‚Allur Ísrael mun frelsaður verða‘

„Þannig mun allur Ísrael frelsaður verða, eins og ritað er: Frá Síon mun frelsarinn koma og útrýma guðleysi frá Jakob.“ — Rómverjabréfið 11:26.

1. (a) Hvaða spurningum er varpað fram í sambandi við Rómverjabréfið 11:26? (b) Hvers vegna er lýðveldið Ísrael ekki sá Ísrael sem átti að ‚frelsast‘?

HVAÐA þjóð er átt við hér? Hvernig frelsast hún? Hvaða áhrif mun björgun hennar hafa á allar aðrar þjóðir? Nú, þegar umboð Breta til að stjórna Palestínu rann út árið 1948 tóku Gyðingar hluta af því svæði og stofnuðu lýðveldið Ísrael. Með sigri yfir her Araba í sex daga stríðinu árið 1967 færðu Ísraelsmenn út landamæri lýðveldisins. En allt frá því að lýðveldið Ísrael var stofnað hefur það þurft að verja tilveru sína með hervaldi. Hvort sem Ísraelsríki nútímans ræður yfir kjarnorkuvopnum til verndar fullveldi sínu eða ekki er ljóst að það reiðir sig ekki á ‚frelsarann frá Síon.‘ Þetta tiltölulega unga ríki er meira að segja, ásamt heiðingjaþjóðum, hluti af Sameinuðu þjóðunum! Þetta lýðveldi er bersýnilega ekki guðveldi eins og Ísraelsþjóðin varð á dögum Móse árið 1513 f.o.t.

2. Hvað var ólíkt með stofnun lýðveldisins Ísraels og heimför Gyðinga árið 537 f.o.t.?

² Austurríski Gyðingurinn Theodor Herzl, stofnandi heimssamtaka Síonista árið 1897, lýsti yfir að Gyðingar væru þjóð og krafðist að tekið yrði til land þar sem stofnsetja mætti ríki Gyðinga. En ekkert af því sem tengt er lýðveldinu Ísrael og tilurð þess stendur í nokkru sambandi við heimför Gyðinga árið 537 f.o.t., á fyrsta ríkisári Kýrusar mikla Persakeisara. Með þeirri endurreisn rættist yfirlýstur tilgangur Guðs Ísraelsþjóðarinnar, Jehóva, eins og hann keumur fram í Jesaja 45:1-5. (2. Kroníkubók 36:22, 23; Esra 1:1-4) Samfara tilurð lýðveldisins Ísrael var hins vegar engin friðarstefna tekin í fullri trú á Guð hins forna Ísraelsríkis. Stofnsetning lýðveldisins Ísraels verður því hvorki túlkuð sem uppfylling spádóma hebresku ritninganna né sem vitnisburður um að Messías Gyðinganna sé að koma.

3. Hverngi skyldi Alþjóðasamband biblíunemenda einu sinni frelsun ‚alls Ísraels‘ en hvaða skilning fengu þeir árið 1932?

³ Allt fram til ársins 1929 héldu meðlimir Aljóðasambands biblíunemenda að Gyðingar að holdinu væru enn útvalin þjóð Guðs, að þeim yrði safnað vantrúuðum aftur til Palestínu, að þeim yrði snúið til trúar á Jesú Krist, hið fyrirheitna sæði Abrahams, og að þeir myndi síðan verða forystuþjóð jarðarinnar til blessunar öllu mannkyni. Árið 1932 var hins vegar sýnt fram á að þetta væri misskilningur á spám Biblíunnar, þar á meðal orðunum í Rómverjabréfinu 11:26 um frelsun ‚alls Ísraels.‘ — Sjá námskafla 8 í bókinni Thy Kingdom Come sem Biblíu- og smáritafélagið Varðturninn hafði útgáfurétt á frá 1891.

Hverjir mynda ‚allan Ísrael‘?

