Dagiti Napateg a Pasamak iti Moderno nga Aldaw a Historia Dagiti Saksi ni Jehova
1870 Ni Charles Taze Russell ken ti grupo manipud Pittsburgh ken Allegheny, Pennsylvania, E.U.A., inrugida ti sistematiko a panagadal iti Biblia
1870-75 Ni Russell ken dagiti kakaduana nga agad-adal naammuanda nga inton umay manen ni Kristo saanto a makita ti natauan a mata ket ti puntiria ti isusublina ramanenna ti panangbendision kadagiti amin a pamiliada ti daga
1872 Ni Russell ken ti grupona nga agad-adal naawatanda ti subbot a gatad nga impaay ni Kristo para iti sangatauan
1876 Naawat ni C. T. Russell ti kopia ti Herald of the Morning, iti Enero; naam-ammona ni N. H. Barbour nga editor, iti dayta a kalgaw sadi Philadelphia, Pennsylvania
Ti artikulo ni C. T. Russell, a naipablaak iti Oktubre a ruar ti Bible Examiner, sadi Brooklyn, Nueva York, intudona ti 1914 kas panungpalan ti Panawen Gentil
1877 Naipablaak ti libro a Three Worlds, a nagtinnulongan da N. H. Barbour ken C. T. Russell
Impablaak ni C. T. Russell ti bokleta a The Object and Manner of Our Lord’s Return, idiay opisina ti Herald of the Morning, sadi Rochester, Nueva York
1879 Insardeng ni Russell a sinuportaran ti Herald of the Morning, iti Mayo, gapu iti panangmatmat ni Barbour iti subbot
Ti immuna a ruar ti Zion’s Watch Tower and Herald of Christ’s Presence, napetsaan ti Hulio 1879
1881 Dagiti immuna a tract nga impablaak dagiti Estudiante ti Biblia; sakbay ti 1914, ti tinawen a naibunong a tract agdagup ti pinullo a milion a kopia iti 30 a pagsasao
Naorganisa ti Zion’s Watch Tower Tract Society; adda kiddaw a “Masapul ti 1,000 a Mangaskasaba,” dadduma dagiti agbalin a regular a colporteur, dagiti dadduma ipaayda ti aniaman a tiempo a kabaelanda a mangisaknap iti kinapudno ti Biblia
Naibunong ti 300,000 a kopia ti Food for Thinking Christians kadagiti mannakimisa kadagiti kangrunaan a siudad ti Britania
1883 Dimmanon ti Watch Tower idiay China; ti dati a misionera a Presbyterian di nagbayag nangrugin a nangasaba sadiay
1884 Ti Food for Thinking Christians dimmanon sadi Liberia, Africa; adda interesado a managbasa a nagkiddaw kadagiti kopia nga ibunongna
Legal a nairehistron ti Zion’s Watch Tower Tract Society sadi Pennsylvania; opisial a nairekord idi Disiembre 15
1885 Dagiti publikasion ti Watch Tower mabasbasan dagiti mabisin iti kinapudno a taga Norte ken Sud America, Europa, Africa, ken Asia
1886 Naipablaak ti The Divine Plan of the Ages, ti umuna a tomo iti serye naawagan a Millennial Dawn (idi agangay naawagan Studies in the Scriptures)
1889 Nabangon ti Bible House idiay Arch Street, sadi Allegheny, Pennsylvania, kas hedkuarter ti Sosiedad
1891 Damo a panagtataripnong nga inawagan dagiti Estudiante ti Biblia a kumbension, sadi Allegheny, Pennsylvania (Abril 19-25)
1894 Dagiti agdaldaliasat a manangaywan nga idi agangay naawaganda a pilgrim (itatta, manangaywan ti sirkito ken distrito) naibaonda gaput’ programa ti Sosiedad a panangbisita kadagiti kongregasion
1900 Ti immuna a sanga nga opisina ti Watch Tower Society naluktan sadi Londres, Inglaterra
Mangaskasaban dagiti Estudiante ti Biblia iti 28 a pagilian, ket ti mensahe nga ikaskasabada dimmanon iti 13 pay a dagdaga
1903 Naganetget a panagibunong kadagiti libre a tract iti binalaybalay no iti Domingo; idi damo, kaaduan a panagibunong iti tract naangay kadagiti kalsada iti denna dagiti simbaan
1904 Dagiti sermon ni C. T. Russell nangrugida a regular a nagparang kadagiti periodiko; iti las-ud ti maysa a dekada agarup 2,000 a diario ti mangiyim-imprentan
