Dagiti Magasin a Makaipaay ti Praktikal a Pakaliwliwaan

AGYAMANAK unay kadakayo gapu kadagiti nagsayaat, praktikal nga artikulo nga impaayyo tapno yaplikarmi, nangruna iti napalabas a sumagmamano a tawen. Kada maawatko ti dadduma kadagitoy, talaga a makasangit ken agyamanak ken Jehova gapu ta adu kadagiti padami a Saksi ti agkasapulan unay iti kasta nga impormasion. Usarek dagiti ruar a mangilawlawag iti pannakaabuso ti ubing, pannakapadakkel iti pamilia dagiti mangnginum, panangrames, ken kinaranggas iti pagtaengan.”​—Linda W. S., Indiana, E.U.A.

Dagidiay a sasao ti pakauna ti maysa kadagiti adu a makaparegta a surat a naawatmi iti kallabes a tawtawen maipapan iti linaon dagiti magasin a Pagwanawanan ken Agriingkayo!, nga impablaak ti Watchtower Society ken iwarwaras dagiti Saksi ni Jehova iti sangalubongan.

No usigentayo a ti Pagwanawanan ket addaan iti sirkulasion a nasurok a 16,000,000 a kopia iti kada ruar ken maipabpablaak iti 120 a pagsasao ken ti sirkulasion ti Agriingkayo! ket gistay 13,000,000 iti 75 a pagsasao, maapresiartay ngarud ti sangalubongan a tulong dagitoy a pagiwarnak. Ituktukon ida dagiti Saksi ni Jehova iti publiko bayat ti ministerioda a panagbalaybalay ken iti impormal a panangasabada a tuktukoyenna ti panangasaba kadagiti di pormal a kasasaad, kas koma no gumatgatangda, agpagpagasolinada iti gasolinaan, agbiaheda iti bus, tren, ken eroplano, wenno iti dadduma pay a napateg a kanito iti kurso ti inaldaw a panagbiag. Nupay kasta, nakasarak ti dadduma a Saksi iti dadduma nga orihinal ken naballigi a pamay-an tapno maitukonda dagiti magasin a nalabit kayatyo met a tuladen.

Panangsarungkar Kadagiti Propesional nga Organisasion

Insurat ti maysa nga agdaldaliasat a ministro maipapan kadagiti nabunga nga aktibidad ti maysa a Saksi kas iti sumaganad: “Nakayugalianna a kolektaen dagiti daan a kopia ti magasin nga Agriingkayo! a naurnong ti dadduma a Saksi iti pagtaenganda. Kalpasanna, sarungkaranna dagiti ahensia a patienna a mangipakita iti naisangsangayan nga interes iti dadduma kadagiti topiko.” Ania a kita nga ahensia ti sinarungkaranna?

“Impamaysana ti atensionna kadagiti ahensia agpaay iti kagimongan, pro-life center, Planned Parenthood, departamento dagiti sikiatrista, sikologo, polis, probation office, drug and alcohol abuse center, child abuse treatment and prevention center, welfare department (nga agkiddaw agpaay iti caseworker), departamento ti salun-at ti maysa a distrito, day-care center, eskuelaan, hospital stress center, ken iti naminsan ti mayor iti siudad.” Aniat’ nagun-odna a balligi?

“Manipud idi rinugianna nga impamaysa ti atensionna iti daytoy naisangsangayan a tay-ak iti napalabas nga innem a bulan, isut’ nakaipaima iti 1,784 a daan a ruar iti nadumaduma a tema!”

Kasano ti ipapan isasarungkar daytoy a Saksi kadagiti propesional a tattao? Kunana: “Pagarupek a ti maysa a rason a naballigi dagitoy nga isasarungkarko, malaksid iti kinapudno a tamtamingen ti magasin dagiti isyu nga inaldaw a sarsarangten dagitoy a tattao, isut’ panagkawes ken panangiparangmi iti bagbagimi iti propesional a wagas.” Sigurado a dagiti propesional a tattao ti mangraem kadatayo no adda sitatalek, kas propesional a yaadani ken umno ti kawes ken panagay-ayustayo.

