“Itultuloyyo nga Aramiden Daytoy kas Panglaglagip Kaniak”
1 Masansan a malipatan dagiti tattao ti kayulogan dagiti napateg a bambanag iti panaglabas ti panawen. Daytoy ti maysa a makagapu no apay nga idi inyussuatna “ti pangrabii ti Apo,” binilin ni Jesus dagiti adalanna: “Itultuloyyo nga aramiden daytoy kas panglaglagip kaniak.” Sipud idin, iti anibersario ti ipapatay ni Jesus, situtulnog nga intultuloy dagiti Kristiano ti ‘panangiwaragawagda iti ipapatay ti Apo, agingga iti idadatengna.’—1 Cor. 11:20, 23-26.
2 Din agbayag, awatenton ni Jesus idiay langit dagiti nabatbati iti bumasbassiten a “bassit nga ipastoran.” (Luc. 12:32; Juan 14:2, 3) Iti daytoy a tawen, ti natda kadagiti napulotan agraman ti umad-adu a dakkel a bunggoy dagiti “sabsabali a karnero” pribilehioda manen a rambakan ti Pangrabii ti Apo inton Abril 11. (Juan 10:16; Apoc. 7:9, 10) Mapabileg ti panangapresiar iti naindaklan nga ayat ni Jehova iti panangibaonna iti bugbugtong nga Anakna agpaay iti sangatauan. Maitampokto ti ehemplo ni Jesus, ti ayatna, ti kinamatalekna agingga ken patay iti panangipaayna iti subbot, ken ti panagturayna itan kas Ari ti naipasdeken a Pagarian ti Dios, agraman dagiti bendision nga iyegto ti Pagarian iti sangatauan. Pudno unay a maysa dayta nga okasion a panglaglagip!
3 Agsagana Itan: Ikagumaantay amin a pagbalinen daytoy a tiempo ti Memorial kas gubuayan ti naindaklan a panagrag-o ken panagyamantayo agraman kadagiti amin a makitimpuyog kadatayo. Maisaganatay ti pusotayo babaen ti panangbasa manen kadagiti salaysay ti Biblia maipapan kadagiti maudi nga aldaw ti ministerio ni Jesus ken dagiti pasamak a nangituggod iti ipapatayna. Sumagmamano a lawas sakbay ti Memorial, mabalin nga ipamaysa iti panagadal ti pamiliatayo a repasuen dagiti kapitulo 112-16 iti libro a Katan-okan a Tao.
4 Mano ti ammoyo a mabalin nga umay iti Memorial no ikagumaanyo a pabilgen ti apresasionda iti daytoy nga okasion, awisenyo ida, ken maipariknayo a makalikaguman ti kaaddada? Agilistakay itan, ket aramidenyo amin a kabaelanyo tapno matulonganyo ida a tumabuno. Kalpasanna, tulonganyo ida nga agtultuloy a rumang-ay iti naespirituan babaen ti panangparegtayo kadakuada a tumabuno a regular kadagiti gimong.
5 Iti panawen ti Memorial, addanto dagiti maaramid nga espesial nga urnos tapno ad-adu pay ti gundawaytayo a mangasaba. Buyogen ti nasayaat nga eskediul, mabalinyo kadi ti ag-auxiliary pioneer iti Abril? iti Mayo? Ti maysa a kasayaatan a wagas tapno maipakita a silalagiptayo a buyogen ti panangapresiar iti naan-anay a kaipapanan kadatayo ti daton ni Jesus ket babaen ti panagsaotayo maipapan iti Diostayo a ni Jehova, ken kadagiti bendision nga iyeg ti Pagarian iti sidong ti panangituray ti Anakna.—Sal. 79:13; 147:1.