Itan ti Tiempo a Panangsapul ken Jehova

“Ni Jehova, minatmatanna manipud sadi langit dagiti annak dagiti tattao, tapno kitaenna no adda kadakuada ti siasinoman nga addaan pannakaawat, a nagbiruk ken Jehova.”​—SALMO 14:2.

1, 2. (a) Kasanot’ panangmatmat ti adu iti pudno a Dios, ni Jehova? (b) Kasano nga ammotayo a ni Jehova ammona ti kinaawan interes ti sangatauan?

ITATTA, ti pudno a Dios, ni Jehova, ket linaksid dagiti ateista, agnostiko, managdaydayaw kadagiti ulbod a didiosen, ken minilion nga agkuna a mamatida iti Dios ngem ilibakda kadagiti ar-aramidda. (Tito 1:16) Adu dagiti mamati kas ti maika-19-siglo a pilosopo nga Aleman a ni Nietzsche a “ti Dios natay.” Saan aya nga ammo ni Jehova daytoy aleng-aleng a kinamaag? Ammona, ta pinaltiinganna ni David a mangisurat: “Ti maag kinunana iti pusona: ‘Awan ni Jehova.’ Isuda agtignayda iti pannakadadael, nagaramidda iti nakarurrurod a gapuanan. Awan siasinoman nga agaramid iti naimbag.”​—Salmo 14:1.

² Intuloy ni David: “Ni Jehova, minatmatanna manipud sadi langit dagiti annak dagiti tattao, tapno kitaenna no adda kadakuada ti siasinoman nga addaan pannakaawat, a nagbiruk ken Jehova.” Wen, ti Soberano nga Apo ammona dagidiay agsapsapul a mangammo ken agserbi kenkuana. Gapuna, ti sipapasnek a panangsapultay kenkuana itan ket napateg. Kaipapanannanto ti nagdumaan ti agnanayon a biag ken agnanayon a pannakapukaw.​—Salmo 14:2; Mateo 25:41, 46; Hebreo 11:6.

3. Ania a potensial ti adda iti masanguanan?

³ Gapuna, makitatayo no apay a nakapatpateg a tulongantay dagiti sabsabali a mangsapul ken Jehova itan. Addada pay minilion a tattao a di pay pulos nakasarak ti maysa kadagiti Saksi ni Jehova wenno nakangngeg ti “naimbag a damag ti pagarian.” Ket no kasano kadakkel ti bilang a pagbalinanto ti “dakkel a bunggoy” sakbay “ti dakkel a rigat,” ditay ammo. Ngem sigurado nga adda potensial para ti ad-adu pay a mangsapul ken makasarak ken Jehova iti mabiit a masanguanan sakbay a naladawen ti amin. Ti saludsod itan ket, Aniat’ maaramidantayo tapno matulongan ti linaklaksa pay a mangsapul ti Dios?​—Mateo 24:14; Apocalipsis 7:9, 14.

4, 5. Iti panagbirbirukda iti maysa a dios, aniat’ kaykayat dagiti adu?

⁴ Adu a tattao ditoy lubong ti agbirbiruk itatta, ngem agbirbiruk ti ania? Mammano laeng dagiti talaga a mangsapsapul iti maymaysa a pudno a Dios, ni Jehova. Kaykayat dagiti nakaad-adu ti maysa a dios a maibagay kadagiti personal a tarigagayda ken kapanunotanda. Kas kinuna ni George Gallup, Jr. a managsirarak ti E.U.: “Talaga a nagbassitan laeng ti masarakan a nagdumaan ti naikameng iti relihion ken ti saan no maipapan ti panagsuitik, panangliklik ti panagbayad ti buis, ken panagtatakaw, kangrunaanna gapu ti kinaadu ti sosial a relihion.” Innayonna nga “adu dagiti basta namagtitipon ti relihion a komportable para kadakuada ken mangpennek ti tarigagayda . . . Maysat’ nangawag ti dayta kas à la carte a relihion.”

