Panangusar iti Baro a Broshur a Sieepektibo

¹ Iti kallabes a kombension distrito, naragsakantayo nga immawat iti baro a broshur a No Adda Matay nga Ay-ayatenyo. Makaguyugoy daytoy kadagiti tattao iti amin a pagna ti biag, idinto ta adu dagiti agleddaang iti pannakapukaw ti maysa nga ay-ayatenda. Dagiti makaatrakar nga ilustrasionna ti mamaglaka a mangipaima. Iti panid 29, ti dramatiko a lamina ni Lazaro a madama a mapagungar manipud ken patay ti mangipakita a ni Jesus ket “nasged ti tarigagayna a mangluk-at iti ranggas ni patay.” Ti sumaruno a panid a napno iti ilustrasion ti mangipalnaad iti naragsak a buya ti panagungar idiay baro a lubong. Anian a makabang-ar daytoy iti puspuso dagidiay naldaangan!

² Daytoy a broshur ti nadisenio a mausar iti pannakisarita. Agparang dagiti saludsod iti kahon idiay ngudo ti kada benneg imbes nga idiay baba iti kada panid. Mabalinyo nga usaren dagiti “Salsaludsod a Pagpanunotan” iti aniaman a wagas a mariknayo a kasayaatan a tumulong iti estudianteyo.

³ No agsarungkarkayo, nalabit a kayatyo nga ipakita ti benneg dagiti linaonna iti panid 2 ken saludsodenyo iti bumalay no ania ti paginteresanna. Bay-anyo a mangyebkas iti riknana, kalpasanna ipakitayo no kasano a ti broshur ket makaitukon iti liwliwa. Nangusar ti kada paset iti nawadwad a teksto ti Biblia a mangipakita iti basaran ti namnamatayo.

⁴ Ti subtema iti panid 5, “Adda Agpaypayso a Namnama,” ilawlawagna iti makaliwliwa a namnama ti Biblia nga agpaay kadagiti natay. Daytoy ti masapul a mangpagana iti “Ti Sigurado a Namnama Para Kadagiti Natay,” a masarakan iti pinanid 26-31. Ti kahon iti panid 27 ti mangipaay iti “Dagiti Makaliwliwa a Teksto.” Ti maladingitan a bumalay ti nalaka a makakita a ni Jehova ti pudno a “Dios ti amin a liwliwa.”​—2 Cor.1:3-7.

⁵ Iti natanang a wagas, ipakita ti broshur no kasano a maparukma iti leddaang iti ipapatay ti maysa nga ay-ayaten ken no kasano a dagiti dadduma ket makatulongda iti kasta a makapaldaang a tiempo. Adda kahon idiay panid 25 a napauluan iti “Panangtulong Kadagiti Ubbing a Mangdaer iti Ipapatay.” Daytoy ti masapul a tumulong kadagiti nagannak a mangsaranget iti daytoy a problema.

⁶ Mangidulinkayo iti ekstra a kopia ken usarenyo dayta iti impormal a panangasaba. Nalabit a kayatyo ti sumarungkar kadagiti lokal a puneraria dita teritoriayo tapno kitaenyo no kayatda ti maaddaan iti kopia a mangliwliwa kadagiti maldaangan a pamiliada.

⁷ Ibilangtayo a maysa a pribilehio ti mangusar iti daytoy baro a broshur a “mangliwliwa iti amin nga agdung-aw.”​—Isa. 61:2.