Panagretiro—Maysa Kadi a Silulukat a Ruangan iti Nateokratikuan nga Aramid?
TI PANAGRETIRO—iti adu daytat’ pagnguduan ti naunday a panawen ti rigat ken pannakasimron. Kalpasan ti pannakaipanget iti makapaksuy wenno makapadukot a rutina, adu ti mangnamnama a ti panagretiro luktanna ti ruangan nga agturong kadagiti tawen ti bang-ar ken personal a wayawaya. Nupay kasta, masansan a dayta a ruangan mangiturong iti panagdukot ken panagkapuy. Talaga a saan a maipaay ti paglinglingayan ken dibersion ti pannakarikna ti kinapateg a kas ti ipaay ti trabaho.
Kadagiti Saksi ni Jehova, ti panagretiro mabalin a luktanna “ti maysa a dakkel a ruangan a mangiturong iti panagaramid.” (1 Corinto 16:9) Nupay ti panaglakay/panagbaket adda dagiti kakuyogna a parikut ken limitasion, natakuatan ti sumagmamano a natataengan nga iti tulong ni Jehova mapalawada ti panagserbida kenkuana. Usigenyo ti kapadasan ti sumagmamano a natataengan a Kristiano idiay Netherlands. Kabayatan ti 1995 a tawen serbisio, 269 iti nasurok a 1,223 a payunir (amin-tiempo a manangiwaragawag ti Pagarian) ket agtawen iti 50 wenno natataengan pay. Kadagitoy, 81 ti agtawen iti 65 wenno nasursurok pay.
Dadduma ti makapagpayunir babaen laeng ti panangitultuloyda iti okupado a kasasaad a naipasdekdan bayat nga agtartrabahoda. (Idiligyo ti Filipos 3:16.) Malaglagip ti maysa a nagretiron a Kristiano nga agnagan Karel: “Idi agtartrabahoak pay, mangrugiak nga agtrabaho iti alas 7:30 t.b. Idi nangrugiak nga umawat iti pensionko, naikeddengko a pagtalinaeden ti kasta met laeng a rutina. Rugiak ti aldaw iti panangasaba iti lansangan babaen dagiti magasin iti sanguanan ti estasion ti tren kada alas siete ti bigat.”
Ti naannad a panagplano ket maysa met a tulbek ti balligi. (Proverbio 21:5) Kas pagarigan, nakaurnong ti dadduma iti umdas a kantidad a mangsuportar kadakuada iti ministerioda. Inkeddeng ti dadduma a kissayan dagiti personal a paggastuan ken maaddaan iti paset-tiempo a trabaho. Alaentay a pagarigan da Theodore ken Ann. Rinugianda ti biag ti naasawaan kas payunir agingga a kinasapulan nga agsardengda iti panagpayunir gapu kadagiti obligasionda iti pamilia. Ngem nagtalinaed a nabiag ti espirituda a kinapayunir! Bayat a dumakdakkel dagiti annakda a babbai, nagtultuloy a naparegtada nga agpayunir. Napatpateg pay, nangipakita da Theodore ken Ann iti nasayaat nga ulidan, a masansan nga agserbida kas auxiliary pioneer. Idi agmataenganen dagiti annakda, kinissayan da Theodore ken Ann ti panggedanda tapno maaddaanda iti ad-adu a panawen a panagserbi iti tay-ak.
Kalpasan a simrek dagiti annakda iti amin-tiempo a ministerio ken pimmanawdan iti pagtaengan, nangrugi a nagpayunir ni Ann. Maysa nga aldaw pinaregtana ni Theodore a panawannan ti trabahona. “Makapagpayunirta a dua,” insingasingna. Impakaammo ni Theodore iti amona ti pangpanggepenna. Nasdaaw idi intukon ti amona ti tulong babaen ti panangipaayna kenkuana iti paset-tiempo a trabaho, a kunana: “Ti panagkunak kayatmo ti agtrabaho iti amin-tiempo iti amom idiay ngato [idiay langit].” Tagtagiragsaken itan da Theodore ken Ann ti agkadua nga agpayunir.
Nagpayunir ti dadduma gapu kadagiti pasamak a dimteng iti biagda. Ti nakalkaldaang nga ipapatay ti anakda a babai ken ti apokoda ti nangtignay iti maysa a nataenganen a pagassawaan tapno mennamennaenda ti wagas a panangusarda iti nabatbati pay a tawen ti panagbiagda. (Eclesiastes 7:2) Imbes a malapunosda iti ladingit, simrekda iti amin-tiempo a panagserbi, a tagtagiragsakenda itan iti nasurok a walo a tawen!