⁵ Dadduma ti agkuna, “Ti relihionko naimbagen para kaniak.” Siempre, ti saludsod talaga koma a, “Ti kadi relihionko naimbagen para iti Dios?” Pudno, ti kaaduan iti Kakristianuan ken Hinduismo ket kontentodan a mangdaydayaw kadagiti imahen ken idoloda. Kaaduan nga agkunkuna a Kristiano masarakanda a ti awanan nagan a Trinitariano a dios umdasen para kadakuada. Ken nasurok a 900 a milion a Muslim mamatida ken Allah. Iti sabali a bangir, minilion nga ateista kunada nga awan ti Dios.

Dagidiay a Makasapul ti Tulong

6. Aniat’ natakkuatan dagiti adu a managbasa iti Ti Pagwanawanan?

⁶ Ngem datayo ngay a regular a mangbasbasa itoy a magasin? Biniruktayo ti pudno a Dios ket nasarakantayo. Pinaneknekantay a pudno dagiti sasao ti Santiago 4:8: “Umadanikayo iti Dios, ket isu umasidegto kadakayo.” Babaen ti aktibo a pannakitimpuyog iti kongregasion Kristiano, immadanitayo iti Dios, ket napasarantayo iti bagbagitayo no kasano nga umasideg ti Dios kadatayo.​—Juan 6:44, 65.

7. Kasano nga ammotayo nga adu pay dagiti tattao nga interesado iti panagbalin nga aktibo iti kinapudno?

⁷ Nupay kasta, ammotayo nga adu pay dagiti maragsakan a makitimpuyog a kanayon iti ili ni Jehova ngem kaskasdi dida pay nangala ti positibo a tignay tapno umadani ken Jehova babaen ti dedikasion ken bautismo. Kasano nga ammotayo daytoy? Idi 1990 nganngani sangapulo a milion a tattao ti timmabuno iti Memorial ti ipapatay ni Jesus. Ngem mano dagiti aktibo a mangipabpablaak ti naimbag a damag ti Pagarian? Nasurokda laeng nga uppat a milion. Kaipapananna dayta nga addaantay agarup innem a milion a mannakigayyem iti kinapudno ken no dadduma tagtagiragsakenda ti makitimpuyog kadatayo ngem dida pay nangrugi a mangirekomenda ti nadalus a pagsasao ti kinapudno babaen ti panangikasaba ti naimbag a damag ti Pagarian. Awan duadua, kadagiti di inggagara nga okasion adu ti agsasao iti biang ni Jehova ken ti turay ti Pagarianna. Nupay kasta, dida pay inlasin a silalawag ti bagbagida kas Saksi ni Jehova. Dagitoy met kayattay ida a tulongan.​—Sofonias 3:9; Marcos 13:10.

8, 9. (a) Aniat’ iparparegta ni Jehova nga intay aramiden? (b) Apay a di nainsiriban a liwayan ti pammagbaga ni Jehova?

⁸ Kayattayo a paregtaen dagitoy nga agbalin a naragsak, aktibo a Saksi ni Jehova iti maudi a paset ti naindaklan a trabaho a maitungtungpal itan iti sangalubongan. Pangngaasiyo ta kitaenyo ti naayat nga awis ni Jehova idiay Proverbio 1:23: “Taliawenyo kadi toy panangtubngarko. Ket iparukpokkonto ti espirituk kadakayo; ipakaammokto dagiti sasaok kadakayo.” (Idiligyo ti Juan 4:14.) Anian a makaparegta a maammuan a ni Jehova sungbatannanto ti panangalatayo kadagiti positibo nga addang tapno ilasintay dagiti bagbagitayo iti naganna ken panagdaydayaw kenkuana! Sigurado, ditay kayat ti mairaman kadagidiay nailadawan idiay Proverbio 1:24, 25: “Gapu ta immayabak ket nagmadikayo, inunnatko ti imak ket awan tao a nangikaskaso, ket inaw-awanyo amin a pammagbagak, ken nagmadikayo iti panangtubngarko.”

