Maaddaankay Koma iti Umiso a Panangmatmat iti Asi ti Dios
NAASI ken maseknan unay ti doktor. Patienna a talaga a masapul nga agpaopera ti pasientena tapno maispal ti biagna. Idi nagkedked ken nadakamat ti pasiente ti isyu maipapan iti panangyalison ti dara, nasdaaw ti doktor. Idi inlawlawagna a dina mabalin ti agpaopera no yalisonanda ti dara gapu iti narelihiusuan a rason, ad-adda pay ti siddaaw ti doktor. Pinanunotna a naimbag no kasanona a matulongan ti pasientena. Kamaudiananna, adda napanunotna. Kinunana: “Ammom, no dika agpayalison ti dara, matayka. Kayatmo kadi ti matay?”
“Ay ket, saan a,” kinuna ti pasientena.
“Ngem, no agpayalisonka, salsalungasingem ti pammatim a napateg met kenka. Bueno, kastoy ti maisingasingko. Ania ngata no agpayalisonka laengen tapno maispal ti biagmo. Kalpasanna ipudnom iti Dios a nakabasolka, sakanto agbabawi. Iti kasta, makasublikanto pay iti relihionmo.”
Impagarup ti napasnek a doktor nga awan a pulos pagdaksan ti balakadna. Ammona a mamati ti pasientena iti naasi a Dios. Awan duadua a maysa daytoy a tumutop a kanito tapno gundawayan ti asi ti Dios! Ngem nainkalintegan kadi ti singasingna?
Kastoy Met Kadi ti Panagrasrasontayo?
No dadduma mabalin a ti panagrasrasontayo ket kas iti panagrasrason ti doktor. Nalabit malapunostayo iti buteng gapu iti di ninamnama nga itataud ti ibubusor idiay pagadalan wenno idiay pagtrabahuan. Wenno mabalin a pilitendatayo a mangaramid iti maisalungasing iti konsiensiatayo, ta no saantay nga aramiden, maibabaintayo. Gapu iti di napakpakadaan a situasion, mabalin nga agduyostayo a mangaramid iti ammotayo a dakes tapno saantayo a marigatan, a pampanunotentayo ti dumawat iti pammakawan kalpasanna.
Wenno mabalin a ti maysa ket sulisogen dagiti dakes a tarigagayna. Kas pangarigan, mabalin a maipasango ti maysa a baro iti maysa a situasion a mangsulisog kenkuana a makiabig. Imbes a sarangtenna ti dakes a tarigagayna, mabalin a tumulok iti dayta, a pampanunotenna ti agpakawan iti Dios kalpasanna. Adda pay ketdi dagidiay nagbasol iti nadagsen uray no ammoda a mabalin a mailaksiddanto iti kongregasion Kristiano. Mabalin nga inkalinteganda, ‘Palabsek ti bassit a tiempo. Kalpasanna agbabawiakto tapno makasubliak.’
Adda dua a banag a maanninawan kadagitoy a situasion. Umuna, imbes nga ikagumaan dagiti indibidual nga aramiden ti umiso, tumulokda. Maikadua, ipagarupda nga uray no makabasolda, insigida a pakawanen ti Dios ida no la ket agpakawanda.
Ania ti Umiso a Panangmatmat?
Ipakita kadi daytoy ti umiso a panangapresiar iti asi ti Dios? Bueno, panunotenyo man pay dayta nga asi. Kinuna ni Jesus: “Kasta la unay ti panagayat ti Dios iti lubong nga intedna ti Anakna a bugbugtong, tapno amin a mamati kenkuana saan a mapukaw no di ket adda biagna nga agnanayon.” (Juan 3:16) Inlawlawag ni apostol Juan no kasano ti panagtignay dayta nga asi idi a kinunana: “Isuratko kadakayo dagitoy a bambanag tapno dikay koma agbasol. Ket no addanto siasinoman a makabasol, addaantayo iti mangibabaet iti Ama, nga isu ni Jesu-Kristo a nalinteg.” (1 Juan 2:1) Gapuna, no makabasoltayo gapu iti kinaimperpekto, mabalintay ti umadani iti Dios babaen ti kararag ken dumawat iti pammakawan gapu iti daton ni Jesus.
Ngem, kayat kadi a sawen daytoy nga awan aniamanna no makabasoltayo man wenno saan, no la ket dumawattayo iti pammakawan kalpasanna? Saan. Tandaananyo dagiti umuna a sasao ti naadaw a teksto: “Isuratko kadakayo dagitoy a bambanag tapno dikay koma agbasol.” Ipakita ti tuloy ti sasao ni Juan iti dayta a bersikulo ti naayat nga urnos ni Jehova iti panangtamingna iti kinaimperpektotayo. Nupay kasta, masapul nga ikagumaantayo a liklikan ti agbasol. Ta no saan, ipakpakitatay laeng ti nakaro a kaawan panagraem iti ayat ti Dios, a kas kadagidiay tinukoy ni Judas a nangaramat iti di kaikarian a kinamanangaasi ti Dios a panglinged kadagiti kinaderrepda.—Judas 4.
