Taginayonem ti Rag-om Bayat ti Nariribuk a Tiempo
“Amin dagidiay agkamang [ken Jehova] agrag-odanto; agingga iti tiempo a di nakedngan agdir-idanto a sirarag-o.”—SAL. 5:11.
1, 2. (a) Ania ti sumagmamano a pakaigapuan ti nakaro a ladingit? (b) Malaksid kadagiti didigra a gagangay iti amin, ania ti masapul nga ibturan dagiti pudno a Kristiano?
DAGITI Saksi ni Jehova maipaspasangoda met kadagiti didigra a mapaspasaran ti sangatauan. Adu nga adipen ti Dios ti biktima ti krimen, gubat, ken dadduma pay a kinaawan hustisia. Dagiti natural a didigra, kinapanglaw, sakit, ken ipapatay ti pakaigapuan ti nakaro a ladingit. Umiso ti insurat ni apostol Pablo: “Ammotayo a ti intero a sangaparsuaan agtultuloy nga agas-asug a sangsangkamaysa ken agpapaut-ot a sangsangkamaysa agingga ita.” (Roma 8:22) Sagsagabaentayo met dagiti epekto ti kinaimperpektotayo. Kas ken Ari David idi nagkauna a tiempo, maikunatayo met: “Dagiti bukodko a biddut limmasatda iti ngatuen ti ulok; kas iti maysa a nadagsen nga awit nadagsenda unay maipaay kaniak.”—Sal. 38:4.
2 Malaksid kadagiti didigra a gagangay iti sangatauan, ibakbaklay dagiti pudno a Kristiano ti piguratibo a kayo a pagtutuokan. (Luc. 14:27) Kas ken Jesus, magurgura ken maidaddadanes dagiti adalan ni Jesus. (Mat. 10:22, 23; Juan 15:20; 16:2) Gapuna, ti panagbalin a Kristiano kalikagumanna ti panagregget ken panagibtur bayat nga ur-urayentayo dagiti bendision iti baro a lubong.—Mat. 7:13, 14; Luc. 13:24.
3. Ania ti mangipakita a saan a kayat ti Dios a napno iti ladingit ken panagsagaba ti biagtayo?
3 Kayatna kadi a sawen a naladingit ti biag dagiti pudno a Kristiano, nga agsagsagabada lattan agingga iti panungpalan? Saan. Kayat ni Jehova a naragsaktayo bayat nga ur-urayentayo ti kaitungpalan dagiti karina. Kanayon a deskribiren ti Biblia dagiti pudno nga agdaydayaw kas naragsak nga ili. (Basaen ti Isaias 65:13, 14.) “Amin dagidiay agkamang [ken Jehova] agrag-odanto; agingga iti tiempo a di nakedngan agdir-idanto a sirarag-o,” kuna ti Salmo 5:11. Wen, posible a matagiragsak ti dakkel a rag-o, talna ti panunot, ken pannakapnek uray iti sidong dagiti didigra. Usigentayo no kasano a matulongannatayo ti Biblia a mangtaginayon iti rag-otayo iti laksid dagiti pakasuotan.
Ni Jehova—“Ti Naragsak a Dios”
4. Ania ti narikna ti Dios idi nagrebelde ti dadduma a parsuana?
4 Alaentayo a pagarigan ti Mannakabalin-amin a Dios a ni Jehova. Iturayanna ti intero nga uniberso. Awan ti pagkuranganna ken awan ti asinoman a pagpannurayanna. Ngem iti laksid ti di maartapan a pannakabalinna, naldaangan la ketdi ni Jehova idi nagrebelde ti maysa kadagiti espiritu nga annakna ken nagbalin a Satanas. Idi agangay, naladingitan idi nagrebelde ti dadduma pay nga anghel. Panunotem met ti nariknana a saem idi timmalikud da Adan ken Eva, dagiti kasayaatan a parsuana ditoy daga. Sipud idin, binilion a kaputotanda ti nangilaksid iti autoridad ni Jehova.—Roma 3:23.
5. Ania ti nangnangruna a mamagladingit ken Jehova?
5 Agtultuloy pay laeng ti iyaalsa a rinugian ni Satanas. Iti agarup 6,000 a tawen, naimatangan ni Jehova ti nakaro nga idolatria, kinaranggas, pammapatay, ken seksual a kinalulok. (Gen. 6:5, 6, 11, 12) Kanayonanna, nangngegna ti nakaro a panagulbod ken panagtabbaaw. Adda dagiti gundaway nga uray dagiti pudno nga adipenna nasairda ti riknana. Dinakamat ti Biblia ti maysa a kasta a situasion babaen kadagitoy a sasao: “Anian a namin-adu nga agrebeldeda kenkuana iti let-ang, sinaktanda ti riknana iti desierto! Ket maulit-ulit a subokenda ti Dios, ket pinasakitanda uray Daydiay Santo ti Israel.” (Sal. 78:40, 41) Napalalo a saem ti marikna ni Jehova no isu ket ilaksid dagiti mismo nga adipenna. (Jer. 3:1-10) Nalawag a gagangay a mapasamak dagiti dakes a bambanag ket maladingitan unay ni Jehova no mapasamak dagita.—Basaen ti Isaias 63:9, 10.