⁹ Dagidiay a mangliway ti pammagbaga ni Jehova nga isut’ birukenda bayat a masarakan pay ken dagidiay a mangitantantan ti pangngeddengda agingga nga aktual a makitada a mangrugrugin ti dakkel a rigat masarakandanto a nagurayda ti nakabaybayag. Ti kasta a kurso ipakitana ti kinakurang ti pammati ken sirib ken di panagraem dayta iti di kaikarian a kinamanangngaasi ni Jehova.​—2 Corinto 6:1, 2.

10. Apay a napeggad ti kinaaleng-aleng ken kinaawan interes?

¹⁰ Tapno maiyilustrar ti panagkasapulan ti madagdagus a panagtignay, tungpalenyo kadi laeng ti naimbag a balakad ti doktor no doblen ti pulmoniayo? Wenno, imbes ketdi, idi a nailasinyon dagiti damdamo a sintomas ti sakit? Ngarud apay aguray pay ti nabaybayag tapno isinayo ti bagiyo manipud masaksakit a lubong ni Satanas ket makidasig ken Jehova ken kadagiti Saksina? Dagiti ibunga ti kinaaleng-aleng, kinaawan interes, ken di panangikaskaso nailawlawagda idiay Proverbio 1:26-29: “Siak met, iti biangko, agkatawaakto intono pannakadidigrayo, agrabrabakakto intono dumteng ti panagbutengyo . . . Iti kasta awagandakto, ngem diakto sumungbat; birukendakto a sigaganetget, ngem didakto masarakan, agsipud ta ginurada ti pannakaammo, ket saanda a pinili ti panagbuteng ken ni Jehova.” Saantay koma a masarakan nga ‘agsapsapul ken Jehova’ inton naladaw unayen!

11. Ania a tulong ti mabalin a magun-odan dagidiay agsapsapul ti panagserbi iti Dios?

¹¹ Dadduma a mangbasa itoy a magasin mabalin nga addada pay laeng iti kurso a mangbirbiruk ti pudno a Dios. Maragsakankami ta agtultuloykayo iti panagbirukyo. Ikararagmi a ti pannakaammoyo iti Biblia tignayennakayto a mangala ti kanayonan a positibo a tignay nga agtakder a sititibker iti kinapudno. Namnamaenyo a tunggal kongregasion dagiti Saksi ni Jehova sisasaganada a tumulong kadakayo iti panagbirukyo.​—Filipos 2:1-4.

Tiempo ti Regta ken Panagtignay

12, 13. Apay a kasapulantayo ti mangala ti panagtignay maipapan ti pudno a panagdaydayaw?

¹² Apay a nasken nga amintayo ti agtignay a mangilasin ti bagbagitayo ken Jehova ken ti pudno a panagdaydayawna? Agsipud ta dagiti sangalubongan a paspasamak agturturongdan iti kangitingitanna. Dagiti pinanid ti historia mailuklukibdan a naparpartak ngem ti kabaelan ti tao a mangbasa kadagita. Saan a tiempo itan ti panagduadua wenno panagbalin a kurang ti pammatina. Nakalawlawag a kinuna ni Jesus: “Ti saan a makikadua kaniak isu ti bumusor kaniak, ket ti saan a makipagurnong kaniak agiwara.” Kinunana pay: “Ta uray siasino a mangibain kaniak ken kadagiti saok, ibainto met ti Anak ti tao inton umay a sidadayag ken ni Ama ken dagiti nasantuan nga anghel.”​—Mateo 12:30; Lucas 9:26.

¹³ Itan ti tiempo ti kinaregta ken panagtignay! Ammotayo no sadino ti pagturturongan dagiti paspasamak ti lubong, ket makitkitatayon ti iyaay ti Armagedon. Gapuna, ti awag isut’ panangsapul ken Jehova itan kasakbayan ti ‘aldaw ti pungtotna,’ bayat a masarakan pay. Idiay dakkel a rigat, naladawto unayen.​—Sofonias 2:2, 3; Roma 13:11, 12; Apocalipsis 16:14, 16.

