Kapitulo 5

Nakita ni Juan ni Naipadayag a Jesus

Sirmata 1​—Apocalipsis 1:10–3:22

Suheto: Sukimaten ni Jesus ti naespirituan nga Israel ditoy daga ket mangted iti nabara a pammaregta

Tiempo ti pannakatungpalna: Daytoy a paset ti aldaw ti Apo ket nangrugi idi 1914 ken agngudo inton matay ken mapagungar ti maudi kadagiti matalek a napulotan

1. Kasano a naidatag ti umuna a sirmata, ket kas impasimudaag ni Juan, kaano ti aktual a pannakatungpalna?

MANGRUGI iti kapitulo 1, bersikulo 10 ti umuna a sirmata iti libro nga Apocalipsis. Kas kadagiti dadduma pay a sirmata iti Apocalipsis, naluktan daytoy babaen ti panangibaga ni Juan nga adda karkarna a nangngeg wenno nakitana. (Apocalipsis 1:10, 12; 4:1; 6:1) Iti daytoy umuna a sirmata a naidatag sigun iti kasasaad idi umuna a siglo, naiturong dagiti mensahe kadagiti pito a kongregasion a kapanawenan ni Juan. Ngem impasimudaag ni Juan no kaano ti aktual a pannakatungpalna idi a kinunana: “Babaen iti paltiing addaak idi iti aldaw ti Apo.” (Apocalipsis 1:10a) Kaano daytoy nga “aldaw”? Adda kadi pakainaiganna iti dayta dagiti dramatiko a pasamak kadagitoy a nariribuk a tiempo? No kasta, masapul nga imutektekantayo a naimbag ti padto, ta apektaranna ti mismo a biagtayo​—ken uray ti pannakaisalakantayo.​—1 Tesalonica 5:20, 21.

Iti Aldaw ti Apo

2. Kaano a nangrugi ti aldaw ti Apo, ken kaano nga agngudo?

² Kaano ti ipasimudaag daytoy a pannakatungpal ti Apocalipsis? Bueno, ania aya ti aldaw ti Apo? Nadakamat daytoy ni apostol Pablo kas tiempo ti panangukom ken pannakatungpal dagiti kari ti Dios. (1 Corinto 1:8; 2 Corinto 1:14; Filipos 1:6, 10; 2:16) Iti idadateng dayta nga “aldaw,” in-inut a matungpal dagiti naindaklan a panggep ni Jehova ken sibaballigi nga agturong iti kangitingitanda. Nangrugi dayta nga “aldaw” idi naisaad ni Jesus kas nailangitan nga Ari. Uray pay kalpasan ti panangdadael ni Jesus iti lubong ni Satanas, agtultuloyto latta ti aldaw ti Apo, buyogen ti pannakaisubli ti Paraiso ken panagbalin a perpekto ti sangatauan, agingga a ni Jesus “iyawatna ti pagarian iti Dios ken Amana.”​—1 Corinto 15:24-26; Apocalipsis 6:1, 2.

3. (a) Kasano a ti padto ni Daniel maipapan iti “pito a panawen” ket makatulong kadatayo a mangammo no kaano a nangrugi ti aldaw ti Apo? (b) Ania dagiti pasamak ditoy daga a mangpasingked a nangrugi idi tawen 1914 ti aldaw ti Apo?

³ Ti pannakatungpal dagiti dadduma pay a padto ti Biblia tulongannatayo a mangammo no kaano a nangrugi ti aldaw ti Apo. Kas pagarigan, dinakamat ni Daniel ti maipapan iti pannakapukan ti turay iti kapuonan ni Ari David; kalpasan ti “pito a panawen” maiparangarangto “a ti Kangatuan isu ti Agturay iti pagarian ti sangatauan, ket itedna dayta iti daydiay kayatna.” (Daniel 4:23, 24, 31, 32) Nangrugi ti kangrunaan a kaitungpalan dayta a padto idi a, kas paneknekan ti Biblia, naan-anay a naglangalang ti pagarian ti Juda idi Oktubre 607 K.K.P. Ipakita ti Apocalipsis 12:6, 14 a ti 3 ¹⁄2 a panawen ket agdagup iti 1,260 nga aldaw; ngarud, ti pito a panawen (mamindua dayta a bilang) ket agdagup iti 2,520 nga aldaw. No ipakattayo ti pagannurotan a “ti maysa nga aldaw maipaay iti maysa a tawen,” 2,520 a tawen ti kaunday ti “pito a panawen.” (Ezequiel 4:6) No kasta, nangrugi nga agturay ni Jesus idiay langit idi arinunos ti 1914. Ti panagbettak ti umuna a sangalubongan a gubat iti daydi a tawen ket isu ti “pangrugian dagiti ut-ot ti panagrigat” nga agtultuloy a mangdiddidigra iti sangatauan. Manipud idi 1914, dagiti pasamak iti daytoy daga a namansaan iti dara nalawag a pasingkedanda a nangrugi iti dayta a tawen ti “aldaw” ti kaadda ni Jesus.​—Mateo 24:3-14.a

