ti “sinalimetmetam ti imbagak maipapan iti panagibtur.” Ipasimudaag ti bersikulo 8 a saan laeng a tinungpal dagiti Kristiano sadi Filadelfia dagiti bilin ni Kristo no di ket sinurotda ti balakadna nga agibturda a simamatalek.​—Mateo 10:22; Lucas 21:19.

8. (a) Ania ti inkari ni Jesus kadagiti Kristiano sadi Filadelfia? (b) Siasino ita ti apektado iti “oras ti pannakasubok”?

⁸ Kinuna pay ni Jesus nga aywananna ida iti “oras ti pannakasubok.” Ditay ammo no ania ti kaipapanan dayta kadagiti Kristiano nga adda idi sadiay. Nupay apagbiit a simmardeng ti panangidadanes kalpasan ti ipapatay ni Domitian idi 96 K.P., naiwayat manen ti agsasagadsad a panangidadanes babaen ken Trajan (98-117 K.P.), nga awan duadua a nangyeg iti ad-adu pay a pannubok. Ngem mapasamak ti nakaro nga “oras ti pannakasubok” iti “aldaw ti Apo” bayat ti “panawen ti panungpalan,” a madama a pagbibiagantayo. (Apocalipsis 1:10; Daniel 12:4,) Naglasat dagiti napulotan-espiritu a Kristiano iti panawen ti pannakasubok kabayatan ken kalpasan unay ti Gubat Sangalubongan I. Ngem, agpatpatuloy pay laeng ti “oras ti pannakasubok.” Apektaranna ti “isuamin a mapagnaedan a daga,” agraman dagiti minilion a mangbukel iti dakkel a bunggoy, a mangnamnama a makalasat iti dakkel a rigat. (Apocalipsis 3:10; 7:9,14) Naragsaktayo no ‘salimetmetantayo ti imbaga ni Jesus maipapan iti panagibtur,’ nga isu daytoy: “Ti nakapagibtur agingga iti panungpalan isunto ti maisalakan.”​—Mateo 24:13.

Naragsak a Panagpasakup iti Kinasoberano ni Jehova

9, 10. (a) Kadagiti ania a pamay-an nga apektarannatay koma ti sirmata maipapan iti trono ni Jehova? (b) Kasano a mangted ragsak kadatayo ti panangbasatayo iti Apocalipsis?

⁹ Pagamangaennatay koma ti sirmata maipapan iti trono ni Jehova ken ti nailangitan a buyotna a nailanad iti kapitulo 4 ken 5 ti Apocalipsis. Matukay koma ti riknatayo kadagiti naimpusuan nga ebkas ti panagdayaw dagiti mannakabalin a nailangitan a parsua a sirarag-o nga agpaspasakup iti nalinteg a kinasoberano ni Jehova. (Apocalipsis 4:8-11) Mangngegan met koma ti timektayo kadagidiay agkuna iti: “Iti Daydiay situtugaw iti trono ken iti Kordero maadda koma ti bendision ken ti dayaw ken ti dayag ken ti pannakabalin iti agnanayon ken awan inggana.”​—Apocalipsis 5:13.

¹⁰ Iti praktikal a pamay-an, kaipapanan daytoy ti sirarag-o a panagpasakuptayo iti pagayatan ni Jehova iti amin a banag. Insurat ni apostol Pablo: “Aniaman ti aramidenyo iti sao wenno iti aramid, aramidenyo ti amin a bambanag iti nagan ni Apo Jesus, nga agyamankayo iti Dios nga Ama baeten kenkuana.” (Colosas 3:17) Ti panangbasatayo iti Apocalipsis pagbalinennatay a pudpudno a naragsak no iti kaunggan ti panunot ken pusotayo ket bigbigentayo ti kinasoberano ni Jehova ken imutektekantayo ti pagayatanna iti amin a benneg ti panagbiagtayo.

11, 12. (a) Kasanonto a magunggon ken madadael ti sistema ni Satanas ditoy daga? (b) Sigun iti Apocalipsis Apo kapitulo 7, siasinonto ti “makabael nga agtakder” iti dayta a tiempo?

¹¹ Ti naragsak a panagpasakup iti kinasoberano ni Jehova ti pakaibatayan ti kinaragsak ti tunggal indibidual ken ti amin nga adda iti uniberso. Din agbayag, gunggonen ken dadaelento ti simboliko a napigsa a ginggined ti sistema ni Satanas ditoy lubong agingga iti mismo a pundasionna. Awanto ti pagkamangan dagiti tao nga agkedked nga agpasakup iti gobierno ti nailangitan a Pagarian ni Kristo, a mangirepresentar iti lehitimo a kinaturay ti Dios. Kuna ti padto: “Dagiti ar-ari ti daga ken dagiti nangato ti saadna ken dagiti kumandante ti militar ken dagiti nabaknang ken dagiti nabileg ken tunggal adipen ken tunggal siwayawaya a tao inlemmengda ti bagbagida kadagiti rukib ken kadagiti masa a batbato kadagiti bantay. Ket itultuloyda a kunaen kadagiti bantay ken kadagiti masa a batbato: ‘Agtinnagkayo kadakami ket ilemmengdakami manipud iti rupa Daydiay situtugaw iti trono ken manipud iti pungtot ti Kordero, agsipud ta ti naindaklan nga aldaw ti pungtotda dimtengen, ket siasino ti makabael nga agtakder?’”​—Apocalipsis 6:12, 15-17.

