Tultulonganyo Kadi ti Anakyo a Mangpili ken ni Jehova?

“NARIKNAK a talaga a makapasikor ken makauma ti agadal iti Biblia. Sililimed nga inkeddengko iti pusok nga inton dumakkelak diakto kayat ti agbalin a maysa kadagiti Saksi ni Jehova,” kuna ti maysa nga agtutubo a lalaki. Nupay mainanama a piliento iti kamaudiananna ti kaaduan kadagiti ubbing iti Kristiano a pagtaengan ti dumasig ken ni Jehova, mabalin a marigatan dagiti agtutubo a kas kenkuana a mangpili ken ni Jehova kas Diosda.

No dadduma, saan a masinunuo dagiti nagannak no kasanoda nga idalan a sibaballigi dagiti annakda. Suksukimatenda a naimbag ti bagida, kas iti maysa a madandanagan nga ama a nangikuna iti naminsan: “Kinapudnona, adda dagiti kanito a matmatak dagiti matmaturog a rupa ti annakko, nga adda pay laeng iti pingpingda ti lulua ti pannakaupay, ket pampanunotek no rumbeng a saanak unay a nainget [kadakuada].” Idi dadakkelen ti dua nga annakna a lallaki, pinilida ti agserbi ken ni Jehova.

Kaskasdi, adda dagiti agtutubo a mangtallikud ken ni Jehova ket panawanda ti kongregasion Kristiano nga agturong iti lubong ni Satanas. Isu a kasano nga agballigi dagiti nagannak a mangtulong kadagiti annakda a mangpili ken ni Jehova? Tapno masungbatan dayta a saludsod, ammuentay pay nga umuna no apay a tallikudan dagiti dadduma nga agtutubo ni Jehova idinto ta tarigagayan unay dagiti dadakkelda nga agtalinaedda kenkuana.

No Apay a Tallikudan Dagiti Dadduma nga Agtutubo ni Jehova

Ti maysa kadagiti kadawyan a makagapu a ta dagiti dadduma nga agtutubo pulos a saanda a pudpudno nga ammuen ni Jehova wenno ti daldalanna. Nupay tumabtabunoda kadagiti Nakristianuan a gimong manipud iti kinaubingda, saan a napasnek ti panangaramidda iti dayta, ken saanda a pudpudno a sapsapulen ni Jehova. (Isaias 55:6; Aramid 17:27) Masikoran ti agtutubo a lalaki a nadakamat itay kadagiti Nakristianuan a gimong agsipud ta dina maawatan ti sasawen dagiti agpalpalawag iti plataporma.

Maimula dagiti bukel ti kinapudno kadagiti dadduma, ngem palubosanda ti pusoda a maallukoy iti nawaya, materialistiko a wagas ti panagbiag ti lubong ni Satanas. Saan a masaranget dagiti dadduma ti napigsa unay a tarigagay a makikadua ken tumulad kadagiti kapatadanda.​—1 Cronicas 28:9; Lucas 8:12-14; 1 Corinto 15:33.

Nupay kasta, iti intero a lubong, adu nga ubbing kadagiti Kristiano a pagtaengan ti pinilidat’ dumasig ken ni Jehova. Adda kadi maadaltayo kadagiti epektibo nga addang nga inaramid dagiti dadakkelda?

Rugianyo a Nasapa

Ti maysa a napateg a tulbek iti panangtulong kadagiti annakyo a mangpili ken ni Jehova isu ti nasapa a panangirugi. Iti kaaduan a kasasaad, agpaut iti unos ti panagbiag dagiti impresion a maawat ken dagiti leksion a maadal no naganus ken nalaka pay laeng a suruan ti puso. (Proverbio 22:6) Isu a rugianyo a nasapa nga isarsarita kadagiti annakyo ti maipapan iti kinaimbag ni Jehova, ti ayat ken kinadayagna, nga ikagumaanyo a patanoren iti pusoda ti panagayat ken ni Jehova ken panangapresiar iti naaramidan ni Jehova maipaay kadakuada. Tapno maibanag daytoy, adu a nagannak ti sibaballigi a nangaramat iti nawadwad nga artikulo maipapan kadagiti parsua ni Jehova a masarakan kadagiti publikasion ti Watchtower Society.