4. (a) Ania ti ipasimudaag dagiti mismo a sasao iti Apocalipsis no kaano a matungpal ti umuna a sirmata? (b) Kaano nga agngudo ti kaitungpalan ti umuna a sirmata?

⁴ No kasta, ti umuna a sirmata ken ti balakad a linaonna ket agaplikar iti aldaw ti Apo, a nangrugi idi 1914. Pasingkedan daytoy dagiti naud-udi a nailanad iti Apocalipsis a mangsalsalaysay iti pannakaibanag dagiti pudno ken nalinteg a pangngeddeng ti Dios​—paspasamak a ni Apo Jesus ket addaan iti naisangsangayan a paset. (Apocalipsis 11:18; 16:15; 17:1; 19:2, 11) No nangrugi a matungpal ti umuna a sirmata idi 1914, kaano nga agngudo? Kas ipakita a mismo dagiti mensahe, ti organisasion a nakaiturongan dagita ket ti kongregasion ti Dios a buklen dagiti napulotan nga adda ditoy daga. Ngarud, agngudo ti kaitungpalan daytoy umuna a sirmata inton matay ken mapagungar iti nailangitan a biag ti maudi a matalek a kameng dayta a napulotan a kongregasion. Nupay kasta, ti Aldaw ti Apo, a mangyeg kadagiti bendision kadagiti naindagaan a sabsabali a karnero, ket agtultuloy agingga iti ngudo ti Sangaribu a Tawen a Panagturay ni Jesu-Kristo.​—Juan 10:16; Apocalipsis 20:4, 5.

5. (a) Ania ti imbilin ti maysa a timek nga aramiden ni Juan? (b) Apay a nalaka la nga ipan ti maysa a lukot kadagiti “pito a kongregasion”?

⁵ Iti daytoy umuna a sirmata, sakbay a nakakita iti aniaman, adda nangngeg ni Juan: “Nangngegko iti likudak ti maysa a napigsa a timek a kas iti trumpeta, a kunkunana: ‘Ti makitam isuratmo iti maysa a lukot ket ipatulodmo dayta iti pito a kongregasion, idiay Efeso ken idiay Smirna ken idiay Pergamo ken idiay Tiatira ken idiay Sardis ken idiay Filadelfia ken idiay Laodicea.’” (Apocalipsis 1:10b, 11) Maysa a naturay ken mangmanmandar a timek a kas iti uni ti trumpeta ti nangibilin ken ni Juan a suratanna dagiti “pito a kongregasion.” Makaawat iti agsasagadsad a mensahe sana ipakaammo dagiti makita ken mangngegna. Imutektekam ta aktual nga adda idi kaaldawan ni Juan dagiti kongregasion a nadakamat ditoy. Masarakan amin dagitoy idiay Asia Menor, iti mismo a ballasiw ti baybay manipud Patmos. Nalaka a madanon dagitoy gapu kadagiti napintas a kalsada dagiti Romano iti dayta a lugar. Saan ngarud a marigatan ti maysa a mensahero a mangipan iti lukot kadagita a kongregasion. Dagitoy a pito a kongregasion ket umasping iti benneg ti maysa a sirkito dagiti Saksi ni Jehova iti kaaldawantayo.

6. (a) Ania ti kaipapanan dagiti “bambanag nga addan”? (b) Apay a masiguradotayo a dagiti kasasaad iti kongregasion dagiti napulotan a Kristiano ita ket umasping kadagiti kasasaad idi tiempo ni Juan?