1909 Naiyakar idiay Brooklyn, Nueva York, ti hedkuarter ti Sosiedad, iti Abril
1914 Damo a pannakaipabuya ti “Photo-Drama of Creation,” sadi Nueva York, idi Enero; sakbay ti ngudo ti tawen, nabuyan dagiti nasurok a 9,000,000 idiay Norte America, Europa, ken Australia
Idi Oktubre 2, idiay panganan ti Bethel sadi Brooklyn, impasingked ni C. T. Russell a, “Nagngudon ti panawen dagiti Gentil”
Aktibo a mangaskasaba dagiti Estudiante ti Biblia iti 43 a daga; 5,155 ti nakiraman iti panangasaba kadagiti dadduma; 18,243 ti naireport a timmabuno iti Panglaglagip
1916 Natay ni C. T. Russell nga agedad ti 64, idi Oktubre 31, bayat a nakalugan iti tren sadi Texas
1917 Ni J. F. Rutherford nagbalin a presidente ti Sosiedad idi Enero 6, kalpasan a ti tallo a miembro ti executive committee tinamingda ti ganuat ti Sosiedad iti las-ud ti dua a bulan
Ti libro a The Finished Mystery nairuar para iti pamilia ti Bethel sadi Brooklyn idi Hulio 17; uppat a direktor ti Sosiedad rimmubrob ti isusuppiatda; kalpasan dayta adu a kongregasion ti nawara
1918 Ti diskurso a “Ti Lubong Nanungpalen—Minilion Ita nga Agbibiag Mabalin a Didan Pulos Matay” damo a naipalawag, idi Pebrero 24, sadi Los Angeles, California. Idi Marso 31, sadi Boston, Massachusetts, ti palawag napauluan “Ti Lubong Nanungpalen—Minilion Ita nga Agbibiag Didan Pulos Matay”
Ni J. F. Rutherford ken dagiti nasinged a kakaduana nairamanda iti mandamiento a maaresto a nairuar idi Mayo 7; nangrugi ti bista idi Hunio 5; nasentensiaanda idi Hunio 21 (maysa idi Hulio 10) iti naunday a pannakaibalud iti federal a pagbaludan
Naserraan ti hedkuarter ti Brooklyn iti Agosto, ket naisubli ti panagimprenta idiay Pittsburgh iti nasurok a nakatawen
1919 Dagiti opisial ti Sosiedad ken dagiti kakaduada naluk-atanda babaen iti piansa, idi Marso 26; idi Mayo 14 binaliktad ti korte de apelasion ti desision ti nababbaba a korte, ket adda baro a bista a naibilin; iti simmuno a tawen, idi Mayo 5, inlusulos ti gobierno ti kaso, a dinan kayat ti agdarum
Tapno masubok no mabalin a rugian manen ti trabaho dagiti Estudiante ti Biblia, inyurnos ni J. F. Rutherford nga ipalawag ti “Namnama ti Masmasnaayan a Sangatauan,” idiay Clune’s Auditorium, sadi Los Angeles, California, idi Mayo 4; dina nalaon dagiti umariwekwek, isu a namindua a naipalawag
Nagkumbension dagiti Estudiante ti Biblia sadi Cedar Point, Ohio, idi Setiembre 1-8; naiyanunsio ti iruruar ti magasin a The Golden Age (Agriingkayo! itan)
Naipablaak ti Bulletin (Ti Ministeriotayo iti Pagarian itan) a pammaregta iti panagserbi idiay tay-ak
Ti report iti tawen impakitana a 5,793 dagiti Estudiante ti Biblia nga aktibo a mangaskasaba iti 43 a daga; 21,411 ti naireport a timmabuno iti Panglaglagip
1920 Ti Watch Tower Society inyusuatnan ti bukodna a panagimprenta sadi Brooklyn
1922 Damo nga inusar ni J. F. Rutherford ti radio, idi Pebrero 26, sadi California, tapno maibrodkas ti diskurso iti Biblia
Kumbension dagiti Estudiante ti Biblia sadi Cedar Point, Ohio, idi Setiembre 5-13; naidagadag nga “Ipablaak, ipablaak, ipablaakyo, ti Ari ken ti pagarianna”
Dagiti klero idiay Alemania sinugsoganda dagiti polis tapno arestuenda dagiti Estudiante ti Biblia no agibunongda iti publiko kadagiti literatura ti Biblia
1924 WBBR (ti immuna nga estasion ti radio a kukua ti Watch Tower Society) nangrugi a nagibrodkas idi Pebrero 24