4. Hvaða kringumstæður gefa til kynna að lýðveldið Ísrael sé ekki „Ísrael Guðs“?

⁴ Það sem Gyðingurinn, er skrifaði Rómverjabréfið 11:26 kallar þar ‚allan Ísrael,‘ kallar hann „Ísrael Guðs“ í Galatabréfinu 6:16. En ef Gyðingar að holdinu í lýðveldinu Ísrael og út um allan heim mynda ekki ‚allan Ísrael,‘ hverjir gera það þá? Þetta er þýðingarmikil spurning því að Gyðingar að holdinu nú á tímum vita ekki hverri af hinum tólf ættkvíslum Ísraels þeir tilheyra. Þeir eiga sér rabbína en enga prestastétt, engan æðsta prest á jörðinni, ekkert musteri í Jerúsalem og ekkert altari þar til að færa á fórnir samkvæmt lögmálinu sem Guð gaf fyrir milligöngu Móse. Allt hefur þetta vantað síðan Rómverjar jöfnuðu Jerúsalem við jörðu árið 70. Ekkert bendir heldur til að sá Guð, sem þeir neita að nefna með nafni, sé framar með þeim sem þjóð. Samt sem áður á Jehóva Guð sér Ísraelsþjóð á jörðinni, meira að segja núna á 20. öldinni. Hverjir mynda þá þjóð?

5, 6. Hvernig sýndi Páll fram á að það væri ekki háð holdlegu ætterni að vera „Ísraels Guðs“?

⁵ Sál frá Tarsus, sem var Gyðingur að holdinu og fékk þau sérréttindi að verða hinn kristni postuli Páll, gefur okkur svar við því. Um árið 56 sendir hann langt bréf „öllum Guðs elskuðu í Róm, sem heilagir eru samkvæmt köllun.“ (Rómverjabréfið 1:1, 7) Í því bréfi greinir Páll frá því hverja Guð leit á sem sanna Ísraelsmanna — ekki Ísraelsmenn að holdinu heldur að andanum. Páll skrifaði:

⁶ „Ekki eru allir þeir Ísraelsmenn, sem af Ísrael eru komnir. Ekki eru heldur allir börn Abrahams, þótt þeir séu niðjar hans, heldur: ‚Afkomendur Ísaks munu taldir verða niðjar þínir.‘ Það merkir: Ekki eru líkamlegir afkomendur hans Guðs börn, heldur teljast fyrirheitsbörnin sannir niðjar. . . .  En Jesaja hrópar yfir Ísrael: ‚Þótt tala Ísraels sona væri eins og sandur sjávarins, þá skulu leifar einar frelsaðar verða. [Jehóva] mun gjöra upp reikning sinn á jörðunni, binda enda á hann og ljúka við hann í skyndi,‘ og eins hefur Jesaja sagt: ‚Ef [Jehóva] hersveitanna hefði ekki látið oss eftir niðja, værum vér orðnir eins og Sódóma, vér værum líkir Gómorru.‘“ — Rómverjabréfið 9:6-9, 27-29.

7, 8. Hvers vegna gátu Ísraelsmenn að holdinu ekki fyllt tölu greinanna á olíutrénu táknræna í Rómverjabréfinu 11. kafla?

⁷ Síðar, í Rómverjabréfinu 11. kafla, líkir Páll Ísraelsþjóðinni við olíutré sem er bundið ‚vini Jehóva,‘ ættföðurnum Abraham. (Jakobsbréfið 2:23) Eftir að sá „vinur“ hafði sýnt hversu hlýðinn hann var sagði Guð honum: „Of af þínu afkvæmi skulu allar þjóðir á jörðinni blessun hljóta, vegna þess að þú hlýddir minni röddu.“ (1. Mósebók 22:18) Sökum þess að meirihluti Gyðinga að holdinu sýndi hvorki sömu trú og forfaðir þeirra Abraham né hlýddi Guði voru þessir vantrúuðu Ísraelsmenn höggnir af hinu táknræna olíutré sem átti sér rót í hinum meiri Abraham, Jehóva Guði. Í stað þeirra komu trúaðir heiðingjar, menn af öðrum þjóðum, til að hið táknræna tré gæti haldið fullri greinatölu. Þeir sem tóku sæti Gyðinga að holdinu urðu „niðjar Abrahams“ sem trúskiptingar eða Ísraelsmenn, með því að Guð, hann sem var meiri en Abraham, tók sér þá að sonum. (Galatabréfið 3:26-29) Þeir urðu Ísraelsmenn í andlegum skilningi, það er að segja andlegir Ísraelsmenn. Þess vegna hélt Páll áfram:

⁸ „Ég vil ekki, bræður mínir, að yður sé ókunnugt um þennan leyndardóm, til þess að þér skuluð ekki með sjálfum yður ætla yður hyggna. Forherðing er komin yfir nokkurn hluta af Ísrael og varir þangað til heiðingjarnir eru allir komnir inn. Og þannig mun allur Ísrael frelsaður verða, eins og ritað er: Frá Síon mun frelsarinn koma og útrýma guðleysi frá Jakob. Og þetta er sáttmáli minn við þá, þegar ég tek burt syndir þeirra. — Rómverjabréfið 11:25-27.

9. Hver er afstaða lýðveldisins Ísraels til meðalgangara nýja sáttmálans, þótt ‚tímum heiðingjanna‘ hafi lokið árið 1914?

⁹ Við tökum eftir að Páll segir ekki: ‚Þangað til heiðingjatímarnir eru liðnir,‘ heldur „þangað til heiðingjarnir eru allir komnir inn“ eða „þangað til full tala fólks af þjóðunum er komin inn.“ (NW) Heiðingjatímunum eða ‚tilteknum tímum þjóðanna‘ lauk árið 1914, árið sem fyrri heimsstyrjöldin braust út. (Lúkas 21:24, NW) Núna, sjö áratugum síðar, álítur hvorki lýðveldið Ísrael né Gyðingar að holdinu um allar jarðir sig eiga aðild að nýja sáttmálanum sem Jehóva sagðist myndu gera við hús Ísraels. (Jeremía 31:31-34) Fyrir meira en nítján öldum, hinn 14. nísan árið 33 á páskakvöldi Gyðinganna, rétti hinn væntanlegi meðalgangari þessa nýja sáttmála trúföstum postulum sínum vínbikar og mælti: „Þessi bikar er hinn nýi sáttmáli í mínu blóði, sem fyrir yður er úthelt.“ (Lúkas 22:20, Ísl. bi. 1912) En eftir allan þennan tíma viðurkennir lýðveldið Ísrael ekki Jesú Krist sem meðalgangara sáttmálans sem sagt var fyrir um í spádómi Jeremía.

10. Hversu mikið af ‚sæði‘ Abrahams til blessunar öllu mannkyni mynduðu trúaðir, holdlegir Gyðingar, og hverjar voru afleiðingarnar?

¹⁰ Að því er Ísraelar segja er „frelsarinn“ enn ekki kominn frá Síon. (Jesaja 59:20; Rómverjabréfið 11:26) Á hvítasunnunni árið 33 tóku samt sem áður leifar Forn-Ísraels við Jesú sem Messíasi. Þessar leifar byrjuðu þá að fá hinn fyrirheitna heilaga anda og fengu aðild að nýja sáttmálanum. Leifar nægðu þó ekki til að fullna tölu hinnar andlegu ‚brúðar‘ Krists sem telur 144.000 meðlimi. (Opinberunarbókin 7:1-8; 14:1-3; 21:9) Ekki urðu því nógu margir Gyðingar að holdinu hluti hins táknræna ólíutrés — þessa er átti sér rót í hinum meiri Abraham sem hét því að ‚sæði‘ hins forna ættföður myndi verða öllum ættum jarðarinnar til blessunar, bæði Gyðingum sem öðrum.

11, 12. Hvað er átt við með hugtakinu „allur Ísrael“ og hvernig má sanna það út af Ritningunni?

¹¹ Hvernig átti þá „allur Ísrael“ að „frelsast“ fyrir tilverknað hins fyrirheitna ‚frelsara‘? Veitum því athygli að Páll skrifaði Rómverjum bréf sitt um árið 56, eftir að hann hafði skrifað Galötum (í kringum árið 50-52). Orðin í Rómverjabréfinu 11:25-27 voru því skrifuð á eftir orðum hans í Galatabréfinu 6:16 um „Ísrael Guðs.“ Það var sá Ísrael sem nýi sáttmálinn var gerður við af Jesú Kristi, ekki spámanninum Móse. Jesús var meðalgangari kristinna Ísraelþjóðar, andlegs Ísraels, sem fæddist sem þjóð á hvítasunnudeginum árið 33 þegar heilögum anda var úthellt yfir Gyðingana sem tóku við Jesú Kristi sem meðalgangara nýja sáttmálans.

