Ti Kadi Interes ket Mapasgedan Manen?
1 “Naragsak dagidiay sipupuot iti espiritual a kasapulanda.” (Mat. 5:3) Dagitoy a sasao ni Jesus iti Sermon idiay Bantay ti napno iti kaipapananna. Saan nga adu iti sangatauan ti makabigbig a kasapulanda iti espiritual a bambanag tapno ti biagda ket naragsak ken addaan panggep. Adda dadduma idi damo a sipupuotda iti espiritual a kasapulanda ngem napukawda dayta. Adda banag a makagapu a bimmaawda maipapan iti espiritual a bambanag. Naglikudanda daydiay pudno a pagimbaganda. Ti saludsod isut’, Ti kadi interes dagita ket mabalin a pasgedan manen? Siraragsak, dadduma kadakuada ti mabalin.
2 Nalabit nga adda ammoyo a nagadal ti Biblia a kadua dagiti Saksi ni Jehova iti napalabasen a tawtawen, mabalin a maysa pay laeng idi nga ubing, ngem saan a nagtultuloy a nakitimpuyog kadagiti tattao ti Dios. Dagiti dadduma a sursuro ken nalinteg a prinsipio ti Biblia, nupay kasta, ket mabalin a naimula iti panunotna ken malagipna pay laeng. Bayat a kumarkaro iti kasasaad daytoy lubong ken nagbalbaliw ti sirkumstansia, dagiti bambanag a naadal iti napalabas ti mabalin a lagipen ket daydiay tao mabalin a bumaw-ing iti Dios ken sidadaan a manayonan dagiti ammona maipapan ti Biblia. Ti panangsarungkar kadagita a tattao a buyogen iti ranta a pabaruen ti panagadal iti Biblia ti mapatalgedan a makagunggona.
3 Sigurado a kasapulan ti regget iti masansan a panangsarungkar kadagidiay timmabuno iti rambak ti Memorial. Ipamatmatyo kadakuada a maseknankayo unay maipapan iti espiritual a pagimbaganda, ket itukonyo ti panagadal iti Biblia kadakuada. Maaramid ti naiduma a pinget a tumulong kadagidiay a timmabunon iti kombension ti distrito wenno asamblea iti sirkito. Ti dadduma a kaso mabalin a makagunggona iti maysa nga agibumbunannag no sumarungkar iti maysa a tao a ti panagadalna ket naisardeng gapu ta kurang iti panagprogresona.
4 Siempre, dagiti tattao a maadalan ti manamnama a mangala iti serioso a takder nga agdayaw ken Jehova ken iparangarangna ti maysa a rukod iti kinaregget a mangadal ti Biblia. Ngem iti biangtayo, kayattayo a siguruen a nakaaramidtayo met iti umdas a kinaregta a tumulong ken mariknatayo iti narikna ni apostol Pablo kadagiti sabsabali idi a nakunana, “Nadalusak manipud iti dara dagiti amin a tattao.”—Ara. 20:26.