1925 Ti Watch Tower ti Marso 1, kas panangsalaysayna iti pannakaipasngay ti Pagarian ti Dios idi 1914, impakitana nga adda dua a naggiddiat ken agbinnusor nga organisasion—ti kukua ni Jehova ken ti kukua ni Satanas
1926 Indagadag ti Sosiedad ti panagbalaybalay buyogen dagiti libro iti Domingo
1928 Naaresto dagiti Estudiante ti Biblia idiay New Jersey (E.U.A.) gaput’ panangibunongda iti literatura kas paset ti panagbalaybalayda; iti las-ud ti maysa a dekada, nasurok a 500 ti kasta a panangaresto iti kada tawen idiay Estados Unidos
1931 Ti nagan a Saksi ni Jehova inanamonganda babaen iti resolusion idiay kumbension sadi Columbus, Ohio, idi Hulio 26, sa kalpasanna kadagiti kumbension iti intero a daga
1932 Inlawlawag ti Vindication, Book 2, no apay a dagiti padto ti Biblia a pannakapabaro saan nga agaplikar kadagiti natural a Judio no di iti naespirituan nga Israel
Nagturposen ti urnos para kadagiti “nabutosan a panglakayen,” maitunos iti inlawlawag ti ruar ti Agosto 15 ken Setiembre 1 a Pagwanawanan
1933 Napawilan dagiti Saksi ni Jehova idiay Alemania. Idi kapudot ti pannakaidadanes agingga idi agngudo ti Gubat Sangalubongan II, 6,262 dagiti naaresto, ket ti pakadagupan ti pannakaibaludda adda 14,332 a tawtawen; 2,074 dagiti naipan kadagiti kampo konsentrasion, a ti pannakaibaludda agdagup ti 8,332 a tawtawen
Dagiti transcription machine (dadduma naiparabaw kadagiti kotse) inusar dagiti Saksi a mangibrodkas kadagiti palawag iti Biblia kadagiti lugar publiko
1934 Inusar dagiti Saksi dagiti maaw-awit a ponograpo a pangipatokaran kadagiti naiplaka a diskurso iti Biblia para kadagiti interesado
1935 Sigun iti palawag ti kumbension sadi Washington, D.C., idi Mayo 31, ti “dakkel nga umariwekwek” isut’ naindagaan a klase; 840 dagiti nabautisaran iti daytoy a kumbension; ad-adda a naiyunay-unay ti namnama ti agnanayon a biag iti paraiso a daga para kadagiti matalek nga adipen ti Dios nga agbibiag itan
Ti paggigimongan ket damo unay a naawagan Kingdom Hall, sadi Honolulu, Hawaii
1936 Dagiti plakard a pagipablaak damo nga inusar dagiti agibumbunannag ti Pagarian tapno awisenda ti publiko kadagiti diskurso iti Biblia
Naidagadag nga irugi ti panangyadal kadagiti interesado; nga usaren ti Riches a libro ti Sosiedad agraman ti Biblia; masansan a grupo a panagadal dagitoy
1937 Inusar dagiti Saksi dagiti maaw-awit a ponograpo tapno ipangngegda dagiti naiplaka a palawag iti Biblia kadagiti mismo a ruangan dagiti balay
1938 Dagiti teokratiko nga urnos a panangpili kadagiti manangaywan ti kongregasion sinuktanda ti demokratiko a wagas, sigun kadagiti Hunio 1 ken 15 a ruar Ti Pagwanawanan
Naiyurnos dagiti asamblea ti sona (asamblea sirkito itan) para iti grupo dagiti kongregasion
1939-45 Iti intero nga Imperio ti Britania ken British Commonwealth, 23 a nasion ti nangipawil kadagiti Saksi ni Jehova wenno imparitda dagiti literaturada iti Biblia
1940 Ti panagibunong iti Pagwanawanan ken Consolation kadagiti kalsada nagbalin a regular a paset ti aktibidad dagiti Saksi ni Jehova
Ti desision ti Korte Suprema ti E.U., idi Hunio 3, nga intandudona ti inkapilitan a panagsaludo iti bandera uray pay no ania ti relihiuso a pammati imbungana ti naranggas a panagderraawda kadagiti Saksi ni Jehova iti intero a nasion
1941 Nalab-awan dagiti aktibo a Saksi ti 100,000 a bilangda, a dimmanon ti 109,371 ti kangatuan iti 107 a daga, nupay ti Gubat Sangalubongan II linapunosna ti Europa ken agsaksaknapen iti Africa ken Asia
1942 Natay ni J. F. Rutherford idi Enero 8, sadi San Diego, California