¹² Gyðingurinn og postulinn Pétur var viðstaddur það tækifæri. Síðar skrifaði hann ‚hinum útvöldu samkvæmt fyrirvitund Guðs‘ og sagði: „Þér eruð ‚útvalin kynslóð, konunglegt prestafélag, heilög þjóð, eignarlýður‘ . . . Þér sem áður voruð ekki lýður eruð nú orðnir ‚Guðs lýður‘.“ (1. Pétursbréf 1:1, 2; 2:9, 10) Þetta staðfestur að sá Ísrael, sem á „allur“ að ‚frelsast,‘ sé ekki hið núverandi lýðveldi Ísraela eða hinir tvístruðu Ísraelsmenn að holdinu út um allan heim. „Allur Ísrael,“ sem átti að ‚frelsast,‘ var hinn andlegi Ísrael sem fæddist á hvítasunnunni árið 33 með því að vera þá getinn af heilögum anda Guðs. Það var þessi „Ísrael Guðs“ sem hinn fyrirheitni ‚frelsari‘ átti að koma til.

13. (a) Hvenær og hvernig kom hinn fyrirheitni frelsari frá Síon? (b) Hverjir urðu með tíð og tíma hluti af „Ísraels Guðs“?

¹³ Jehóva, frelsarinn mikli, kom á hvítasunnudeginum árið 33. Hvernig? Með því að nota Jesú til að úthella heilögum anda yfir um það bil 120 lærisveina sem voru saman komnir í loftstofu í höfuðborg þjóðarinnar, Jerúsalem. Þessir lærisveinar urðu þannig fyrsti hluti ‚Ísraels Guðs‘ getinn til andlegs lífs og með von um eilíft líf á andlegu tilverusviði hið efra. Með tíð og tíma urðu hluti af þessum andlega Ísrael menn af öðrum þjóðum sem trúðu á hinn fyrirheitna frelsara. Hvenær gerðist það? Þegar Samverjum var snúið til trúar — og síðar heiðingjum frá og með trúhvarfi rómverska hundraðshöfðingjans Kornelíusar og fjölskyldu hans og vina árið 36 — græddi Jehóva, hinn meiri Abraham, alla þessa trúuðu menn af öðrum þjóðum sem „greinar“ á stofn þessa táknræna olíutrés sem var eingetinn sonur hans, Jesús Kristur. Þannig gátu þessir menn af þjóðunum komið í stað trúlausra Gyðinga sem voru brotnir af olíutrénu með „greinarnar“ 144.000. — Postulasagan 10. kafli; 15:14-21.

Ágræðslunni nú lokið

14. Hvað er nú vel ljóst í sambandi við ‚allan Ísrael‘?

¹⁴ Liðin eru 1949 ár frá þessum tímamótaatburði árið 36. Rökrétt er því að ætla að nú hafi alvaldur Guð lokið við að frelsa ‚allan Ísrael.‘ Þetta er mun lengra tímabil en það er Gyðingar einir nutu hylli Guðs, frá dögum Móse árið 1513 f.o.t. til ársins 36 þegar fyrsti óumskorni heiðinginn tók trú. Vafalaust hefur þessi langi tími nægt til að frelsa ‚allan Ísrael‘ í þeim skilningi að safna nægilega mörgum meðlimum. Öll rök hniga að því að svo sé.

15. Hvernig sagði Jesús, í spádómi sínum um ‚tákn endloka heimskerfisins,‘ að hinum „útvöldu“ yrði safnað?

¹⁵ Jesús Kristur vék að þessu tímabili þegar hann bar fram spádóminn um ósýnilega ‚nærveru‘ sína í andanum og um ‚endalok heimskerfisins.‘ Hann sagði: „Þá mun tákn Mannssonarins birtast á himni, og allar kynkvíslir jarðarinnar hefja kveinstafi. Og menn munu sjá Mannssoninn koma á skýjum himinsins með mætti og mikilli dýrð. Hann mun senda út engla sína með hvellum lúðri, og þeir munu safna hans útvöldu úr áttunum fjórum, himinskauta milli.“ (Matteus 24:3, 30, 31) Hvenær hófst þessi ‚nærvera‘ Jesú Krists?

