Ti Panglukat a Sasao ket Naiduma iti Maaramidanna
1 Makunkuna a ti umuna a 30 a segundo iti panangiparang no agbalaybalaytayo isut’ kangrunaan. Wen, ti panglukat a sasaotayo isut’ mangeddeng no denggendatayo wenno saan. Idiay panid 9 iti Panakirinnason a libro, nadakamatna dagiti dua a nasken a bambanag a kasapulan a panunoten no iyammo iti bagbagitayo. Isuda dagitoy: (1) Ti mensahe a naikomision nga idanontayo isu “daytoy naimbag a damag ti pagarian,” a kaipapananna a masapul nga ikagumaantayo a tulongan dagiti tattao a kumita iti panagkasapulan ti Pagarian ken situtulokda a mangusig iti dayta. (2) Ti napudno a pannakaseknan iti pagimbagan dagiti tattao ti tumulong kadatayo a mangdanon iti puspusoda. Maipakita daytoy babaen ti nabara ken nagayyeman nga isem, natulok a dumngeg no agsaoda, ken babaen ti panagsaludsod a mangriing iti interes ket rugianda ti makisarita.
2 Rinugianyo kadin nga inusar dagiti introduksion a naisingasing idiay Panakirinnason a libro wenno dagidiay agparang iti kallabes a Ti Ministeriotayo iti Pagarian? Adu dagiti agibumbunannag ti nangipadamag iti dakkel a balligida bayat ti panagbalaybalay a ministerio babaen iti panangusarda kadagitoy a pangrugi a balbalikas a sao-por-sao kas adda a naimaldit. Nasarakan dagiti dadduma a babaen laeng iti sangkabassit a panangitiempo ti panagsagana a maipaay iti tay-ak ti ministerio, napadanumda dagiti panglukat a sasao babaen ti bukodda a balikas ngem naibasarda iti sasao kadagiti naimaldit a singasing.
3 Maysa a banag ti nabatad, nga no addaankayon iti panglukat a sasao dita panunotyo sakbay nga asitganyo ti maysa a tao babaen iti damag ti Pagarian, mas naaliwaksay ken natalekkayo. Dagiti ebkasyo ti mangisarming iti napasnek a tarigagayyo a mangiburay ti naimbag a damag. Ti kinamanagsaganayo isut’ mangaramid iti ministerioyo a mas makaay-ayo agsipud ta nasaysayaat ti maibungana. Kangrunaan iti amin isut’ pannakaipaaytayo iti kasayaatan a daton ti serbisio a maitukontayo.—Heb. 13:15; 1 Ped. 2:5.
4 Gapuna nga itiempoyo ti agsagana. Usigenyo ti tipo dagiti tattao a mabalin a masabet idiay lokal a teritoriayo. Ania dagiti pakasikoran ken pakaseknanda? Ania dagiti agdama a paspasamak a mangapektar iti biagda? Kalpasan a maiyanninag iti sungbat dagitoy a saludsod, kitaenyo dagiti panglukat a sasao a naisingasing idiay pinanid 9-15 iti Panakirinnason a libro wenno pilienyo ti maysa wenno ad-adu a pangrugi a sasao manipud iti Ti Ministeriotayo iti Pagarian. Siwayawayakayo a mangritubar ken mangitutop kadagiti eksakto a sasao kadagidiay marikna a kaannawidanyo. Ti sumaruno nga addang isut’ panangipadas kadagiti dadduma nga agibumbunannag dagiti panglukat a sasaoyo babaen ti sesion iti panagsanay. Nalabit a daytoy ti mamaregta iti dadduma a mangparang-ay met kadagiti panglukat a sasaoda. Iti aniaman a banag, sigurado a makapagpinnaregta ken makapagpinnabileg iti maysa ken maysa a maipaay iti naimbag nga ar-aramid.
5 Ti tiempo ken pingetyo a mausar iti panagsagana a maipaay ti panangiparangyo idiay tay-ak isut’ magunggonaan. Mabalin a mabendisionankayo ti ad-adu pay nga epektibo a pannakiraman iti nakaay-ayat a panangurnong a trabaho a madaman a maar-aramid.