Panagdayaw ti Pamilia​—Napateg iti Pannakaisalakan!

PANUNOTENYO no kasano a nakaam-amak ti “gubat ti naindaklan nga aldaw ti Dios a Mannakabalin-amin”! (Apoc. 16:14) Nalawag ti panangiladawan ni propeta Mikias: “Dagiti bantay masapul a malunagda . . . , ket agbisngayto a mismo dagiti nababa a tanap, kas iti allid gapu iti apuy, kas iti dandanum a maibukbukbok iti napasdok a lugar.” (Mik. 1:4) Anianto ti nakaay-ay-ay a pagbanagan dagidiay saan nga agserserbi ken Jehova? Kuna ti Sao ti Dios: “Dagidiay pinapatay ni Jehova pudno unay a maaddanto iti dayta nga aldaw manipud iti maysa nga ungto ti daga agingga iti sabali nga ungto ti daga.”​—Jer. 25:33.

Gapu kadagita a pakdaar, dagiti ulo ti pamilia​—nga adu kadakuada ti agsolsolo a nagannak​— nasayaat nga isaludsodda maipapan kadagiti annakda a nataenganen ti panagpampanunotna, ‘Makalasatdanto ngata inton Armagedon?’ Ipanamnama ti Biblia a makalasatda no addaanda iti natibker a relasion ken Jehova a maitutop iti edadda.​—Mat. 24:21.

No Apay a Napateg nga Iwayaanyo ti Panagdayaw ti Pamiliayo

Kas nagannak, siguraduenyo nga aramidenyo ti amin a kabaelanyo a mangpadakkel kadagiti annakyo “iti disiplina ken panangiturong-panunot ni Jehova.” (Efe. 6:4) Nakapatpateg ti panagadal iti Biblia a kaduayo dagiti annakyo. Kayattayo nga agbalinda a kas kadagiti Kristiano idiay Filipos a kinomendaran ni Pablo gapu ta situtulokda a nagtulnog ken Jehova. Insuratna: “Dungdungnguek, iti wagas a kankanayon a panagtulnogyo, saan laeng a kabayatan ti kaaddak, no di ket ad-adda pay a sisasagana ita kabayatan ti kaawanko, itultuloyyo nga itrabaho ti bukodyo a pannakaisalakan buyogen ti buteng ken panagpigerger.”​—Fil. 2:12.

Dagiti kadi annakyo an-annurotenda dagiti linteg ni Jehova uray awankayo? Komusta ngay no addada idiay eskuelaan? Kasanoyo a matulongan dagiti annakyo nga agbalin a kombinsido a makagunggona dagiti linteg ni Jehova tapno annurotenda dagitoy uray awankayo?

Dakkel ti maitulong ti panagdayaw ti pamilia tapno mapabileg ti pammati ti anakyo. Gapuna, usigentayo ti tallo a napateg nga elemento tapno agbalin a naballigi ti panagadal ti pamiliayo iti Biblia.

Aramidenyo Koma a Regular

Ipakita ti Biblia nga adda naikeddeng a tiempo a dumatag dagiti anghel iti sanguanan ni Jehova nga Amada. (Job 1:6) Kasta met koma ti aramidenyo kadagiti annakyo. Mangikeddengkayo iti aldaw ken oras para iti Panagdayaw ti Pamilia sa taginayonenyo dayta. Kanayonanna, mangikeddengkayo met iti alternatibo nga eskediul no kas pagarigan ta adda dagiti di mapakpakadaan a pasamak.

Bayat ti panaglabas ti bulan, diyo ipalubos nga agbalin nga iregular ti panagadalyo. Laglagipenyo a dagiti annakyo ti kapatgan nga estudianteyo iti Biblia. Kayat ni Satanas a biktimaen ida. (1 Ped. 5:8) No langananyo daytoy a nagpateg a Panagdayaw ti Pamilia gapu iti panagbuya iti telebision wenno dadduma a saan a napateg nga aktibidad, nagballigi ni Satanas.​—Efe. 5:15, 16; 6:12; Fil. 1:10.