6. Kasano ti panangtaming ti Dios kadagiti parikut?
6 Kaskasdi, saan a dagiti saem ken ladingit a marikna ni Jehova ti mangpasardeng kenkuana nga agtignay. No tumaud dagiti parikut, dagus a mangaramid kadagiti addang tapno maksayan dagiti dakes nga epekto dagita. Mangaramid met kadagiti tignay a saan a makita a dagus ti resultana ngem agbanagto iti pannakatungpal ti panggepna. Babaen kadagita a positibo a tignay, sirarag-o a padpadaanan ni Jehova ti pannakaalangon ti kinasoberanona ken dagiti bendision nga itden dayta kadagiti nasungdo nga adipenna. (Sal. 104:31) Wen, iti laksid ti nakaro a pannakaumsina, nagtalinaed ni Jehova kas “ti naragsak a Dios.”—1 Tim. 1:11; Sal. 16:11.
7, 8. No dumteng ti parikut, kasano a matuladtayo ni Jehova?
7 Agpayso, saan a kas ken Jehova ti abilidadtayo a mangsolbar kadagiti parikut. Kaskasdi, matuladtayo ni Jehova no iti panangtaming kadagiti pakarigatantayo. Natural laeng a makariknatayo iti pannakaupay no adda parikut, ngem mapagballigiantayo dayta. Gapu ta naparsuatayo iti ladawan ni Jehova, addaantayo iti abilidad ken praktikal a sirib a tumulong kadatayo a mangsukimat iti parikuttayo ken mangrisut iti dayta no posible.
8 Ti maysa a napateg a banag a makatulong kadatayo a mangdaer kadagiti pakarigatan ket ti panangbigbig nga adda dagiti ditay kontrolado. Ad-adda a makariknatayo iti pannakapaay no dagita laeng ti pampanunotentayo ken ikkatenna ti rag-o nga itden ti pudno a panagdayaw. Kalpasan nga inaramidtayo ti amin a kabaelantayo a mangrisut iti problema, nasayaat nga ipamaysatayo ti panunottayo kadagiti napatpateg a bambanag. Dagiti sumaganad a salaysay iti Biblia iyilustrarna dayta a punto.
Napateg ti Panagbalin a Nainkalintegan
9. Kasano a nagbalin a nainkalintegan ni Anna?
9 Usigem ti kapadasan ni Anna, a nagbalin nga ina ni propeta Samuel. Maldaangan gapu iti kinalupesna, a nakaigapuan ti pannakaumsina. No dadduma, kasta unay ti pannakaupayna nga uray la agsangsangit ken saan a mangan. (1 Sam. 1:2-7) Idi naminsan a napan iti santuario ni Jehova, ‘sipapait ti kararua ni Anna, ket rinugianna ti agkararag ken Jehova ket nagsangit iti kasta unay.’ (1 Sam. 1:10) Kalpasan nga impeksana ti riknana ken Jehova, kinuna kenkuana ti nangato a padi a ni Eli: “Mapanka a sitatalna, ket ited koma ti Dios ti Israel ti dawatmo a kiniddawmo kenkuana.” (1 Sam. 1:17) Iti dayta a gundaway a nabigbig ni Anna a naaramidnan ti amin a kabaelanna. Saanna a kontrolado ti kinalupesna. Isu ket nagbalin a nainkalintegan. Kalpasanna, “napan ket nangan, ket saanen a nagdanag ti rupana.”—1 Sam. 1:18.
10. Ania a realistiko a panangmatmat ti imparangarang ni Pablo idi naipasango iti parikut a dina marisut?
10 Kasta met la ti imparangarang ni apostol Pablo idi naipasango iti pakarigatan. Adda sakitna a nangparigat unay kenkuana. Inawaganna dayta kas “siit iti lasag.” (2 Cor. 12:7) Aniaman dayta a sakitna, inaramid ni Pablo ti amin a kabaelanna tapno umimbag, nga inkararagna a bang-aran koma ni Jehova. Namin-ano nga impakaasina dayta ken Jehova? Namitlo. Kalpasan dayta, kinuna ti Dios ken ni Pablo a saan a simimilagro a mapaimbag ti ‘siit iti lasagna.’ Inakseptar dayta ni Pablo ket impamaysana ti naan-anay a panagserbina ken Jehova.—Basaen ti 2 Corinto 12:8-10.
