Jeremía

33 Orð Jehóva kom til Jeremía í annað skipti meðan hann var enn í haldi í Varðgarðinum:+ 2 „Þetta segir Jehóva skapari jarðar, Jehóva sem mótaði hana og grundvallaði – Jehóva er nafn hans: 3 ‚Hrópaðu til mín. Ég svara þér og segi þér fúslega frá miklum og óskiljanlegum hlutum sem þú hefur ekki þekkt áður.‘“+

4 „Þetta segir Jehóva Guð Ísraels um húsin í þessari borg og hús Júdakonunga sem hafa verið rifin niður til að verjast umsátursvirkjunum og sverðinu,+ 5 um þá sem eru komnir til að berjast við Kaldea og um staðina þar sem líkin hrannast upp, lík þeirra sem ég felldi í reiði minni og heift, en vegna illsku þeirra huldi ég andlit mitt fyrir þessari borg: 6 ‚Ég hlúi að sárum borgarinnar og græði þau.+ Ég lækna íbúana og opinbera þeim hafsjó friðar og sannleika.+ 7 Ég leiði útlagana frá Júda og Ísrael aftur heim+ og byggi þá upp svo að þeir verði eins og áður.+ 8 Ég hreinsa þá af allri þeirri sekt sem þeir hafa bakað sér með því að syndga á móti mér.+ Ég fyrirgef þeim allar syndir þeirra og afbrot gegn mér.+ 9 Borgin verður mér til frægðar, gleði, lofs og prýði meðal allra þjóða jarðar sem frétta af öllu því góða sem ég veiti fólki mínu.+ Þær munu skjálfa af ótta+ vegna allrar þeirrar góðvildar sem ég sýni henni og friðarins sem ég veiti henni.‘“+

10 „Jehóva segir: ‚Þið munuð kalla þennan stað auðn þar sem hvorki búa menn né skepnur. En í borgum Júda og á strætum Jerúsalem, sem liggja í eyði, mannlausar og án búfjár, munu aftur heyrast 11 fagnaðarlæti og gleðihróp,+ köll brúðguma og brúðar, raddir þeirra sem segja: „Þakkið Jehóva hersveitanna því að Jehóva er góður,+ tryggur kærleikur hans varir að eilífu!“‘+

‚Þakkarfórnir verða færðar í húsi Jehóva+ því að ég leiði útlaga landsins aftur heim svo að allt verði eins og áður,‘ segir Jehóva.

12 Jehóva hersveitanna segir: ‚Í þessari auðn þar sem hvorki búa menn né skepnur og í öllum borgunum verða aftur beitilönd þar sem hirðar hvíla hjarðir sínar.‘+

13 ‚Í borgunum í fjalllendinu og á láglendinu, í borgunum í suðri, í Benjamínslandi, í nágrenni Jerúsalem+ og í borgum Júda+ munu sauðir á nýjan leik ganga fram hjá þeim sem telur þá,‘ segir Jehóva.“

14 „‚Þeir dagar koma,‘ segir Jehóva, ‚þegar ég efni loforðið góða sem ég gaf um Ísraelsmenn og Júdamenn.+ 15 Á þeim dögum og á þeim tíma læt ég réttlátan sprota*+ vaxa af ætt Davíðs og hann mun framfylgja réttvísi og réttlæti í landinu.+ 16 Á þeim dögum verður Júda bjargað+ og Jerúsalem mun búa við öryggi.+ Hún verður kölluð: Jehóva er réttlæti okkar.‘“+

17 „Jehóva segir: ‚Einn af afkomendum Davíðs mun alltaf sitja í hásæti Ísraels+ 18 og aldrei mun vanta Levítaprest frammi fyrir mér til að færa brennifórnir, brenna kornfórnir og bera fram sláturfórnir.‘“

19 Orð Jehóva kom aftur til Jeremía: 20 „Jehóva segir: ‚Ef þið gætuð rofið sáttmála minn við daginn og sáttmála minn við nóttina svo að dagur og nótt kæmu ekki á réttum tíma,+ 21 aðeins þá væri hægt að rjúfa sáttmála minn við Davíð þjón minn+ svo að enginn af sonum hans ríkti sem konungur í hásæti hans.+ Hið sama má segja um sáttmála minn við Levítaprestana, þjóna mína.+ 22 Svo sannarlega sem her himinsins verður ekki talinn og sandur sjávarins verður ekki mældur mun ég fjölga afkomendum Davíðs þjóns míns og Levítunum sem þjóna mér.‘“

23 Orð Jehóva kom aftur til Jeremía: 24 „Hefurðu ekki tekið eftir hvað þetta fólk segir: ‚Jehóva mun hafna báðum ættunum sem hann valdi‘? Menn vanvirða fólk mitt og líta ekki lengur á það sem þjóð.

25 Jehóva segir: ‚Svo sannarlega sem ég gerði sáttmála við daginn og nóttina+ og setti himninum og jörðinni lög+ 26 mun ég aldrei hafna afkomendum Jakobs né Davíðs þjóns míns. Ég vel höfðingja af afkomendum hans og þeir skulu ríkja yfir afkomendum Abrahams, Ísaks og Jakobs. Ég flyt útlagana aftur heim+ og sýni þeim meðaumkun.‘“+