14. Addaantayo kadagiti ania a rason iti panangsapul ken Jehova?

¹⁴ Talaga, rebbeng koma a sapsapulen ti sangatauan ti anamong ti Dios itan. Mayanatup la unay ti panangiyebkas ni apostol Pablo iti dayta idiay Aramid 17:26-28: “[Ti Dios] iti maymaysa a tao inaramidna a pagtaudan dagiti amin a nasion dagiti tao, tapno agnaedda iti amin a rabaw ti daga, ket intudingna ti panagsasaganad dagiti tiempo ken dagiti beddeng ti pagtaenganda, tapno sapulenda ti Dios, bareng no ti panagar-arikapda isu masarakanda, uray pay no adda iti saan nga adayo iti tunggal maysa kadatayo. Ta kenkuana agbiagtayo ken aggunaytayo ket mataginayon ti kinataotayo.” Dayta maudi a sasao, “ta kenkuana agbiagtayo ken aggunaytayo ket mataginayon ti kinataotayo,” mangted kadatayo ti umdas a rason a sapulen ti Dios. Pagyamanan ti di kaikarian a kinamanangngaasi ni Jehova, agbibiagtayo iti akikid ngem napateg a biospera iti daytoy battiutit a daga. Ditay aya rebbeng nga agyaman iti Soberano nga Apo ti uniberso? Ket ditay aya rebbeng nga ipakita ti panagyamantayo kenkuana kadagiti praktikal a pamay-an?​—Aramid 4:24.

15. (a) Aniat’ narikna ni historiador Arnold Toynbee a panggep ti natantan-ok a relihion? (b) Aniat’ masapul nga aramidentayo tapno maipadayagtayo ti Dios?

¹⁵ Naminsan insurat ni historiador nga Arnold Toynbee: “Ti pudno a panggep ti natantan-ok a relihion isut’ panangisilnag kadagiti naespirituan a balakad ken kinapudno nga isudat’ kababagasna kadagiti adu a kararua a madanonna, tapno tunggal maysa kadagitoy a kararua matulongan a mangitungpal ti pudpudno a pagtungpalan ti Tao. Ti pudno a pagtungpalan ti Tao isut’ panangipadayag iti Dios ken panangtagiragsak Kenkuana iti agnanayon.” (An Historian’s Approach to Religion, panid 268-9) Tapno maipadayag ti Dios, umuna nga isut’ intay sapulen ken gun-oden ti umiso a pannakaammo kenkuana ken ti pangpanggepna. Gapuna, mayanatup la unay ti awag ni Isaias: “Sapulenyo ni Jehova, dakayo a tattao, ita ta masarakan pay. Umawagkayo kenkuana ita ta asideg pay. Ti managdakdakes bay-anna koma ti dalanna, ken ti tao a saan a nalinteg dagiti pampanunotna; ket agsubli koma ken Jehova, ket isu kaasiannanto, ken iti Diostayo, ta isu pakawanennanto iti nawadwad.”​—Isaias 55:6, 7.

Ania a Praktikal a Tulong ti Maitukontayo?

16. (a) Ania a karit ti sangsanguen ti kongregasion Kristiano? (b) Iti ania a praktikal a pamay-an a matulongantay dagiti dadduma nga agserbi ken Jehova?

¹⁶ Dagiti minilion nga interesado a tattao a saan pay nga aktibo a manangibunannag isudat’ karit nga agpaay kadatayo amin. Aniat’ ar-aramidentayo iti praktikal a pamay-an kas papanglakayen, ministerial nga ad-adipen, payunir, ken agibumbunannag tapno tulongan dagidiay mannakigayyem iti kinapudno nga agbalin a kaduatayo nga aktibo a makiramraman iti pudno a panagdaydayaw? Maysa a pamay-an ti panangitukon ti praktikal a tulong no adino a kasapulan isut’ isasarungkar kadagiti pagtaenganda ket ikuyog ida kadagiti gimong idiay Kingdom Hall tapno mabalinda met a tagiragsaken dagiti gunggona ti espiritu ni Jehova iti regular a pamay-an. Ti balakad ni apostol Pablo kadagiti Hebreo, idiay Heb kapitulo 10, bersikulo 24 ken 25, ket naganetget ita a kas idi: “Ket agpipinnanunottayo a maipaay iti pannakaparegtatayo iti ayat ken kadagiti naimbag nga ar-aramid, a ditay baybay-an dagiti panaggigimongtayo, kas iti kadawyan dagiti dadduma, no di ket agbibinnalakadtayo, ket nangnangruna gapu ta makitayo nga umas-asideg ti aldaw.” Paregtaenmi amin dagidiay a kalikagumanda a mapasaran ti pagayatan ni Jehova a makitimpuyog a regular kadagiti Saksi ni Jehova idiay lokal a Kingdom Hall da.