⁶ Matungpal kalpasan ti tiempo ni Juan ti kaaduan kadagiti padto iti Apocalipsis. Nadakamat kadagita a padto dagiti “bambanag a maaramidto kalpasan dagitoy.” Ngem dagiti balakad kadagiti pito a kongregasion ket maipapan kadagiti “bambanag nga addan,” dagiti kasasaad nga aktual a mapaspasamak idi kadagiti pito a kongregasion. Makatulong unay dagita a mensahe kadagiti matalek a nadutokan a panglakayen kadagidi a pito a kongregasion, kasta met kadagiti amin a dadduma pay a kongregasion dagiti napulotan a Kristiano iti daydi a tiempo.b Yantangay iti aldaw ti Apo a mapasamak ti kangrunaan a kaitungpalan ti sirmata, ipasimudaag dagiti sasao ni Jesus a manamnama a mapasamak met dagiti umasping a kasasaad iti kongregasion dagiti napulotan a Kristiano iti kaaldawantayo.​—Apocalipsis 1:10, 19.

7. Siasino ti nakita ni Juan iti daytoy umuna a sirmata, ket apay a napateg ken makaparagsak dayta kadatayo ita?

⁷ Iti daytoy umuna a sirmata, nakita ni Juan ni naranga nga Apo Jesu-Kristo iti nailangitan a dayagna. Ania ti ad-adda pay a maikanatad para iti libro dagiti padto maipapan iti naindaklan nga aldaw daytoy nga Apo a dinutokan ti langit? Ken ania ti napatpateg pay koma kadatayo, datayo nga agbibiag iti dayta a panawen ken mangipangpangag iti amin a bilinna? Maysa pay, anian a ragsak dagiti mangsupsuporta iti kinasoberano ni Jehova ta naipanamnama kadakuada a ti Mesianiko a Bin-i, kalpasan nga inibturanna ti amin a suot ken pannakaidadanes nga inyeg ni Satanas ken nagsagaba iti nakas-ang nga ipapatay idi a nadunor ti ‘mukodna’ agarup 2,000 a tawenen ti napalabas, ket sibibiag itan idiay langit, a naikkan iti pannakabalin a mangibanag a sibaballigi iti naindaklan a panggep ti Dios!​—Genesis 3:15.

8. Ania ti sidadaan ita nga aramiden ni Jesus?

⁸ Nabatad a nakasaganan ni Jesus nga agtignay kas agturturayen nga Ari. Isu ti dinutokan ni Jehova kas Kangrunaan a Manangikisap a mangipatungpal kadagiti saanen a mabaliwan a pangngeddengna maibusor iti daytoy daan ken dakes a sistema dagiti bambanag ken iti sairo a diosna a ni Satanas. Sidadaan met a mangukom, saan laeng nga iti lubong, no di ket kadagiti pay kameng ti kongregasionna a buklen dagiti napulotan ken iti dakkel a bunggoy a kakaduada.​—Apocalipsis 7:4, 9; Aramid 17:31.

9. (a) Kasano ti panangdeskribir ni Juan ken ni naipadayag a Jesu-Kristo iti tengnga dagiti nabalitokan a pagsaadan ti silaw? (b) Ania ti ipasimudaag ti arig templo a buya ken ti pagan-anay ni Jesus? (c) Ania ti ipasimudaag ti nabalitokan a barikesna?

