Spurningakassinn

◼ Hvernig ætti að meðhöndla það mál þegar húsráðandi krefst þess að vottar Jehóva komi ekki oftar í heimsókn til hans?

Ef við sjáum skilti á hurðinni sem bannar stranglega heimsóknir trúboða eða nefnir sérstaklega votta Jehóva væri best að virða óskir húsráðanda og láta vera með að knýja dyra.

Stundum rekumst við á skilti sem bannar sölumennsku eða fjársöfnun. Það á ekki við okkur þar sem starf okkar er trúarlegt góðgerðarstarf. Það væri við hæfi að láta sem ekkert væri og knýja dyra. Ef húsráðandinn mótmælir getum við með nærgætni útskýrt hvers vegna okkur finnist slíkt skilti ekki ná til okkar starfs. Ef húsráðandinn tekur þá skýrt fram að bannið nái yfir votta Jehóva virðum við óskir hans.

Í fáeinum tilfellum kann húsráðandi að verða sýnilega æstur þegar við komum heim til hans og krefjast þess eindregið að við komum ekki aftur. Við skyldum fara eftir þeim óskum. Festa skyldi dagsetta athugasemd við svæðiskortið til þess að boðberar, sem starfa seinna á svæðinu forðist að knýja dyra á því heimili.

Við skyldum hins vegar hafa hugfast að ekki ætti að forðast slík heimili endalaust. Núverandi íbúar flytjast ef til vill annað. Við kynnum að hitta annan fjölskyldumeðlim sem bregst jákvætt við heimsókn okkar. Hugsanlegt er að húsráðandinn, sem við ræddum við, taki sinnaskiptum og verði ekki eins mikið á móti því að við komum í heimsókn. Að liðnum nokkrum tíma ætti þess vegna að grennslast með nærgætni eftir því hjá íbúunum hvert viðhort þeirra sé núna til heimsókna okkar.

Fara ætti yfir spjaldskrá svæðiskortanna einu sinni á ári og útbúa lista yfir heimili þar sem okkur hefur verið ráðlagt að koma ekki aftur. Undir leiðsögn starfshirðisins má fela nokkrum nærgætnum og reyndum boðberum að heimsækja þessi heimili. Koma mætti með þá útskýringu að við knýjum dyra til að grennslast eftir því hvort sami húsráðandinn búi þar enn þá. Boðberinn ætti að þekkja vel efnið í Rökræðubókinni, blaðsíðu 15-24, undir titlinum „Hvernig bregðast mætti við því sem stöðvað gæti samræðurnar.“ Ef viðbrögðin eru sæmileg mætti fara aftur í heimsókn síðar eins og venjulega er gert. Ef húsráðandinn heldur áfram að vera fjandsamlegur ætti ekki að fara aftur í heimsókn þangað fyrr en næsta ár. Öldungaráðið á staðnum getur ákveðið hvort ráðlegt sé í einstöku tilfelli að meðhöndla málið á annan hátt.