Panangiparang iti Naimbag a Damag Buyogen ti Positibo a Kababalin
1 Kayattayo amin a tagiragsaken ti aniaman nga aramidtayo, nangnangruna iti trabaho a panagaramid iti adalan. Kasanotayo a magun-od ti kasta a pannakapnek? Mangrugi dayta iti panangsalimetmet iti positibo a panagpampanunot no tultulongantayo dagiti sabsabali. (Prov. 11:25) Ti wagastayo a mangiparang iti naimbag a damag ipakitana koma a pudno a patientay ti ibagbagatayo. No naimpusuan ti panagsaotayo, maanninaw ti kinapasnek ken pammatitayo. (Luc. 6:45) No ensaywentay ti presentasiontayo, napigpigsa ti nakemtayo a makisarita kadagiti tattao. Matulongannatayo daytoy nangnangruna iti Pebrero bayat nga itukontayo ti libro a Life—How Did It Get Here? By Evolution or by Creation? Mabalin a makatulong kadakayo dagiti sumaganad a singasing.
2 No itukonyo ti libro a “Creation,” mabalinyo nga ibaga daytoy iti damo a pannakisarita:
◼ “Iti pannakisaritami kadagiti kaarrubatayo, naammuanmi a dadduma agtalekda iti Dios. Dagiti dadduma marigatanda a mamati kenkuana. Ania ti makunayo? [Palubosanyo a sumungbat.] Imutektekanyo no ania ti kuna ti Biblia maipapan iti daytoy a banag. [Basaenyo ti Roma 1:20.] Makitatayo ti pammaneknek ti ‘agnanayon a pannakabalin ken kina-Dios’ ti Dios no imatangantayo dagiti bambanag a pinarsuana.” Basaenyo ti maudi a parapo iti panid 48 ti libro a Creation, sa iturongyo ti atension iti kinakomplikado ti sibibiag a selula. Wenno usarenyo ti parapo 18 iti panid 147 a mangipakita no kasano a ti nakaskasdaaw a circulatory system ti kayo itampokna ti gapuanan ti Namarsua. Itukonyo ti libro sayo iyurnos ti panagsubliyo.
3 No sarungkaranyo dagidiay nakasaritayo maipapan iti kina-Namarsua ti Dios, nalabit kayatyo nga ibaga ti kastoy:
◼ “Iti napalabas nga ibibisitak, nagsaritaanta ti maipapan iti pammaneknek iti kaadda ti Dios—dagiti nakaskasdaaw a parsuana. Narigatyo kadi a patien a maseknan met iti masakbayantayo Daydiay namarsua iti uniberso? [Palubosanyo a sumungbat.] Makapainteres a maammuan nga inkeddengen ti Namarsua ti masanguanan.” Basaenyo ti Isaias 46:9, 10. Depende iti paginteresan dayta a tao, usarenyo dagiti ladawan ken kapsion iti kapitulo 19 ti libro a Creation a mangitampok iti nagsasayaat a kasasaad nga inkari ti Dios. Basaenyo ti parapo 1 ti kapitulo 20, sa itukonyo ti panagadal iti Biblia. No awatenna, irugiyo ti panagadal iti libro a Pannakaammo.
4 Mabalinyo a padasen daytoy a presentasion no itukonyo ti libro a “Creation”:
◼ “Iti pannakisaritak kadagiti kaarrubayo, napaliiwko nga il-iliwen ti kaaduan ti natalged a komunidad ken natalna a lubong. Panagkunayo apay ngata a di natun-oyan ti tao ti kasta a kasasaad? [Palubosanyo a sumungbat.] Mabalin a napasnek ken adda naimbag a maar-aramidan dagiti dadduma a panguluen, ngem imutektekanyo ti ibalakad ti Biblia.” Basaenyo ti Salmo 146:3, 4; kalpasanna isaludsodyo: “Adda kadi asinoman a makapennek kadagiti kasapulan ti tao?” Basaenyo ti bersikulo 5 ken 6. Ipakitayo ti ladawan iti panid 251 iti libro a Creation, sa iturongyo ti atension kadagiti pagimbagan nga iyeg ti turay ti Dios. Itukonyo ti libro.
5 No ti panagturay ti Dios ti napagsaritaanyo idi damo, mabalinyo a padasen daytoy a singasing iti panagsarungkaryo:
◼ “Idi immayak ditoy sumagmamano nga aldawen ti napalabas, napagsaritaanta ti pannakapaay ti tao a mangyeg iti talna ditoy daga. Nalabit malagipyo ti rason nga inted ti Biblia maipapan iti kasta a pannakapaay. [Basaenyo manen ti Salmo 146:3.] Nadlawyo kadi no apay a balakadannatayo ti Dios a ditay isaad ti namnamatayo kadagiti tattao? [Palubosanyo a sumungbat.] Nalabit umanamongkayo a ti Dios laeng ti pangnamnamaan iti aniaman a manayon a solusion. Nailawlawag iti Salmo 146:10 ti rason no apay a makapagtalektayo iti daytoy. [Basaenyo.] No kayattayo ti agbalin nga iturayan ti Pagarian ti Dios, ania ti masapul nga aramidentayo?” Ukradenyo ti libro a Creation iti panid 250, basaenyo ti parapo 13, ken ilawlawagyo ti Juan 17:3. Ibagayo a kayatyo nga idemostra no kasano a gun-oden ti pannakaammo a mangiturong iti biag nga agnanayon. No umanamong, ipakitayo ti libro a Pannakaammo sa irugiyo ti panagadal.
6 Iti panangtrabaho kadagiti tiendaan, mabalinyo nga usaren daytoy ababa a wagas ti panangitukon iti libro a “Creation”:
◼ “Ita nga aldaw mangipapaaykami iti naisangsangayan a serbisio kadagiti negosiante iti daytoy a komunidad. Maseknantayo amin iti ilalanlan ti krimen ken kinaranggas iti lugartayo. Panagkunayo adda kadi makaipaay iti napaypayso a solusion iti daytoy a parikut? [Palubosanyo a sumungbat.] Ti Dios addaan iti solusion.” Iturongyo iti panid 196 ti libro a Creation; basaen ken komentuanyo ti Proverbio 2:21, 22 iti parapo 19. Ipakitayo ti paulo ti kapitulo 16, sa itukonyo ti libro.
7 No sarungkaranyo ti negosiante a napaimaanyo iti libro a “Creation,” mabalinyo a kunaen:
◼ “Iti napalabas nga ibibisitak, nadakamatko a ti Dios laeng ti addaan iti manayon a solusion iti krimen ken kinaranggas. Sigun iti karina, makapagtalektayo nga addanto natalna a daga. Imutektekanyo ti pagpilian a naipasango iti tunggal maysa kadatayo.” Basaenyo ti parapo 11 iti panid 250 ti libro a Creation, a pakairamanan ti Salmo 37:37, 38. Komentuanyo ti ladawan iti panid 251, sa basaenyo ti umuna a sasao ti parapo 14. Itukonyo ti libre a panagadal iti Biblia, a maaramid iti mismo a panggedan wenno iti pagtaenganda.
8 Kas “katrabahuan ti Dios,” adda panggapuantayo nga agbalin a positibo a mangiparang iti naimbag a damag. (1 Cor. 3:9) Ti panangsalimetmettayo iti daytoy a kababalin agresulta iti nabaknang a pammendision ni Jehova.