Ti Pannakaammo Manipud iti Dios Sungbatanna ti Adu a Saludsod
1 Sakbay a nagun-odyo ti umiso a pannakaammo iti kinapudno, nalabit adu ti saludsodyo maipapan iti biag a diyo masungbatan. Anian a ragsakyo nga immawat kadagiti naibatay-Biblia a sungbat kadagidiay a saludsod! Ita matulonganyon dagiti sabsabali a mangbirok kadagita a sungbat. (Idiligyo ti 2 Timoteo 2:2.) Maiburayyo kadakuada ti pannakaammo ti Dios a mangiturong iti biag nga agnanayon. (Juan 17:3) Ngem kasanoyo a matulongan ti maysa a tao a mangapresiar iti pateg daytoy a pannakaammo? Bueno, panunotenyo dagiti saludsod a sinungbatan kadakayo ti kinapudno. Ania ti tarigagayan a maammuan dagiti agbirbirok iti kinapudno? Ti panangpampanunotyo kadagitoy matulongannakayo a mangitukon iti libro a Pannakaammo a Mangiturong iti Biag nga Agnanayon. Matulongannakayo dagiti sumaganad a singasing kabayatan ti panagsaganayo a mangasaba iti Hunio.
2 Yantangay adu ti tattao a masmasdaaw no apay a nakaad-adu ti agsagsagaba ditoy lubong, mabalin a nasayaat no kastoy ti ibagayo:
◼ “No dumteng ti didigra wenno lumanlan ti krimen ken kinaranggas, masansan a maisaludsod dagiti tattao no apay a mapaspasamak ti kakasta a nakaal-alingget a bambanag. Aniat’ sungbatyo iti dayta?” Palubosanyo a sumungbat ken padayawanyo ti sungbatna. Kalpasanna iturongyo iti kapitulo 8 iti libro a Pannakaammo, ket dakamatenyo ti nailanad iti parapo 2. Ilawlawagyo a daytoy a libro idatagna ti panangilawlawag ti Biblia no apay a mapasamak dagiti dakes a bambanag, sa kunaenyo: “Kayatko nga ibati kadakayo daytoy a libro iti bassit a kontribusion.” Kalpasanna iyurnosyo ti panagsubli tapno maituloy ti nagsaritaanyo.
3 Inton sublianyo ti napaimaanyo iti libro a “Pannakaammo,” mabalinyo a kunaen:
◼ “Interesadoak iti opinionmo maipapan iti no apay a nakaad-adu ti agsagsagaba ditoy lubong. Umanamongka kadi iti sungbat ti Biblia kas nadakamat iti libro?” Palubosanyo a sumungbat. Basaenyo ti parapo 17 iti panid 77 iti libro a Pannakaammo, sa ibagayo a kayatyo nga ibasa ti Roma 9:14 manipud iti Biblia ti bumalay. Sa kunaenyo: “Ti naimbag a damag ket, saan a ti Dios ti makagapu iti panagrigat ken panagsagabatayo. Inkarina nga ikkannatayo iti biag nga agnanayon iti kinatalna ken kinaragsak. Ti umuna a kapitulo daytoy a libro napauluan iti ‘Mabalinyo ti Maaddaan iti Naragsak a Masakbayan!’ Kayatko nga ilawlawag no kasano a pudno dayta kenka ken kadagiti patpatgenyo.” Iturongyo iti kapitulo 1, sa idemostrayo ti panagadaltayo. Mangsaklawkayo manipud iti kapitulo iti mayanatup a kaadu sigun kadagiti kasasaad.
4 Nalabit kayatyo nga usaren ti introduksion nga adda iti panid 14 iti libro a “Panakirinnason,” iti sidong ti paulo a “Kinalakay/Ipapatay”:
◼ “Inimtuodyo kadin: ‘Ni patay isu ngatat’ tungpal ti isuamin? Wenno adda pay sabali a banag kalpasan ti ipapatay?’ [Palubosanyo a sumungbat.] Lawlawagan ti Biblia dagiti saludsodtayo maipapan iti ipapatay. [Basaenyo ti Eclesiastes 9:5, 10.] Ipakitana pay nga adda ti pudpudno a namnama dagidiay addaan pammati. [Iturongyo iti parapo 13 iti panid 84 ti libro a Pannakaammo; basaen ken ilawlawagyo ti sasao ni Jesus a masarakan iti Juan 11:25.] Daytoy intero a kapitulo sungbatanna ti saludsod nga, Aniat’ mapasamak kadagiti natay a patpatgentayo? No kayatmo a basaen, ibatik kenka daytoy a kopia iti bassit a kontribusion.”
5 No agsarungkarkayo, mabalin nga ipalagipyo iti bumalay ti naudi nga isasarungkaryo sa kunaenyo:
◼ “Napagsaritaanta idi no aniat’ mapasamak iti tao no matay. Adu ti mamati nga adda sabali a biag idiay langit wenno impierno kalpasan ti ipapatay. Ngem pinampanunotmo kadin ti maipapan iti posibilidad a panagungar dagiti natay ditoy daga a mismo? [Palubosanyo a sumungbat.] Sigun iti Biblia, dagidiay mapagungar karamandanto kadagiti naemma a mangtawid iti daga. [Basaenyo ti Salmo 37:11, 29, sa isalaysayyo ti parapo 20 iti panid 88 ti libro a Pannakaammo.] Dayta a namnama nangipaay iti liwliwa kadagiti minilion a tattao a mabutbuteng iti ipapatay. Daytoy a libro tulongannakayo a mangtarus a naimbag iti dayta a banag. Mabalin kadi nga ipakitak no kasano?”
6 No kayatyo ti nalaklaka a presentasion, mabalinyo a padasen daytoy:
◼ “Kayatko nga ipakita kenka ti ilustrasion iti daytoy libro a Pannakaammo a Mangiturong iti Biag nga Agnanayon. Saan kadi a nagpintas daytoy a ladawan?” Ukagenyo ti libro tapno makita ti bumalay ti panid 4-5. Palubosanyo a sumungbat. Kalpasanna basaenyo ti sasao iti panid 5. Ingudoyo iti kastoy: “Mabalinmo nga alaen daytoy a libro tapno mabasamto a mismo. Adda sangkabassit a kontribusion iti dayta a mangsulnit iti dadduma a nagastos iti pannakayimprentana.” Kitaenyo no kaano ti kombeniente a panagsubli a mangsurnad iti aniaman a naipakita nga interes.
7 Adda kadatayo ti pannakaammo manipud iti Dios a mangsungbat kadagiti napapateg a saludsod iti biag. Ganetgetanyo ti agsagana, ket bendisionanto ni Jehova ti reggetyo a mangiburay iti daytoy makaited-biag nga impormasion kadagidiay agbirbirok iti kinapudno.