Hættur á hverju strái

„Allt sem maður gerir dags daglega er áhættusamt — það er jafnvel hættulegt að sofa.“ — Tímaritið Discover.

LÍFINU er stundum líkt við það að ganga um jarðsprengjusvæði því að maður getur slasast eða dáið hvenær sem er, oft fyrirvaralaust. Áhættuþættirnir eru breytilegir frá einu landi til annars. Má þar nefna umferðarslys, borgarastríð, hungursneyð, alnæmi, krabbamein, hjartasjúkdóma og ótalmargt annað. Alnæmi er algengasta dánarorsökin í Afríku sunnan Sahara. Árið 1999 létust þar „2,2 milljónir manna af völdum alnæmis en það er tíföld tala þeirra sem féllu í öllum borgarastríðum í Afríku samanlögðum,“ að sögn tímaritsins U.S.News & World Report.

Heimurinn ver gífurlegum fjármunum í að lengja mannsævina og draga úr hættunni á sjúkdómum og örorku. Margt hefur jákvæð áhrif svo langt sem það nær, þar á meðal heilbrigt mataræði, hóf í meðferð áfengis og hæfileg hreyfing. En það er til leiðarvísir með áreiðanlegum leiðbeiningum um allt sem máli skiptir í lífinu, og það er hægt að gera lífið öruggara með því að fylgja honum. Þessi leiðarvísir er Biblían. Hún inniheldur leiðbeiningar um alls konar mál sem snerta heilsu manna og velferð. Auðvitað fjallar hún ekki um hvert einasta vandamál í smáatriðum. Hins vegar setur hún fram prýðisgóðar meginreglur um mataræði, líkamsrækt, hugarfar, kynlíf, notkun áfengis, tóbaks og fíkniefna og um fjölmargt annað.

Óvissa í fjármálum er líka daglegt brauð hjá mörgum. Þar kemur Biblían líka til hjálpar því að hún hvetur bæði til heilbrigðrar afstöðu gagnvart peningum og meðferð þeirra og gerir fólk að betri starfsmönnum eða vinnuveitendum. Biblían er einfaldlega öruggur leiðarvísir, ekki aðeins um fjármál og líkamlega vellíðan heldur einnig um lífið sjálft. Langar þig til að kynna þér hve gagnleg Biblían getur verið í daglegu lífi? Lestu þá áfram.