‘Kimmuyog Kenkuana ti Bambanag nga Inaramidna’
NI Theodore Jaracz, a kameng ti Bagi a Manarawidwid dagiti Saksi ni Jehova, ket naturposna ti naindagaan a biagna idi agsapa ti Mierkoles, Hunio 9, 2010. Agtawen iti 84 ken napanawanna ni Melita nga asawana iti 53 a tawen. Karaman kadagiti napanawanna ket ni manangna ken ti tallo a kaanakanna.
Nayanak ni Kabsat Jaracz idi Setiembre 28, 1925, idiay Pike County, Kentucky, U.S.A., ken insimbolona ti dedikasionna ken Jehova iti edad a 15, idi Agosto 10, 1941. Dua a tawen kalpasanna, idi agtawen iti 17, simrek kas regular pioneer ket dayta ti nangrugian ti agarup 67 a tawen a panagserbina iti amin-tiempo.
Idi 1946, idi agtawen iti 20, tinabunuan ni Kabsat Jaracz ti maikapito a klase ti Watchtower Bible School of Gilead. Kalpasan ti panagturposna, natudingan nga agserbi kas agdaldaliasat a manangaywan iti Cleveland, Ohio, a paset ti Estados Unidos. Idi 1951, naidestino iti sanga nga opisina ti Australia, a sadiay ti nagserbianna kas adipen ti sanga. Sigun iti 1983 Yearbook of Jehovah’s Witnesses, “naparegta unay [ni Kabsat Jaracz] dagiti kakabsat iti intero a pagilian gapu iti panangitandudona iti nateokratikuan a kinaurnos ken iti nagsayaat nga ulidanna iti tay-ak.”
Idi nagsubli idiay Estados Unidos ni Kabsat Jaracz, nagkasarda ken Melita Lasko idi Disiembre 10, 1956. Nangrugida kas agassawa iti panagdaliasat a trabaho. Sipipinget a nagserbida kadagiti sirkito ken distrito iti dakkel a paset ti Estados Unidos. Idi arinunos ti 1974, naawis ni Kabsat Jaracz nga agbalin a kameng ti Bagi a Manarawidwid dagiti Saksi ni Jehova.
Kanayonto a malaglagip ni Kabsat Jaracz kas napinget ken nasungdo nga adipen ni Jehova, a naimpusuan nga impangpangrunana dagiti nateokratikuan nga aktibidad. Isu ket naayat ken nadungngo nga asawa ken naespirituan a lalaki nga iyun-unana ti pagimbagan ti sabsabali. (1 Cor. 13:4, 5) Impakitana ti kasta a naimpusuan a pannakaseknan iti sabsabali babaen ti panangsiguradona a patas ken naasi ti pannakatrato ti amin. Kanayonanna, makita ti dakkel a panagayat ken pannakaseknanna kadagiti tattao babaen ti kinaregtana iti ministerio.
Nupay maladingitantayo iti ipapatay ti maysa a nagaget, maipatpateg a kameng ti pamilia ti Bethel ken ti sangalubongan a panagkakabsat, maragsakantayo iti nasungdo a panagserbi ni Kabsat Jaracz ken ni Jehova iti adu a dekada. Awan duadua a ‘pinaneknekanna ti bagina a matalek uray agingga ken patay, ket inawatna ti korona ti biag.’ (Apoc. 2:10) Masiguradotayo met a ‘kimmuyog kenkuana dagiti bambanag nga inaramidna.’—Apoc. 14:13.