Itultuloyna ti salaysayna: “Ituktukonmi idi ti Agriingkayo! maipapan ti aborsion (Mayo 22, 1993), isu nga inkeddengko a sarungkaran ti maysa a pro-life center. Rinugiak ti nakisarita babaen ti maysa a padamag maipapan iti nakaay-ay-ay a panangiregreg ket kalpasanna intukonko ti magasin, agraman Ti Pagwanawanan. Nagsayaat ti saritaanmi ta nangitukonak pay iti broshur a Pudno Aya a Maseknan ti Dios Kadatayo?, a sigagagar nga inawatda.” Ti simmaruno a sinarungkaranna isut’ Planned Parenthood center a nakapadasanna iti umasping a balligi.a

Makaituggod daytoy a kita ti panangyun-una iti yaadu dagiti tao a mayat a mangbasa kadagiti magasin. Manipud kadagiti naawat a surat, ammomi a masansan a magustuan dagiti propesional a tattao ti panagsirarak ken ekselente nga estilo ti pannakaisurat dagiti magasintayo. Pudno unay daytoy ta iti dadduma a pagilian, kas ti Suriname, idiay Sud America, us-usaren dagiti estudiante ken mannursuro ti Agriingkayo! kas kangrunaan a makaisuro a magasin. Adu a magasin ti maipapaima dagiti Saksi sadiay, ket sigagagar a segseggaan dagiti interesado a tattao ti tumunggal ruar.

Sagudayen ti maysa a report a naawat manipud Nigeria maipapan ti maysa nga estasion ti radio a nangadaw iti sao por sao iti ruar ti Agriingkayo! a “Babbai​—Maikari iti Panagraem.” (Hulio 8, 1992) Aniat’ ipakita dayta? A maitukontay a sibaballigi dagiti magasin kadagiti direktor ti estasion ti radio ken TV. Kasapulan laeng ti panangadal iti tumunggal ruar ken panunoten no asino nga espesialista iti lugaryo ti nadakamat kadagiti tema, abogadoda man, mannursuro, mamalbalakad, polis, nars, doktor, wenno kameng ti aniaman a dadduma pay a propesion.

Maysa a naiduma a yaadani ti inusar ti sabali pay a Saksi a nangiruangan iti presentasionna babaen ti panangdamagna, “Pagay-ayatyo aya dagiti quiz? Kaaduan a tattao pagay-ayatda. Adtoy ti maysa iti ruar ti Agriingkayo! (Enero 8, 1994, wenno Setiembre 8, 1994) a napauluan, ‘Napanunotyo Kadin?’ Apay a dikay isurat ti sungbat dagiti saludsod, ket agsubliakto iti sabali nga aldaw tapno maidiligtay ida kadagiti sungbat ti Biblia.” Isut’ naaddaan iti nagadu a narayray a panagsasarita a naibasar iti daytoy a metodo ken nakairugi iti sumagmamano a panangyadal iti Biblia.

Ti sabali pay a singasing isut’ panangipakita kadagiti nabiit pay a ruar nga addaan tema a nalabit makaallukoy iti maysa a propesional a kasarsaritayo. Naaddaan ni Linda, ti nadakamat itay, iti sumaganad a kapadasan iti administrador/mamalbalakad ti maysa nga eskuelaan a mangus-usar iti programa ti panangisurona kadagiti kabaruan a pamay-an. “Bayat nga inlawlawagko dagiti magasin kenkuana, nakitana ti ‘Ubbing a Maup-upay,’ sana kinuna, ‘Ti Dios imbaonnaka ita nga aldaw!’ Iti dayta nga aldaw isursurona no kasano a maliklikan dagiti ubbing ti pannakaupay. Idi nakitana ti kapadasan iti makinlikud a panid ti magasin a mangyan-anunsio iti libro a Ti Kina-agtutuboyo​—Pananggun-od ti Kasayaatan iti Dayta, isut’ nagkiddaw iti maysa a kopia. Naiparna nga impakitak kenkuana ti maysa a paset ti libro maipapan ti panagpakamatay, ket impeksana, ‘Ammok nga imbaonnaka ti Dios ditoy!’ Kalkalpasna a binalakadan ti maysa a barito a dinan kayat ti agbiag. Ita ad-adun ti mairanudna kenkuana.”

Yilustrar dagitoy a kapadasan a buyogen ti panangyun-una ken panagsagana agraman ti positibo a panangmatmat, maiburaytayo iti ad-adu pay a tattao ti makaliwliwa a Sao ti Dios. Kas insurat ni apostol Pablo: “Bendito koma ti Dios ken Ama ni Apotayo a Jesu-Kristo, ti Ama dagiti nadungngo nga asi ken ti Dios ti amin a liwliwa, a mangliwliwa kadakami iti amin a rigatmi, tapno mabalinanmi a liwliwaen dagidiay adda iti aniaman a kita ti rigat babaen ti liwliwa a pinangliwliwa ti Dios kadakami a mismo.”​—2 Corinto 1:3, 4.

[Dagiti Footnote]

[Ladawan iti panid 23]

Adda praktikal nga impormasion dagiti magasin agpaay kadagiti ahensia nga agserbi iti kagimongan

[Ladawan iti panid 24]

Mabalin a maitukon Ti Pagwanawanan ken Agriingkayo! iti adu a kasasaad