Panangipateg iti Kaipapanan ti Agdama a Paspasamak
1 “Ti langa daytoy lubong ket agbalbaliwen.” (1 Cor. 7:31) Makita daytoy iti agdama a napardas a paspasamak. Maidanggay ti amin a maar-aramid iti sidong ti organisasion ni Jehova, ania iti kaipapanan daytoy kadakayo?—Luc. 21:28.
2 Patalgedan ti kaitungpalan iti padto ti Biblia a daytoy dakes a sistema dagiti bambanag ket addan iti maudi nga al-aldawna. (Mat. 24:3-14; Luc. 21:7-11) Kuna ni Jesus a “daytoy a kaputotan ket saanen a lumabas agingga a maaramiden dagiti amin a bambanag.” (Luc. 21:32) Patgenyo kadi ti kayat a sawen daytoy kadagiti tattao idiay teritoriayo a saan pay a timmakder iti dasig ni Jehova? No kasta ngarud, ania ti kaeskanna daytoy iti ministerioyo ti tay-ak?—Luc. 21:34-36.
3 Tulonganyo Dagiti Dadduma Bayat nga Adda Pay Tiempo: Kiniddaw ni Jesus kadagiti disipulona a gundawayanda ti napaboran a kasasaad nga ipakaammo iti naimbag a damag. (Juan 9:4) Nangted ni apostol Pablo iti kaasping a balakad idi kiniddawna kadagiti kakabsat idiay Colosas a “magnakayo a nainsiriban kadagidiay adda iti ruar, a gatangenyo ti nagundawayan a tiempo.”—Col. 4:5.
4 Dadduma ti nangipangag iti pammagbaga ti apostol babaen iti pananggundawayda ti tiempo ket nagbalinda a regular payunir. Adu nga agtutubo ti nangala iti regular payunir a serbisio bayat nga addada idiay pagadalan ket nagballigida iti dayta. Magatang dagiti agtutubo ti nagundawayan a tiempo babaen iti panangtulongda kadagiti kaeskuelada a mangawat ti kaipapanan dagiti paspasamak kadagitoy nga aldaw ken iti namnama ti masakbayan idiay sidong iti Pagarian ti Dios.—Ecl. 12:1.
5 Mausartayo a naimbag ti tiempotayo iti tay-ak ti ministerio bayat iti Oktubre babaen ti panangaramat iti Agriingkayo! a magasina ti kada oportunidad. Daytoy a publikasion ti mangted iti pannakaawat ti pudno a kaipapanan dagiti agdama a paspasamak. Itukonyo daytoy kadagiti maseknan a tattao a masarakanyo iti panagbalaybalay a trabaho. Itukonyo kadagiti kaeskuela wenno katrabahuanyo a tattao. Ilawlawagyo dagiti suheto a paginteresan dagiti tattao nga am-ammoyo. Kas ehemplo, ti Oktubre 8, 1992 nga Agriingkayo!, naglaon kadagiti artikulo maipapan iti negatibo nga emosion wenno rikrikna, a mangipakita no kasano a maparukma ti kinadanag, panagbuteng, panagpungtot, pannakaupay ken panagleddaang.
6 No itukonyo ti Agrringkayo!, kanayon a nasayaat no iturongyo idiay paset nga “Apay a Mapabpablaak iti Agriingkayo!” idiay panid 4 ti kada magasina. Agpannuray iti tipo ti tao a kasaoyo, itudoyo a mangted daytoy iti lawag nga agpaay ti sangapamilia, ken ipakitana no kasano a masaranget dagiti problema (kas sagudayen ti Oktubre 8 a ruar), ken saan laeng a mangted iti damag ngem itudona met ti pudno a kaipapanan dagitoy iti likud dagiti agdama a paspasamak, ngem kaskasdi a di dumasig iti napolitikaan. Dagiti managpanunot a tattao ti sigurado a mangipateg a dagitoy a benneg isut’ mangaramid iti Agriingkayo! a pudno a nabalor kadakuada.
7 Kadagitoyen ti naragsak a tiempo a panagserbi ken Jehova. Daytoy koma a kinapudno ti mangtignay kadatayo a mangusar a naimbag kadagiti gundaway iti daytoy a bulan a tumulong ti ad-adu pay a sinsero a tattao a kumita iti pudno a kaipapanan nga adda ti likudan dagiti agdama a paspasamak.