Ti panangibilang iti asi ti Dios kas maysa a safety net (iket a mangsippaw kadagiti trapezist no kas pangarigan agkamalida) uray no ania ti aramidentayo, tagibassitenna ti asi ti Dios ken pagparangenna a saan a dakes ti basol. Saan nga umiso ti kasta a kapanunotan. Kinuna ni apostol Pablo ken ni Tito: “Naiparangarangen ti di kaikarian a kinamanangaasi ti Dios a mangyeg ti pannakaisalakan kadagiti amin a kita ti tattao, nga isursuronatayo a mangiwaksi iti saan a nasantuan ken kadagiti nailubongan a tarigagay ket agbiagtayo a buyogen ti kinasimbeng ti panunot ken kinalinteg ken nadiosan a debosion iti tengnga daytoy agdama a sistema dagiti bambanag.”—Tito 2:11, 12.
Impakita ni Pablo ti panangapresiarna iti asi ti Dios babaen ti panangsarangetna iti kinaimperpektona. Kinunana: “Dandanogek ti bagik, ket iturayak a kas maysa nga adipen, di la ket ta, kalpasan a kinaskasabaak dagiti dadduma, mapagtalawakto met.” (1 Corinto 9:27) Saan a tinagilag-an ni Pablo ti pagannayasanna nga agbasol. Kastatay met kadi?
Ti Panangmatmat ni Jesus
Impakita naminsan ni Jesus no kasano ti panangmatmatna iti panangikompromiso iti umiso ken ti panangsurot iti nanamnam-ay a dana tapno maliklikan ti panagsagaba. Idi impakaammo ni Jesus kadagiti adalanna nga asidegen ti pannakaidatonna ken patay, imbaga ni Pedro kenkuana a saan koma nga agpanunot iti kasta, a kunkunana: “Apo, kaasiam ta bagim; uray kaanoman saan a maaramid kenka daytoy.” Ania ti insungbat ni Jesus? “Pumanawka iti sanguanak, Satanas! Maysaka a pakaitibkolan kaniak, agsipud ta pampanunotem, saan a dagiti pampanunot ti Dios, no di ket dagiti tao.”—Mateo 16:22, 23.
Impakita ti nainget a panangtubngar ni Jesus ken Pedro a saan a kayat ni Jesus ti agaramid iti maisalungasing iti pagayatan ti Dios tapno maliklikanna ti rigat. Ipakita ti kasuratan a sititibker a sinurotna ti nalinteg a dalan, isut’ gapuna a saan a sinardengan ni Satanas a riribuken. Idi kamaudiananna, isu ket nalalais, nakabkabil iti kasta unay, ken natutuok agingga ken patay. Ngem saan a nakikompromiso, ket gapu itoy nabalinanna nga indaton ti biagna a kas subbot a maipaay kadatayo. Saanna la ketdi nga inibturan amin dagitoy tapno ‘kaasiantayo ti bagbagitayo’ no dumteng dagiti pakarigatan wenno sulisog!
Maipapan ken Jesus, adda a naikuna: “Inayatmo ti kinalinteg, ket ginuram ti kinadakes.” (Hebreo 1:9) Ti panangliklik iti rigat masansan nga iturongna ti maysa nga agaramid iti dakes. Gapuna, no pudno a kaguratayo ti kinadakes—kas ken Jesus—pulos a ditay makikompromiso. Iti libro ti Proverbio, kuna ni Jehova: “Anakko, agsiribka, ket paragsakem toy pusok, tapno masungbatak ti mangum-umsi kaniak.” (Proverbio 27:11) Naragsakan iti kasta unay ni Jehova iti natimbeng ngem di maisin a kinalinteg ni Jesus. Maparagsaktay met ni Jehova no tuladentayo ti kinatarnaw ni Jesus.—1 Pedro 2:23.
Masanay Babaen ti Panagibtur
Insurat ni apostol Pedro: “Iti daytoy agrag-okayo unay, nupay iti apagbiit iti agdama, no isu ti masapul, napagladingitkayo gapu kadagiti nadumaduma a pakasuotan, tapno ti nasubok a kualidad ti pammatiyo, a napatpateg nga adayo ngem iti balitok a mapukaw uray pay no magugoran iti apuy, masarakan koma a pakaigapuan ti dayaw ken dayag ken tan-ok iti pannakaiparangarang ni Jesu-Kristo.” (1 Pedro 1:6, 7) Agsipud ta imperpektotayo ken agbibiagtayo iti tengnga ti lubong ni Satanas, kanayon a maipasangotayo kadagiti pannubok ken sulisog. Kas inlawlawag ni Pedro, mabalin nga agpaay dagitoy iti nasayaat a panggep. Suotenda ti pammatitayo, ipakitada no nakapsut wenno natibker.
