Apay a Matay ti Tao?

Sungbat ti Biblia

Normal laeng a panunoten no apay a matay dagiti tattao, nangruna no matay ti ipatpategtayo. Kuna ti Biblia: “Ti pannilud a mangpataud iti ipapatay isu ti basol.”—1 Corinto 15:56.

Apay nga agbasol ken matay dagiti tattao?

Natay ti immuna a tao a da Adan ken Eva gapu ta nagbasolda iti Dios. (Genesis 3:17-19) Ipapatay laeng ti resulta ti panagsukirda iti Dios, ti “ubbog ti biag.”​—Salmo 36:9; Genesis 2:17.

Impatawid ni Adan ti basol kadagiti kaputotanna. Kuna ti Biblia: “Babaen iti maysa a tao simrek ti basol iti lubong ken ti ipapatay babaen iti basol, ket iti kasta ti ipapatay nagsaknap iti amin a tattao agsipud ta nagbasolda amin.” (Roma 5:12) Matay ti tao gapu ta nagbasolda amin.​—Roma 3:23.

No kasano a mapukaw ti ipapatay

Inkari ti Dios nga addanto tiempo nga “alimonennanto ni patay iti agnanayon.” (Isaias 25:8) Tapno mapukaw ti ipapatay, ikkatenna nga umuna ti basol a pakaigapuanna. Aramiden ti Dios dayta babaen ken Jesu-Kristo, ti “mangikkat iti basol ti lubong.”​—Juan 1:29; 1 Juan 1:7.