Talna​—Kasano a Maaddaanka iti Dayta?

GAPU ta agbibiagtayo iti nariribuk a lubong, masapul nga ikagumaantayo ti maaddaan iti talna. Ngem uray no natalna ti panunottayo, narigat a pagtalinaeden dayta. Ania ti ibaga ti Sao ti Dios tapno maaddaantayo iti talna ken mapagtalinaedtayo dayta? Ken kasano a matulongantayo ti sabsabali a maaddaan iti talna?

TAPNO MAADDA TI PUDPUDNO A TALNA

Makuna nga addaantayo iti pudpudno a talna no natalgedtayo ken natalna ti panunottayo. Kasapulan met a maaddaantayo iti nasinged a pannakigayyem iti sabsabali. Kangrunaanna, masapul a maaddaantayo iti nasinged a relasion iti Dios. Kasano?

Agtaltalektayo ken Jehova ken kayattayo a natalna ti relasiontayo kenkuana no tungpalentayo dagiti nalinteg a bilin ken prinsipiona. (Jer. 17:7, 8; Sant. 2:22, 23) Iti kasta, umasideg kadatayo ken ikkannatayo iti natalna a panunot. Kuna ti Isaias 32:17: “Ti aramid ti pudno a kinalinteg agbalinto a talna; ket ti panagserbi ti pudno a kinalinteg, kinaulimek ken kinatalged agingga iti tiempo a di nakedngan.” Maaddaantayo iti pudpudno a natalna a panunot no naimpusuan nga agtulnogtayo ken Jehova.​—Isa. 48:18, 19.

Maaddaantayo met iti manayon a talna babaen ti naisangsangayan a sagut ti nailangitan nga Amatayo​—ti nasantuan nga espirituna.​—Ara. 9:31.

MAKATULONG TI ESPIRITU TI DIOS

Inlista ni apostol Pablo ti talna kas maikatlo nga aspeto ti “bunga ti espiritu.” (Gal. 5:22, 23) Gapu ta agtaud ti pudpudno a talna iti espiritu ti Dios, bay-antayo nga agtignay dayta tapno maaddaantayo iti pudpudno a talna. Usigentayo ti dua a pamay-an a matulongannatayo ti espiritu ti Dios a maaddaan iti talna.

Umuna, no regular a basaentayo ti Sao ti Dios. (Sal. 1:2, 3) Bayat nga ut-utobentayo ti mensahe ti Biblia, tulongannatayo ti espiritu ti Dios a mangtarus iti pampanunot ni Jehova maipapan iti adu a banag. Kas pagarigan, maawatantayo no kasano a kayatna a pagtalinaeden ti talna ken no apay a nagpateg dayta kenkuana. No iyaplikartayo dagita a maadaltayo iti Sao ti Dios, nataltalna ti biagtayo.​—Prov. 3:1, 2.

Maikadua, masapul nga ikararagtayo ti nasantuan nga espiritu ti Dios. (Luc. 11:13) Ikari ni Jehova a no agpatulongtayo kenkuana, “ti talna ti Dios a mangringbaw iti isuamin a panunot saluadannanto dagiti puso[tayo] ken dagiti pannakabalin ti isip[tayo] babaen ken Kristo Jesus.” (Fil. 4:6, 7) No kanayon nga ikararagtayo ken Jehova ti espirituna, ipaayannatayo iti talna ti panunot a para laeng kadagidiay nasinged kenkuana.​—Roma 15:13.

Kasano nga inyaplikar ti dadduma daytoy a balakad ti Biblia ken kasano a nagbalbaliwda isu a naaddaanda iti manayon a talna​—natalna a panunot, ken natalna a relasion ken Jehova ken iti padada a tao?

NAADDAANDA ITI MANAYON A TALNA

Adda dagiti Kristiano a dati a “managunget” ngem naasi, naanus, naimbag, ken natalna itan ti relasionda iti dadduma.a (Prov. 29:22) Agpayso dayta iti dua a kabsattayo a natulongan a mangparmek iti pungtot ken maaddaan iti natalna a relasion iti sabsabali.

Naalas ti panagsasao ni David gapu iti dakes nga ugalina. Sakbay a nagdedikar iti Dios, manangkritikar ken nagubsang ti panagsasaona kadagiti kapamiliana. Idi agangay, nabigbigna a kasapulan nga agbalbaliw ken agbalin a mannakikappia. Ania ti inaramidna? Kinunana: “Inyaplikarko dagiti prinsipio ti Biblia. Kas resultana, addan respetok kadagiti kapamiliak ken respetuendak met.”