Sanayendatayo met dagitoy. “Nasursuro [ni Jesus] ti agtulnog babaen dagiti sinagabana.” (Hebreo 5:8) Masursurotay met ti agtulnog, kasta met ti agtalek ken Jehova, no ibturantayo ti pakasuotan. Ket agtultuloy daytoy a panagsursuro agingga a maan-anay, kas kinuna ni Pedro: “Ti Dios . . . a mismo ti mangileppas iti panagsanayyo, patibkerennakayo, papigsaennakayo.”—1 Pedro 5:10.
Nupay kasta, no makikompromisotayo iti sidong ti pannubok, ipakpakitatayo a takrut wenno nakapsuttayo, awanan iti nasged a panagayat ken Jehova ken iti kinalinteg wenno awanan iti panagteppel. Pagpeggaden iti kasta unay ti kasta a pagkapuyan ti relasiontayo iti Dios. Wen, mabalin a pudno iti kasasaadtayo ti ballaag ni Pablo: “Ta no agbasoltayo a sipapakinakem kalpasan ti panangawattayo iti umiso a pannakaammo ti kinapudno, awanen ti mabalintayo nga idaton gapu kadagiti basbasol.” (Hebreo 10:26) Anian a nasaysayaat nga amang no liklikantayo ti agbasol ngem ti tumulok iti pagkapuyan a mabalin a pakapukawan ti namnamatayo nga agbiag!
Awan Kondisionna a Kinatarnaw
Idi kaaldawan ni mammadto Daniel, naballaagan dagiti tallo a Hebreo a maitappuakda iti apuy no saanda nga agrukbab iti idolo. Ania ti insungbatda? “No kasta, ti Diosmi a pagserserbianmi mabalinnakami nga isalakan. Iti urno a sumsumged ken dumardarang ken ita imam, O ari, ilapsutnakami. Ngem no saan, maipakaammo koma kenka, O ari, a dagita diosmo dikamto pagserbian, ken kasta met dikamto pagdayawan ti ladawan a balitok nga impatakdermo.”—Daniel 3:17, 18.
Kasta ti pangngeddengda gapu ta kayatda nga aramiden ti umiso. Situtulokda a matay. Uray ta adda namnamada nga agungar. Nupay kasta, no isalakan ti Dios ida, nasaysayaat pay. Ngem awan kondisionna ti natibker a takderda. Kasta met koma a kanayon dagiti adipen ti Dios.
Iti kaaldawantayo, adda dagidiay naibalud, natutuok, ken napapatay pay ketdi gapu ta saanda a nakikompromiso. Nagsakripisio dagiti dadduma no iti material, a kinaykayatda ti agtalinaed a nakurapay ngem ti bumaknang babaen ti pananglabsing kadagiti nalinteg a prinsipio. Ania ti napasamak iti daydiay Kristiano a babai a nadakamat iti pangrugian daytoy nga artikulo? Inapresiarna ti kinapasnek ti doktor nupay saan a nainkalintegan ti singasingna, ngem dina inkompromiso ti pammatina. Imbes ketdi, nagkedked nga agpaopera gapu iti panagraemna iti linteg ni Jehova. Makaparagsak ta naimbagan met laeng ket nakaregregta pay la nga agserserbi ken Jehova. Nupay kasta, idi sititibker nga impakaammona ti takderna, dina ammo no anianto ti pagbanaganna, ngem intalekna ti amin iti ima ni Jehova.
Ania ti nakatulong kenkuana nga agtalinaed a natibker iti sidong ti pakarigatan? Saan a nagtalged iti bukodna a pigsa, ket kasta met koma ti asinoman nga adipen ti Dios. Laglagipenyo, “ti Dios ti kamang ken pigsatayo, maysa a tulong a madadaan iti tiempo ti riribuk.” (Salmo 46:1) Anian a nasaysayaat nga amang ti agpatulong iti Dios iti sidong ti pakasuotan ngem ti agbasol ket kalpasanna agpakaasi kenkuana!
Wen, ditay koma laglag-anen ti naindaklan nga asi ti Dios. Patanorentay ketdi ti napaypayso a tarigagay nga agaramid iti umiso, uray no maipasangotayo kadagiti pakarigatan. Patibkeren daytoy ti relasiontayo ken Jehova, ipaayna ti panagsanay a kasapulantayo tapno magun-odtayo ti biag nga agnanayon, ken iparangarangna ti umiso a panagraem iti asi ti Dios. Makaparagsak iti nailangitan nga Amatayo ti kasta a nainsiriban a takder.
[Ladawan iti panid 24]
Ti naan-anay a panagtalek iti panagungar ti nakatulong kadagiti tallo a Hebreo a nangsalimetmet iti kinatarnawda