Panagtalinaed a Kupado iti Serbisio ni Jehova
1 Pudno a nagundawayantayo unay nga agserbi ken Jehova. Gapu iti umiso a pannakaammo maipapan kenkuana ken iti bugbugtong nga Anakna, ni Jesus, natignaytayo babaen ti ayat a mangigasto iti bagbagitayo nga agaramid ti pagayatanna. (Juan 17:3) Mabalin a mabannogantayo, ngem ipaay ni Jehova ti pigsa tapno bumilegtayo.—Isa. 40:29.
2 Kasano ti panangipakita iti panangipateg ti dakkel nga ayat nga inyebkas ni Jehova ken ni Kristo Jesus kadatayo? (2 Cor. 5:14, 15) Ti umuna a wagas isut’ panangtulad ken Jesus, isu nga awan sarday a nangsaksi maipapan iti nagan ken Pagarian ni Amana. (1 Ped. 2:21) No addaantayo iti nabileg a pammati, ti biagtayo isut’ agrikos iti aglawlaw ti inted iti Dios a trabaho a mangikasaba ti naimbag a damag.—Mat. 24:14.
3 Adda kadi kalalainganna a kawadwad ti tiempo a masapul nga ipaaytayo iti tay-ak ti ministerio? Nagduduma ti kasasaad. Nalabit a limitadotayo gapu ti edad, nalaad a salun-at, wenno responsabilidad iti pamilia. Nupay kasta, kaskasdi a kasapulantayo amin nga aramiden iti kapnekan a serbisio ken Jehova. (2 Tim. 2:15) Adda dagiti gundaway a nakalukat iti tunggal maysa kadatayo kas maiyataday iti kasasaadtayo. Ania ti dadduma kadagitoy?
4 Wagas a Mangpalawa iti Ministeriotayo: Masapul nga interesadotayo nga umuna a mangparang-ay iti kalidad ti ministeriotayo. Maibanag daytoy babaen iti panagbalin a nalaing a mannursuro. Maysa kadagiti kangrunaan a panggep ti Teokratiko a Pagadalan iti Ministerio isu ti panangtulong kadatayo nga agbalin a nalaing iti tay-ak ti ministerio. Sipapanunotkayo aya iti termino ti tay-ak iti serbisio no agsaganakayo ti pasetyo? Maiyaplikar kadi dagiti maawat a balakad tapno rumang-aytayo iti personal a ministerio? (sg p. 96-9) Kapadana, adu a singasing a maipaay idiay tay-ak iti ministerio ti maited bayat iti Gimong ti Serbisio. Usarentayo dagitoy a madagdagus.
5 Sumaruno, usigen ti posibilidad a mangihusto iti kasasaadyo tapno mabalinyo ti makiraman iti auxiliary wenno regular payunir a trabaho. Ti panangaramid iti dayta isut’ mangpakupado kadakayo iti serbisio ti Amatayo, ni Jehova. (1 Cor. 15:58) Kasano ngarud no dikay makapayunir? Maidemostrayo ti espiritu iti kinapayunir babaen ti panangkultibaryo iti napasnek a pannakaseknan kadagiti tattao idiay teritoriayo. Mabalinyo met nga usaren ti kada gundaway a tumulong kadagiti sinsero a tattao a mangammo ken Jehova babaen iti sarungkar ken panagadal ti Biblia.
6 Idi damo a naadaltayo iti kinapudno, ti ayat ken Jehova ken ni Kristo Jesus isut’ nangtignay kadatayo a nangbalbaliw iti kabibiagtayo. Itan, bayat nga rumang-ay iti panangipateg ti relasiontayo iti nailangitan nga Amatayo ken ti naaramidan iti Anakna a pagimbagantayo, adda pay kadi sabsabali a panangihusto tapno mapalawa iti ministeriotayo? Gastuantayo koma amin iti bagbagitayo babaen ti kinakupado iti serbisio ni Jehova.—Roma 12:11.