Naapektaran ti ugali ni Rachel gapu iti dimmakkelanna. Inadmitirna, “Gapu ta napadakkelak iti pamilia a managpungpungtot, lablabanak pay laeng ti riknak nga agpungtot.” Kasano a nagbalin nga ad-adda a mannakikappia? Insungbatna, “Kanayon nga ikararagko ti tulong ni Jehova.”

Da David ken Rachel ket pagarigan ti natalna a bunga iti panangyaplikar kadagiti prinsipio ti Biblia ken panagtalek iti tulong ti espiritu ti Dios. Nalawag nga uray nariribuk ti lubong a pagbibiagantayo, maaddaantayo iti natalna a panunot a makatulong tapno nasayaat ti relasiontayo iti pamiliatayo ken iti kakabsat. Nupay kasta, iparegta ni Jehova a ‘makikappiatayo iti amin a tattao.’ (Roma 12:18) Posible kadi dayta, ken ania dagiti pagimbagan ti panangikagumaantayo a makikappia?

MAKIKAPPIA ITI SABSABALI

Babaen ti panangasaba, aw-awisentayo dagiti tattao a magunggonaan iti mangyeg iti kappia a mensahetayo maipapan iti Pagarian ti Dios. (Isa. 9:6, 7; Mat. 24:14) Makaparagsak ta adu ti nangipangag. Kas resultana, saanda unay a maupay wenno masuron kadagiti makitkitada a mapaspasamak. Imbes ketdi, addaandan iti pudpudno a namnama iti masanguanan ket ‘sarakenda ti talna ken surotenda dayta.’​—Sal. 34:14.

Ngem saan nga amin ket mangipangag iti mensahetayo iti damo a pannakisaritatayo. (Juan 3:19) Nupay kasta, tulongannatayo ti espiritu ti Dios a sitatalna ken sidadayaw a mangidanon iti naimbag a damag. Iti kasta, sursurotentayo dagiti instruksion ni Jesus iti panangasaba iti Mateo 10:11-13: “No sumrekkayo iti balay, kablaawanyo ti sangakabbalayan; ket no ti balay maikari, ti talna a tarigagayanyo iti dayta dumteng koma iti dayta; ngem no di maikari, ti talna manipud kadakayo agsubli koma kadakayo.” No surotentayo ti balakad ni Jesus, pumanawtayo a natalna ti riknatayo a mangnamnama a dumngegdanto met laeng.

Mabalin a maadda met ti talna no nadayaw ti pannakisaritatayo kadagiti opisial ti gobierno, a pakairamanan dagidiay bumusbusor iti trabahotayo. Kas pagarigan, saan idi nga ap-aprobaran ti maysa a pagilian iti Africa ti panagibangon kadagiti Kingdom Hall gapu iti panangidumduma. Tapno sitatalna a masolbar ti problema, naibaon ti maysa a kabsat a dati a misionero iti dayta a pagilian a makisarita iti embahador dayta a pagilian idiay London, England. Ibagana ti natalna a trabaho dagiti Saksi ni Jehova iti dayta a pagilian idiay Africa. Ania ti resultana?

Insalaysayna: “Idi nakadanonak iti reception desk, nadlawko a pareho ti panagbadbado ti receptionist ken ti tribu a nasursurok ti lengguaheda. Isu a kinablaawak iti lengguahena. Nasdaaw ket insaludsodna, ‘Ania ti rantam?’ Sidadayaw nga imbagak a kayatko koma ti makisarita iti embahador. Tinawaganna ti opisial, ket rimmuar sa kinablaawannak iti lengguahena. Kalpasanna, dimngeg a naimbag ti embahador idi inlawlawagko ti natalna a trabaho dagiti Saksi ni Jehova.”

Gapu iti nadayaw a panangilawlawag ti kabsat, nagbalbaliw ti di umiso a pannakaawat ken panangidumduma ti embahador iti trabahotayo. Idi agangay, pinalubosanen dayta a pagilian ti trabahotayo a panagibangon. Naragsakan dagiti kakabsat iti dayta! Wen, adu ti pagimbagan ti nadayaw a panangtratotayo iti sabsabali, kas iti talna.

AGNANAYON A TALNA

Tagtagiragsaken ita ti ili ni Jehova ti naespirituan a paraiso a napnuan iti talna. Manayonam dayta a talna bayat a patpatanorem daytoy nga aspeto ti bunga ti espiritu. Kangrunaanna, maragsakan kenka ni Jehova ken maaddaanka iti naruay ken manayon a talna iti baro a lubong ti Dios.​—2 Ped. 3:13, 14.