ket ni N. H. Knorr ti nagbalin a maikatlo a presidente ti Sosiedad idi Enero 13
Ti dagup ti naiyimprenta a Pagwanawanan iti daytoy a tawen iti amin a pagsasao ket 11,325,143
Naisibbo ti Advanced Course in Theocratic Ministry para kadagiti adda idiay hedkuarter ti Sosiedad, idi Pebrero 16
Inyimprenta ti Sosiedad ti kompleto a Biblia a King James Version, kadagiti bukodna a makina (web rotary)
1943 Nangrugi a nageskuela idi Pebrero 1 ti umuna a klase ti Watchtower Bible School of Gilead
Ti Kurso ti Teokratiko a Panagministro (Eskuelaan ti Teokratiko a Panagministro itan) para kadagiti kongregasion dagiti Saksi ni Jehova naiyam-ammo kadagiti asamblea iti Abril
Ti Korte Suprema ti E.U. nangted ti paborable a pangngeddeng kadagiti Saksi ni Jehova iti 20 kadagiti 24 a kaso; ti Nangato a Korte ti Australia inikkatnan ti pannakaipawil dagiti Saksi sadiay, idi Hunio 14
1945 Idi Oktubre 1, dagiti direktor ti Sosiedad saandan a mapili babaen iti panangbutos dagidiay nagbalin a kualipikado gapu iti kuarta a donasionda
Ti promedio a bilang dagiti libre a panangiyadal iti Biblia kadagiti pagtaengan iti kada bulan dimmanon iti 104,814
1946 Bayat ti naglabas a pito a tawen, nasurok nga 4,000 a Saksi ni Jehova idiay Estados Unidos ken 1,593 idiay Britania ti naaresto ken nasentensiaan a maibalud manipud makabulan aginggat’ lima a tawen gapu iti Nakristianuan a neutralidadda
Iti daytoy damo a tawen kalpasan ti Gubat Sangalubongan II, 6,504 dagiti makiramramanen iti amin a tiempo a panagserbi kas payunir
Nangrugin a naipablaak ti magasin nga Agriingkayo! (nangsandi iti The Golden Age ken Consolation); ti dagup ti maiyim-imprenta isut’ 13,934,429 a kopia iti daytoy a tawen
Nasurok nga 470 a Saksi ti naisaklang kadagiti korte ti Grecia gaput’ panangisuroda iti Biblia kadagiti sabali
1947 Sadi Quebec, Canada, 1,700 nga asunto dagiti Saksi ni Jehova gaput’ panagebanghelioda ti nakasalansan kadagiti korte
Nasurok a 10,000 itan ti bilang dagiti kongregasion, nga agdagup ti 10,782 iti intero a lubong
1950 Ti New World Translation of the Christian Greek Scriptures nairuar iti Ingles, idi Agosto 2, iti kumbension sadi Nueva York
1953 Nangrugi ti naganetget a programa a panangsanay kadagiti Saksi ni Jehova nga agbalaybalay, idi Setiembre 1
1957 Iti 169 a daga, 100,135,016 nga oras ti binusbos dagiti Saksi ni Jehova a nangiwaragawag iti Pagarian ti Dios ken nangiyadal iti Biblia kadagiti kabbaro nga interesado
1958 Ti Divine Will International Assembly, sadi Nueva York, tinabunuan ti 253,922 a naggaput’ 123 a daga; 7,136 ti nabautisaran
1959 Dagiti umuna a sesion ti Kingdom Ministry School, nangrugi idi Marso 9, sadi South Lansing, Nueva York, a naidisenio para kadagiti manangaywan ti kongregasion ken dagiti agdaldaliasat a manangaywan
1961 Ti umuna a grupo dagiti manangaywan ti sanga ti Sosiedad inatenderanda ti espesial a 10-bulan a kurso a pannakasanay sadi Brooklyn, Nueva York, tapno ad-adda a mapagkaykaysa ti trabaho dagiti Saksi ni Jehova iti sangalubongan
Ti New World Translation of the Holy Scriptures, ti kompleto a Biblia a maymaysa a tomo, nairuar iti Ingles
1963 Ti New World Translation of the Christian Greek Scriptures rimmuar kadagiti innem pay a pagsasao (Aleman, Español, Italiano, Olandes, Portugues, ken Pranses), ken adu pay ti sumaruno kadagiti umay a tawen
Nasurok a maysa a milionen a Saksi ni Jehova ti aktibo iti 198 a daga; ti kangatuan a dagup dagiti agibumbunannag itoy a tawen ket 1,040,836; 62,798 ti nabautisaran
