Saludsod

◼ Maitutop kadi ti agkontribusion no makiluganka iti sabsabali?

Agpannuray ti dadduma kadatayo iti sabsabali a maipaay ti tulong a tumabuno a regular kadagiti gimong ken makiraman iti tay-ak ti serbisio. Adu a kakabsat a lallaki ken babbai ti siaayat a mangusar iti tiempo, lugan, ken dadduma a sanikuada a mangipaay iti pagluganantayo. Nupay mabalin a masapsapada nga agrubbuat ngem ti dati ken mataktakda nga agawid iti pagtaenganda, mangipaayda iti transportasion a buyogen ti nabulos nga espiritu.

Kas iti kada sabali nga aspeto ti Nakristianuan a ministeriotayo, agaplikar ti prinsipio a masarakan iti Galacia 6:5: “Tunggal maysa awitennanto ti bukodna nga awit.” Gapuna, no adda regular a mangiluglugan kadatayo, masapul nga ipakitatayo ti panangipateg saan laeng a babaen iti sasao no di kasta met iti maitutop a kontribusion a tumulong iti nairaman a gasto no kabaelantayo.—Mat. 7:12; 1 Cor. 10:24.

Nupay saan nga agkiddaw ti tulong ken agminar a saan a kasapulan ti tao a makinlugan, kanayon a maipateg ti napasnek a panangitukon ti kontribusion. Mabalin nga agkedked ti agmanmaneho a mangawat ti aniaman; ken, siempre, isu koma ti makindesision iti dayta. Ngem maiparbeng latta nga itukonyo dayta. No dikay kabaelan ti mangted iti dayta a tiempo, adda koma dayta iti panunotyo; mabalin a kabaelanyo ti mangted iti nasursurok inton sumaruno nga aglugankayo.—Luc. 6:38.

Naayat unay iti biang dagidiay addaan lugan a mangpalugan iti sabsabali nga awanan. (Prov. 3:27) Kabayatanna, naayat met a banag kadagidiay magunggonaan iti kasta a kinamanangngaasi ti agyaman babaen ti panagkontribusion a mayataday iti sasaadenda.—Col. 3:15.