Saludsod
◼ Kasano a maiyebkas ti rag-o dagidiay tumabuno kadagiti bautismo?
Ti bautismo ket maysa a naragsak nga okasion. Pagragsakantayo a makita dagiti agdadamo iti publiko a panangidemostrada ti pammatida. (Sal. 40:8) Nakuna ni Jesus a daytoy ti taudan iti dakkel a rag-o sadi langit. (Luc. 15:10) Dagiti miembro iti pamilia ken agibumbunannag a nangadal kadagitoy nga agbautisar ti kangrunaan nga agrag-o ta makitada dagitoy nga agdadamo a nangala iti nasken nga addang. Ngem kasano a maiyebkas iti umiso a panagrag-o?
Ti bautismo ni Jesus isut’ naituyang nga ulidan dagiti bautismo ti Kristiano kadagitoy nga aldaw. Agkarkararag idi bayat a mabautisaran. (Luc. 3:21, 22) Ammona nga iti dayta a bautismo isut’ maysa a tiempo ti panagutob ken napasnek a panagpanunot. Nabigbig met dagiti disipulona iti importansia ti bautismo. Idi aldaw ti Pentecostes 33 K.P., agarup a 3,000 ti nabautisaran. Ania idi ti tignay dagiti disipulo a nakasaksi iti dayta a pasamak? “Ket nagtultuloyda nga impaay ti bagbagida iti sursuro dagiti apostol . . . ken dagiti kararag.” (Ara. 2:41, 42) Insarming dagiti apostol dagiti espiritual a bambanag.
Dagiti Kristiano nga asamblea iti moderno a tiempo isudat’ natampokan kadagiti bautismo. Maitutop unay iti umiso nga ebkas ti rag-o babaen iti panagpalakpak no makita dagiti indibidual a nangala ti takder a maipaay ken Jehova. Iti sabali a bangir, ti naparang a di magawidan nga ariwawa, panangipayapay kadagiti ima, ken panangayab kadagiti nagnagan ket saan a maiparbeng. Ti kasta a kondukta ket ipakitana iti kaawan panangipateg ti kinasagrado iti ebkas ti pammati. Saan met a maitutop a tiempo ti pannangted iti sabong wenno regalo kadagidiay baro a bautisado apaman a sumagpatda manipud iti pagbautisaran. Ti bautismo isut’ marka iti rubbuat ti Kristiano a lumba a maipaay iti pannakaisalakan. Maipakita ti rag-otayo babaen iti panangtulong kadagiti baro a bautisado a mangipateg ti nadekket a relasion ken Jehova nga isut’ inlukat iti bautismo kadakuada.
Ti lugar iti bautismo ket saan a maiparbeng a pagay-ayaman, paglangoyan, wenno dadduma pay nga kababalin a mangsinga iti kinaserioso ti okasion. Ti rag-otayo isut’ maiyebkas iti nadaeg a wagas. Ti kinaurnos ken kinaseriosotayo isudat’ mangted iti rag-o dagiti amin a tumabuno.