17. No intay tulongan dagiti estudiante ti Biblia a rumang-ay iti panangbiruk ken Jehova, ania a salsaludsod ti masapul a masungbatan?

¹⁷ No iyadaltay ti Biblia iti maysa a regular a tumabtabunon kadagiti gimong, matulongantay kadi dayta a makualipikar kas manangibunannag ti naimbag a damag? (Kitaenyo ti Organisado a Mangitungpal ti Ministeriotayo, panid 97-9.) Ket iti kanito nga agbalin a maysa a di bautisado a manangibunannag, naipaay kadin ti awis a makikadua kadatayo a regular iti trabaho a publiko a panangaskasaba ken iti dadduma kadagiti iyad-adalantayo ken panagsarungkar? (Kitaenyo ti Disiembre 1, 1989, ruar Ti Pagwanawanan, panid 31.) Iti sabali a pannao, no makualipikaren dagiti kabbaro, parparegtaentay kadi ida babaen ti panangipakita kadakuada nga umun-una ti dadduma kadagiti positibo a resulta ti trabahotayo a panangaskasaba?​—Mateo 28:19, 20.

Ni Jehova Maikari a Sapulen

18. Kasano nga impakita ni Jehova ti asina iti sangatauan?

¹⁸ Gapu iti daton a subbot ni Kristo Jesus, saanen a singiren ni Jehova dagiti naglabas a basbasoltayo ken lipatenna ti maibusor kadatayo no agbabawitayo ken alagadentayo ti pammati. Imutektekanyo dagiti sasao ni David: “Ta saanna nga impaay kadatayo ti kas mayanatup kadagiti basbasoltayo; dinatayo met sinupapakan iti katutopan ti kinadangkestayo. Ta kas kangato dagiti langlangit iti ngatuen ti daga, kasta ti kadakkel ti kinamanagayatna kadagiti agbuteng kenkuana. Kas panagaddayo ti daya ken ti laud, kasta ti nangyadayuanna kadagiti salsalungasingtayo kadatayo. Kas panangngaasi ti maysa nga ama kadagiti annakna, kasta ti panangngaasi ni Jehova kadagiti agbuteng kenkuana. Ta ammona ti pannakasukogtayo, isu malagipna a datayo tapuktayo.”​—Salmo 103:10-14; Hebreo 10:10, 12-14.

19. Aniat’ adda a pammaregta kadagidiay immikay iti kinapudno?

¹⁹ Pudno a managparabur ken manangngaasi a Dios ni Jehova. No umaytay kenkuana iti kinapakumbaba ken panagbabawi, isut’ mangpakawan ken manglipat. Saan nga agimulmula ti agnanayon a sakit ti nakem a ti ibungana ket agnanayon a pannakatutuok iti umap-apuy nga impierno. Saan, ta kas kinuna ni Jehova: “Siak​—siak met laeng Daydiay nangpunas kadagiti labsingmo gapu kaniak met laeng, ket diakto lagipenen dagiti basbasolmo.” Anian a pammaregta dayta iti asinoman nga immikay iti kinapudno ken liniwayanda ti relasionda ken Jehova! Maparegtada met a mangbiruk ken Jehova itan ken agsubli iti aktibo a pannakitimpuyog iti ili nga agaw-awit ti naganna.​—Isaias 43:25.

20, 21. (a) Addaantayo ti ania a makaparegta nga ulidan idiay Juda idi ugma? (b) Ania ti inaramid dagiti agnanaed iti Juda tapno magun-odanda ti bendision ni Jehova?

