“Ti Espiritu Sukimatenna . . . ti Nauneg a Bambanag ti Dios”

“Ti espiritu sukimatenna ti amin a bambanag, uray pay ti nauneg a bambanag ti Dios.”​—1 COR. 2:10.

1. Ania ti akem ti nasantuan nga espiritu nga intampok ni Pablo iti 1 Corinto 2:10, ken ania dagiti saludsod a tumaud?

ANIAN a yamantayo iti panagtignay ti nasantuan nga espiritu ni Jehova! Ti Kasuratan tukoyenna ti espiritu kas katulongan, sagut, mangsaksi, ken agdawat para kadatayo. (Juan 14:16; Ara. 2:38; Roma 8:16, 26, 27) Intampok ni apostol Pablo ti sabali pay a napateg nga akem ti nasantuan nga espiritu: “Ti espiritu sukimatenna ti amin a bambanag, uray pay ti nauneg a bambanag ti Dios.” (1 Cor. 2:10) Wen, us-usaren ni Jehova ti nasantuan nga espirituna a mangipalgak kadagiti nauneg a naespirituan a kinapudno. No awan ti tulong ti espiritu, kasanotay koma a matarusan dagiti panggep ni Jehova? (Basaen ti 1 Corinto 2:9-12.) Ngem tumaud ti sumagmamano a saludsod: Kasano a ‘sukimaten ti espiritu ti nauneg a bambanag ti Dios’? Babaen iti siasino nga impalgak ni Jehova dagita a bambanag idi umuna a siglo K.P.? Kasano ken babaen iti siasino a sukimaten ti espiritu dagiti nauneg a bambanag iti kaaldawantayo?

2. Iti ania a dua a pamay-an nga agtignay ti espiritu?

² Impasimudaag ni Jesus nga agtignay ti espiritu iti dua a pamay-an. Sakbay unay ti ipapatayna, kinunana kadagiti apostolna: “Ti katulongan, ti nasantuan nga espiritu, nga ibaonto ti Ama iti naganko, isuronto dayta kadakayo ti amin a bambanag ket ipalagipna kadakayo ti amin a bambanag nga imbagak kadakayo.” (Juan 14:26) Gapuna, agtignay ti nasantuan nga espiritu kas mannursuro ken manangipalagip. Kas mannursuro, tulonganna dagiti Kristiano a mangtarus iti bambanag a saanda a maawatan. Kas manangipalagip, tulonganna ida a manglagip ken mangyaplikar a siuumiso iti bambanag a nailawlawagen.

Idi Umuna a Siglo

3. Ania a sasao ni Jesus ti mangipasimudaag nga in-inut a maipalgak “ti nauneg a bambanag ti Dios”?

³ Adu a kinapudno ti insuro ni Jesus kadagiti adalanna a dida pay idi ammo. Ngem adu pay ti masapul a maammuanda. Kinuna ni Jesus kadagiti apostol: “Adu pay a banag ti sawek kadakayo, ngem saanyo a kabaelan nga awiten ida iti agdama. Nupay kasta, inton dumteng dayta, ti espiritu ti kinapudno, idalannakayto iti isuamin a kinapudno.” (Juan 16:12, 13) Babaen kadagita a sasao, impasimudaag ni Jesus nga in-inut a maipalgak dagiti nauneg a naespirituan a bambanag babaen ti nasantuan nga espiritu.

4. Idi Pentecostes 33 K.P., kasano a nagtignay ti nasantuan nga espiritu kas mannursuro ken manangipalagip?

⁴ Idi Pentecostes 33 K.P., dimteng “ti espiritu ti kinapudno” idi naiparukpok dayta iti agarup 120 a Kristiano a nagtataripnong idiay Jerusalem. Adda dagiti nakita ken nangngegan a pammaneknek iti dayta. (Ara. 1:4, 5, 15; 2:1-4) Nakapagsao dagiti adalan iti nagduduma a lenguahe, ket insaritada ti “maipapan iti natan-ok a bambanag ti Dios.” (Ara. 2:5-11) Tiempo idin tapno maipalgak ti maysa a baro a banag. Impadto ni propeta Joel dayta a pannakaiparukpok ti nasantuan nga espiritu. (Joel 2:28-32) Nakita dagiti tattao ti pannakatungpal dayta iti pamay-an a dida ninamnama, ken inlawlawag ni apostol Pedro ti kaipapanan dayta a pasamak. (Basaen ti Aramid 2:14-18.) Iti kasta, nagtignay ti nasantuan nga espiritu kas mannursuro yantangay natulonganna ni Pedro a mangtarus a ti napasamak kadagiti adalan ket kaitungpalan ti nagkauna a padto. Nagtignay met ti espiritu kas manangipalagip yantangay nabaelan ni Pedro a kinotar ti padto ni Joel ken ti dua a salmo ni David. (Sal. 16:8-11; 110:1; Ara. 2:25-28, 34, 35) Amin a nakita ken nangngeg dagidi a nagtataripnong ket talaga a nauneg a bambanag ti Dios.