⁹ Tinaliaw ni Juan ti naggapuan ti napigsa a timek, ket daytoy ti nakitana: “Timmaliawak tapno kitaek ti timek a makisasao kaniak, ket, idi nakataliawak, nakakitaak iti pito a nabalitokan a pagsaadan ti silaw.” (Apocalipsis 1:12) Inton agangay maammuan ni Juan no ania ti isimsimbolo dagitoy pito a pagsaadan ti silaw. Ngem daydiay adda iti tengnga dagiti pagsaadan ti silaw ti nakaawisan ti imatangna. “Iti tengnga dagiti pagsaadan ti silaw adda maysa nga umasping iti anak ti tao, a nagkawes iti pagan-anay a dumanon agingga kadagiti saka, ken nabariksan kadagiti barukongna iti nabalitokan a barikes.” (Apocalipsis 1:13) Ni Jesus, ti “anak ti tao,” ket nagparang ken ni Juan, a nasdaaw a nakaimatang iti nadaeg ken sumilsilnag a langana. Nagparang buyogen ti nakaranraniag a dayag iti tengnga dagiti nagangtan a nabalitokan a pagsaadan ti silaw. Daytoy arig templo a buya impaganetgetna ken ni Juan ti akem ni Jesus kas naindaklan a Nangato a Padi nga insaad ni Jehova, nga addaan pannakabalin a mangukom. (Hebreo 4:14; 7:21-25) Ti atiddog ken naranga a kawesna ket mayataday iti saadna kas padi. Kas kadagiti Judio a nangato a padi idi ugma, adda nabalitokan a barikes a naipalikmut iti barukongna, iti batog ti pusona. Ipasimudaag daytoy ti naimpusuan a panangaramidna iti nasantuan nga annongen nga inted kenkuana ni Jehova a Dios.​—Exodo 28:8, 30; Hebreo 8:1, 2.

10. (a) Ania ti ipasimudaag ti kasla niebe ti kapurawna a buok ni Jesus ken dagiti gumilgil-ayab a matana? (b) Ania ti iladladawan dagiti kasla napasileng a gambang a saka ni Jesus?

¹⁰ Intuloy ni Juan ti panangdeskribirna: “Mainayon pay, ti ulona ken ti buokna ket purawda a kas iti puraw a delana, kas iti niebe, ket dagiti matana kaslada iti gumilgil-ayab nga apuy.” (Apocalipsis 1:14) Ti buokna a kasla niebe ti kapurawna ipasimudaagna ti kinasirib gapu iti kaunday ti panagbiagna. (Idiligmo ti Proverbio 16:31.) Ket dagiti gumilgil-ayab a matana ipakitana nga isu ket nasiput, alerto, bayat nga agsukimat, mangsubok, wenno idissuorna ti ungetna. Naiturong ti imatang ni Juan uray kadagiti saka ni Jesus: “Ket dagiti sakana umaspingda iti nasudi a gambang no bumegbeggang iti urno; ket ti timekna kas iti daranudor ti adu a danum.” (Apocalipsis 1:15) Iti sirmata, dagiti saka ni Jesus ket kasda la gambang, naraniag, ken nasilap. Maitutop dayta a mangiladawan iti daydiay magmagna a sireregta ken addaan iti nasayaat a takder iti imatang ni Jehova a Dios. Maysa pay, iti Biblia, masansan a mausar ti balitok a mangiladawan kadagiti nadibinuan a banag, ket ti gambang mausar met no dadduma a mangiladawan kadagiti natauan a banag.c No kasta, dagiti naraniag a saka ni Jesus a kasla nasudi a gambang ipalagipna kadatayo no kasano ti ‘kaimnas’ dagiti sakana idi nagna ditoy daga a nangikaskasaba iti naimbag a damag.​—Isaias 52:7; Roma 10:15.

11. (a) Ania ti ipalagip kadatayo dagiti nadayag a saka ni Jesus? (b) Ania ti ipasimudaag ti pannakailadawan ti timek ni Jesus “kas iti daranudor ti adu a danum”?

¹¹ Wen, kas perpekto idi a tao, naranga ni Jesus iti imatang dagiti anghel ken tattao. (Juan 1:14) Dagiti nadayag a sakana ipalagipda met kadatayo nga isu ket sitatakder kas Nangato a Padi iti nasantuan a disso iti organisasion ni Jehova. (Idiligmo ti Exodo 3:5.) Kanayonanna, ti timekna ket kasla daranudor ti dakkel a dissuor​—nadaeg ken makapaamanga. Maitutop dayta iti daydiay maikari a maawagan iti Sao ti Dios, daydiay umay ‘a mangukom iti mapagnaedan a daga buyogen ti kinalinteg.’​—Aramid 17:31; Juan 1:1.

