2 Gun-odem ti Umiso a Pannakaammo Maipapan iti Dios

“Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios.”​—Juan 17:3.

ANIA TI LAPPED? Kuna ti dadduma a ti Dios ket saan a persona. Patien met ti sabsabali a ti Dios ket maysa laeng a nabileg a puersa. Dagidiay mamati nga isu ket pudno a persona isursuroda dagiti agsisimparat a doktrina maipapan kenkuana ken kadagiti galadna.

KASANOM A MAPAGBALLIGIAN TI LAPPED? Ti maysa a pamay-an tapno magun-odam ti pannakaammo maipapan iti Dios ket ti panangusigmo kadagiti banag a pinarsuana. Kinuna ni apostol Pablo: “Dagiti di makita a kualidadna [ti Dios] ket silalawag a makita manipud pannakaparsua ti lubong ken agpatpatuloy, agsipud ta matarusan ida babaen iti bambanag a naaramid, ti mismo nga agnanayon a pannakabalin ken kina-Diosna.” (Roma 1:20) Babaen ti panangusigmo a naimbag iti nakaparsuaan, adu ti masursurom maipapan iti sirib ken pannakabalin ti Namarsua kadatayo.​—Salmo 104:24; Isaias 40:26.

Nupay kasta, tapno magun-odan ti umiso a pannakaammo maipapan iti personalidad ti Dios, tunggal maysa nasken a basaenna ti Biblia a Sao ti Dios ken sukimatenna a mismo dayta. Dimo ipalubos a basta impluensiaan ti sabsabali ti panagpampanunotmo. Imbes ketdi, surotem daytoy a balakad ti Biblia: “Dikay agpaisukogen iti daytoy a sistema ti bambanag, no di ket agbalbaliwkayo babaen ti panangpabaroyo iti panunotyo, tapno mapaneknekanyo iti bagbagiyo ti naimbag ken makaay-ayo ken naan-anay a pagayatan ti Dios.” (Roma 12:2) Kas pagarigan, usigem dagiti sumaganad nga ipakaammo ti Biblia maipapan iti Dios.

Adda personal a nagan ti Dios. Rinibu a daras a mabasa iti intero a Biblia ti personal a nagan ti Dios. Iti adu a patarus, nadakamat dayta iti Salmo 83:18, a kastoy ti mabasa: “Bareng maammoanda coma a sicsica laeng, nga agnagan Jehova, ti Cangatoan a ringbawam iti amin a daga.”​—Ti Santa Biblia, PBS.

Ni Jehova a Dios adda riknana a maapektaran kadagiti ar-aramiden ti tattao. Kalpasan a winayawayaan ni Jehova ti ilina nga Israel manipud pannakaadipenda idiay Egipto, namin-adu a dida inkankano ti nainsiriban a balakadna. Gapu iti kinasukirda, “sinaktanda ti riknana.” Babaen kadagiti aramidda, “pinasakitanda uray Daydiay Santo ti Israel.”​—Salmo 78:40, 41.

Maseknan ni Jehova iti tunggal maysa kadatayo. Bayat a kasarsaritana dagiti adalanna, kinuna ni Jesus: “Saan aya a ti dua a billit-tuleng mailako iti sinsilio a bassit ti pategna? Kaskasdi awan maysa kadakuada ti matnag iti daga a saan nga ammo ni Amayo. Ngem dagiti mismo a buok ti uloyo nabilangda amin. Gapuna dikay agbuteng: napatpategkayo ngem iti adu a billit-tuleng.”​—Mateo 10:29-31.

Awan ti puli wenno kultura nga idumduma ti Dios. Ni apostol Pablo kinunana kadagiti Griego idiay Atenas a ti Dios “inaramidna ti tunggal nasion dagiti tattao, tapno agnaedda iti intero a rabaw ti daga.” Imbagana pay a ti Dios “saan nga adayo iti tunggal maysa kadatayo.” (Aramid 17:26, 27) Kinuna ni apostol Pedro: “Ti Dios saan a mangidumduma, no di ket iti tunggal nasion anamonganna ti tao nga agbuteng kenkuana ken agaramid iti kinalinteg.”​—Aramid 10:34, 35.

ANIA TI GUNGGONA? Dadduma “adda regtada iti Dios; ngem saan a maitunos iti umiso a pannakaammo.” (Roma 10:2) No ammom ti talaga nga isursuro ti Biblia maipapan iti Dios, saankanto a maallilaw ket iti kasta, ‘makaadanika iti Dios.’​—Santiago 4:8.

Para iti ad-adu pay nga impormasion, kitaem ti kapitulo 1 nga “Ania ti Pudno Maipapan iti Dios?” iti libro nga Ania a Talaga ti Isursuro ti Biblia?a

[Footnote]

[Ladawan iti panid 6]

Ti maysa a pamay-an tapno magun-odam ti pannakaammo maipapan iti Dios ket ti panangusigmo kadagiti banag a pinarsuana