Björt framtíð jarðar undir Guðsríki

BIBLÍAN segir að trúin sé „fullvissa um það, sem menn vona.“ (Hebreabréfið 11:1) Eins og við sáum í greininni á undan lét Guð, meira en 500 árum fyrir fæðingu Krists, skrifa spádómlega lýsingu í Daníelsbók á uppgangi og falli heimsveldanna allt frá dögum Daníels fram til okkar tíma. Nákvæmni þessara spádóma veitir okkur fullvissu eða tryggingu fyrir þeirri trú að það sem enn er ekki komið fram af spádómum Daníels muni einnig rætast og að mjög bráðlega muni ríki Guðs í höndum Krists Jesú leysa stjórnir mannanna af hólmi.

Það mun hafa í för með sér gríðarlega breytingu fyrir mannkynið! Guð horfir fram til þess tíma þegar hann segir: „Sjá, ég gjöri alla hluti nýja.“ (Opinberunarbókin 21:5) Ef við athugum suma hinna innblásnu spádóma, sem draga upp mynd af þessari hamingjuríku framtíð, munum við geta séð hversu ‚nýtt‘ allt verður, hversu gerólíkt því sem við sjáum núna undir stjórn manna. Það sem Biblían segir um framtíð jarðarinnar og lífið á henni er hreinlega undursamlegt. Taktu eftir:

Glæpir og ofbeldi munu hverfa. „Illvirkjarnir verða afmáðir, . . . engir guðlausir til framar.“ Þeir sem þá lifa munu hver fyrir sig „búa undir sínu víntré og undir sínu fíkjutré og enginn hræða þá. Því að munnur [Jehóva] allsherjar hefir talað það.“ — Sálmur 37:9, 10; Míka 4:4.

Kynþátta- og þjóðernissundrung, og þær styrjaldir sem af henni hljótast, munu hverfa. „Engin þjóð skal sverð reiða að annarri þjóð, og ekki skulu þær temja sér hernað framar.“ — Jesaja 2:4.

Húsnæðisskortur, heimilisleysi og atvinnuleysi mun heyra fortíðinni til. Jesaja sagði fyrir: „Þeir munu reisa hús og búa í þeim, og þeir munu planta víngarða og eta ávöxtu þeirra. . . . mínir útvöldu skulu sjálfir njóta handaverka sinna.“ — Jesaja 65:21, 22.

Hræðilegar hungursneyðir, svo sem þær er riðið hafa yfir stóra hluta Afríku, verða óþekktar, því meira en nóg fæða verður handa öllum. „Gnóttir korns munu vera í landinu, á fjallatindunum.“ „Jörðin hefir gefið ávöxt sinn, Guð, vor Guð, blessar oss.“ — Sálmur 72:16; 67:7, 8.

Allir verða heilbrigðir og hraustir þannig að þeir geti notið þessara blessana til fulls. Jafnvel meðan jarðnesk þjónusta Jesú stóð yfir var með sanni sagt að ‚blindir fengju sýn, haltir gengju, líkþráir hreinsuðust og daufir heyrðu.‘ En þá mun rætast enn stórkostlegra fyrirheit: „Hann [Guð] mun þerra hvert tár af augum þeirra. Og dauðinn mun ekki framar til vera, hvorki harmur né vein né kvöl er framar til. Hið fyrra er farið.“ — Lúkas 7:22; Opinberunarbókin 21:4.

Þetta er stórkostleg breyting! Hvílíkur léttir verður þetta ekki öllu hinu þjakaða mannkyni. Við hvetjum þig til að beygja þig núna undir ríki Guðs þannig að þú megir líka uppskera þá blessun sem þessi tímamótabreyting á stjórninni yfir heiminum mun hafa í för með sér.

[Mynd á blaðsíðu 7]

Núlifandi menn geta hlakkað til stórfenglegrar blessunar. Styrjaldir, glæpir, fátækt, sjúkdómar og meira að segja dauðinn munu taka enda. Gætir þú hugsað þér að eiga slíka framtíð fyrir höndum?