16, 17. Hvenær hófst ‚nærvera‘ Jesú Krists og hvaða merkisatburður gerðist síðan í sambandi við hina ‚útvöldu‘?

¹⁶ ‚Nærvera‘ Jesú hófst þegar lauk hinum ‚sjö tíðum‘ heiðingjanna haustið 1914. (Daníel 4:23-36) Þá beindi hinn dýrlega gerði Jesús Kristur athygli sinni að stríðshrjáðri jörðinni til að beita þar valdi sínu til yfirráða. Staðreyndir mannkynssögunnar sanna að árið 1919 sendi hinn ríkjandi konungur Jesús Kristur út sína himnesku engla til að safna „hans útvöldu“ frá öllum heimshlutum. Undir yfirumsjón Biblíu- og smáritafélagsins Varðturninn var þeim safnað í einingu, sem náði um allan hnöttinn, til að kraftar þeirra mættu þaðan í frá vera sameinaðir í að framfylgja spádómlegu boði Jesú í Matteusi 24:14: „Þetta fagnaðarerindi um ríkið verður prédikað um alla heimsbyggðina öllum þjóðum til vitnisburðar. Og þá mun endirinn koma.“

¹⁷ Á almennu móti þjóna Guðs árið 1931 voru þeir einhuga um að taka sér nýtt nafn, að vera þekktir sem vottar Jehóva. Síðar var gefin út bók af Félaginu sem hét Jehóva en hún fjallaði um nafn Guðs sem þeir fögnuðu svo mjög að bera. Vottar Jehóva tóku þakklátir við þessari nýju bók árið 1934, um það leyti sem „foringinn“ í nasistaflokknum, Adolf Hitler, einsetti sér að útrýma vottum Jehóva í Mið-Evrópu.

18. Hvaða atburðir gáfu til kynna að tala hinna „útvöldu“ væri fullnuð?

¹⁸ Það sem síðan gerðist gaf til kynna að lokið væri að safna hinum vígðu, skírðu „útvöldu“ sem ættu að hljóta ríkið á himnum. Hvernig þá? Á þann hátt að árið 1935 var athygli og kröftum hinna „útvöldu“ beint að ‚miklum múgi‘ sem lýst var í Opinberunarbókinni 7:9-17. Af hverjum skyldi þessi ‚mikli múgur‘ myndaður? Af mönnum sem myndu eigna Jehóva Guði og Jesú Kristi heiður og dýrð og fengju að launum eilíft líf í paradís á jörð sem þeir myndu ganga inn í án þess að deyja — þrátt fyrir mestu ‚þrengingu‘ allrar mannkynssögunnar. Bent var á að þessir menn væru hinir jarðnesku ‚aðrir sauðir‘ góða hirðisins, Jesú Krists. Með fögnuði voru þeir gerðir að ‚einni hjörð‘ með leifum ‚alls Ísraels‘ sem enn voru lifandi á jörðinni. — Jóhannes 10:16.

Hverju svara þú?

◻ Hvers vegna er lýðveldið Ísrael ekki sá Ísrael sem Rómverjabréfið 11:26 talar um?

◻ Hvers vegna gátu Ísraelsmenn að holdinu ekki fyllt tölu greinanna á olíutrénu táknræna?

◻ Hver er hinn fyrirheitni frelsari og hvenær og hvernig kom hann frá Síon?

◻ Hverjir mynda ‚allan Ísrael‘ og hvenær var lokið söfnun þeirra?

[Mynd á blaðsíðu 24]

Hvað merkti ‚bikarinn‘ þegar Jesús stofnsetti kvöldmáltíð Drottins?

[Mynd á blaðsíðu 26]

Hluti áheyrenda á mótinu í Washington D.C. árið 1935.