Iwayaam ti Napateg a Bambanag

“Ti tiempo a nabati ket ababan.”—1 Corinto 7:29.

“TI PANAGLUGLOG ken panagpisawpisawmo iti kadanuman dina kaipapanan nga aglanglangoykan,” insurat ni Michael LeBoeuf iti librona a Working Smart.

Iti sabali a pannao, adda nagdumaan ti basta kinaalibtak ken ti talaga a panangiringpas iti banag a napateg. Lagipem ti napalabas a lawas. Nangusaram iti tiempom? Ania ti nakakumikomam unay? Maamirismo kadi a nasken nga iwayaam dagiti banag a talaga a napateg kenka?

Usigem ti impakpakauna ni Jesus maipapan iti naganat a tiempotayo. Kinunana a bayat nga umas-asidegen ti panungpalan daytoy a sistema ken umad-adanin ti nalinteg a baro a lubong ti Dios, makumikom dagiti adalanna. Iti ania? Iti panangikasabada iti “daytoy naimbag a damag ti pagarian [ti Dios].” Nadakamatna pay a ti kaaduan a tattao ket saan a madadaan a dumngeg. Makumikomda unay kadagiti gagangay a pakaseknan iti biag. Innayonna a dagidiay saan a madadaan a dumngeg iti mensahe ti Pagarian ket madadaelto.—Mateo 24:14, 37-39; Lucas 17:28-30.

Ita, ikaskasaba dagiti Saksi ni Jehova ti naimbag a damag ti Pagarian ti Dios iti nasurok a 230 a pagilian. Kas kaitungpalan ti impadto ni Jesus, adu ti saan a dumngeg, ta kunkunada nga “okupadoda unay.” Ngem nupay okupadoka, paregtaendaka nga iwayaam a sukimaten ti isursuro ti Biblia maipapan iti Pagarian ti Dios. Namnamaenmi nga apaman a maammuam dagiti bendision nga ipaayto ti Dios iti sangatauan, umanamongkanto a ti panagimdeng ken panangipangag iti mensahe ti Biblia ket talaga a napateg, banag a maiparbeng laeng nga iwayaam.a

[Footnote]