11. Ania ti maaramidan ti kararag ken araraw no iti panangdaer kadagiti pakarigatan?
11 Saan nga ipakita dagitoy a pagarigan nga isardengtayon nga ikararag ken Jehova dagiti pakarigatantayo. (Sal 86:7) Iti kasumbangirna, idagadag kadatayo ti Sao ti Dios: “Dikay maringgoran iti aniaman, no di ket iti amin a banag babaen iti kararag ken araraw agraman panagyaman maipakaammo koma dagiti dawatyo iti Dios.” Kasano nga ipangag ni Jehova dagita nga araraw ken dawat? Innayon ti Biblia: “Ket ti talna ti Dios a mangringbaw iti isuamin a panunot saluadannanto dagiti pusoyo ken dagiti pannakabalin ti isipyo babaen ken Kristo Jesus.” (Fil. 4:6, 7) Wen, mabalin a saan nga ikkaten ni Jehova dagiti parikuttayo ngem ipangagna dagiti kararagtayo babaen ti panangsaluadna iti abilidadtayo nga agpanunot. Kalpasan nga ikararagtayo dagita, nataltalna ti panunottayo ken mabigbigtayo ti peggad nga itden ti nalabes a panangpampanunot kadagiti pakaringgorantayo.
Pagragsakam Koma nga Aramiden ti Pagayatan ti Dios
12. Apay a napeggad ti agtalinaed a naladingit?
12 Kuna ti Proverbio 24:10: “Impakitam kadi a naupayka iti aldaw ti rigat? Kurangto ti bilegmo.” Kuna ti sabali pay a proverbio: “Gapu iti saem ti puso adda ti nadanar nga espiritu.” (Prov. 15:13) Dadduma a Kristiano ti naupay nga uray la insardengdan ti personal a panagbasada iti Biblia ken ti panangutobda iti Sao ti Dios. Parparawpawen ti panagkararagda, ken liklikandan ti makilangen kadagiti kapammatianda. Nalawag a napeggad ti agtalinaed a naladingit.—Prov. 18:1, 14.
13. Ania dagiti aktibidad a makatulong a mangpaksiat iti pannakaupay ken mangyeg iti rag-o?
13 Iti sabali a bangir, ti kinapositibo tulongannatayo a mangipamaysa iti atensiontayo kadagiti gubuayan ti rag-o. Insurat ni David: “Ti panangaramid iti pagayatam, O Diosko, nagragsakak.” (Sal. 40:8) No adda parikuttayo, ditay koma isardeng dagiti makagunggona nga aktibidadtayo mainaig iti panagdayaw. Kinapudnona, ti agas ti ladingit ket ti pannakiraman kadagiti aktibidad a mangyeg iti kinaragsak. Kuna ni Jehova nga agbalintayo a naragsak no basaentayo ti Saona ken regular a sukimatentayo dayta. (Sal. 1:1, 2; Sant. 1:25) Babaen ti Nasantuan a Kasuratan ken dagiti Nakristianuan a gimong, magun-odtayo dagiti “makaay-ayo a sasao” a mangpabileg ken mangparagsak iti pusotayo.—Prov. 12:25; 16:24.
14. Ania ti inkari ni Jehova a mangyeg kadatayo ita iti rag-o?
14 Inikkannatayo ti Dios iti adu a rason nga agrag-o. Ti inkarina a pannakaisalakan ket maysa a kangrunaan a gubuayan ti kinaragsak. (Sal. 13:5) Ammotayo nga aniaman ti mapasamak kadatayo ita, gunggonaanto ti Dios dagidiay sipapasnek a mangsapsapul kenkuana. (Basaen ti Eclesiastes 8:12.) Nagsayaat ti panangyebkas ni propeta Habakuk iti kasta a panagtalek idi insuratna: “Nupay ti met laeng kayo a higos saan nga agsabong, ket awan bunga kadagiti puon ti ubas; ti trabaho ti kayo nga olibo mabalin nga agbanag iti pannakapaay, ket dagiti met laeng natukantukad a talon mabalin a saanda a mangpataud iti taraon; ti arban pudno a maisina iti kulongan, ket mabalin nga awan pangen kadagiti alug-og; kaskasdi, no maipapan kaniak, agragsakakto ken Jehova a mismo; agrag-oakto iti Dios ti pannakaisalakanko.”—Hab. 3:17, 18.
“Naragsak ti Ili a ti Diosna Isu ni Jehova!”
15, 16. Mangdakamat iti sumagmamano a sagut ti Dios a matagiragsaktayo bayat nga ur-urayentayo dagiti bendision iti masanguanan.
