Kasapulantay Amin ti Gagayyem
“Ti maysa a gayyem ket daydiay maibagam kenkuana ti amin a banag, daydiay maawagam iti aniaman nga oras iti aldaw.”—Yaël, Francia
“Ti maysa a gayyem maawatanna no nasaktanka ken makipagrikna kenka.”—Gaëlle, Francia
“ADDA gayyem a dumekket a nasingsinged ngem iti maysa a kabsat.” (Proverbio 18:24) Sipud idi naisurat dagita a sasao iti Biblia agarup 3,000 a tawen ti napalabasen, saan pay laeng a nagbalbaliw ti kangrunaan a kababalin ti tao. Ti pannakigayyem ket napateg pay laeng iti panunot ti tao no kasano a napateg ti taraon ken danum iti bagina. Ngem para iti adu a tattao, narigat a penken daytoy kangrunaan a kasapulan a pannakigayyem. Kadawyanen ti kinaliday. “Saan a narigat nga ilasin dagiti makagapu,” kinuna da Carin Rubenstein ken Phillip Shaver iti libroda nga In Search of Intimacy. Dinakamatda ti bambanag a kas iti “kanayon nga iyaakar”—masansan nga umakar ti tattao iti pagnaedanda—“dagiti siudad a di mangikankano kadagiti tattao, napno iti krimen,” ken “ti panagbuya iti telebision ken video imbes a direkta a makilangen dagiti tattao iti komunidadda.”
Ibusen met ti moderno a panagbiag ti tiempotayo ken pigsatayo. “Ad-adu a tao ti linawas a makalangen ti taga siudad ngem iti makalangen ti taga away iti makatawen wenno uray pay iti intero a panagbiagna, idi maika-17 a siglo,” kinuna ni Letty Pogrebin iti librona nga Among Friends. Gapu iti kaadu ti am-ammotayo, saan a maipamaysa ti atensiontayo iti maysa a tao isu a saan a mapatanor ti nasinged ken napaut a pannakigayyem.
Uray pay kadagiti lugar a di unay naapura ti wagas ti panagbiag, napartak ti panagbalbaliw dagiti kasasaad ti kagimongan. “Nakasingsingedkami idi kadagiti gagayyemmi,” kuna ni Ulla, nga agnanaed iti Makindaya a Europa. “Ngem ita, adun ti naipamaysa iti trabahoda wenno kadagiti bukodda a raragpaten. Kanayon nga okupado ti amin, ket mariknami nga in-inut a lumamlammiisen ti dati a panaggagayyemmi.” Gapu iti apurado a kasasaad ti moderno a panagbiag, saanen a maipangpangruna ti pannakigayyem.
Ngem kasapulantay unay ti gagayyem. Nangnangruna a kasapulan dagiti agtutubo daytoy. Kas kinuna ni Yaël, a naadaw itay, “no agtutuboka pay, masapul a mariknam nga akseptaren ken kamengnaka ti maysa a grupo ken mariknam a nasingedka iti maysa a tao.” Agtutubo man wenno nataengan, kasapulantay amin iti naragsak ken nasinged a pannakigayyem. Ket agpapan pay kadagiti karit, nagadu ti maaramidantayo tapno maaddaan ken mataginayontayo dagiti pudno a gagayyem. Daytoy ti salaysayen dagiti sumaganad nga artikulo.