Danonenyo ti Puso ti Iyad-adalanyo
1 Sakbay a nagpalangit, kinuna ni Jesus kadagiti adalanna nga isuroda ti sabsabali a “tungpalenda” ti amin nga imbilinna. (Mat. 28:19, 20) Tapno ‘matungpal’ ti maysa a tao dagiti bilin ni Kristo, nasken a dumanon ti impormasion iti pusona. (Sal. 119:112) Kasanoyo a gutugoten ti puso ti iyad-adalanyo iti Biblia?
2 Ikararagyo nga Iturongnakayo ni Jehova: Trabaho ti Dios ti panangaramid iti adalan. Ti pamendisionna, saan a dagiti abilidadtayo, ti nasken tapno agballigi. (Ara. 16:14; 1 Cor. 3:7) Gapuna, napateg nga ikararagtayo a tulongannatayo ni Jehova a mangisuro iti kinapudno iti sabsabali.—Isa. 50:4.
3 Amirisenyo No Ania ti Patpatien ti Iyad-adalanyo: Maammuantayo ti ibagatayo tapno madanon ti puso ti tattao no ammotayo ti patpatienda ken no apay a patienda dayta. Apay a maallukoy ti iyad-adalantayo iti partikular a sursuro? Aniat’ nakakombinsiranna a dayta ket nakappapati? Matulongannatayo ti kasta a pannakaammo nga agsao buyogen ti pannakaawat.—Ara. 17:22, 23.
4 Mangibangon iti Lohikal, Nainkasuratan nga Argumento: Ti kinapudno ket nasken a maawatan ti estudiante. (Ara. 17: 24-31) Nasken a mairasonantayo a naimbag ti namnamatayo. (1 Ped. 3:15) Nupay kasta, kanayon nga aramidenyo dayta buyogen ti naasi, naanus a pamay-an.
5 Suportaranyo Dayta Babaen Kadagiti Ilustrasion: Saan laeng a nalaklaka a makaawat ti estudiante no adda dagiti ilustrasion no di ket matukay pay dagita ti riknana. Apektaranda agpadpada ti panunot ken ti puso. Masansan a nagusar ni Jesus kadagiti ilustrasion. (Mar. 4:33, 34) Siempre, tapno epektibo, masapul a mayanatup ti mausar nga ilustrasion iti punto a mapagsarsaritaan, ken rumbeng nga adda pakainaiganna iti biag ti mayad-adalan.
6 Ilawlawagyo Dagiti Pagimbagan ti Panangawat iti Kinapudno: Kayat nga ammuen dagiti tattao dagiti pagimbagan ti panangyaplikar iti ad-adalenda. Tulonganyo ti iyad-adalanyo a mangbigbig a nainsiriban dagiti sasao ni Pablo iti 2 Timoteo 3:14-17.
7 Dikay maupay no adda dagiti saan a mangawat iti isursuroyo. Saan nga amin a puso ket umawat. (Mat. 13:15) Nupay kasta, adda dagidiay agbalin a manamati. (Ara. 17:32-34) Sapay koma ta ti panangikagumaanyo a mangdanon iti puso babaen ti naimbag a damag tulonganna ti ad-adu pay a mangawat ken ‘mangtungpal’ iti imbilin ni Jesus.