Ti panagtulnog ken panagraem ken ni Jehova ken iti panagdaydayaw kenkuana ket karaman kadagiti dadduma pay a kababalin a masapul a maisuro a nasapa iti biag. Makaparagsak a kitaen dagiti di pay ages-eskuela nga ubbing kadagiti Nakristianuan a gimong a mangikagumaan a mangaramid kadagiti simple a nota ken mangbirok kadagiti teksto iti bukodda a Biblia wenno kumuyog kadagiti dadakkelda a mapan iti banio tapno agdiram-os iti nalamiis a danum no makatuglepda. Simple laeng dagitoy a banag, ngem anian a nagpateg dagitoy iti panangyukuok iti naganus nga isip a ti panagraem ken panagtulnog ket rumbeng a maipakita ken ni Jehova!

Rumbeng met a masapa a mairugi ti serioso a personal a panangisuro iti Biblia. Idi dua pay lat’ tawen dagiti annakda a lallaki, rinugian ti maysa a pagassawaan nga ibasaan ida iti libro a Panagimdeng iti Naindaklan a Mannursuro.a Kamaudiananna, idi agbasbasan dagiti annakda, masapada a bumangon ket binigat a yadalan ida ni nanangda iti libro a Ti Librok dagiti Estoria ti Biblia ken Mabalinyo ti Agbiag nga Agnanayon iti Paraiso a Daga.* Sarunuen daytoy ti pannakasalaysay ti teksto iti aldaw nga idaulo ni tatangda sakbay a mamigatda. Sibabaknang a nasupapakan ti panagregget dagiti nagannak idi pinili dagiti annakda iti di pay nabayag ti agserbi ken ni Jehova, nga insimboloda ti dedikasionda babaen ti panagpabautisar iti danum iti tawenda a 10 ken 11.

Malagip ti maysa a nasayaat a baro nga agserserbi iti sanga nga opisina ti Watch Tower Society idiay Japan nga idi ubing pay laeng, isut’ tinulongan ni nanangna a mangpatanor iti relasion ken ni Jehova babaen ti panagtugawna iti abayna iti rabii, a tultulonganna nga agkararag. Pulos a dina nalipatan ti naisuro kenkuana​—sadinoman ti papananna wenno aniaman ti aramidenna, kanayon nga asideg ni Jehova ken madadaan a tumulong.

Masursuro dagiti naballigi a nagannak nga ilasin dagiti di umiso a pagannayasan gapu iti natawid a kinaimperpekto dagiti annakda, ket masapa nga irugi dagiti nagannak a tulongan dagiti annakda a mangatur kadagitoy. (Proverbio 22:15) Masapul a mataming a nasapa dagiti kababalin nga agduyos iti panagimbubukod, kinasukir, kinatangsit, nalabes a kinamanangbabalaw kadagiti sabsabali. Ta no saan, agtungpal ti kakasta a kababalin iti yaalsa a maibusor iti Dios ken iti daldalanna. Kas pagarigan, masansan a palubosan dagiti natakneng ngem napanuynoy unay a nagannak ti annakda a mangpatanor kadagiti managimbubukodan a kababalin. Marigatan dagitoy nga annak a mangraem kadagiti man dadakkelda wenno ken ni Jehova, nga agbalinda a kas kadagiti ‘awanan panagyaman’ a nadakamat iti Biblia. (Proverbio 29:21) Iti sabali a bangir, dagiti annak a maikkan iti trabaho idiay balay ken masursuruan nga agbalin nga alerto iti pakasapsapulan dagiti sabsabali, mabalin nga ad-adda a managyamanda agpadpada iti dadakkelda ken ni Jehova.

