NGUMINNGINA TI GAGATANGEN—ANIA TI ARAMIDEM?
Akseptarem ti Realidad
No in-inut a ngumina dagiti gagatangen, mabalin a saantay unay a madmadlaw dayta nangruna no ngumatngato met ti sueldotayo. Ngem no bigla a ngumato dagiti presio ken isu latta ti sueldotayo, mabalin a madanagan ken maburiborantayo nangruna no adda ti pamiliatayo.
Saantay a malapdan ti panagngato dagiti presio ken babayadan. Ngem pagimbagantayo no akseptarentayo a kastan a talaga ti biag ita.
NO APAY A NAPATEG
Dagiti tattao a mangbigbig a saanda a makontrol ti panagngina dagiti gagatangen ket mabalin a . . .
nalaklaka nga agtalinaed a kalmado. No kalmadotayo, mas makapagpanunottayo a naimbag ken nasaysayaat ti panagdesisiontayo.
nalaklaka a liklikan dagiti saan a nasayaat nga ugali. Kas pagarigan, ti panaggatang kadagiti saan a talaga a kasapulan wenno panangitantan iti panagbayad iti koriente, danum, ken dadduma pay.
nalaklaka a liklikan ti makiriri kadagiti kapamilia gapu iti kuarta.
nalaklaka a makapanunot kadagiti pamay-an a mayan-anay ti adda a kuarta. Kas pagarigan, kissayan dagiti paggastuan ken gatangen laeng dagiti talaga a kasapulan.
TI MABALINMO NGA ARAMIDEN
Nakasaganaka koma nga agbalbaliw. No bigla a ngumina dagiti gagatangen, nasayaat no kissayam dagiti paggastuam no posible. Adda dagiti tattao nga aggasto iti ad-adu ngem iti masapsapulanda, isu a rumigat a rumigat ti kasasaadda. Kasda la aglanglangoy a subsubaenda ti napegges nga ayus ti karayan! Inton agangay, mabannogdan. No adda pamiliam, natural laeng a pampanunotem met no kasano a maipaaymo dagiti material a kasapulanda. Ngem saan la a dayta ti napateg. Laglagipem nga ad-adda a kasapulanda ti ayat, tiempo, ken atensionmo.
No itultuloymo ti agbiag a naluho uray no saanmon a kabaelan, kaska la aglanglangoy a subsubaem ti napegges nga ayus ti karayan