¹² Maipapan iti dayta a saludsod, iti sumaganad a kapitulo, dineskribir ni apostol Juan dagidiay mangbukel iti dakkel a bunggoy, nga aggapu iti dakkel a rigat, kas ‘sitatakder iti sanguanan ti trono ken iti sanguanan ti Kordero.’ (Apocalipsis 7:9,14, 15) Ti panagtakderda iti sanguanan ti trono ti Dios ipakitana a bigbigenda dayta a trono ken naan-anay nga agpasakupda iti kinasoberano ni Jehova. Dayta ti gapuna nga addaanda iti naanamongan a takder.

13. (a) Ania ti pagrukrukbaban ti kaaduan kadagiti agnaed iti daga, ket ania ti isimbolo ti marka iti muging wenno imada? (b) Isu nga apay a nasken ti panagibtur?

¹³ Iti sabali a bangir, iladawan ti kapitulo 13 ti kaaduan kadagiti agnaed iti daga kas agrukrukbab iti napolitikaan a sistema ni Satanas, nga isimbolo ti atap nga animal. Namarkaan ti‘mugingda’ wenno ti ‘imada,’ a mangipakpakita iti mental ken pisikal a panangsuportada iti dayta a sistema. (Apocalipsis 13:1-8, 16, 17) Kalpasanna, innayon ti kapitulo 14: “No ti asinoman agrukbab iti atap nga animal ken iti ladawanna, ket umawat iti marka iti mugingna wenno iti imana, inumennanto met ti arak ti unget ti Dios a maibukbok nga awan lalaokna iti kopa ti pungtotna . . . Ditoy a kaipapananna ti panagibtur dagiti sasanto, dagidiay mangalagad kadagiti bilin ti Dios ken iti pammati ken Jesus.” (Apocalipsis 14:9,10, 12) Bayat nga aglabas ti panawen, ad-addanto a maisaludsod daytoy: Siasino ti supsuportaranyo? Ni Jehova ken ti kinasoberanona wenno ti dakes a napolitikaan a sistema nga isimbolo ti atap nga animal? Naragsak dagidiay saan nga umawat iti marka ti animal ken agibtur a simamatalek nga agpaspasakup iti kinasoberano ni Jehova.

14, 15. Ania a mensahe ti naiballaet iti panangiladawan ti Apocalipsis iti Armagedon, ket ania ti kaipapanan daytoy kadatayo?

¹⁴ Makikomprontasionto dagiti agtuturay ti “isuamin a mapagnaedan a daga” ken ni Jehova mainaig iti isyu ti kinasoberano. Mapasamakto dayta a panagsango inton Armagedon, ti “gubat ti naindaklan nga aldaw ti Dios a Mannakabalin-amin.” (Apocalipsis 16:14, 16) Bayat a mailadladawan ti panaguurnong dagiti agtuturay iti daga a makigubat ken Jehova, adda naibaet a mamagpanunot a sasao. Bimmallaet ni Jesus a mismo iti sirmata, a kunana: “Adtoy! Umayak a kas maysa a mannanakaw. Naragsak daydiay agtalinaed a siririing ket igagana dagiti makinruar a kawesna, tapno saan koma a magna a lamolamo ket dagiti tattao makitada ti ibainna.” (Apocalipsis 16:15) Mabalin a tuktukoyenna daytoy dagiti Levita a para guardia iti templo a mauksoban ken maibabain iti publiko no matiliwan ida a matmaturog kabayatan ti panagguardiada.

¹⁵ Nalawag ti mensahe: No kayattayo ti maisalakan inton Armagedon, masapul nga agtalinaedtayo a nasalukag iti naespirituan ken salimetmetantayo ti simboliko a pagan-anay a mangipabigbig kadatayo kas matalek a Saksi ni Jehova a Dios. Naragsaktayo no ditay maturog iti naespirituan ken awan sardayna nga itultuloytayo ti makiraman a sireregta iti panangirakurak iti “agnanayon a naimbag a damag” maipapan iti naipasdeken a Pagarian ti Dios.​—Apocalipsis 14:6.