Ti maysa pay a banag a makatulong isu ti nasapa a panangirugi a mangikeddeng kadagiti teokratiko a kalat a kabaelan a ragpaten ti ubing. No saan a nasapa ken kankanayon a maaramid daytoy, mabalin a punnuen dagiti dadduma ti isip ken pusona kadagiti sabali a kalat. Rumbeng a mairaman kadagitoy a kalat ti panangbasa iti intero a Biblia, personal a panagadal iti maysa kadagiti publikasion ti Watch Tower Society, pannakiraman iti Teokratiko nga Eskuelaan ti Panagministro, panagbalin a manangiwaragawag iti naimbag a damag, ken panagpabautisar.

Malagip ni Takafumi nga isut’ inruam ni nanangna nga agbasa kadagiti magasin a Pagwanawanan ken Agriingkayo! babaen ti panangaramidna kadagiti simple a saludsod sana ibati dagitoy iti rabaw ti lamisaan iti kusina a sangpetanna no aggapu iti eskuelaan. Malagip ni Yuri a ti pannakikadua iti sumagmamano nga aldaw kadagiti payunirb nga agserserbi kadagiti lugar a dakkel ti pakasapulan kadagiti ministro a Kristiano, pannakikuyog kadakuada a rummuar iti ministerio, pannakakita kadakuada nga agluto iti naimas a taraon, ken pannakaimatang iti rag-o ken regtada dakkel ti impluensiana iti tarigagayna nga agserbi ken ni Jehova iti umasping a pamay-an. Malagip dagiti adu nga agtutubo ti regular a panangipasiar dagiti dadakkelda kadakuada idiay Bethel, kas pannakaawag ti hedkuarter ken dagiti sanga ti Watch Tower Society, a pakapaliiwanda kadagiti dadduma nga agtutubo a lallaki ken babbai a siraragsak nga agserserbi ken ni Jehova. Adu kadagidiay simmarungkar idi ubingda pay laeng ti agserserbi itan kadagiti Bethel iti aglikmut ti lubong.

Itedyo ti Panawenyo Kadagiti Annakyo

Ti kaadu ken kualidad ti panawen a busbusbosenyo iti denna dagiti annakyo mabalin nga adda direkta a pakainaiganna no pilienda met laeng ti agserbi ken ni Jehova wenno saan. Nalakada la a mailasin ti kaadu ti panawen ken panagsagana nga ipapaayyo iti panagadalyo a sangsangkamaysa iti Biblia. No diyo malagipen ti nagsardenganyo iti napalabas a panagadalyo wenno no itantanyo ti panagadalyo gapu iti babassit la a makagapu, ipampamatmatyo a saan unay a napateg ti panagadal. Nupay kasta, no makitada dagiti sakripisio nga ar-aramiden dagiti nagannak maipaay iti panagadal, nga agsaganada a naimbag ken regular nga angayenda ti panagadal uray pay ania dagiti pakasingaan a rumsua, naiduma a mensahe ti maipasimudaag kadakuada. Nupay saan nga inkapilitan, agpelles dagiti dadduma nga inna no kasta a yadalanda ti annakda, a kas no mapanda makigimong wenno mangyadal iti Biblia iti kaarrubada. Ipakpakitada a napateg ti panagdaydayaw ken ni Jehova.

Adu a panawen ken panagregget ti kasapulan tapno matagiragsak dagiti annakyo ti panagadalda iti Biblia, tapno madanon ti pusoda. Maawis dagiti babassit nga ubbing kangrunaanna no makitada dagiti banag a maad-adalda a maimostra iti sanguananda. Kas pagarigan, tinulongan ti maysa nga ama dagiti annakna a mangiladawan iti panagungar babaen ti panangimostrana iti salaysay ti Biblia maipapan iti panagungar ni Lazaro. Napan naglemmeng iti bassit a siled ket kalpasanna rimmuar a kas ni napagungar a Lazaro.​—Juan 11:17-44.