5, 6. (a) Kalpasan ti Pentecostes 33 K.P., ania dagiti napateg a saludsod a masapul a masungbatan mainaig iti baro a tulag? (b) Babaen iti siasino a naidatag dagita a saludsod, ken kasano a nabukel dagiti desision?

⁵ Adu pay ti masapul a mailawlawag kadagiti Kristiano idi umuna a siglo. Kas pagarigan, adda dagiti saludsod maipapan iti baro a tulag a nangrugi a naipatungpal idi aldaw ti Pentecostes. Agpaay laeng kadi ti baro a tulag kadagiti Judio ken proselita a Judio? Karaman met kadi iti dayta a tulag dagiti Gentil ket iti kasta, mapulotanda iti nasantuan nga espiritu? (Ara. 10:45) Masapul kadi a makugit nga umuna dagiti lallaki a Gentil ken annurotenda ti Mosaiko a Linteg? (Ara. 15:1, 5) Nagpateg dagita a saludsod. Kasapulan ti espiritu ni Jehova a mangsukimat kadagita a nauneg a bambanag. Ngem babaen iti siasino nga agtignay dayta?

⁶ Babaen kadagiti nadutokan a lallaki a saggaysa a naidatag ken nausig dagita a saludsod. Adda da Pedro, Pablo, ken Bernabe idi nagtataripnong ti bagi a manarawidwid ken insalaysayda no kasano nga inturong ni Jehova ti atensionna kadagiti di nakugit a Gentil. (Ara. 15:7-12) Kalpasan a nausig dayta a pammaneknek agraman ti kunaen ti Hebreo a Kasuratan ken buyogen ti tulong ti nasantuan nga espiritu, nakabukel ti bagi a manarawidwid iti desision. Kalpasanna, impakaammoda dayta a desision kadagiti kongregasion babaen ti surat.​—Basaen ti Aramid 15:25-30; 16:4, 5; Efe. 3:5, 6.

7. Babaen kadagiti ania a naipalgak dagiti nauneg a kinapudno?

⁷ Adu pay a bambanag ti nalawlawagan babaen kadagiti naipaltiing a surat da Juan, Pedro, Santiago, ken Pablo. Ngem kalpasan a nakompleto ti Kristiano a Kasuratan, nagsardeng dagiti sagut a panagipadto ken namilagruan a pannakaipalgak ti pannakaammo. (1 Cor. 13:8) Agtultuloy kadi nga agtignay ti espiritu kas mannursuro ken manangipalagip? Agtultuloy kadi a tulonganna dagiti Kristiano a mangsukimat kadagiti nauneg a bambanag ti Dios? Wen, kas ipamatmat ti padto.

Bayat ti Tiempo ti Panungpalan

8, 9. Siasino dagiti addaan iti naespirituan a pannakatarus nga ‘agsilnagto’ bayat ti tiempo ti panungpalan?

⁸ No maipapan iti tiempo ti panungpalan, impadto ti maysa nga anghel: “Dagidiay addaan iti pannakatarus agsilnagdanto a kas iti kinaraniag ti tangatang; ken dagidiay mangyeg kadagiti adu iti kinalinteg, kas kadagiti bituen agingga iti tiempo a di nakedngan, iti mismo nga agnanayon. . . . Ket ti pudno a pannakaammo umadunto.” (Dan. 12:3, 4) Siasino dagidiay addaan iti pannakatarus nga agsilnagto? Nangted ni Jesus iti pamalatpatan iti ilustrasionna maipapan iti trigo ken dakes a ruot. No maipapan iti “panungpalan ti sistema ti bambanag,” kinunana: “Iti dayta a tiempo, dagiti nalinteg agsilnagdanto a siraraniag a kas iti init iti pagarian ni Amada.” (Mat. 13:39, 43) Sigun ken Jesus, “dagiti nalinteg” ket isu dagiti “annak ti pagarian,” dagiti napulotan a Kristiano.​—Mat. 13:38.

