Ipakita ti Panangipateg iti Balay ti Dios
1 Idi panawen ti Biblia binilin ni Jehova ti ilina a regular nga agu-ummongda iti balayna. (Lev. 23:2) Nangipaay dagitoy a panagtitipon iti panawen tapno mapagsaritaan ken mamennamennada ti Linteg ni Jehova. Napno ti is-isipda kadagiti kapanunotan ti Dios. Intandudo daytoy nga urnos ti panagkaykaysa ken nadalus a panagdayaw. Dagiti panagtitipon itatta iti balay ti Dios ket saan a basbassit ti pategda.
2 Kasanotay a Maipakita nga Ipategtayo Dagiti Gimong? No maminsan lapdan ti kasasaad ti tao a tumabuno iti gimong. Ngem pinalubosanyo kadin dagiti babassit a parikut a mangsinga iti regular nga itatabunoyo iti gimong? Saan a makigimong dagiti dadduma gapu ta arin-sakiten ti uloda wenno nabannogda kalpasan ti aduan trabaho nga aldaw. Ibilang ti dadduma nga obligadoda a mangsangaili kadagiti bimmisita a di manamati a kabagianda. Nangliwat pay a nakigimong dagiti daddduma tapno mabuyada ti paggugustoda a programa iti TV. Ti tukad ti naipakita a panangipateg kadagitoy a kasasaad ket adayo iti naimpusuan a tarigagay nga inyebkas dagiti babbaro ni Core: “Toy kararuak siiiliw, wen, sisesegga kadagiti paraangan ni Jehova.”—Sal. 84:2.
3 Nupay nawadwad ti naespirituan a taraon a naisagana kadagiti gimong, marigatan dagiti dadduma nga agimdeng. Mabalin a masarakanda ti bagbagida nga agar-arapaap, mangpampanunot kadagiti inaldaw a pakasikoran, wenno agtuglepda pay ketdi. Nasarakan dagiti adu a ti panagala iti ababa a nota tumulong kadakuada nga agalerto. Kanayonanna, no nasakbaytay nga agsagana a naimbag, maipaayantayto ti “ad-adda ngem iti gagangay a panangipangag.”—Heb. 2:1.
4 Masapul met a maipasagepsep iti ubbing dagiti naisagana nga instruksion kadagiti gimong. Bassitto unay ti maadal dagiti ubbing no ikkan ida dagiti nagannak ti ay-ayam wenno libro a pagdrowingan tapno agulimekda. Kinakurang ti umiso a disiplina no mapalubosan dagiti ubbing nga agay-ayam, agtatagari, agsangit, wenno sabalit’ ar-aramidenda a makaisturbo iti dadduma. Makissayan ti masansan ken di kasapulan nga ipapan iti kasilias bayat ti gimong no ammo ti ubing nga isu ket kuyogento a kanayon ti maysa kadagiti nagannakna.
5 Importante ti Isasangpet iti Oras: Sagpaminsan, mabalin a lapdannatayo a dumteng iti oras ti gimong dagiti di malisian a kasasaad, ngem no maipaugali ti isasangpet kalpasan ti panglukat a kanta ken kararag ipakitana ti kurang a panagraem kadagiti gimong. Laglagipen a ti pannakipagkanta ken pannakipagkararag kadagiti kakabsattayo iti gimong ti kongregasion ket paset ti panagdayawtayo. Ti ugali a kanayon a naladaw ket masansan a resulta ti nakapuy a nasakbay a panagplano. Ti kinamanagsapsapa ipakitana a raemen ken apresiarentay dagiti gimong.
6 Bayat nga umasideg unay ti aldaw, ad-adda a kasapulan ti panaggigimongtayo. (Heb. 10:24, 25) Ipakitatay ti apresasiontayo babaen iti regular nga itatabuno, nasakbay a panagsagana, isasangpet iti oras, naipamaysa a panagimdeng, sa yaplikar ti naadaltayo.