12. Ania ti iladladawan ti “natarumamis, atiddog a kampilan a dua ti tademna”?

¹² “Ket iti makannawan nga imana isu addaan iti pito a bituen, ket manipud iti ngiwatna rumrummuar ti maysa a natarumamis, atiddog a kampilan a dua ti tademna, ket ti rupana kas iti init no agsilnag iti pannakabalinna. Ket idi isu nakitak, napasagak a kasla natay iti sakaananna.” (Apocalipsis 1:16, 17a) Iti ud-udina bassit, inlawlawag ni Jesus a mismo ti kaipapanan dagiti pito a bituen. Ngem paliiwem no ania ti rumrummuar iti ngiwatna: “maysa a natarumamis, atiddog a kampilan a dua ti tademna.” Anian a maitutop a panangiladawan! Wen, ta ni Jesus ti nadutokan a mangyebkas kadagiti saanen a mabaliwan a pangngeddeng ni Jehova maikontra kadagiti kabusorna. Dagiti pangngeddeng nga isawangna ket agresulta iti pannakaikisap dagiti amin a nadangkes.​—Apocalipsis 19:13, 15.

13. (a) Ania ti ipalagip kadatayo ti nalawag, naraniag a rupa ni Jesus? (b) Ania a buya ti iparang ti panangiladawan ni Juan ken ni Jesus?

¹³ Ti nalawag, naraniag a rupa ni Jesus ipalagipna kadatayo ti makasisirap a rupa ni Moises kalpasan ti pannakisao ni Jehova kenkuana idiay Bantay Sinai. (Exodo 34:29, 30) Lagipem met nga idi nagbaliw ti langa ni Jesus iti imatang dagiti tallo nga apostolna agarup 2,000 a tawenen ti napalabas, “ti rupana nagsilnag a kas iti init, ket dagiti makinruar a kawesna nagraniagda a kas iti lawag.” (Mateo 17:2) Ket ita, iti sirmata a nakaiparangan ni Jesus bayat ti aldaw ti Apo, isilsilnag met ti rupana ti naraniag a dayag ti maysa nga adda iti presensia ni Jehova. (2 Corinto 3:18) Kinapudnona, ti buya a naiparang iti sirmata ni Juan ket makapurar a dayag. Manipud iti kasla niebe ti kapurawna a buok, dagiti gumilgil-ayab a mata, ken ti naraniag a rupa agingga kadagiti nasilnag a saka, maysa daytoy a nakangayngayed a sirmata maipapan iti Daydiay agnanaed itan “iti di maasitgan a lawag.” (1 Timoteo 6:16) Nakapatpatak ken nabnabiag daytoy a buya! Ania ti reaksion ni nasdaaw unay a Juan? Kuna kadatayo ti apostol: “Ket idi isu nakitak, napasagak a kasla natay iti sakaananna.”​—Apocalipsis 1:17.

14. Ania ti rumbeng nga epektona kadatayo ti panangbasatayo iti sirmata ni Juan maipapan ken ni naipadayag a Jesus?

¹⁴ Ti nangayed ken detalyado a panangiladawan ti sirmata ni Juan punnuenna dagiti adipen ti Dios ita iti naimpusuan nga apresasion. Nasurok a 90 a tawenen ti napalabas manipud idi nangrugi ti aldaw ti Apo. Kabayatan dayta a panawen, agtultuloy ti makaparagsak a kaitungpalan ti sirmata. Para kadatayo, ti panagturay ni Jesus iti Pagarian ket saan a masanguanan a namnama no di ket napaypayso ken mapaspasamaken iti agdama. Gapuna, kas nasungdo nga iturayan ti Pagarian, rumbeng a sukimatentay pay buyogen ti panagsiddaaw dagiti dineskribir ni Juan iti daytoy umuna a sirmata ket ipangag ken tungpalentayo dagiti sasao ni naipadayag a Jesu-Kristo.

[Dagiti Footnote]

[Dagiti ladawan iti panid 23]

Dagiti nakabakab dagiti arkeologo a tedda dagiti siudad nga ayan idi dagiti pito a kongregasion pasingkedanda ti rekord ti Biblia. Ditoy nga inawat dagiti Kristiano idi umuna a siglo dagiti makaparegta a mensahe ni Jesus a manggutgutugot ita iti sangalubongan a kongregasion

PERGAMO

SMIRNA

TIATIRA

SARDIS

EFESO

FILADELFIA

LAODICEA