⁹ ‘Agsilnagto’ kadi ti amin a napulotan a Kristiano? Wen, gapu ta amin a Kristiano ket makipaset iti panangasaba, panagaramid iti adalan, ken iti panangpabileg iti maysa ken maysa kadagiti gimong. Dagiti napulotan ti mangipasdek iti ulidan. (Zac. 8:23) Malaksid iti dayta, maipalgak dagiti nauneg a bambanag bayat ti tiempo ti panungpalan. Ngem agingga a saan a dumteng dayta a tiempo, agtalinaed a “naselioan” ti mismo a padto ni Daniel. (Dan. 12:9) Kasano ken babaen iti siasino a ti espiritu sukimatenna ti nauneg a bambanag?

10. (a) Babaen iti siasino nga ipalgak ti espiritu dagiti nauneg a kinapudno bayat ti maudi nga al-aldaw? (b) Ilawlawagyo no kasano a nalawlawagan dagiti kinapudno maipapan iti naindaklan a naespirituan a templo ni Jehova?

¹⁰ No adda naespirituan a banag iti kaaldawantayo a masapul a malawlawagan, ti nasantuan nga espiritu tulonganna dagiti nadutokan a pannakabagi “ti matalek ken masirib nga adipen” nga adda iti sangalubongan a hedkuarter tapno sukimatenda dagiti nauneg a kinapudno a saanda idi a maawatan. (Mat. 24:45; 1 Cor. 2:13) Ti Bagi a Manarawidwid kas maysa a grupo usigenda no adda dagiti pannursuro nga agkasapulan iti kanayonan a pannakailawlawag. (Ara. 15:6) Kalpasanna, ipablaakda dagiti mausigda tapno magunggonaan ti amin. (Mat. 10:27) Iti panaglabas ti panawen, nalabit a kasapulan dagiti kanayonan a pannakailawlawag. Gapuna, masapul a mailawlawag manen a naimbag dagita.​—Kitaenyo ti kahon a “No Kasano nga Impalgak ti Espiritu ti Kaipapanan ti Naespirituan a Templo.”

Magunggonaan iti Akem ti Espiritu Ita

11. Kasano a ti akem ti nasantuan nga espiritu a mangipalgak iti nauneg a bambanag ti Dios ket makagunggona iti amin a Kristiano ita?

¹¹ Ti akem ti nasantuan nga espiritu a mangipalgak iti nauneg a bambanag ti Dios ket makagunggona iti amin a matalek a Kristiano. Kas kadagiti Kristiano idi umuna a siglo, adu ti naawatantayo nga impormasion babaen ti tulong ti nasantuan nga espiritu. Malaksid iti dayta, tulongannatayo a manglagip ken mangyaplikar kadagita. (Luc. 12:11, 12) Saan a kasapulan ti nangato nga adal tapno matarusan dagiti naipablaak a nauneg a naespirituan a kinapudno. (Ara. 4:13) Kasano a maparang-aytayo ti pannakaawattayo kadagiti nauneg a bambanag ti Dios? Usigentayo ti sumagmamano a singasing.

12. Kaano nga ikararagtayo ti nasantuan nga espiritu?

¹² Ikararag ti nasantuan nga espiritu. Sakbay nga adalentayo ti maysa a topiko iti Kasuratan, masapul nga ikararagtayo ti panangiwanwan ti nasantuan nga espiritu. Aramidentayo dayta uray no agmaymaysatayo wenno apagbiit laeng ti panagadaltayo. Sigurado a maragsakan ti nailangitan nga Amatayo kadagiti kasta a napakumbaba nga araraw. Kas impamatmat ni Jesus, sipaparabur nga ipaay ni Jehova ti nasantuan nga espirituna no sipapasnek a dawatentayo dayta.​—Luc. 11:13.

13, 14. Kasano a ti panagsagana para kadagiti gimong tulongannatayo a mangtarus iti nauneg a bambanag ti Dios?

¹³ Agsagana para kadagiti gimong. Umaw-awattayo kadagiti ‘taraon iti umiso a tiempo’ babaen ti klase adipen. Ti “adipen” itungpalna ti annongenna babaen ti panangipaayna kadagiti Nainkasuratan a publikasion ken panangyurnosna kadagiti programa para iti panagadal ken panaggigimong. Adda dagiti natingiting a naimbag a rason no apay a maikalikagum iti “intero a timpuyog dagiti kakabsat” nga usigenda ti maysa a topiko. (1 Ped. 2:17; Col. 4:16; Jud. 3) Makidangdanggaytayo iti nasantuan nga espiritu no ikagumaantayo a suroten dagiti naipaay a singasing.​—Apoc. 2:29.