15 Bayat nga ur-urayentayo ti nagsayaat a masanguanan, kayat ni Jehova a tagiragsakentayo dagiti naimbag a bambanag nga ipapaayna. Kuna ti Biblia: “Naammuak nga awanen ti nasaysayaat [para iti sangatauan] ngem ti panagrag-o ken panagaramid iti naimbag bayat ti panagbiag ti maysa; ken kasta met a ti tunggal tao mangan ken pudno nga uminum ken makakita iti imbag iti isuamin a napinget a panagtrabahona. Dayta ti sagut ti Dios.” (Ecl. 3:12, 13) Ti “panagaramid iti naimbag” ramanenna ti panangaramid iti pagsayaatan ti sabsabali. Kinuna ni Jesus a naragragsak ti mangted ngem iti umawat. Mangyeg iti pudno a pannakapnek ti panangipakita iti kinaimbag iti asawa, anak, nagannak, ken kakabagiantayo. (Prov. 3:27) Ti panagbalin a nadungngo, managpadagus, ken manangpakawan kadagiti kakabsattayo ket gubuayan met ti adu a rag-o ken makaay-ayo dagita ken Jehova. (Gal. 6:10; Col. 3:12-14; 1 Ped. 4:8, 9) Pudno a makagunggona met ti panangitungpaltayo iti ministeriotayo buyogen ti kinamanagsakripisio.
16 Dagiti sasao iti Eclesiastes dakamatenna dagiti simple a gubuayan ti ragsak, kas iti pannangan ken panaginum. Wen, uray agpaspasartayo kadagiti pakasuotan, pakaragsakantayo ti aniaman a material a sagut kadatayo ni Jehova. Kanayonanna, libre a buyaen ti nagpintas nga ilelennek ti init, nangayed nga aglawlaw, nakakatkatawa a tignay dagiti animal, ken dadduma pay a pagsidsiddaawan iti nakaparsuaan. Makapaamanga dagita ken mangyegda kadatayo iti rag-o. Bayat nga ut-utobentayo dagita a bambanag, umuneg ti ayattayo ken Jehova, daydiay Mangipapaay iti amin a naimbag a banag.
17. Ania ti naan-anay a mangbang-ar kadatayo manipud kadagiti pakarigatan, ken ania ti makaliwliwa kadatayo iti agdama?
17 Inton agangay, ti ayattayo iti Dios, panagtulnog kadagiti bilinna, ken pammatitayo iti pangsubbot a daton ket agresultanto iti naan-anay a pannakabang-ar manipud kadagiti pakarigatan a bunga ti kinaimperpektotayo ken mangyeg iti manayon a rag-o. (1 Juan 5:3) Kabayatanna, maliwliwatayo iti kinapudno a pagaammo unay ni Jehova ti amin a banag a mangparparigat kadatayo. Insurat ni David: “Agrag-oakto ken agragsakak iti naayat a kinamanangngaasim, ta nakitam ti pannakaparigatko; naammuam ti maipapan kadagiti tuok ti kararuak.” (Sal. 31:7) Gapu iti panagayat kadatayo ni Jehova, ispalennatayto manipud kadagiti didigra.—Sal. 34:19.
18. Apay a kanayon koma a naragsak ti ili ti Dios?
18 Bayat nga ur-urayentayo ti kaitungpalan dagiti karina, sapay koma ta tuladentayo ni Jehova, ti naragsak a Dios. Liklikantayo koma a dagiti negatibo a rikna ti mangpasardeng kadatayo a rumang-ay iti naespirituan. No tumaud dagiti parikut, agpaiwanwantayo koma iti abilidad nga agpanunot ken praktikal a sirib a naggapu iti Dios. Tulongannatayo ni Jehova nga agbalin a nainkalintegan ken mangaramid kadagiti addang a mangkissay iti dakes nga epekto dagiti makadidigra a pasamak. Pakaragsakantayo koma dagiti naimbag a bambanag nga ipapaay ti Dios, pisikal man wenno naespirituan. No agtalinaedtayo a nasinged iti Dios, makapagrag-otayo gapu ta “naragsak ti ili a ti Diosna isu ni Jehova!”—Sal. 144:15.
Ania ti Naadalyo?
• No maipaspasango kadagiti pakarigatan, kasano a matuladtayo ni Jehova?
• Kasano a ti panagbalin a nainkalintegan matulongannatayo a mangdaer kadagiti pakarigatan?
• Kadagiti nariribuk a tiempo, kasano a mangyeg iti rag-o ti panangaramid iti pagayatan ti Dios?
[Dagiti Ladawan iti panid 16]
Maladingitan unay ni Jehova no mapasamak dagiti dakes a bambanag
[Credit Line]
© G.M.B. Akash/Panos Pictures
[Dagiti Ladawan iti panid 18]
Inikkannatayo ni Jehova kadagiti rason nga agtalinaed a naragsak