Bayat nga agmatmataengan dagiti ubbing, ad-adu a panawen ken kinasigo ti kasapulan iti panangtaming iti naruay nga emosion, panagduadua, ken pakaringgoran a pakaipasanguanda. Nagpateg ti panawen nga ilasin dagiti naayat ken mannakaawat a nagannak iti daytoy a tukad no kayatda a masursuro dagiti annakda ti agtalek ken ni Jehova. Kinuna ti maysa a naballigi nga ama nga addaan uppat nga annak a no kasta a maipasango dagiti annakna iti nadumaduma a parikut, isut’ agsukisok iti tumutop a material kadagiti publikasion ti Watchtower ket pagsasaritaanda dagitoy iti inaldaw agingga a maparmek a naan-anay dagiti parikut.

Napaliiw ti maysa a kupado a payunir nga ina nga addaan dua nga annak nga umik-ikay ken saan a naragsak ti balasangna kadagiti teokratiko nga aktibidad. Isu nga inkeddeng ti ina a nasken nga isut’ masangpetan ti anakna idiay balayda iti panaggapuna idiay eskuelaan iti tunggal malem, a makisarita iti balasangna bayat nga umin-inumda iti tsá. Babaen ti nasinged a panagsarsaritada nga aginá, nagun-od ti balasangna ti tulong a kasapulanna. Ita, apagturposna iti haiskul, kinaduaanna ni nanangna iti serbisio a kinapayunir.​—Proverbio 20:5.

Nasayaat a Pannakitimpuyog ken Ulidan

Malaksid pay iti panangipaay iti panawenda, masapul nga ipaayan dagiti nagannak ti annakda iti nasayaat a kakadua. Kunaen ti Proverbio 13:20: “Ti makipagna kadagiti masirib a tattao agbalinto a masirib, ngem ti makilangenlangen kadagiti maag dakesto ti pagbanaganna.”

Bigbigen ti adu a naballigi a nagannak ti kinapudno dayta a proverbio. Kuna ti maysa nga ama dagiti uppat nga annak: “No taliawek ti napalabas, ti panagkunak, dagiti adu a gagayyem ti annakmi iti kinapudno ti maysa kadagiti nakatulong a nangtignay kadakuada nga agserbi ken ni Jehova. Pinaregtak ida a makigayyem [kadagiti kakabsat] iti dadduma a kongregasion kasta met iti kongregasionmi ken ipategda dagidiay a gagayyem.” Malagip ti maysa a Kristiano a panglakayen nga adu a tawenen nga agserserbi iti Bethel: “Idi ubingak pay laeng, agnanaedkam iti maysa a bassit a balay, ngem kanayon a sadiay ti pagdagusan ti manangaywan ti sirkito. Mainayon pay, masansan a makipangmalem kadakami dagiti special pioneer iti kongregasionmi. Idiay balaymi ti pagdigosanda ken makipulapolda kadakami. Ti pannakangngeg kadagiti kapadasanda ken pannakakita iti rag-oda ti nakatulong kaniak a mangipateg iti amin-tiempo a panagserbi.”

Ti nasayaat a pannakitimpuyog ket makatulong kadagidiay lumaslasat kadagiti pakarigatan. Addaan ti maysa nga ina iti anak a lalaki a maburburiboran. Inyamangna ti parikutna iti maysa nga agdaldaliasat a manangaywan dagiti Saksi ni Jehova. Insingasing ti manangaywan nga ikuyogna ti anakna a rummuar iti tay-ak ti serbisio. “No aramidem, sumayaatto ti espiritualidadna ken aminen,” kinuna ti manangaywan. Impadamag ti ina: “Adda urnos ti kongregasionmi para iti panangasaba iti rabii, ket adu nga ages-eskuela nga ubbing, sumagmamano a natataengan a regular pioneer, ken maysa a panglakayen ti makiramraman iti dayta. Idi damo narigatanak a mangikuyog iti anakko a rummuar a regular, ngem saan a nagpaut dayta ta tunggal sumangpet idiay balay, nakaragragsak ken naparegta iti nasayaat a pannakitimpuyogna. Idi adda iti haiskul, isut’ nagpabautisar ken binulan nga ag-auxiliary pioneer, ket idi nakapagturposen, nag-regular pioneer.” Nasayaat ti ibunga ti makaay-ayo a panagkakadua a napakuyogan iti panangaramid iti pagayatan ni Jehova.