¹⁴ No agsaganatayo para kadagiti gimong, nasayaat a kitaentayo dagiti naisitar a teksto ken ikagumaantayo a tarusan no ania ti pakainaiganda iti topiko nga ad-adalentayo. Dayta ti in-inut a mangpauneg iti pannakaawattayo iti Biblia. (Ara. 17:11, 12) Ti panangkita kadagita a teksto tulongannatayo a manglagip iti linaonda babaen ti tulong ti nasantuan nga espiritu ken manglagip iti pakasarakan kadagita a teksto.

15. Apay nga ammotayo koma ti linaon dagiti kabaruan a publikasiontayo, ken kasano a maaramidtayo dayta?

¹⁵ Ammoyo koma ti linaon dagiti kabaruan a publikasion. Saan a maadal kadagiti gimong ti dadduma a naipablaak a publikasion, kas kadagiti pagbasaan a nairanta para iti publiko, ngem naisagana dagita a pakagunggonaantayo. Iti daytoy okupado a lubong, masansan nga adda dagiti tiempo nga aguraytayo. No adda awittayo a publikasion a ditay pay nabasa wenno nalpas a binasa, mabalin nga usarentayo nga agbasa dagita a tiempo. Dadduma ti agdengngeg kadagiti audio recording bayat a magmagna wenno nakaluganda tapno maammuanda ti linaon dagiti kabaruan a publikasion. Amin dagita a material paunegenda ti pannakaawattayo kadagiti naespirituan a bambanag. Nupay nauneg a bambanag dagiti linaonda, naisuratda iti wagas a nalaka a maawatan dagiti ordinario a tattao.​—Hab. 2:2.

16. Ania ti magunggonatayo no inotar ken agsukimattayo mainaig kadagiti saludsod a mapanunottayo?

¹⁶ Agmennamenna. No agbasakayo iti Biblia wenno kadagiti publikasion a naibatay iti dayta, usigenyo koma a naimbag ti basbasaenyo. Bayat nga ar-aramidenyo dayta, mabalin a tumaud dagiti saludsod iti isipyo. Mabalin nga inotaryo dagita a saludsod sa kalpasanna, agsukimatkayo mainaig kadagita. Bayat a suksukimatentayo dagiti bambanag a paginteresantayo, umuneg ti pannakaawattayo. Iti kasta, umadu ti naespirituan a pannakaammotayo a mabalintay nga usaren no kasapulantayo.​—Mat. 13:52.

17. Ania ti agdama a programayo mainaig iti panagadal ti pamiliayo wenno personal a panagadalyo?

¹⁷ Mangyeskediulkayo iti tiempo para iti panagdaydayaw ti pamilia. Paregtaennatay amin ti Bagi a Manarawidwid a mangyeskediul iti tiempo iti kada lawas para iti personal a panagadal wenno panagadal ti pamilia. Ti nagbaliw nga eskediul ti gimongtayo ti nangted iti gundaway tapno mayaplikartayo dayta a balakad. Ania ti us-usigenyo bayat ti Panagdaydayaw ti Pamilia? Dadduma ti agbasa iti Biblia, agsukimat kadagiti teksto a dida maawatan, ken mangaramidda iti ababa a nota iti Bibliada. Adu a pamilia ti mangilatang iti tiempo tapno usigenda a naimbag no kasano a mayaplikarda dagiti ad-adalenda. Adda dagiti ulo ti pamilia a mangpili iti topiko a makitada a kasapulan nga usigen ti pamiliada wenno mangtratar kadagiti suheto wenno saludsod a kiniddaw ti pamilia nga adalenda. Sigurado nga addanto pay dadduma a topiko a mapanunotyo a mabalinyo nga usigen bayat ti panaglabas ti tiempo.a

18. Apay a ditay koma bumdeng a mangadal kadagiti naun-uneg a kinapudno iti Sao ti Dios?

¹⁸ Kinuna ni Jesus nga agtignay ti espiritu kas katulongan. Gapuna, ditay koma bumdeng a mangadal kadagiti naun-uneg a kinapudno iti Sao ti Dios. Dagita a kinapudno ket paset ti nagpateg a “pannakaammo iti Dios,” ken naawistayo a mangsukimat kadagita. (Basaen ti Proverbio 2:1-5.) Nagadu ti maammuantayo maipapan iti “bambanag nga insagana ti Dios kadagidiay agayat kenkuana.” Bayat nga ikagumaantayo nga ammuen ti ad-adu pay maipapan iti Sao ni Jehova, tulongannatayo ti nasantuan nga espiritu gapu ta “ti espiritu sukimatenna ti amin a bambanag, uray pay ti nauneg a bambanag ti Dios.”​—1 Cor. 2:9, 10.