‘Naragsak ti Asinoman Mangtungtungpal Kadagitoy a Sasao’

16. Apay a nangnangruna a makaparagsak dagiti maudi a kapitulo ti Apocalipsis?

¹⁶ Malapunos iti rag-o dagiti naragsak a managbasa iti libro nga Apocalipsis no mabasada dagiti maudi a kapitulo a mangiladawan iti nadayag a namnamatayo​—ti baro a langit ken baro a daga, kayatna a sawen, nalinteg a gobierno ti nailangitan a Pagarian a mangituray iti baro ken nadalusan a kagimongan ti tao, a pakaidayawan ni “Jehova a Dios a Mannakabalin-amin.” (Apocalipsis 21:22) Iti paggibusan dagiti nakaskasdaaw nga agsasagadsad a sirmata, ti anghel a mensahero kinunana ken Juan: “Dagitoy a sasao matalek ken napudnoda; wen, ni Jehova a Dios dagiti naipaltiing nga ebkas dagiti mammadto imbaonna ti anghelna tapno ipakitana kadagiti adipenna dagiti bambanag a masapul a maaramid iti mabiit. Ket, adtoy! umayak a sidadaras. Naragsak ti asinoman a mangtungtungpal kadagiti sasao ti padto daytoy a lukot.”​—Apocalipsis 22:6,7.

17. (a) Ania a pammatalged ti naipaay iti Apocalipsis 22:6? (b) Ania ti pagalibtakantay koma a liklikan?

¹⁷ Dagiti naragsak a managbasa iti Apocalipsis malagipda a dagiti sasao nga umasping kadagitoy ket agparang iti pangrugian ti “lukot.” (Apocalipsis 1:1,3) Ipatalged dagitoy a sasao ‘a maaramidto iti mabiit’ amin a “bambanag” a naipadto iti daytoy maudi a libro ti Biblia. Agbibiagtayon iti arinunos ti panawen ti panungpalan ket sigurado nga agsasarunonto a maaramid a nadaras dagiti agkakanaig a pasamak a naipadto iti Apocalipsis. Gapuna, dinatay koma mailibay ti aniaman a kasla natalged iti sistema ni Satanas. Ti nasalukag nga agbasa laglagipenna dagiti ballaag a naipaay kadagiti mensahe a naipatulod iti pito a kongregasion iti Asia ket liklikanna dagiti palab-og ti materialismo, idolatria, imoralidad, kinabaaw, ken sektarianismo dagiti apostata.

18, 19. (a) Apay a masapul nga umayto pay laeng ni Jesus, ket ania a namnama nga inyebkas ni Juan ti adda kadatayo? (b) Iti ania a panggep nga ‘umayto’ pay laeng ni Jehova?

¹⁸ Iti libro nga Apocalipsis, maulit-ulit nga impakaammo ni Jesus: “Umayak a sidadaras.” (Apocalipsis 2:16; 3:11; 22:7,20a) Masapul nga umayto pay laeng tapno ukomenna ti Babilonia a Dakkel, ti napolitikaan a sistema ni Satanas, ken amin a tattao nga agkedked nga agpasakup iti kinasoberano ni Jehova, nga irepresentar ita ti Mesianiko a Pagarian. Idanggaytayo ti timektayo iti timek ni apostol Juan, a nagkuna: “Amen! Umayka, Apo Jesus.”​—Apocalipsis 22:20b.

¹⁹ Kuna ni Jehova a mismo: “Adtoy! Umayak a sidadaras, ket ti gunggona nga ipaayko adda kaniak, tapno supapakak ti tunggal maysa kas iti aramidna.” (Apocalipsis 22:12) Bayat nga ur-urayentayo ti nadayag a gunggona a biag nga awan inggana kas paset man ti naikari a “baro a langit” wenno ti “baro a daga,” sapay koma ta sireregta a makiramantayo a mangidanon iti daytoy nga awis iti amin a nasingpet panagpuspusona a tattao: “‘Umayka!’ Ket ti asinoman a mawaw umay koma; ti asinoman a mayat awatenna koma ti danum ti biag nga awan bayadna.” (Apocalipsis 22:17) Sapay koma ta agbalinda met a naragsak a managbasa iti naipaltiing ken makaliwliwa a libro ti Apocalipsis!

[Footnote]

Dagiti Punto a Marepaso

◻ Ania a kalasugan ti inusar ni Jehova a nangyallatiw iti Apocalipsis, ket ania ti masursurotayo iti daytoy?

◻ Apay a maragsakantay koma a mangbasa kadagiti mensahe a naipatulod kadagiti pito a kongregasion iti Asia?

◻ Kasanotayo a maaywanan iti “oras ti pannakasubok”?

◻ Ania ti matagiragsaktayo no tungpalentayo dagiti sasao ti lukot a nakaisuratan ti Apocalipsis?

[Ladawan iti panid 15]

Naragsak dagidiay mangbigbig iti Gubuayan ti naimbag a damag

[Ladawan iti panid 18]

Naragsak daydiay agtalinaed a siririing