Siasino ti Dumngeg iti Mensahetayo?
1 Iti pakasaritaan ti tao, ad-adda a malaylayus ita dagiti tao iti impormasion, a kaaduan kadagitoy ket saan a napateg ken makatikaw pay ketdi. Kas resultana, adu ti mariribukan, isut’ gapuna a marigatantayo a mangallukoy kadakuada a dumngeg iti mensahe ti Pagarian. Saanda a mabigbig nga agpaay iti pagimbaganda ti panangipangag iti Sao ti Dios.—Luc. 11:28.
2 Agrag-otayo ta iti adu a paset ti lubong, pinullo a ribu dagiti tattao ti dumdumngeg iti dayta a mensahe ken umaw-awat iti ituktukontayo a panagadal iti Biblia iti pagtaengan. Nupay kasta, iti dadduma a teritoria, saan a kastat’ kaadu dagiti mangipangag. Adu dagiti madanontayo iti ministerio a saan a mangipangag, ket nalabit pampanunotentayo no siasino dagiti dumngeg iti mensahetayo.
3 Masapul nga agannadtayo di la ket ta maupaytayo. Inlawlawag ni Pablo: “‘Tunggal maysa nga umawag iti nagan ni Jehova maisalakanto.’ Nupay kasta, kasano ti panangawagdanto iti daydiay . . . dida nangngeg? Kalpasanna, kasano a mangngegdanto no awan ti mangasaba? . . . ‘Anian a nagimnas ti saksaka dagidiay mangideklara ti naimbag a damag dagiti naimbag a bambanag!’” (Roma 10:13-15) No nagagettayo a mangimula iti bin-i ti Pagarian, padakkelen ti Dios dayta kadagiti nasingpet ti panagpuspusona.—1 Cor. 3:6.
4 Ti Tulbek Isut’ Kanayon a Panagsarungkar: Kadagiti teritoria a sumagmamano laeng dagiti tao a dumngeg iti mensahetayo, kasapulan a patanorentayo ti aniaman nga interes a masarakantayo, makaipaimatayo man iti literatura wenno saan. Apay nga ibagatayo a dagus nga agbambannogtay laeng? No agmulatayo iti bin-i, ditay ammo no sadino nga agtubo. (Ecl. 11:6) No agsublitayo a nakasagana a mangiranud iti Nainkasuratan a banag, uray apagbiit laeng, mabalin a madanontayo ti puso ti maysa a tao. Mabalintay ti mangibati iti tract wenno mangitukon kadagiti agdama a magasin. Inton agangay, mabalin a makaidemostratayo iti panagadal iti Biblia. Bendisionan ni Jehova ti panagreggettayo.—Sal. 126:5, 6.
5 Maysa a tract ti naibati iti maysa a babai a nangipakita iti bassit nga interes. Sa la nadanon manen iti pagtaenganna kalpasan ti dua a bulan, idi a kupado latta a makisao. Isu met laeng a tract ti naibati manen kenkuana. Iti laksid ti kinapinget ti agibumbunannag, sa la naranaan kalpasan ti tallo pay a bulan, ngem masakit idi. Simmarungkar manen ti kabsat a babai iti sumuno a lawas, ket pinagsaritaanda ti tract iti apagbiit. Idi nagsubli ti kabsat iti simmaganad a lawas, nangipakita ti babai iti napaypayso nga interes. Gapu iti panagbaliw dagiti sirkumstansia iti biagna, sipapanunoten iti naespirituan a kasapulanna. Nairugi ti panagadal iti Biblia, ket nagtultuloy dayta a linawas kalpasanna.
6 Kas iti aniaman a banag a kayattayo a makita a tumubo, sabong man, nateng, wenno interes iti mensahe ti Pagarian, kasapulan ti panangsukay. Kasapulan ti panawen, pinget, panangtaripato, ken determinasion a di sumuko. No agtultuloytayo a mangasaba, sigurado a makasaraktayo iti ad-adu pay a dumngeg iti mensahetayo.—Idiligyo ti Galacia 6.9.