[Footnote]

Ania ti Sungbatyo?

• Ania ti dua a pamay-an a tulongannatayo ti espiritu a mangsukimat iti “nauneg a bambanag ti Dios”?

• Babaen iti siasino nga impalgak ti nasantuan nga espiritu dagiti nauneg a kinapudno idi umuna a siglo?

• Kasano nga agtigtignay ita ti nasantuan nga espiritu a manglawlawag iti bambanag?

• Ania ti mabalinmo nga aramiden tapno magunggonaanka iti akem ti espiritu?

[Kahon iti panid 22]

No Kasano nga Impalgak ti Espiritu ti Kaipapanan ti Naespirituan a Templo

Ti maysa kadagiti “nauneg a bambanag ti Dios” a naipalgak idi umuna a siglo isu daytoy: ti tabernakulo ken idi agangay dagiti templo iladawanda ti maysa a nadaydayag a naespirituan a kaitungpalan. Tinukoy ni Pablo dayta a kaitungpalan kas “ti pudno a tolda, nga imbangon ni Jehova, ket saan a ti tao.” (Heb. 8:2) Maysa dayta a naindaklan a naespirituan a templo, maysa nga urnos iti iyaadani iti Dios a nagbalin a posible babaen ti daton ken kinapadi ni Jesu-Kristo.

Naipasdek “ti pudno a tolda” idi 29 K.P., idi a ni Jesus ket nabautisaran ken inawat ni Jehova kas daydiay agbalin a perpekto a daton. (Heb. 10:5-10) Kalpasan ti ipapatay ken panagungarna, simrek ni Jesus iti Kasasantuan a paset ti naespirituan a templo ken indatagna ti pateg ti datonna ‘iti sanguanan ti Dios.’​—Heb. 9: 11, 12, 24.

Ni apostol Pablo dinakamatna dagiti napulotan a Kristiano kas “rumangrang-ay nga agbalin a nasantuan a templo maipaay ken Jehova.” (Efe. 2:20-22) Agpada kadi dayta a templo ken “ti pudno a tolda” a dineskribir ni Pablo idi agangay iti suratna kadagiti Hebreo? Kasta ti impagarup dagiti adipen ni Jehova iti adu a dekada. Patienda pay a maisagsagana ditoy daga dagiti napulotan a Kristiano tapno agbalinda a ‘batbato’ iti nailangitan a templo ni Jehova.​—1 Ped. 2:5.

Ngem sakbay unay ti 1971, mangrugin a mailasin dagiti kameng ti klase adipen a ti templo a dinakamat ni Pablo iti Efeso ket naiduma iti naindaklan a naespirituan a templo ni Jehova. No “ti pudno a tolda” ket buklen dagiti napagungar a napulotan a Kristiano, agparang a naipasdek laeng dayta idi mangrugi a mapagungarda bayat ti “kaadda ti Apo.” (1 Tes. 4:15-17) Nupay kasta, kinuna ni Pablo maipapan iti dayta a tabernakulo: “Daytoy met laeng a tolda maysa a pangngarig a maipaay iti naituding a tiempo nga itan dimtengen.”​—Heb. 9:9.

Babaen ti naannad a panamagdilig kadagita a teksto ken iti dadduma pay a teksto, nagbalin a nalawag a ti naespirituan a templo ket saan a madama a maibangbangon. Dagiti met napulotan a Kristiano saanda a ‘batbato’ a maisagsagana ditoy daga tapno agbalin a paset dayta a templo. Imbes ketdi, agserserbida iti paraangan ken iti Nasantuan a paset ti naespirituan a templo, nga inaldaw a mangidatdatonda iti Dios iti “sakripisio ti panagdaydayaw.”​—Heb 13:15.

[Ladawan iti panid 23]

Kasano a maparang-aytayo ti pannakaawattayo kadagiti “nauneg a bambanag ti Dios”?