Mabalin nga awan dagiti agtutubo iti lugaryo a nasayaat a pakikaduaan koma ti anakyo, ngem adu nga agtutubo ti pinilidat’ agserbi ken ni Jehova gapu iti pannakapaliiwda iti ulidan dagiti dadakkelda. Adu nga agtutubo ti nangdayaw kadagiti dadakkelda ken kinayatda a tuladen ida. Malagip ni Yuri ti kinamanagpadagus ni nanangna ken ti pannakaseknanna kadagiti dadduma, a teleponuanna ida ken ilutuanna dagiti masakit. Kastoy ti kinuna ni Tatsuo, maysa a kameng ti pamilia nga addaan uppat nga annak a lallaki, dadakkelda aminen ken agserserbida ken ni Jehova: “Dinakam mabalin a yadalan a regular ni nanang agsipud ta di manamati ni Tatang ken napalalo ti panangbusor dagiti kakabagian. Ngem dakkel ti epektona kaniak ti pannakakitak iti takderna iti kinapudno ken iti rag-ona nga agserserbi ken ni Jehova. Situtulok pay nga agpuyat agingga iti pumarbangon a tumulong kadagiti parikutmi.” Addaan iti bileg ti nainsiriban a sasao dagiti nagannak no mapakuyogan iti matalek nga ar-aramid. Kinuna ni Yoichiro maipapan kadagiti dadakkelna: “Awan malagipko a nagsaoda iti negatibo maipapan kadagiti dadduma iti kongregasion; wenno pinalubosandakam nga annakda a mangidanondanon iti biddut dagiti sabsabali.”​—Lucas 6:40-42.

Ti Rag-o iti Pannakakita Kadagiti Annak a Mangpili ken ni Jehova

Awan ti nalaka a pamay-an iti panangtulong kadagiti annakyo a mangpili ken ni Jehova. Addanto latta dagiti nariribuk a kanito. Ngem kinuna ti madandanagan nga ama a nadakamat itay: “Kas nagannak, kankanayon a simamatalek nga inkagumaanmi a suroten dagiti singasing ti makitkita nga organisasion ni Jehova. Maysa daytoy a dakkel a tulong iti panangparmek kadagiti parikut.” Naballigi ti panagreggetda.

Wen, babaen ti panangaramidyo iti amin a kabaelanyo a mangsurot kadagiti pagannurotan ti Biblia, nga isuroyo iti annakyo dagiti nasayaat a rason iti panagayat ken ni Jehova, a napakuyogan iti matalek nga ulidanyo ken napasnek a panagregget a tumulong, mabalin nga agballiginto met ti panagreggetyo. Malagipyo kadi daydiay agtutubo a lalaki a nadakamat itay, a nangikeddeng iti naminsan a dina kayat ti agbalin a maysa kadagiti Saksi ni Jehova. Kalpasan a sibaballigi a tinulongan ni nanangna kadagidi narigat a tawen a naglasatanna, kinunana: “Maragsakanak ta pulos a di simmuko!” Mabalin a kastanto met ti maikuna dagiti annakyo.​—Galacia 6:9.

[Dagiti Footnote]

[Ladawan iti panid 30]

Maragsakankay aya a manglaglagip iti panangpadakkelyo iti anakyo?