Di Ninamnama a Tulong Manipud iti Agriingkayo!

BABAEN ITI MANNURAT TI AGRIINGKAYO! IDIAY BENIN

◼ Ni Noël nga agtawen iti 23 inkeddengna ti agsardeng nga ageskuela tapno sumrek kas amin-tiempo a ministro dagiti Saksi ni Jehova. Ngem pagduaduaan dagiti kabagianna no kabaelannanto a suportaran ti bagina. Talaga a narigatan ni Noël a nagbirok iti maitutop a paset-tiempo a trabaho. Isu nga idi naipablaak ti naintiempuan nga artikulo a “Lima a Pamay-an iti Panagbirok iti Panggedan,” iti magasin nga Agriingkayo!, namin-adu a binasa dayta a naimbag ni Noël.a Nakatulong kadi ti artikulo kenkuana? Wen, ngem saan nga iti pamay-an a ninamnamana.

Ti direktor iti pribado nga eskuelaan nakitana ni Noël a mangaskasaba iti binalaybalay ket dinamagna no isu ket maysa a Saksi ni Jehova. Kasapulan ti direktor ti maysa pay a mannursuro, ket gapu ta napaliiwna nga epektibo a mangisuro dagiti Saksi ni Jehova, dinamagna ken Noël no adda am-ammona nga interesado a mangisuro. Idi imbaga ni Noël nga awan, kinuna ti direktor, “Sika ngay?”

Saan pay a napadasan ni Noël ti nangisuro iti eskuelaan, ken no dadduma agbeddal. Idiay Benin, problema daytoy ta kalikaguman ti board of education a masapul nga ageksamen dagiti mannursuro tapno mapatalgedan a saanda nga agbeddal. “No makaalaka iti sertipiko,” kinuna ti direktor, “itedko kenka dayta a trabaho.”

Adun ti rinang-ayan ni Noël iti Teokratiko nga Eskuelaan ti Panagministro, ti eskuelaan a ti panggepna ket mangparang-ay iti abilidad nga agpalawag ken makisarita iti publiko ken linawas a maang-angay dayta kadagiti kongregasion dagiti Saksi ni Jehova. Agpalpalawag metten iti kongregasionda. Nupay kasta, agtibtibbayo ti barukongna idi nangala iti eksamen.

Inyawat kenkuana ti nangeksamen ti maysa a magasin ket kiniddawna a basaenna a sipipigsa ti maysa a parapo a naugedan iti nalabaga. Nagbukirad ti mata ni Noël idi nakitana ti artikulo a “Lima a Pamay-an iti Panagbirok iti Panggedan.” Sisasayud a binasana ti parapo ket nakaala iti sertipiko.

Kamaudiananna, imbaga ti nangeksamen a kanayon nga agbasbasa kadagiti magasin dagiti Saksi ni Jehova. “Adu nga impormasion ti maammuan kadagitoy a pagbasaan isu a masansan nga usarek dagitoy iti eksaminasion,” kinunana.

Nangrugi a nangisuro ni Noël, ket kayat ti direktor nga alaen a mangisuro iti sumaganad a tawen, ngem adda sabali a plano ni Noël. Naayaban ngamin nga agtrabaho iti sanga nga opisina dagiti Saksi ni Jehova, a sadiay ti pagserserbianna itan.

[Footnote]