Sérðu þörf?
1 Jehóva er lýst sem hjálp og hæli. Við vitum að í nauðum getum við farið til hans og hann mun hjálpa okkur. (Sálm. 18:3; 46:2) Við getum líkt eftir þessari hluttekningarsemi með því að bjóðast til að aðstoða aðra þegar við sjáum þess þörf.
2 Hvað fær mann til að leggja lykkju á leið sína til að hjálpa öðrum? Flestir viðurkenna að slík breytni sýni kærleika og mannúð. Orð Guðs hvetur sannarlega til þess. (Rómv. 15:1) Páll hvatti okkur til að ‚líta ekki aðeins á eigin hag, heldur einnig annarra.‘ — Fil. 2:4.
3 Við getum öll haft ánægju af þessu. (Post. 20:35) Páll valdi hinn unga Tímóteus sem dæmi um mann sem ‚léti sér einlæglega annt um hagi‘ bræðra sinna. (Fil. 2:20) Það er gott að við skulum nú á dögum hafa margt ungt fólk í söfnuðunum með sams konar lunderni. En hvort sem við erum ung eða gömul er ýmislegt sem við getum gert ef við sjáum að þörf sé fyrir hendi.
4 Hefur þér nokkurn tíma fundist að þörfum sumra mætti sinna betur? Ef til vill var bróðir eða systir á spítala og fáir komu í heimsókn, eða einhver var bundinn við rúmið en enginn kom til hans til að fara í snúninga fyrir hann eða aðstoða við heimilisverkin. Jesús lítur á þá sem þjóna Jehóva sem fjölskyldumeðlimi sem bera einlæga umhyggju hver fyrir öðrum. (Mark. 3:33-35) Í dæmisögunni um sauðina og hafrana sýndi hann að þeir sem njóta velþóknunar við hægri hönd konungsins gera það vegna hjálpsemi sinnar við bræður konungsins. — Matt. 25:40.
5 Hvernig get ég hjálpað? Hvað er hægt að gera til að veita hjálp þegar augljós þörf er á? Gætum við tekið frumkvæðið að því að hjálpa á einhvern hátt? Ef til vill er innan safnaðarins aldrað fólk sem þarfnast uppörvunar en á engan nákominn til að hjálpa sér. Þá kann sumt ungt fólk að þarfnast hjálparhandar. Barnmörg fjölskylda, sem nýlega hefur fengið áhuga, birtist ef til vill í ríkissalnum þegar boðberinn, sem nemur með henni, er ekki viðstaddur. Þau kunna kannski vel að meta að einhver bjóðist til að hjálpa þeim með börnin.
6 Þegar kærleiki okkar til sannleikans og skipulags Jehóva vex lærum við einnig betur að meta aðra í söfnuðinum og sýna þeim umhyggju. Páll hvatti okkur til að láta verða rúmgott hjá okkur hvað þetta varðar. (2. Kor. 6:11-13) Jesús lagði áherslu á að það sé fyrst og fremst með því að bera kærleika hvert til annars sem við sýnum að við séum sannir fylgjendur hans. — Jóh. 13:35.
7 Þegar við þess vegna sjáum þörf ætti ósvikinn kærleikur til bræðra okkar og safnaðarins að knýja okkur til að taka frumkvæðið og hjálpa á hvern þann hátt sem við getum. (Gal. 6:9, 10) Þessi umhyggja fyrir öðrum dregur okkur saman og bindur okkur nánum kærleiks- og einingarböndum. (1. Kor. 10:24) Á þennan hátt leggjum við okkar af mörkum til að uppfylla þörf innan safnaðarins.