Ti Kadi Abril ket Espesial a Bulan Kadakayo?
1 Masansantayo a kunaen a dagiti bulan iti Marso ken Abril ket tiempo ti Memorial. Idinto ta iti rambak ti Memorial ket kanayon a mairana iti daytoy a tiempo ti tawen, maparegta dagiti tattao ni Jehova a mangpaadu iti pannakipasetda idiay tay-ak ti ministerio kas auxiliary payunir. Ken adu dagiti makiraman iti Marso ken Abril ti masansan a kabaelanda iti agtultuloy ti auxiliary payunir a serbisio agingga iti Mayo, nangruna ta daytoy ket bulan pay laeng dagiti bakasion ti pagadalan.
2 Apay a dikay tumabuno ti miting dagiti manamnama nga auxiliary payunir inton Pebrero 14 iti kongregasionyo? Daytoy ti mamaregta kadakayo a mangusig a serioso, nangruna no makitayo ti kaadu dagiti sabsabali nga agplano nga ag-auxiliary payunir. No planoyo ti makiraman iti Marso, no kasta iyawatyo a madagdagus ti aplikasionyo kalpasan iti miting.
3 Uray dagidiay saan a makapayunir mabalinda nga aramiden iti Marso ken Abril a kas espesial a bulbulan ti naparang-ay a tay-ak iti ministerioda. Sigurado a nawadwad ti maaramidan. Nalabit a dagiti agibumbunannag ti kongregasion ken payunir ket maawisda dagiti saan pay a bautisado nga agibumbunannag a makipagtrabaho kadakuada iti tay-ak. Maaramid ti nagpaiduma a pinget a mangawis met kadagiti interesado a tattao iti Memorial inton Abril 6.
4 Idi napan a tawen naaddaantayo ti 7,554 nga auxiliary payunir iti Marso, 17,009 ti Abril, ken 10,950 iti Mayo. Adu a baro a panagadal ti Biblia iti nairugi kas resulta ti napaadu a trabaho. Babaen iti bendision ni Jehova a maipaay ti naparang-ay a pingetyo iti daytoy a tawen, nalabit a makaipasdekkayo met ti maysa a baro a panagadal iti Biblia ket ti Abril isut’ mapatalgedan a maysa nga espesial a bulan kadakayo.—Sal. 34:8; Prov. 10:22.