Aramidenyo Koma a Praktikal

Ti Panagdayaw ti Pamilia ket saan koma a basta pananggun-od iti pannakaammo. Ikagumaanyo nga aramiden dayta a praktikal. Kasano? No dadduma, mangpilikayo kadagiti topiko a mainaig iti mabalin a pakaipasanguan ti anakyo kadagiti sumaganad nga aldaw wenno lawas. Kas pagarigan, apay a diyo ensayuen no kasano ti mangasaba? Naragragsak dagiti agtutubo a mangaramid iti banag a kabesadoda. Ti panagensayo kadagiti presentasion ken ti panagsagana no kasano a tamingen ti isusupiat ti bumalay ti tumulong kadakuada nga agbalin a naturtured bayat a makipasetda iti nagduduma nga aspeto ti ministerio.​—2 Tim. 2:15.

Mabalinyo met ti agensayo no kasano a sarangten dagiti annakyo ti impluensia dagiti kapatadanda. Mabalinyo a pagsasaritaan kas pamilia ti kapitulo 15 ti libro a Dagiti Saludsod nga Iyimtuod ti Agtutubo​—Dagiti Sungbat nga Epektibo, Tomo 2. Ti paulo a “Dagiti Aramidek no Pilitendak Dagiti Kapatadak” iti panid 132 ken 133 ket mangipaay kadagiti singasing ken mangted met iti gundaway iti anakyo nga agpanunot no kasanona a tamingen dagiti bambanag. Dagiti sasao iti baba ti panid 133 iparegtana kadagiti agtutubo: “Ensayuem dagiti sungbatmo a kaduam ti maysa kadagiti dadakkelmo wenno ti maysa a nataengan ti panagpampanunotna a gayyem.” Apay a diyo aramiden ti kasta a sagpaminsan a panagensayo kas paset ti Pangdayaw ti Pamiliayo?

Ti panagdayaw ti pamilia ket mangipaay iti gundaway kadagiti nagannak a mangipaganetget kadagiti gunggona nga itden ti panangragpat kadagiti naespirituan a kalat. Mainaig iti dayta, ti libro nga Iyimtuod ti Agtutubo, Tomo 2, ket addaan iti nagsayaat nga impormasion iti kapitulo 38, a napauluan iti “Kasanok nga Usaren ti Biagko?” Bayat a pagsasaritaanyo dayta a kapitulo, tulonganyo ti anakyo tapno mabigbigna a ti kasayaatan nga aramidenna ket ti panangipamaysana iti biagna iti panagserbi ken Jehova. Sukayenyo iti puso ti anakyo ti tarigagay nga agpayunir, agserbi iti Bethel, ageskuela iti Ministerial Training School, wenno rumagpat iti dadduma pay a kita ti amin-tiempo a panagserbi.

Palagip: Adda dagiti nagannak a nasayaat ti intensionda, a maseknanda unay iti kayatda a pagbalinan dagiti annakda ngem maliwayandan nga apresiaren ti maar-aramidan dagitoy. Siempre, nasayaat met a paregtaenyo dagiti annakyo a rumagpat kadagiti kalat a kas iti panagserbi iti Bethel ken panagmisionero. Nupay kasta, saan koma a nangato unay ti namnamaenyo kadakuada nga uray la marigatandan, a pakaigapuan ti pannakaupayda. (Col. 3:21) Kanayon a laglagipenyo a masapul koma a masursuroda nga ayaten ni Jehova gapu ta kayatda, saan ket a gapu ta kayatyo. (Mat. 22:37) Gapuna, mangkitakayo kadagiti pangkomendaranyo kadakuada, ken liklikanyo ti pagannayasan a mangbirok kadagiti saanda a maar-aramidan. Sursuruanyo ida a mangapresiar kadagiti amin a naaramidan ni Jehova. Kalpasanna, bay-anyo ida a mangsubad iti kinaimbag ni Jehova.

Aramidenyo Koma a Naragsak

Ti maikatlo a kangrunaan a tulbek ti naballigi a Panagdayaw ti Pamilia ket ti panangaramid iti dayta a naragsak. Kasano? Padasenyo ti dumngeg wenno agbuya kadagiti drama nga impablaak dagiti Saksi ni Jehova ken pagsasaritaanyo dayta. Wenno sangsangkamaysa a mangbasakayo iti maysa a paset ti Biblia, a tudinganyo iti akem ti tunggal miembro ti pamiliayo.

