PANAGIRIK
Ti panangisina iti binukel manipud iti ungkay ken garami. No bassit laeng ti iriken dagiti managadas, wenno no babassit ti binukel a kas iti kumino, wenno no sililimed nga agirikda bayat dagiti napeggad a panawen, agaramatda iti sarukod wenno pagbaut nga iggaman ti ima tapno batbatenda ti binukel, iti daga wenno iti maysa a pagpespesan iti ubas.—Uk 6:11; Ru 2:17; Isa 28:27.
Nupay kasta, iti pagirikan ti normal a pakaar-aramidan ti panagirik. Gagangay nga adda dayta iti nangatngato a lugar a naangin, buklen ti nalantag a sirkulo a disso, agingga iti 15 m (50 pie) ti diametrona, a naaramid iti bato wenno natangken ti pannakasedsedna a daga. Dagiti pagirikan nga awan ti pribado a makinkukua ket masansan a nagaabayda iti asideg ti maysa a purok nga usaren ti isuamin. Ti binettek a sebada wenno trigo, a kangrunaan a binukel ti Palestina, ket maiwaras iti suelo (itatta pangkaaduan nga iti kapuskol a 30 agingga iti 46 cm [12 agingga iti 18 pul.]). Iti panangibaddebaddek dagiti toro wenno dadduma pay nga animal, bayat ti panagrikusrikusda iti pagirikan, in-inut a maparpar ti garami ket maisina ti binukel manipud iti ungkay. Saan idi a nabusalan dagiti animal bayat ti panagsaksakda iti binukel.—De 25:4; Os 10:11; 1Co 9:9, 10.
Babaen ti panagaramat kadagiti alikamen a pagirik a guyoden dagiti animal, pimmartak ti panagirik ken nasaysayaatda nga usaren ngem kadagiti kuko laeng ti animal. (Isa 41:15; Am 1:3) Dagiti pagirik a naaramat kadagiti naud-udi a tiempo ket mabalin nga akaba a nalantag a nadadagsen a pasagad nga addaan kadagiti natadem a ngipen a bato wenno landok kadagiti sirokda, wenno basbaskag a mangguyod kadagiti nadagsen a nagtimbukel a pataladtad nga addaan kadagiti tadem a mangrungos ken mangparpar kadagiti ungkay dagiti binukel. Tunggal panagrikus dagita a pasagad ken alikamen a pataladtad saklawenda ti kanayonan a benneg, ket nakatulong ti kanayonan a dagsen ti mangiturturong a nakalugan iti rabawda tapno ad-adda nga epektibo ti panagirik dagita.—Idiligyo ti Isa 28:28.
No naan-anayen a nairik ti binukel, ken naulit-ulit a naipadalan iti dayta a proseso, itaepdan.—Kitaenyo ti PANAGTAEP.
Gapu ta nalayang ken lantag, masansan a naaramat dagiti pagirikan iti sabsabali pay a panggep. Naangay dagiti seremonia ti panagleddaang gapu ken Jacob iti pagirikan ti Atad iti asideg ti Jordan. (Ge 50:10, 11) Iti panangiwanwan ni Jehova, ginatang ni David ti pagirikan ni Arauna (Ornan), nangbangon sadiay iti altar, ket nagisakripisio ken Jehova. (2Sm 24:16-25; 1Cr 21:15-28) Idi agangay, iti daytoy a pagirikan ti nakaibangonan ti templo ni Solomon. (2Cr 3:1) Idi nagnumo da Jehosafat ken Acab maipapan iti pannakigubatda iti Siria, naisaad dagiti tronoda iti maysa a pagirikan idiay pagserkan ti ruangan ti Samaria.—1Ar 22:10.
Piguratibo nga Usar. Iti piguratibo a kaipapanan, ti mapasamak kadagiti ungkay ti binukel iti pagirikan ket maikanatad unay a simbolo ti pannakabatbat ken pannakaputedputedto dagiti kabusor ni Jehova. (Isa 41:15; Jer 51:33; Mik 4:12, 13; Hab 3:12) Iladawan met ti panagirik ti ar-aramiden no dadduma dagiti tattao a panangilupitlupit iti sabsabali. (2Ar 13:7) Wenno ti pannakaisina ti trigo manipud iti garami mabalin nga iladladawanna ti pannakaisina ti nalinteg manipud iti nadangkes babaen ti panangukom ni Jehova. (Mt 3:12) Iti sabali pay a kaipapanan, ti napaut ken aglaplapusanan a panagirik ipasimudaagna ti kinarang-ay ken pamendision ni Jehova.—Le 26:5; Joe 2:24.