1965 Immuna nga Assembly Hall, teatro a naretubar, isut’ inusar dagiti Saksi ni Jehova sadi Nueva York
1967 Nagsasagadsad ti naunday ken nadangkok a pannakaidadanes dagiti Saksi ni Jehova iti intero a Malawi ket nagtultuloy kadagiti tawen a simmaganad
1969 Nasuroken a maysa a milion dagiti panagadal iti Biblia kadagiti pagtaengan; ti report ipakitana ti 1,097,237 a promedio
1971 Dimmakkel ti Bagi a Manarawidwid; idi Oktubre 1, ti tserman nangrugi nga agrikos kadagiti miembrona iti kada tawen
1972 Dagiti kongregasion dagiti Saksi ni Jehova immatonan ti lokal a bagi dagiti panglakayen, imbes a maymaysa la a tao nanipud Oktubre 1
1974 Ti kangatuan a dagup dagiti agibumbunannag iti sangalubongan dimmanunen iti 2,021,432; dagiti payunir ngimmato manipud 94,604, idi 1973, ket nagbalin a 127,135
1975 Nabaliwan ti pannakaorganisa ti Bagi a Manarawidwid; idi Disiembre 4, ti responsabilidad kadagiti kaaduan a trabaho naituding iti innem a komite, a nangrugida a nagandar idi Enero 1, 1976
1976 Tunggal sanga nga opisina ti Watch Tower Society immatonan ti komite dagiti tallo wenno ad-adu pay a naespirituan a nataengan a lallaki, imbes a maymaysa a manangaywan, manipud Pebrero 1
1977 Nangrugi ti Pioneer Service School a nangipaay ti naisangsangayan a pannakasanay dagiti pinullo ribo a payunir iti sangalubongan
1984 Agpromedion ti 2,047,113 ti panagadal iti Biblia kadagiti pagtaengan nga ikonkondukta dagiti Saksi ni Jehova
1985 Nairubbuat ti urnos para kadagiti internasional a boluntario, nga urnosenda manipud hedkuarter dagiti konstruksion ti Sosiedad iti sangalubongan
Sigun iti report 3,024,131 ti makiramraman iti trabaho a panangikasaba iti Pagarian iti 222 a daga; 322,821 ti promedio itan dagiti payunir; 189,800 ti nabautisaran itoy a tawen
1986 Nadutokan dagiti Regional Building Committee a mangurnos iti pannakabangon dagiti Kingdom Hall
1987 Nagtultuloy a limmawa ti trabaho a panagaramid iti adalan, ket adda 3,005,048 nga indibidual ken grupo dagiti pamilia a maiyad-adalan iti Biblia, adu kadakuada iti linawas; ti dagup dagiti nabautisaran iti daytoy a tawen ket 230,843
Nangrugi a nagandar ti Ministerial Training School idi Oktubre 1, ti immuna a klase naangay sadi Coraopolis, Pennsylvania
1989 Dagiti nagbaliw a kasasaad idiay Makindaya nga Europa timmulong tapno maangay ti tallo a dadakkel a kumbension internasional idiay Poland, sa kadagiti dadduma a daga iti simmuno a tawtawen
1990 Ti pannakaikkat ti restriksion kadagiti Saksi ni Jehova kadagiti pagilian ti Africa ken Makindaya nga Europa pinapartakna ti pannakakasaba ti kanayonan a 100,000,000 a tattao
Dagiti agibumbunannag iti Pagarian nadanonda ti baro a kangatuan a bilang nga 4,017,213; dimmanon ti 536,508 dagiti payunir; 895,229,424 ti dagup dagiti oras a nabusbos iti naganetget a trabaho a panangiwaragawag iti Pagarian
1991 Naikkat ti pannakaiparit idiay Makindaya nga Europa ken Africa ket nalaklakan nga idanon ti naimbag a damag ti Pagarian ti Dios kadagiti 390,000,000 pay a tattao
1992 Ti Pagwanawanan maiyim-imprentan iti promedio a 15,570,000 iti 111 a pagsasao; ti Agriingkayo!, a magun-odanen iti 67 a pagsasao, agpromedion ti 13,110,000
Daytoy pay laeng ti kadaklan a pammaneknek a naited, bayat nga 4,472,787 ti nakiraman iti pannakaiwaragawag ti Pagarian iti 229 a daga; 605,610 ti binulan a promedio dagiti payunir; 1,024,910,434 ti oras a nabusbos iti panangasaba a publiko; 4,278,127 dagiti panangiyadal iti Biblia; 301,002 dagiti baro nga adalan a nabautisaran