Adda dagiti regular nga artikulo iti Ti Pagwanawanan ken Agriingkayo! a nagsayaat a pagsasaritaan ti pamilia. Kas pagarigan, mabalinyo nga usaren ti artikulo iti panid 31 ti Agriingkayo! a napauluan iti “Ania ti Sungbatmo?” Iti kada dua a bulan nga isyu ti publiko nga edision Ti Pagwanawanan, naglaon dayta iti artikulo nga agkalikagum iti panagsukimat a napauluan iti “Para Kadakayo nga Agtutubo.” Kasinnublat daytoy ti serye a para kadagiti ubbing a napauluan iti “Isuroyo Dagiti Annakyo.”

Dagiti artikulo iti serye nga “Agimtuod Dagiti Agtutubo” iti Agriingkayo! ket makapainteres met kadagiti nagannak dagiti agtutubo a kas met iti libro nga Iyimtuod ti Agtutubo, Tomo 2. No usarenyo dayta a libro, diyo koma labsan ti kahon nga “Ania ti Makunam?” iti ngudo ti tunggal kapitulo. Saan laeng a basta pangrepaso dayta. Dagiti saludsod a linaonna ket mabalin nga usaren a pagsasaritaan ti pamilia.

Ngem diyo koma usaren ti panagadal ti pamilia kas gundaway a mangpalutpot kadagiti annakyo. Kas pagarigan, diyo koma piliten ti anakyo a mangibasa iti insuratna iti benneg a napauluan iti “Ti Notak” wenno iti dadduma a paset dayta a libro nga agkalikagum iti panangisuratna iti kapanunotanna. Iti “Para Kadagiti Nagannak” iti panid 3, kunana: “Saanyo a bibiangan ti libro dagiti agtutubo nga annakyo tapno saanda nga agbain a mangisurat iti pudpudno a karirikna ken kapanunotanda. Inton agangay, mabalin nga ibagadanto met laeng kadakayo ti maipapan kadagiti insuratda.”

No aramidenyo a regular, praktikal, ken naragsak ti panagdayaw ti pamiliayo, sibabaknang a bendisionan ni Jehova ti panagreggetyo. Daytoy a nagsayaat a panagkakadua ti pamiliayo ket makatulong a mangtaginayon a nabileg ti espiritualidad dagiti ipatpategyo iti biag.

[Kahon iti panid 31]

Baliwbaliwanyo ti Wagas ti Panagadalyo

“No agadalkami a sangapamiliaan, ilawlawagmi ken lakayko dagiti material a maadal kas panagsagana iti gimong. Kalpasanna, ipadrowingmi kadagiti babbalasitangmi ti sumario ti inadalmi. No dadduma, idemostrami dagiti eksena iti Biblia wenno agensayokami no kasano ti mangasaba. Ibagaymi ti panagadalmi iti edadda ken aramidenmi dayta a makapainteres, makaparegta, ken makaay-ayo.”​—J.M., Estados Unidos.

“Tapno matulonganmi ti anak ti iyad-adalak iti Biblia a mangtarus no ania ti rikna ti agusar iti lukot idi panawen ti Biblia, inyimprentami ti libro nga Isaias kalpasan nga inikkatmi dagiti numero a mangipakita iti kapitulo ken bersikulona. Pinagsisilpomi dagiti panid sa inikkanmi iti tubo ti agsumbangir nga ungtona. Tinulad ti anakna ti inaramid idi ni Jesus iti sinagoga idiay Nazaret. Sigun iti Lucas 4:16-21, ni Jesus “inukradna ti lukot [ni Isaias] ket nasarakanna” ti paset a birbirokenna. (Isa. 61:1, 2) Idi pinadas dayta ti ubing, narigatan a nangbirok iti Isaias 61 iti dayta nga atiddog a lukot nga awanan iti kapitulo ken bersikulo. Nasdaaw iti kinasigo ni Jesus nga agusar iti lukot isu a naikunana: ‘Naglaing a talaga ni Jesus!’”​—Y.T., Japan.

[Ladawan iti panid 30]

Ti panagensayo tulonganna dagiti annakyo a mangsaranget iti impluensia dagiti kapatadanda

[Ladawan iti panid 31]

Ikagumaanyo nga aramiden a makaparagsak ti Panagdayaw ti Pamiliayo