ENOC

[Daydiay Nasanay; Nainaguraran [kayatna a sawen, naidedikar, nairugi]].

1. Anak ni Cain ken ama ni Irad. Nayanak ni Enoc iti daga ti Kinapugante kalpasan a pinapatay ni Cain ti kabsatna a ni Abel.​—Ge 4:17, 18.

2. Ti anak a nayanak ken Jared iti edad a 162; ti maikapito a tao iti linia ti kapuonan manipud ken Adan. Malaksid ken Matusalem, a nayanak kenkuana idi agtawen iti 65, naaddaan ni Enoc iti annak a lallaki ken babbai. Maysa ni Enoc kadagiti natukoy a “kastoy kadakkel nga ulep dagiti saksi” a naisangsangayan nga ulidan iti pammati kadagidi nagkauna a tiempo. “Ni Enoc nagtultuloy a nakipagna iti pudno a Dios.” (Ge 5:18, 21-24; Heb 11:5; 12:1) Kas maysa a mammadto ni Jehova, impakpakaunana ti iyaay ti Dios a kaduana ti nasantuan a linaklaksana tapno mangipakat iti panangukom kadagiti di nadiosan. (Jud 14, 15) Nalabit nagpasar iti pannakaidadanes gapu iti panagipadtona. Ngem saan nga impalubos ti Dios a dagiti bumusbusor papatayenda ni Enoc. Imbes ketdi, “innala” ni Jehova, kayatna a sawen, napaababa ti biagna iti edad a 365, edad nga adayo nga ab-ababa ngem iti edad ti kaaduan a kapanawenanna. “Nayalis ni Enoc tapno saanna a makita ni patay,” a mabalin a kayatna a sawen nga isu inkabil ti Dios iti naimpadtuan a pannakaimayeng ket kalpasanna pinagpatinggana ti biag ni Enoc bayat ti pannakaimayengna tapno saanna a mapasaran dagiti ut-ot ni patay. (Ge 5:24; Heb 11:5, 13) Nupay kasta, saan a naipan idiay langit, sigun iti nalawag a sasao ni Jesus iti Juan 3:13. Kas iti napasamak iti bagi ni Moises, agparang a pinagpukaw ni Jehova ti bagi ni Enoc, ta “saan a nasarakan iti sadinoman.”​—De 34:5, 6; Jud 9.

Saan a ni Enoc ti nangisurat iti “Libro ni Enoc.” Daytoy ket di naipaltiing, apokripal a libro a naisurat adu a siglo kalpasanna, nalabit maysa a tiempo kabayatan ti maikadua ken umuna a siglo K.K.P.

3. Ti kaunaan a siudad a nadakamat iti Biblia. Imbangon ni Cain daytoy a siudad iti daga ti Kinapugante iti daya ti Eden. Pinanagananna dayta iti nagan ti anakna nga Enoc.​—Ge 4:17.