Siempre, kasapulan ti pudpudno a determinasion tapno makapagtalinaed iti amin-tiempo a ministerio. Kas pagarigan, dagus a nangrugi nga agpayunir da Ernst ken ni baketna, a Riek, apaman a pimmanawen dagiti annakda iti pagtaengan. Di nagbayag kalpasanna, maysa a dati a kasosio iti negosio ti nangitukon ken ni Ernst iti maysa a trabaho a panguartaan iti dakkel. Insungbat ni Ernst: “Addaankami iti kasayaatan pay laeng nga amo, ket dimi kayat ti agsardeng iti panagserbi kenkuana!” Gapu ta nagtalinaed da Ernst ken ni baketna nga “empleado” ni Jehova, naluktan kadakuada ti sabali pay a pribilehio iti panagserbi. Nagserbida iti trabaho iti sirkito iti nasurok a 20 a tawen ken nagtultuloyda kas payunir agingga ita. Pagbabawyanda kadi ti panangisakripisioda iti bagida? Itay laeng nabiit nagsurat dagiti agassawa: “No pagayatan ni Jehova, iti tallo pay a bulan selebraranmin ti maika-50 a tawen ti panagasawami, a masansan a maawagan iti nabalitokan nga anibersario. Ngem buyogen ti naan-anay panamati maikunami a dagiti pudpudno a nabalitokan a tawenmi nangrugi idi nagpayunirkami.”
Masarakan ti adu a ti ruangan a mangiturong iti napalawa a panagaramid mangiturong met iti dakdakkel pay a rag-o! Kuna ti maysa a kabsat a lalaki a nangrugi a nagpayunir kalpasan ti dua a lawas idi nakagteng iti edad nga 65: “Awan duadua a maikunak a diak pulos napasaran ti kasta a panawen iti biagko a napnapno kadagiti bendision a kas ti napalabas a sangapulo a tawen ti panagpayunir.” Kuna ti agassawa a nagpayunir iti nasurok a piton a tawen: “Ania koma pay ti rumbeng nga aramiden ti pagassawaan nga addaan edad ken kasasaad a kas kadakami? Masansan a makitami dagiti kas kadakami iti teritoria—tao laengen iti balay, lumuklukmeg, lumaklakay/bumakbaket, ken kumapkapuy. Ti panagserbi pagtalinaedennakami a nasalun-at iti mental ken pisikal. Kanayonkam nga agkadkadua. Masansan a nasayaksakkami ken tagtagiragsakenmi ti biag.”
Siempre, saan nga isuamin a natataenganen ti addaan kasasaad a makapagpayunir. Masigurado dagitoy a Kristiano nga ipateg ni Jehova ti aniaman a maaramidanda iti panagserbi kenkuana. (Idiligyo ti Marcos 12:41-44.) Kas pagarigan, maysa a kabsat a babai ti naidalit iti nursing home. Nupay kasta, silulukat pay laeng kenkuana ti maysa a ruangan ti panagaramid! Insaludsod kenkuana ti doktor no kasanona a palabsen ti orasna. Isalaysayna: “Imbagak kenkuana a kanayon a kurang ti tiempok. Dina matarusan daytoy. Imbagak kenkuana a daytoy ket gapu ta dagiti aldawko napnoda kadagiti makapnek nga aramid. Saanak a malday, no di ket sapulek dagiti sabsabali nga isudat’ malmalday ket ikagumaak nga ibaga kadakuada no aniat’ isagsagana ti Dios agpaay iti sangatauan.” Gupgopenna dagiti bambanag iti panangikunana: “Iti maysa nga agarup 80 ti tawennan, bassiten ti manamnamana. Ikararagandak tapno maidalanko pay ti adu nga agturong ken Jehova.”
Addakay kadin iti edad a panagretiro? Ti ruangan nga agturong iti nam-ay mabalin a makaay-ayo, ngem saan a daytat’ ruangan iti naespirituan a bendision. Usigenyo a naimbag ti kasasaadyo buyogen ti panagkararag. Mabalin a makastrekkayo iti ruangan a mangiturong iti dakdakkel a panagaramid iti panagserbi ken Jehova.
[Dagiti ladawan iti panid 25]
Ti panagretiro mabalin a mangiturong iti napalawa a panagaramid iti ministerio