²⁰ Iti daytoy a banag addaantay makaparegta nga ulidan ken Ari Asa iti Juda idi ugma. Pinarutna ti ulbod a panagdayaw iti pagarianna, ngem kaskasdi nga addada nabati a ramramit ti pagano a panagdaydayaw. Ti salaysay idiay 2 Cronicas 15, bersikulo 2 ingganat’ 4, ibagana kadatayo no ania ti kinuna ni mammadto Azarias ken Asa kas palagip: “Ni Jehova adda kadakayo bayat ti kaaddayo kenkuana; ket no isu ti sapulenyo, masarakanyonto, ngem no isu ti baybay-anyo baybay-annakayto met. Ket nabayag a tiempo nga awan iti Israel ti napaypayso a Dios . . . Ngem idi ti pannakaparigatda isuda nagsublida ken Jehova a Dios ti Israel ket nagsapulda kenkuana, isu nasarakanda.”

²¹ Saan a nakipagay-ayam ni Jehova ti linnemmengan ken Ari Asa ngem “isu nasarakanda.” Kasano a nagtignay ti ari iti daytoy a mensahe? Iti isu met laeng a kapitulo, sumungbat ti 2Cro 15 bersikulo 8 ken 12: “Ket idi nangngeg ni Asa dagitoy a sasao . . . , timmured ket inikkatna dagiti kinarimon iti amin a daga . . . ket pinabarona ti altar ken Jehova nga adda idi iti sango ti balkon ni Jehova. Ket [ti Juda], nakitulagda iti panagsapulda ken Jehova a Dios dagiti ammada iti amin a pusoda ken amin a kararuada.” Wen, sinapulda a sipapasnek ni Jehova “iti amin a pusoda ken amin a kararuada.” Aniat’ resultana iti nasion? Ibaga ti 2Cro 15 bersikulo 15 kadatayo: “Ket ti amin a Juda nagrag-o iti maipapan iti sapata; ta nagsapatada idi iti amin a pusoda ket nagsapulda kenkuana iti amin a tarigagayda, ket isu nasarakanda; ket ni Jehova intedna kadakuada ti talna iti aglikmut.”

22. Aniat’ mangparegta kadatayo nga agbalin nga aktibo iti serbisio ni Jehova itan?

²² Ita, saan aya a pammaregta dayta kadatayo a mangala ti positibo a panagtignay maipapan ti nadalus a panagdayaw ken Jehova? Ammotayo a ti potensial adda para iti minilion pay nga agdayaw ken Jehova. Awan duadua adu kadagitoy ti mangar-aramiden ti panagbalbaliw iti kabibiagda tapno matungpalda dagiti Nainkasuratan a pagalagadan iti serbisio ni Jehova. Dagiti dadduma dumakdakkeldan iti pannakaawat ken pammati, birbirukendan ni Jehova, ket iti mabiiten matignaydan a mangiraman ti nadalus a pagsasao kadagiti sabsabali babaen panangiranud kadakuada ti nauneg a pannakaawat iti kinapudno maipapan ken Jehova ken ti Pagarianna. Ket apay a nakapatpateg a datayo amin birukentayo ni Jehova itan ta masarakan pay? Agsipud ta asidegen ti inkarina a baro a lubong!​—Isaias 65:17-25; Lucas 21:29-33; Roma 10:13-15.

Malagipyo Pay Aya?

◻ Asinot’ mangipakpakita ti kinaawan interes iti pudno a Dios, ni Jehova?

◻ Iti ania a tukad a masansan nga apektaran ti relihion ti kababalin?

◻ Aniat’ adda a potensial iti iyaadu dagiti aktibo a Saksi?

◻ Apay nga itan ti tiempo ti kinaregta ken panagtignay?

◻ Apay a maikari ni Jehova a sapulen?

[Ladawan iti panid 10]

Adu a gagayyem dagiti Saksi ni Jehova a timmabuno iti Memorial ket potensial nga ad-adipen ti Dios

Ti bilang ti timmabuno iti Memorial idi 1990: 9,950,058

Ti kangatuan a bilang dagiti agibumbunannag idi 1990: 4,017,213

[Ladawan iti panid 12]

Idi kaaldawan ni Ari Asa, ti nasion nagsubli ken Jehova